توضيح مهم جداااااااا
هذه التدوينة لم تكن سوى فضفضة عما حدث ، و هى لا تعنى بأى شكل من
الأشكال الإنتقاص من شأن أى شخص على الإطلاق ، الفكرة ببساطة
إنى كنت معولة على حركة كفاية ، الحركة اللي قدرت تسيطر على اسفلت الشارع،اللي بالتأكيد مختلفة تماما عن باقي التيارات، بمعنى أنا هنا بعاتب موش بهاجم. أنا قلت أعمل التوضيح دا علشان ببساطة موش عايزة أتفهم غلط خصوصا من الناس اللى أنا فعلا بأحترمهم و بقدر مجهودهم زى علاء سيف.
تحديث 2
أدهم خرج وكل المعتقلين
وفي اتصال تليفوني معاه
قال انهم كويسين وبيطمنوا الجهامير
كدة بكل بساطة بلطجية وزارة المقاشات
سابوهم ف الصحرا بعد ما باتوا الليلة
ادهم وجيمي بيجمعوا كل اللي كانوا معتقلين
لان الامن رمي كل واحد في حتة في الصحرا
ودلوقتى بيدوروا علي احمد الدروبيي
مريض السكر) اللي مش عارفين هو فين تحديدا
في الصحرا الواسعة
بعد كدة ادهم
وباقي الللي كانوا معاهم هيطلعوا علي لنقابه الصحفيين
1تحديث
فلكي «الأخبار» في خدمة الاستفتاء..
قال في «برج» الرئيس مبارك: «التجمع الشعبي أنت مصباحه»..
وقال لابنه جمال: «كثيراً ما تبدع بأفكارك الجديدة للوطن»
بالشفا
اسمحوا لي اقولها لاول مرة هنا
أحا
انا بقالي ساعات كتيرررة بحاول اكتب البوت دا، بس مش عارفة، الماسنجر قدامي فاضي
علي غير العادي،الاول كان جيمي داخل خارج ، بمراجيحه ومقالبه، وغلاسته اللذيذة احيانا، وخناقاته معايا اللى ملهاش داعي، وكمان مفيش ادهم وكلامنا عن السنيما و الافلام ، واخر الاغاني القديمة اللي عتر فيها، وعن اسماعيل ياسين واغانييه، و لاعزة بكل رقتوضحكتها الهادية، اللي بتخليني اصدق ان الدنيا فعلا بخير.
قبل المظاهرة كنت محضرة نفسي اني اكتب بوست مسخرة، لكن فعلا مش
قادرة، لان مكنش في مسخرة ولا مهزلة اكتر من اعتصام 25 مارس في ميدان التحرير، لكن انا
بس هذكر تفاصيل عشتها .
نازلة جري من الشغل، لسه بقول يا هادي الاقي ادهم وعزة، و مكالمة
تليفون بينا طويلة، عن الجو العام ف الارض المحتلة من ميدان التحرير، وتوصية من ادهم
لو اتمسك، اتصل بعزة(يا دي النيلة، تاني وصية خلال اسبوع، الاول من جيمي، اللي محددش اتصل بمين،وادي ادهم كمان)، يا ادهم بلاش نسبق الحدث، (رغم انه المتوقع)، طول
الطريق الموبيل مبطلش رن، يا حد بيسألنى انتى فين؟ او هنتقابل فين؟
علي قهوة صغيرة، كانت المكان السري بتاعي انا وتنظيم 12ربيع الاول، ادهم طلب
لي شاي، هشام مشغول بالموبيل، حسام معاه ضيوف، جيمي منطلق زي عادته وقالبها مراجيح. بدأنا نتحرك، المفترض ان اتجاه المجموعة اللي عددها مكنش قليل تتجه لقلب
الميدان وتحتله، ما عدا انا مش هكون مع المجموعة مش ترفع لكن رحم الله امرئ عرف قدر نفسه. المتوقع
كان ضرب وطحن اول ما نقرب من الميدان، وانا حركتي غير سريعة، انا بالكتير اقدر اتصل
بأحد المحامين، اوأن الخبر يوصل لبعض الناس، ممكن ارفع العكاز بتاعي واضرب حد، لكن
مش طرح أحد الخصوم ارضا زي ما حصل في مظاهرات 2000بمساعدة صديقة، ومفيش جري زي زماااااااااااان.
