خبر عاجل 13 سودانى ف قسم الدقي وفي انتظار امن الدولة

تحديث 2
نقلا عن مدونة
kashfun

تجديد حبس اللاجئين السودانيين15يوما بعد ربع ساعة من بدء محاكمتهم!

في الثامنة تقريبا صباح الخميس 5 ابريل الماضي تم نقل اللاجئين السودانيين للعرض على النيابة - بعد يومين فقط من الأربعة أيام الأولى التي حكم بها عليهم على ذمة التحقيق، استغرقت المحكمة الهزلية ربع ساعة،رفض طلب اللاجئين العرض على الطب الشرعي لإثبات إصابتهم التي تعرضوا لها في قسم الدقي يوم الإثنين الماضي عندما تم إلقاء القبض عليهم، تم ترحيلهم إلى سجن طرة
للتواصل مع المحامين من متابعي القضية
أ. شريف هلالي0122988544 (الجمعية العربية لحقوق الإنسان)
أ. محمد بيومي 0105094449- أستاذة أمل ( مركز المساعدة القانونية

اقرأ أيضا ما كتبه يحيى مجاهد

تحديث: أصل الحكاية

يوم الاربعاء الماضي 28 مارس توجه الي مقر مفوضية الامم المتحدة لشئون اللاجئين
بالمهندسين 12 لاجئا سودانيا ينتمون لاسرتين من دارفور (أسرة فضل و اسرة قذافي)وهم من
اسر ضحايا مجزرة المهندسين ولم يتسلموا التعويضات التي صرفت لاسر ضحايا المجزرة في
بداية فبراير الماضي من السفارة السودانية بالقاهرة وقدرها 5الاف دولار لاسرة كل ضحية
وعندما ذهبت الاسرتان للمفوضية استدعى موظفوها الامن لهم وتم احتجازهم بقسم شرطة الدقي
وتم الافراج عنهم في اليوم نفسه الساعة الخامسة عصرا بعد أخذ إذن امن الدولة!
وفي الثامنة من صباح الاثنين 2 ابريل تكرر ما حدث الأربعاء الماضيعندما توجهت نفس
الاسرتين للمفوضية حسب طلب الأخيرة منهم
فوجئوا بحاجز حديدي حولهم يفصلهم عن مدخل استعلامات المفوضية حيث منعوا من الدخول
و كانوا قد منعوهم من الوقوف مع بقية اللاجئين السودانيين، ثم حملهم في عربة الشرطة التي
ظلت تطوف بهم شوارع القاهرة حتى استقر بهم الحال في قسم شرطة الدقي مرة اخري
و هناك تعرض اللاجئون للضرب على يد رجال الأمن بقسم الدقي بعد فصل الرجال
في غرفة الحبس الاحتياطي، لم يحضر أي محام تحقيقات الأمن معهم في قسم الدقي

في الخامسة و النصف تقريبا توجهت بهم الشرطة لنيابة الدقي
عرف فيما بعد ان اتجاه اللاجئيين الي المفوضية كان بسبب عدم ادراج اسمهم ضمن كشف
صرف التعويضات الذي استحقها أسر 30 ضحية
فلم تسلمهمالسفارة السودانية تعويضات

مع العلم ان الكشف والتعويضات المالية مصدرها الحكومة المصرية دون اعلان رسمي بذلك

بعد تفاهم تم عقب زيارة النائب الاول للرئيس السوداني وحاكم اقليم الجنوب بالسودان- سيلفا كير ميارديت
والاسماء ال30 مصدرها مكتب الحركة الشعبية بالقاهرة التي لم تسجل بقية اللاجئين ال56
ووارد جدا تكرار ما حدث مع اسر بقية الضحايا ممن لم تشمل اسماؤهم بالكشف

أو ان يكون الجانب المصري تسلم الاسماء كاملة وتم لهف ما يقرب من نصف التعويضات
و اكتفي بصرف مبلغ 1150 الف دولار فقط مقابل توقيع اهل كل ضحية على انها لن تقاضي
الحكومة و لا المفوضية في شان المذبحة

أما المفاجأة كانت كالتالي حسب مفوضية الللاجئين فانه لم يكن هناك موعد محدد للاجئين
بمقر المفوضية صباح الاثنين وحسب اللاجئين فان الامن طلب منهم مساء الاربعاء الماضي
ان يذهبوا صلباح الاثنين للمفوضية لحل المشكلة ثم فؤجئوا بامن المفوضية يرفض
دخولهم الثامنة صباحا ثم يحيط بهم حتى وصلت سيارة شرطة بعد نصف ساعة و توجهت
بهم لقسم الدقي قبل التاسعة!

اللاجئون السودانيون الآن بتخشيبة الجيزة قسم الترحيلات

وجهت لهم تهم التجمهر وتجمع أكثر من خمسة و محاولة التاثير على قرارات المفوضية
السامية لشئون اللاجئين لقبول طلباتهم، وتكدير السلم الخ

استمرت التحقيقات مع اللاجئين أمس في نيابة الدقي حتى منتصف الليل

انتقلوا بعدها لقسم الدقي ثم الى الجيزة

وكان قرار النيابة بالحبس على ذمة التحقيق 4 ايام وممارسة سياسة تجويع حتي
ان وكيل النيابة تندر من طلب احد اللاجئين لشرب بعض الماء

حتى السابعة من مساء امس الاتنين لم يتوجه اي من المحامين او الحقوقيين لتقديم المساعدة
ومن توجه وهم عدد اقل من 4 بعد ذلك طالته المعاملة السيئة من الامن والنيابة

عدداللاجئين المحتجزين حتى الآن هم 9 رجال :

بعضهم ليس من ذوي الضحايا لكنهم من لجنة صوت اللاجيء التي نظمت اعتصام نهاية العام 2005 بمصطفى محمود :
صلاح الدين موسى
نزار حماد
محمد حسين
فخر الدين دميري
حامدداوود
محمدعباس
نزار محمد أحمد
عبدالله آدم حسين
موسى
وحتى الخامسة و النصف تم اخلاء سبيل
الاطفال :
حماد- 6 شهور
مريم - عامان
النساء:
عواطف ادم- زوجة اللاجيء محمد عباس
حليمة آدم
يواجه اللاجئون تهمتي: التجمهر+التجمع التظاهر بدون إذن

نقلا عن مدونة

kashfun

تحديث 4:45

لم يذهب أي محامي او مهتم لتقديم المساعدة

تم احتجاز 13 سوداني من أسر ضحايا مذبحة اللاجئين السودانيين في ميدان مصطفي محمود صباح

اليوم في قسم شرطة الدقي بعد أن توجهوا الي مفوضية شؤون اللاجئيين لصرف التعويضات

وللمرة الثانية خلال أسبوع يتم القبض عليهم واحتجازهم في قسم الدقي، دون سبب واضح

فكانت المرة الاولي يوم الاربعاء الماضي، حين تم احتجازهم من التاسعة صباحا وحتى الخامسة

مساء، من بين المحتجزين طفلين وسيدتين .نرجو من السادة المحامين والحقوقيين

والمهتمين نشر الخبر وتقديم المساعدة مع العلم انهم تعرضوا للضرب المبرح وفي انتظار

نقلهم الي مقر امن الدولة ولا يوجد معهم محامين.

خطة جديدة من المعارضة لمرحلة ما بعد البؤرة

بعد أن مر زلزال التعديلات الدستورية المعجزة- من العجز علي رأي أدهم- التي عبر فيها الشعب عن رأيه اللي محصلش - زى ما فهمونا بما أننا ناس مقاوحة مخها تخين وتستاهل كل اللي يتعمل فيها- سادت حالة من التفكير العميق بين مختلف تيارات وحركات المعارضة، وكذلك الافراد، حول ما يجب عمله خلال مرحلة ما بعد التعديلات، صحيح أن البعض اصابه الاحباط، الا ان البعض الاخر كان أكثر ايجابية و لجأ الي سن أساليب مقاومة ومشاركة جديدة، في السياق نفسه، قررت حركة كفاية- أهم تيار معارض في الشارع المصري- حسب ما ذكرت جريدة الدستور- في ديل الصفحة الثانية ع الشمال- بدء تطبيق خطة جديدة تتناسب مع مرحلة ما بعد التعديلات، هدفها تحريك الجهامير- اللي نايمة من زماااان- والتنسيق مع الاخوان المسلمين (تااااني) و أحزاب المعارضة (بردوه).

وتقوم الخطة علي فتح حوار مع الاحزاب (هو لسه متفتحش؟ الظاهر ان محدش كان معاه فتاحة) والتحرك في المحافظات التي تعاني الاهمال الحكومي و الفقر الشديد (طبعا بما ان كل محافظات مصر لاتعاني واى حتة ف مصر، وكله تمام يا فندم) وطرح برنامج مقاومة سلمية يعتمد علي الاعتصام والتظاهر(تاااني)والاضراب.( هو كان تم طرح برنامج مقاومة مسلحة لا سمح الله؟.
اما عضو اللجنة التنسيقية للحركة جورج اسحاق ( دا ظهر يا جماعة، اشطة عليه)، فقال ان الحركة ستركز في الفترة القادمة علي توعية المواطنيين بمخاطر التعديلات الستورية وقانون مكافحة الارهاب ومباشرة الحقوق السياسية
( ههههههههههه التوعية بعد خراب مالطة كتر خيره يا جماعة صحيح التعديلات من ديسمبر 2006لكن بردوا توعية الجهامير بعد ما خلاص جثة الوطن دخلت تلاجة المشرحة لا ضرر منها، ولا نفع ).

يا جماعة اهو في برده تيار بدأ يفكر ويطرح خطة عملية لمرحلة ما بعد البؤرة قصدي التعديلات الكاستورية، والاهتمام اكتر بالبفتة البيضا، بما ان قلب قيادات الحركة ابيض زي اللبن الحليب بالصلاتو ع النبي.

مع الوضع ف الاعتبار انها لم تعد تعديلات كستورية دا بقت دستور العزبة خلاص يعني ولا حتى المحكمة الدستورية العليا تقدر تغير منه فتفوتة

اتمنى من كل قلبي نجاح الخطة الجهنمية لصحصحة الجهامير المخمودة، ومحدش يسيء الظن ويربط مابين الخطة وبداية شهر ابريل.

وفوتوكوا بعافية

امين

الي أهل لا مؤاخذة الئمة السطوحية

حلوا عن سمانا وارحلوا

يلا يا شاطر انت و هو روحوا العبوا بعيد

يلا هنروش ميه

يا كفاية فينك فينك؟ ...القيادات بيني وبينك

عودة الصورة بناء علي رغبة الجهامير

الصورة للعبقري فتحي ابو العز ولطشتها من عند عرباوي

توضيح مهم جداااااااا

هذه التدوينة لم تكن سوى فضفضة عما حدث ، و هى لا تعنى بأى شكل من

الأشكال الإنتقاص من شأن أى شخص على الإطلاق ، الفكرة ببساطة

إنى كنت معولة على حركة كفاية ، الحركة اللي قدرت تسيطر على اسفلت الشارع،اللي بالتأكيد مختلفة تماما عن باقي التيارات، بمعنى أنا هنا بعاتب موش بهاجم. أنا قلت أعمل التوضيح دا علشان ببساطة موش عايزة أتفهم غلط خصوصا من الناس اللى أنا فعلا بأحترمهم و بقدر مجهودهم زى علاء سيف.

تحديث 2

أدهم خرج وكل المعتقلين

وفي اتصال تليفوني معاه

قال انهم كويسين وبيطمنوا الجهامير

كدة بكل بساطة بلطجية وزارة المقاشات

سابوهم ف الصحرا بعد ما باتوا الليلة

ادهم وجيمي بيجمعوا كل اللي كانوا معتقلين

لان الامن رمي كل واحد في حتة في الصحرا

ودلوقتى بيدوروا علي احمد الدروبيي

مريض السكر) اللي مش عارفين هو فين تحديدا

في الصحرا الواسعة

بعد كدة ادهم

وباقي الللي كانوا معاهم هيطلعوا علي لنقابه الصحفيين

1تحديث

فلكي «الأخبار» في خدمة الاستفتاء..

قال في «برج» الرئيس مبارك: «التجمع الشعبي أنت مصباحه»..

وقال لابنه جمال: «كثيراً ما تبدع بأفكارك الجديدة للوطن»

الخبر من المصري اليوم عدد النهاردة

بالشفا

اسمحوا لي اقولها لاول مرة هنا

أحا

انا بقالي ساعات كتيرررة بحاول اكتب البوت دا، بس مش عارفة، الماسنجر قدامي فاضي

علي غير العادي،الاول كان جيمي داخل خارج ، بمراجيحه ومقالبه، وغلاسته اللذيذة احيانا، وخناقاته

معايا اللى ملهاش داعي، وكمان مفيش ادهم وكلامنا عن السنيما و الافلام ، واخر الاغاني القديمة اللي عتر فيها،

وعن اسماعيل ياسين واغانييه، و لاعزة بكل رقتوضحكتها الهادية، اللي بتخليني اصدق ان الدنيا فعلا بخير.

قبل المظاهرة كنت محضرة نفسي اني اكتب بوست مسخرة، لكن فعلا مش

قادرة، لان مكنش في مسخرة ولا مهزلة اكتر من اعتصام 25 مارس في ميدان التحرير، لكن انا

بس هذكر تفاصيل عشتها .