المهم اول ما اتجهنا للميدان الزملا راحوا ناحية اليمين قدام كنتاكي التحرير، انا قلت يمكن
بيتفاءلوا بالدكان، الوقفة طولت وانا واقفة بعيد بتفرج ع العساكر والظبابيط، بما ان دايما مش بيجي في بالهم
اني تبع المظاهرة-دا الجانب الايجابي للكوارث-بكلم ادهم، نتحرك؟ قال اه قفلت ثانية تليفوني رن، برد، الدنيا اتلخبطط، لقيت جيمي بيجري ناحية الصنية وبعده اسد، طبعا الظبابيط وصبيانهم البلطجية شدوا أسد وجيمي، وأرمي ف عربية الترحيلات رقم5496،اه اخدت رقمها، روحت عند العربية والبيه الظابط قالي بتعملي ايه؟ قلت له باخد رقم العربية،اللي كانت قدام عمر افندي وأنا فضلت قدامها معرفش اد ايه؟ ...
معظم المجموعة اتجهت لميدان طلعت حرب بسبب دفع الامن ، وانا فضلت ف مكاني، وبعد ما كلمت
ادهم اتحركت ف نفس الاتجاه قبل ما اوصل لهناك كان في مجموعة من كفاية بتهتف، كنا خرجنا من
دايرة سقوط شبكة المحمول اللى فى ميدان التحرير،ادهم سمع الهتافات ع التليفون جري
وهتف وسيطر المتظاهرين علي الاسفلت،لمدة عشر دقايق، كانوا افضل عشر دقايق في
اليوم كله، وفشل الامن في السيطرة ع الشارع، لحد ما اتكردن الرصيف قدام اير فرانس، وهجم
البلطجية بتوع وزارة المقشات، بالملابس المدنية طبعا، والضرب اشتغل ف كل الناس. وانا
اتجهت للرصيف المقابل امام كافيه ريش وسط المصورين
اللي حزني اكتر ولو انه مش جديد تعليقات الناس "يستاهلوا" فعلا شعب تلمه زماره وتفرقه عصايا، بعدها
حاول عزيزي ايوب اني ادخل كافيه ريش، لكن الحمد لله احيانا الدماغ الصعيدي اللي زي قالب الطوب بتنفع، زي الجانب الايجابي للكوارث، البعض جري، ودا طبعا مش عيب ف مواجهة جحافل البلطجية، ولا وزارة
المقشات، بدأ شحن المتظاهرين، ف عربية الترحيلات، ومنهم ادهم، تليفونه فضل يرن بس
مش بيرد، كلمت عزة، لقيت ادهم سبقني وبلغها بنفسه، كملت اتصالي بعدد من
الناس (محاميين وحقوقيين)...كل دا وايوب بيناديني وانا ولا انا هنا، مردتش عليه، ولا
علي البيه المكلبظ الظبوط اللي فاكر شكلي من يوم مظاهرة 16مارس
وسبت كافيه ريش ومشيت، عرفت بعدها بدقايق ان الناس اللي ف كافيه ريش اضربوا واتحاصروا من
بلطجية النظام ، بعدها كان كل قهاوي وسط البلد مترشقة مخبرين وامن اخبرني صديقي
وقال يلا نروح، انا بصراحة قلت لا طبعا مش هروح،وملقتش تفسير لمنطق
ان يبقي في مكان بديل لمظاهرة سبق وتم الدعوة لها ان تكون في ميدان التحرير، دعوة قالت وحددت هنكون هناك الساعة 6كلنا واخدين بالكوا من كلمة كلنا دي؟
طبعا الساعة كانت 6 ومفيش كلنا، صحيح كان في مجموعة من كفاية وصلت لكن بلاش