نازلة جري من الشغل، لسه بقول يا هادي الاقي ادهم وعزة، و مكالمة

تليفون بينا طويلة، عن الجو العام ف الارض المحتلة من ميدان التحرير، وتوصية من ادهم

لو اتمسك، اتصل بعزة(يا دي النيلة، تاني وصية خلال اسبوع، الاول من جيمي، اللي محددش اتصل بمين،وادي ادهم كمان)، يا ادهم بلاش نسبق الحدث، (رغم انه المتوقع)، طول

الطريق الموبيل مبطلش رن، يا حد بيسألنى انتى فين؟ او هنتقابل فين؟
علي قهوة صغيرة، كانت المكان السري بتاعي انا وتنظيم 12ربيع الاول، ادهم طلب

لي شاي، هشام مشغول بالموبيل، حسام معاه ضيوف، جيمي منطلق زي عادته وقالبها

مراجيح. بدأنا نتحرك، المفترض ان اتجاه المجموعة اللي عددها مكنش قليل تتجه لقلب

الميدان وتحتله، ما عدا انا مش هكون مع المجموعة مش ترفع لكن رحم الله امرئ عرف قدر نفسه. المتوقع

كان ضرب وطحن اول ما نقرب من الميدان، وانا حركتي غير سريعة، انا بالكتير اقدر اتصل

بأحد المحامين، اوأن الخبر يوصل لبعض الناس، ممكن ارفع العكاز بتاعي واضرب حد، لكن

مش طرح أحد الخصوم ارضا زي ما حصل في مظاهرات 2000بمساعدة صديقة، ومفيش جري زي زماااااااااااان.

المهم اول ما اتجهنا للميدان الزملا راحوا ناحية اليمين قدام كنتاكي التحرير، انا قلت يمكن

بيتفاءلوا بالدكان، الوقفة طولت وانا واقفة بعيد بتفرج ع العساكر والظبابيط، بما ان دايما مش بيجي في بالهم

اني تبع المظاهرة-دا الجانب الايجابي للكوارث-بكلم ادهم، نتحرك؟ قال اه قفلت ثانية تليفوني رن، برد، الدنيا اتلخبطط، لقيت جيمي بيجري ناحية الصنية وبعده اسد، طبعا الظبابيط وصبيانهم البلطجية شدوا أسد وجيمي، وأرمي ف عربية الترحيلات رقم5496،اه اخدت رقمها، روحت عند العربية والبيه الظابط قالي بتعملي ايه؟ قلت له باخد رقم

العربية،اللي كانت قدام عمر افندي وأنا فضلت قدامها معرفش اد ايه؟ ...
معظم المجموعة اتجهت لميدان طلعت حرب بسبب دفع الامن ، وانا فضلت ف مكاني، وبعد ما كلمت

ادهم اتحركت ف نفس الاتجاه قبل ما اوصل لهناك كان في مجموعة من كفاية بتهتف، كنا خرجنا من

دايرة سقوط شبكة المحمول اللى فى ميدان التحرير،ادهم سمع الهتافات ع التليفون جري

وهتف وسيطر المتظاهرين علي الاسفلت،لمدة عشر دقايق، كانوا افضل عشر دقايق في

اليوم كله، وفشل الامن في السيطرة ع الشارع، لحد ما اتكردن الرصيف قدام اير فرانس، وهجم

البلطجية بتوع وزارة المقشات، بالملابس المدنية طبعا، والضرب اشتغل ف كل الناس. وانا

اتجهت للرصيف المقابل امام كافيه ريش وسط المصورين
اللي حزني اكتر ولو انه مش جديد تعليقات الناس "يستاهلوا" فعلا شعب تلمه زماره وتفرقه عصايا، بعدها

حاول عزيزي ايوب اني ادخل كافيه ريش، لكن الحمد لله احيانا الدماغ الصعيدي اللي زي قالب الطوب بتنفع، زي الجانب الايجابي للكوارث، البعض جري، ودا طبعا مش عيب ف مواجهة جحافل البلطجية، ولا وزارة

المقشات، بدأ شحن المتظاهرين، ف عربية الترحيلات، ومنهم ادهم، تليفونه فضل يرن بس

مش بيرد، كلمت عزة، لقيت ادهم سبقني وبلغها بنفسه، كملت اتصالي بعدد من

الناس (محاميين وحقوقيين)...كل دا وايوب بيناديني وانا ولا انا هنا، مردتش عليه، ولا

علي البيه المكلبظ الظبوط اللي فاكر شكلي من يوم مظاهرة 16مارس

وسبت كافيه ريش ومشيت، عرفت بعدها بدقايق ان الناس اللي ف كافيه ريش اضربوا واتحاصروا من

بلطجية النظام ، بعدها كان كل قهاوي وسط البلد مترشقة مخبرين وامن اخبرني صديقي

احمد عبد الفتاح عن المظاهرة اللي قدام النقابة

وقال يلا نروح، انا بصراحة قلت لا طبعا مش هروح،وملقتش تفسير لمنطق

ان يبقي في مكان بديل لمظاهرة سبق وتم الدعوة لها ان تكون في ميدان التحرير، دعوة قالت وحددت هنكون هناك الساعة 6كلنا واخدين بالكوا من كلمة كلنا دي؟

طبعا الساعة كانت 6 ومفيش كلنا، صحيح كان في مجموعة من كفاية وصلت لكن بلاش

نسأل ع العدد لتبقي فضيحة، مع كل احترامي لشباب الحركة اللي شاركوا في

احتلال الاسفلت من البستان لميدان طلعت حرب، لان بالتأكيد حركة كفاية مش هم بس، فين لا مؤاخذة القيادات ؟ وغيرهم من اعضاء الحركة؟ يا فرحتي قال نقلوا المظاهرة قدام نقابة الصحفيين، ايه خايفيين يضربوا؟ وايه الجديد ف تعامل الامن؟ ولا هم اللي انضربوا ف طلعت حرب ناس هبلة؟ وأغبيا انهم لبوا نداء الحركة للاعتصام؟

مع الاعتراف ان الدعوة مكنتش من كفاية وحدها،لكن معظم المدونيين او المستقليين

والاتجاهات اللي دعت للاعتصام كانت موجودة،لكن كفاية كانت فين؟

هل ممكن دا يخليني بعد كدة اروح للمكان البديل اللي رضيت به كفاية؟

ولا من الاساس مصدقش اى دعوة منها للمشاركة ف مظاهرة او اعتصام، كان عندي

انطباع ان كفاية هتشارك بكل ناسها، كبير وصغير، لكن للأسف الصغير بعضه شارك، وكبيره معرفش فين؟ قال ايه بيريح اعصابه خارج القاهرة يا فرحتي..الحمد لله اني مصرة على ان افضل مستقل ولا

حزب ولا لا مؤاخذة حركة قياداتها قافلة موبيلاتها وبتريح اعصابها من وجع

الدماغ، او راحت تتظاهر في مكان غير المكتوب ف دعوتهم للشارع بالمشاركة، مع

احترامي ان اكيد مش كفاية لوحدها هي المفروض تعمل كل حاجة وتقود الشارع، لكن طالما

ابو العروسة دعا للفرح ومحضرش معناها انه مش موافقة ع الجوازة

السودا، وطالما انه مش موافق دعي ليه من الاول؟

رجعت البيت لمامتي اللي عرفت اخبار وسط البلد من

القنوات الفضائية، واضطريت احلف ان كويسة وراجعة البيت حالا

واول ما دخلت البيت كانت حفلة استقبال كل يوم من ولادي، مريم(4سنين)وسؤالها

المعتادة، جبتي لي حاجة حلوة؟ انتى كنتي فين؟ رد عليها عبد الله(7سنين) كانت في

المظاهرة، مريم قالت يعني ايه مظاهرة؟ قالها يعني تروحي تهتفي ف الشارع بصوت عالي

والعساكر ينزلوا فيكي ضرب. في الخلفية كان في مشهد من فيلم فرحان ملازم

ادم، فيه (ام فتنة) الفنانة لبلبة بتقول لفتحي عبد الوهاب، من مشي جنب الحيط سلم

لاننا غلابة، واللي يعافر مع الحكومة يبقي بينطح زي الجديان في حيطة.معرفش ادهم

كان ممكن يعلق ايه علي مشهد مريم وعبد الله و الحوار الداير ما بين فرحان وام فتنة.

مش معني كدة انى موافقة ع الحوار، اللي اترسخ جوا

بعض من امخاخ الشعب المصري، انا ضده بالثلث، انا مع النطح

كما الجديان ف الحيطان، والحيطان مش ممكن تطرحني ارضا بسهولة

اه نسيت اقولكم اخر اخبار الاستفتاء المزور مقدما

احمد راح يشارك لاقي مفيش اشراف قضائي

يعني المادة 88 اللي ف الدستور اللي الاستفتاء

بخصوصه خلاص تم تغييرها من غير

استفتاء ووجع راس

والله مش عارفة لازمته ايه من الاول

تزوير الاستفتاء بدأ في ميت الخولي

تحديث

صورة من الخطاب

تزوير الاستفتاء بدأ يا شعب مصر

الخبر وصلني عبر مدونة دفتر وطن

شوفوا الخبر اللي نقله محمد اسماعيل مراسل الجزيرة توك

نظرا لامكانيات الزنزانة التقنية والفنية المحدودة

في نقل صورة من الخطاب المختوم بختم النسر

و موجه من رئيس قرية ميت الخولي عبد الله بمحافظة دمياط

إلى رئيس الوحدة المحلية بهذه القرية مضمونه ما يلى
/ السيد
بعد التحية يرجى التنبية على العاملين رئاستكم بالتوجه الى مقار لجان الاستفتاء للتصويت

بنعم للتعديلات الدستورية يوم الاثنين 26/3/2007 وعدم التوقيع حضور وانصراف وتسليم دفاتر الحضور للوحدة المحلية صباح يوم الاستفتاء .وذلك في حضور المشاركة والتعاون للوصول لاعلى نسبة تصويت للقرية رئيس القرية

ملحوظة
طبعا للأسف الشديد هناك مشكلات فى نقل الصورة عن طريق سكان لكن المهم إن ختم النسر ظاهر وكمان التاريخ واضح وباين يخرم عين النسر وهو ستة وعشرين مارس 2007

ولا عزاء لشعب مصر

مش عاوزة مظاهرة ولا وقفة احتجاجية ... عاوزة عصيان مدني

تحديث

للسادة اللي مش مقتنعين

بمظاهرة ولا وقفة احتجاجية

او السادة اللي مش مقتنعين بعصيان مدني

أقدم لكم دستور دولة العبيد

قبل ما تقروا الخبر اللى تحت روحوا شوفوا اللي هيتعمل

في الشعب المصري من أول يوم الاتنين علي مدونة

دستورك يا محروسة

مش أنا اللي لقيتها دا دماغ ماك

ممكن تشوفوا التغطية بالصور لمؤتمر نواب المعارضة

مسخرة ...علي مدونة يا لالالي

يوم الاثنين 26/3 فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا, التعديلات دي الحزب الوطني عملها بمعرفته .. تعديلات تفصيل على مقاس جمال بيه , عشان محدش يتكلم أو يعترض أو يطالب بحقه أو يرفع راسه , مش كدة وبس كلنا هنكون مهددين في الشارع وفي شغلنا وبيوتنا وأكل عيشنا . تعديل المادة 179

بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير

إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش

عدل ولا صحافة ولا قانون , وكله بالدستور يا بيه ! أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها . التعديلات كمان هتمنع أي مستقل يترشح للرئاسة يعني

انكتب علينا وعلي ولادنا ولادنا رئيس من الحزب إياه لحد ما نموت , ورئيس الجمهورية بقى من حقه يحله

مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه . يعني من

الآخر البلد هتبقى عزبة مبارك وولده , واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين .

دي اخر فرصة ولا هنوافق نكون انفار وعبيد في العزبة؟
يوم الاحد25/3 الساعة 6مساء هنعتصم في ميدان التحرير

كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا

ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل

الشارع ومش هنخاف ومش حنسيب بلدنا عشان احنا أصحابها

دي اخر مظاهرة قبل الغاء الجمهورية

قبل اعلانها عزبة مباركية هبابية علي دماغه

وبما ان وزارة المقشات و أمن المخابز هيحاولوا يمنعوها زي مظاهرة16/3

ووقفة 20/3

أنا مش عاوزة مظاهرة ولا وقفة احتجاجية انا عاوزة عصيان مدني

عصيان مدني لحد ما يغور

ويسقط يسقط حسنى مبارك

فما ضاع وطن وراءه مدافع

العهد الآتي

المجد لمبارك فى الأعالى ،،،،،،

و على مصر الخراب ،،،،،

و بالشعب المزلة
من

سفر العهد اللي جاي

so i'm

لان مصر بقت كدة

بعد ما كانت كدة

الصور الاربعة الاخيرة :بعدسة زنزانة

لا يأس مع الحياة ولا حياة لمن تنادى..مظاهراتنا فعل بيولوجي حتمي

تحديث معرفش رقم كام

المهم: اعتصام مفتوح أمام قسم شرطة الضاهر للافراج عن المعتقلين اللي الشرطة رفضت الافراج عنهم

انا مستعجلة ممكن تتابعوا الاخبار من عند جرجس من أمام القسم

انا رأيي عصيان مدني

احسن بما ان مفيش حاجة نافعة

مع ولاد ....