نسأل ع العدد لتبقي فضيحة، مع كل احترامي لشباب الحركة اللي شاركوا في
احتلال الاسفلت من البستان لميدان طلعت حرب، لان بالتأكيد حركة كفاية مش هم بس، فين لا مؤاخذة القيادات ؟ وغيرهم من اعضاء الحركة؟ يا فرحتي قال نقلوا المظاهرة قدام نقابة الصحفيين، ايه خايفيين يضربوا؟ وايه الجديد ف تعامل الامن؟ ولا هم اللي انضربوا ف طلعت حرب ناس هبلة؟ وأغبيا انهم لبوا نداء الحركة للاعتصام؟
مع الاعتراف ان الدعوة مكنتش من كفاية وحدها،لكن معظم المدونيين او المستقليين
والاتجاهات اللي دعت للاعتصام كانت موجودة،لكن كفاية كانت فين؟
هل ممكن دا يخليني بعد كدة اروح للمكان البديل اللي رضيت به كفاية؟
ولا من الاساس مصدقش اى دعوة منها للمشاركة ف مظاهرة او اعتصام، كان عندي
انطباع ان كفاية هتشارك بكل ناسها، كبير وصغير، لكن للأسف الصغير بعضه شارك، وكبيره معرفش فين؟ قال ايه بيريح اعصابه خارج القاهرة يا فرحتي..الحمد لله اني مصرة على ان افضل مستقل ولا
حزب ولا لا مؤاخذة حركة قياداتها قافلة موبيلاتها وبتريح اعصابها من وجع
الدماغ، او راحت تتظاهر في مكان غير المكتوب ف دعوتهم للشارع بالمشاركة، مع
احترامي ان اكيد مش كفاية لوحدها هي المفروض تعمل كل حاجة وتقود الشارع، لكن طالما
ابو العروسة دعا للفرح ومحضرش معناها انه مش موافقة ع الجوازة
السودا، وطالما انه مش موافق دعي ليه من الاول؟
رجعت البيت لمامتي اللي عرفت اخبار وسط البلد من
القنوات الفضائية، واضطريت احلف ان كويسة وراجعة البيت حالا
واول ما دخلت البيت كانت حفلة استقبال كل يوم من ولادي، مريم(4سنين)وسؤالها
المعتادة، جبتي لي حاجة حلوة؟ انتى كنتي فين؟ رد عليها عبد الله(7سنين) كانت في
المظاهرة، مريم قالت يعني ايه مظاهرة؟ قالها يعني تروحي تهتفي ف الشارع بصوت عالي
والعساكر ينزلوا فيكي ضرب. في الخلفية كان في مشهد من فيلم فرحان ملازم
ادم، فيه (ام فتنة) الفنانة لبلبة بتقول لفتحي عبد الوهاب، من مشي جنب الحيط سلم
لاننا غلابة، واللي يعافر مع الحكومة يبقي بينطح زي الجديان في حيطة.معرفش ادهم
كان ممكن يعلق ايه علي مشهد مريم وعبد الله و الحوار الداير ما بين فرحان وام فتنة.
مش معني كدة انى موافقة ع الحوار، اللي اترسخ جوا
بعض من امخاخ الشعب المصري، انا ضده بالثلث، انا مع النطح
كما الجديان ف الحيطان، والحيطان مش ممكن تطرحني ارضا بسهولة
اه نسيت اقولكم اخر اخبار الاستفتاء المزور مقدما
احمد راح يشارك لاقي مفيش اشراف قضائي يعني المادة 88 اللي ف الدستور اللي الاستفتاء
بخصوصه خلاص تم تغييرها من غير
استفتاء ووجع راس
والله مش عارفة لازمته ايه من الاول