عارفة انكم عارفين ان البوست دا عن مظاهرة النهاردة، اللي رجعتني لمظاهرات مارس 2003، مع الفارق، علي الاقل بالنسبة لى، في مارس 2003، الفرق الاول مجرد سماع خبر مظاهرة في التحرير، الناس تحشد بعضها، وتنزل، الفرق التاني حرية الحركة والقدرة علي الجري، وسهولة الانتقال من شارع لشارع، عكس الحشر في شارع كريم الدولة، وحشري انا ف كرنر واحد لمدة ساعة ، الفرق التالت ان مكنش عندي أي استعداد للمشاركة لحد يومين فاتوا، بشكل لا ارادي كل ما اتفق على موعد مع صديق، اقوله "اشوفك ف المظاهرة".

المشاركة في المظاهرة ما تجيش كدة وخلاص، الاول من الافضل اتباع بعض الاستعدادات، بالنسبة للانسات اول حاجة شنطة اليد، بلاش الشنط البنانيتي خالص، الافضل سبورت باج صغيرة، ومتكونش متكربسة ميكاب، او كتب او أي حبشتكنات، الضروريات فقط، ويا ريت شاحن موبيل، صحيح مش عارفين هنستعمله فين؟ لكن كل شيء جايز.
طبعا سبورت شوز، وايشارب قديم مش مهم لو ضاع، في الغالب بنطلون من الغسالة، لكن ممكن جيب للأحجام العائلية، او مفضلي الكلاسيك، مفيش ازمة من ميكاب خفيف، بس الافضل لم الشعر، ديل حصان، او قصه قصير ونريح نفسنا، اما الاخوات المحجبات ايشارب عادي وخلاص، بلاش ايشاربات موديل عربة السيدات ف المترو
لان في مطر، وشد وجذب مع الامن، وبالتالي كل الترتر والحركات والحلقان الكبيرة دي هيكون مصيرها حفر المية في شارع كريم الدولة.
بالنسبة للشوباب يبعدوا اول حاجة عن ارتداء أي اندر وير ملون، لانه بيعمل شغل جامد قوي لدي السادة الظبابيط، بعد القبض والترحيل علي مخابز عمن الدولة، خلوه اسود، بما انك ممكن تقضي ايام طويلة من غير ما تغيره.
بلاش تربط مع أصحابك علي انك تقابلهم ف حتة معينة، كدة كدة الجميع هيتخندق في شارع ضيق، يعني هتخلص الكريديت بتاعك ع الفاضي، خليه لعربية الترحيلات، كمان مفيش داعي صاحبتك تيجي المظاهرة لو عاوزة تشارك، الافضل انها تكون براحتها، لوحدها مع أصحابها مش مهم، والا هتلاقي نفسك متكتف ساحبها وراك ف كل شارع تدخله، وكمان هتضرب اكيد بسببها، بما انك هترفض أي مساس بها، والنتيجة بوكس ف الفك، او تتهور وتروح ماسك وشاتم أي رتبة قدامك، بس يا ريت تبعد عن العساكر..اشتم الظبابيط اخف وطأة، وهو نضال برده

بالنسبة للجنسين شحن بطاريات الموبيلات، وشرا كريديت، بلاش الكريديت اللي ع الهوا ابو خمسة، لانه هيخلص
بعد اول خمس دقايق من المظاهرة، لما تحاول تتأكد ان كل اصحابك وصلوا ولا لسه، يعني احتمال كبير ميكونش معاك اى كريديت، وانت جوا عربية ترحيلات، او حتي براها.
اول حركات الامن القرعة اللي مش جديدة بالنسبة لي الحرص علي كردنة المتظاهرين، اما الجديد فكان اللطف والظرف، من البشاوات الظبابيط الكبار قوي قوي، اللي اتحايلوا على بعض المدونيين، الحاج جرجس، وعرباوي، ودماغ ماك، لدي وصولهم ميدان التحرير انهم يروحوا يتظاهروا بعيد عن الميدان، وبقي كل مدون معاه ظابط هههههههه.

اضطر الجميع للرضوخ والاتجاه لحزب التجمع اللي اتحول لدار مناسبات، بيأجر قاعات الافراح، قصدي الحزب، لاحزاب اخري، اهو برده تنسيق حزبي، وتخيلوا 400مناضل ناصري جوا حزب التجمع عشان انتخابات الحزب
و ميتين بره مطحونين من 1000عسكري امن مخابز، و لا حياة لمن تنادي بالمشاركة..يا لهوييييييييييي
احلي حاجة انك تقف في كورنر قريب من الامن، مش خطوط التماس الاولي ولكن ع الاجناب اللي الرتب
المتوسطة قوي قوي تدير من خلالها المعركة مع المتظاهرين.. ولو حبيت تعقد اتخن ظابط بص له كل شوية وانت ساكت، خصوصا وهو بيدي تعليماته لعساكر امن المخابز اللى لابسين مدني، هياخد باله انك متابعه وبتراقبه، بعد شوية هتلاقيه خرس وبطل اعطاء اوامر بالاندساس وسط المتظاهرين..هيخاف انك تسيح والاخ اللى لابس مدني ممكن ينضرب.
المكان التاني ياريت فوق بس مش بلكونة يعني حاجة اقصر شوية زي كابل الكهربا اللي علي يمينك وانت داخل حزب التجمع سابقا، دار مناسبات حاليا، عشان متفقدش اتصالك بالمظاهرة واصحابك،
دا غير انك هتشوف كل الناس، وهتاخد بالك من مين زعلان من مين، ومين بيزوغ ف الزحمة، ومين بيربط مع مزة، ومين فعلا رايح يتظاهر ....بس الحاجة اليع فعلا كانت التحرش والتلكيك للكلام مع الانسات ف المظاهرة من بعض الاخوة المناضلين هههههههههههه

هي هي ف كل مظاهرات مصر تقريبا، تنازع الهتاف ... كل واحد عاوز الناس تردد هتافه هو، لانه هو الصح،
اللي يديه الحق انه يضرب القوي المعارضة له بهتافاته.
وهو هو الشو اللي بيعمله البعض للفت انتباه الكاميرات بأنواعها. ومفيش مانع من كام حديث تلفزيوني، ولو مهتم ان صورتك تطلع وتبقي مشهور، الزق قريب من الكاميرات أو الزق جنب حد مشهور جدا هتلاقي نفسك في كل الجرايد، والقنوات الارضية والجوية والبحرية.
ازفت حاجة شفتها اوحش حاجة فعلا كان دفع و ذق المنسق العام لحركة كفاية الدكتور عبد الوهاب المسيري، رغم حالته الصحية الصعبة لاجباره علي دخول كردون كريم الدولة شارع سابقا، رغم ان المسيري لم يعترض علي دخول الخندق، ما أدي لثورة البعض ودفاعه عن المسيري ضد السقوط،افتكر بالتحديد الصديق احمد عاطف من جريدة الكرامة، فما كان من الامن الا انه هاجم الجميع بما فيهم المسيري نفسه.

:-المهم نخرج من المظاهرة بمجموعة استنتاجات وهي

- انه لم يكن هناك استايل معين للملابس الشوباب هي هي التي شيرتات والجينز، والجاكت بمناسبة البرد، والمطرة.
- البنانيت كانوا في منتهي الاناقة والشياكة، والبوت كان عامل عمايله، الا ان الاسدال يظل اكبر انجازات تلك المظاهرة ليس بمجرد المشاركة في ترديد الهتاف، بل تأليف الهتاف نفسه.
- ان موضوع المظاهرة ف ميدان التحرير ومن الساعة خمسة لسبعة دي فضيحة، ميدان التحرير مكان لتشتيت المتظاهرين، وبما ان الميدان كبير، هتلاقيهم زي الجزر متوزعين كل شوية ف حتة ، مجمع تحرير، هارديز، كنتاكي ، واخيرا ثواني الامن بيسيطر علي كل الناس بما ان محدش بيجي في ميعاده، فاكرينها اوبن اير بارتي .
- صحيح ان المظاهرة لم تفشل الا ان كان عندي امل انها تكون اقوي من كدة، ومش ف الخون بتاع كريم الدولة، اللى مش عارفة كريم مين؟(يمكن كريم عامر) ودولة مين؟ (دولة العصابة).

اهم حاجة بالنسبة لي ان العكاز بتاعي رجع لي بعد فقده بساعة ونص وانا مش عارفة اطنطط ، ومحبوسة ف كورنر جنب العساكر، لحد ما بقينا عشرة، احمد ورزق والاتنين عساكر امن مركزي جداد طازة ف السلاح، اللي تقوله اخوانك ف السلاح بتوع المحلة اضربوا يقولك "اه وبعدها كان في تأديب، لا يا ست هم تلات سنين، هيعدوا بالطول والعرض". أما شعبان وزميله العسكري في ملابس مدنية فسبوا ميت دين للحكومة والمظاهرات، والظابط "اللي نافخ ريشه" بسبب الاجازة اللى اتلغت لمجموعة كبيرة من العساكر، اللي رجعوهم من علي باب المعسكر، وشحنوهم علي المظاهرة؟ عكازي طلع في الاخر قدام كاميرا العربية وواحد مصر انه يخص سي الحاج محمد عبد السلام، والحاج جرجس يقنع فيه دا تبع الانسة يقوله ابدا الحاج عبد السلام، أما أحمد دفتر وطن بما انه كان مزنوق قدام الكوردون فغرم كارت شحن جديد وكل شوية لقيتوا العكاز؟ عرفت بعدين ان كان في متابعة من الجهامير مش للمظاهرة، لكن لاختفاء العكاز، ومحاولات تتبعه
رست علي ان سي احمد استلف مني تمن كارت الشحن قبل ما اروح،مش قلت لكم اشتروا واشحنوا قبل المظاهرة.

- ان مظاهراتنا تظل كما أجاب الدكتور المسيري "فعل بيولوجي حتمي"، قاصدا الذهاب الي التواليت، وفي عينيه تلك الابتسامة عندما سألته "حضرتك رايح فين؟".

الاقرار بأن مع السلامة أكذوبة الاصلاح السياسي ف مصر

.

الصور من مدونة دماغ ماك

روضة احمد: من بنات مصر الجدعات قوي

تحديث عاجل

وردنا الآن أنباء عن تأكيد محكمة استئناف الأسكندرية للحكم الصادر على كريم عامر بالحبس أربعة سنوات... والجديد أن محكمة الاستئناف قبلت أيضا بإقامة دعوى حسبة ضد كريم وفريق الدفاع عنه ...مسخرة... يعني من الاخر طز في تعديل القانون اللي اتعمل بعد قضية نصر حامد أبو زيد بأنه لا يحق لأحد رفع دعوى حسبة مباشرة واعتبارها من اختصاصات النيابة، مش من محامين وناس بيدعوا انهم تضرروا من كريم، تضرروا في ايه ان شاء الله؟ يكونش هو السبب في احتلال فلسطين، ولا العراق وافغانستان؟او تلاقيه السبب في انفلونزا الطيور، او برده حادثة قطر الصعيد من كام سنة، ولا بالتأكيد له علاقة في الوكسة القوية للحكومة والنظام بتعديل كام وتلاتين مادة من المرحوم مقدما الدستور واحتمال برده هو اللي وز سيادة القاضي اياه بلطش تقرير الشبكة العربية، او كتب له عريضة الدعوي المسخرة اللي بيقول فيها ان موقع كفاية الكخة دا من تمويل الشبكة وتابع ليها هو ونشاطات الحركة .
كمان الحكم بيقول طزين ولا طز للمرة التانية والعاشرة في مواد القانون المعدلة والجديدة بما انه تم توضيح الدفاع أن حكم محكمة الدرجة الأولى باطل لأن القاضي حكم على كريم بمادة في القانون تم تعديلها، يعني سيادته حكم بنص مادة مش موجودة اصلا، عادي خالص والله يا جماعة متتخضوش ولسه

دا حتي سيادة القاضي الفاضل محبش يضيع وقته ويقرا مذكرات دفاع ووجع دماغ

هو النهاردة في اي متشات يا جماعة؟ حد يفهمني

من الاخر تاني وايه يعني هو فيها حاجة لو اتحكم بنص مادة قانون

مش موجودة او حتي سيادة القاضي ما اخدش بيها خبر

انا بس اللي مش عاوزة اعترف من بدري اننا ف مصر ام الدنيا

وريسها حنتيرة

اقروا بيان الشبكة العربية لمعلومات حقوق الانسان

معرفتي بروضة بدأت من ثلاث أشهر، كنت حريصة طوال تلك الفترة علي متابعة قضية كريم عامر معها، أحيانا من خلال مناقشة أراء كريم، أو ما تحكيه روضة لي من مواقف تعترضها أثناء سير المحاكمة بعضها طريفة،تحكيها روضة بكل خفة دم المصريات، أو محزنة لما يمكن أن يكنه البعض للاخر المختلف في الرأي، بداية من حارس كريم المصاحب له في جلسات المحاكمة، ويده معه في كلبش واحد، كل أمنيته تتلخص في "خلصوني بجي أنا مش عاوز انزل مع الواد دا تاني"أو أحد وكلاء النيابة الذي حرص علي أقناع روضة بالتخلي عن دورها في هيئة الدفاع عن كريم.

سواء اتفقت مع كريم و أراءه، أو اختلفت ، الا ان كل ما يهمني هنا هو روضة كشابة مصرية في بداية طريق الحياة كمحامية، فحين قرأت بوست نساء المستقبل في مدونة دفتر وطن ربطت بين روضة ونموذج معين لهذا المستقبل نموذج مصر علي تحقيق ذاته، حتي وان رفض البعض، فقد تخرجت روضة في كلية الحقوق عام2000، ومنه للتدريب في مكتب محامي، ثم اتجهت لان يكون لديها مكتبها الخاص،ومعه اتجهت للعمل داخل احدي منظمات حقوق الانسان

سنوات قليلة ربما لم تكن حافلة بالكثير من وجهة نظر البعض،لكن بالتأكيد لدي روضة فقد كان بها الكثير.

روضة بنوتة مصرية خفيفة الظل، وان كانت خجولة،الا انها واثقة من نفسها، مازلت مصرة علي ارتداء الجينز والحذاء الرياضي، حتي داخل قاعة المحكمة، رغم نصائح البعض،"يا أستاذة مينفعش" الا انها مصرة "بلاش كلمة استاذة دي، هلبس اللي انا شايفاه مريح وعملي جدا".الف تحية لروضة أحمد أحدي نساء هذا المستقبل، لعله يكون مبشرا كأبتسامة روضة

قبل الحكم في قضية كريم سألتني روضة لماذا لم يكن هناك بوست عن كريم؟

كان ردي انني افضل ان اكتب البوست عنك انتي، أجابتني بنظرة خجل وابتسامة خفيفة، معناها، لماذا؟

وها انا اكتب البوست عن روضة، مصحوبة ببعض الاسئلة حول اسئناف قضية كريم عامر
- أول معرفتك بكريم عامر؟
معرفتي بكريم كانت من خلال القضية حيث انه اتصل بالشبكة العربية لمعلومات حقوق الانسان، و أخبرنا انه تسلم طلب حضور من النيابة العامة بمحرم بك، ولم يكن يعرف سبب طلب الحضور بالتحديد، لأن الطلب لم يكن واضحا، لكن كريم توقع أنه بسبب التحقيق معه سابقا بجامعة الازهر، كلية شريعة وقانون، فرع دمنهور؟
- هل فكرتي كتير قبل الموافقة علي الدفاع عن كريم عامر؟
في اليوم الذي عرفت أنه سيتم التحقيق معه لم يكن لدي الوقت لمعرفة الموضوع أو قراءة أي شيء عنه وسافرت اليوم التالي مباشرة الي الاسكندرية لحضور التحقيق معه. وعندما قابلته لاول مرة قبل التحقيق أخبرني انه يكتب مقالات علي أحد المواقع الالكترونية، يعبر فيها عن رأيه الشخصي.
- رد فعل الناس؟
رد فعل الناس بدأت بعد التحقيق معه مباشرة ، من وكلاء النيابة الذين تم التحقيق في حضورهم، وكانوا فعلا متحاملين عليه، وطلبوا مني عدم الاستمرار في الدفاع عنه، وترك القضية، لكني رفضت ليس لاتفاقي مع كريم بالدفاع عنه، ولكن لما يحتمه علي واجبي المهني.
- هل كنتى تتوقعي الحكم؟
في ظل ما تم في التحقيقات وجلسات التجديد و أمام القضاء كان الحكم متوقع ولكننا كهيئة دفاع كنا نتوقع أكثر من ذلك بسبب أثارة دعوي الحسبة، وهجوم البعض، ومنهم محامين، علي كريم بسبب مقالاته و أرائه.
- علي أي أساس سيتم بناء الدفاع عن كريم في الاستئناف؟
- الدفاع في الاستئناف سيكون علي أساس عدم تمكن هيئة الدفاع من المرافعة الشفوية عن المتهم وكذلك عدم الاستجابة الي الطلبات التي تقدمت بها هيئة الدفاع وكذلك عدم أستكمال أوراق الدعوي لاننا طلبنا الشكوي التي تقدم بها أحد الطلبة الي جامعة الازهر وكذلك عدم وجود تحريات نيابة أمن الدولة بالملف، بالاضافة لعدم ندب خبير من كلية هندسة لتحديد المكان الذي تم النشر فيه.
- ملاحظاتك علي حيثيات الحكم؟
ملاحظاتي علي الحكم هي:
أولا: تغير القيد والوصف باستبدال المادة 98، و102 مكرر بالمواد 176، و171، من قانون العقوبات، دون اعلان هيئة الدفاع بهذا التغيير.
ثانيا: تم تعديل المادة 176 من قانون العقوبات طبقا لتعديلات قانون الصحافة ولم يعمل رئيس المحكمة بالتغيير وحكم طبقا للنص القديم!!
ثالثا: عدم الأخذ بتطبيق أقليمية القانون وهو تحديد الدولة التي تم فيها العلانية لتحديد القانون واجب التطبيق وكلها أسباب أساسية للحكم. بناء علي كل هذه الاسباب سيكون الاستئناف.
- رأيك الشخصي في كتابات كريم؟
لا أريد أن أخلط بين رأيي الشخصي ومجال عملي حيث انه لايوجد مساحة لذلك، والا لن أستطيع الدفاع عن أي متهم لانه أحيانا يتعارض رأيي الشخصي و رأيي المهني، فمن حق أي متهم أن يكون له محامي يدافع عنه. وهو واجب مهني لا علاقة له بالحياة الشخصية.
- هل لديك صراع داخلي بين رأيك الشخصي والمهني بخصوص القضية؟

أرفض الاجابة عن هذا السؤال

وقع للتضامن مع كريم

شاعر- مؤرخ وسط مراكز الوجود

المدينة

أنت قلت "سأذهب الي بلد اخر، الي بحر اخر،
الي مدينة أخري أحسن من تلك التى أعيش فيها.
هنا كل ما أفعله مصيره الفشل،
وقلبي ميت مدفون مثل جثة كم ستعاني روحي هنا؟
أينما توجهت، أينما نظرت أري خرائب محترقة من حياتي هنا
حيث قضيت زمنا طويلا لا أفعل شيئا".
أنت لن تجد أرضا جديدة ولا بحرا جديدا.
ستلاحقك هذه المدينة دوما.
ستسكن في نفس الشوارع،
ويشيب شعر رأسك في نفس المنازل.
سوف تنتهي هنا دائما.
انس أي مكان اخر .
فأنت لا تملك سفينة ولا طريق.
والحياة التى ضيعتها هنا
ضيعتها في أي مكان اخر.
أغسطس 1894
* * * * * * * * * * *
قبر ياسيس

أنا ياسيس ، أرقد هنا في هذه المدينة العظيمة
كنت مشهورا بوسامتي
أعجب بي الحكماء و ذوو الفطنة
كما أعجب بي الاجلاف من العامة
وكنت أطرب لاعجاب هؤلاء و هؤلاء
وعلي مدي الزمن، ولكثرة ما لعبت دور ناركيسوس
وهرميس نضبت الدماء في عروقي
و أصابني الدمار.
يا أيها المسافر، اذا كنت سكندريا
فلن تلومني.
أنت تعرف حمية حياتنا هنا
وما بها من عواطف متأججة
وتفسخ بهيج.

ابريل1917

لا أدعي موهبة في قراءة الشعر، فأنا مثل كثيرين، عاديين، أقرأ الرباعيات، ونجم، ودنقل، و لي قراءات متواضعة لأشعار أبي القاسم الشابي، وبن زيدون أحد شعراء الاندلس، أو أخرين لا أتذكرهم الان، أما كونستانتين كفافيس، فقد لمحت بعض المقالات عنه في بعض الصحف، من سنوات بعيدة، فأكتفيت بقراءة الابيات القليلة، المصاحبة للمقال، ولم أكلف نفسي عناء البحث عنه فأنا لا أميل بطبعي لقراءة الشعر المترجم، لانني أؤمن- وقد أكون علي خطأ- بأن الشعر أو الاحساس عموما هو ابن للغة التي كتب بها، لا يصح انتمائه للغة أخري. مع هذا لم أجرؤ علي الرفض حين عرض علي صديقي النديم، في زيارتي الاخيرة للسندباد، لتسديد ما علي من ديون، نسخة من كتاب "في انتظار البرابرة"، الذي ضم بعض قصائد كفافيس، أو كفافي كما يحلو للبعض، ومنهم أنا. فسرعان ما جرت عيني علي الكلمات، ولمست تاريخية المكان والزمان، والخروج من بوتقة تعقيدات شعرية، حالت بيني وبين القراءة لعديدين، وانطلق في السرد من منطلق ذاتي لتفاصيل حياته اليومية، فقد مال كفافي لحب التاريخ والابتكار، والتمرد، وهو ما أميل اليه، بما اني لست من المتخصصين في الشعر، دراسة أو قراءة، فقد حاولت قراءة القصائد، بحدسي الشخصي، وأحسست بالكلمات من منطلق مدي حلاوة الكلمة،وصدقها، فأنا لدي صعوبة في فهم المجازي والتشبيه والبلاغة ، فحين أقرأ أحاول فهم أحساسي الذاتي للكلمة، والمعني،والذي يجعلني أحب القصيدة، دون سبب، فلا أستطيع التعبير بالكلمات عن السؤال: لماذا أعجبتني تلك القصيدة، أو ذاك الشاعر؟ حاولت مرة أخري أنتقاء قصيدة أو أتنين، لنشرها هنا، ولكني وقعت في حيرة، نظرا لجودة القصائد كلها، وحلاوة كلماتها، الا انه لابد من الاعتراف بأني أخترت القصائد الاقل تمردا، وذاتيا لنشرها هنا، فقد أصابني بعض الخوف في نشر ما ملك عليا تفكيري من قصائد، و أن كنت أعد بنشر بعض القصائد علي يسار المدونة، لاحقا، خصوصا قصيدتي "منذ الساعة التاسعة"، و "ذات مساء"ولذلك أفضل أن تقرأوا الكتاب بأنفسكم، وهو موجود لدي مكتبة السندباد، ومديرها النديم، وسعره معقول جداجدا.

من هو كونستانتين كفافيس؟
ولد كفافي، بالاسكندرية في 17/ابريل 1863، التاسع والاخير في الترتيب بين أخوته، لأسرة يونانية، ثرية،توفي والده وهو في السابعة، وبعدها بسنتين أنتقلت الاسرة الي انجلترا، فأتقن كفافي اللغة الانجليزية وأكتسب المعرفة بالادب الانجليزي، حتى قيل أنه تحدث اليونانية بلهجة بريطانية، ثم عاد الي الاسكندرية، عام 1879، والتحق بمدرسة التجارة، وحين أحتل الانجليزى مصر 1882، انتقلت أسرة كفافي الي القسطنطينية، فكانت سانحة لكفافي لمواصلة دراساته في التاريخ والحضارة البيزنطية، وهناك تعلم قراءة دانتي بالايطالية، وكتب أولي قصائده بالانجليزية والفرنسية، واليونانية.
1885، عاد كفافي الي الاسكندرية، فعمل صحفيا ثم في بورصة الاسكندرية، وانتهي به الحال موظفا كتابيا في مصلحة الري،لمدة ثلاثين عاما، وبمرتب ضئيل.
من غرائب كفافي انه لم يقدم طوال حياته مجموعة من أشعاره للنشر أو البيع، أو حتى للنقاد، رغم أنه كتب بمعدل سبعين قصيدة سنويا، يمزقها كلها عدا أربع أو خمس قصائد، تطبع في طبعات خاصة من أجل أصدقائه، وفي 1904، نشر أول كتبه الذي ضم أربعة عشر قصيدة، وفي1910، كان الكتاب الثاني، ولم تنشر بعدها أي مجموعات شعرية أخري.
من أهم أصدقائه ومعاصريه ،الكسندر سينوبوليس أى.أم فورستر مؤلف رواية "الطريق الي الهند"، و "الاسكندرية:تاريخ ودليل للمدينة"، والمؤرخ البريطاني الشهير أرنولد توينبي، والروائي د.ه لورانس، والشاعر ت. س اليوت، الذي نشر قصيدة "ايثاكا" لكفافي.

من واقع كتاب "في انتظار البرابرة"، والذي حرره ديزموند أوجريدي، وترجم له شوقي فهيم، حوي الكتيب مجموعة قصائد لكفافي المرتبة زمنيا بداية من " شموع" و"وقع الاقدام"، المكتوبتان في أغسطس 1893، نهاية ب "جاء ليقرأ" المؤرخة في يوليو1924، كما اهتم المحرر بشرح مكانة كفافي في الحداثة الشعرية، وانتماؤه الي حركة الفنية التي بدأت عام 1907، وانتهت مع قيام الحرب العالمية الاولي في 1914، هي الحركة التكعيبية، التي هي في الاساس تتعامل مع الاشكال، وبعد تحقق الشكل ، تجعل الشاعر أو الفنان يتنقل ما بين الذات والموضوع، فقد حقق كفافي امكانية شعر حديث متعدد الابعاد، قائم علي المخيلة التاريخية، وان ابتعد عن التعقيد، فتجلي شعره بشكل طبيعي ورمزى، اسطوري، ناضج، وهادئ، متضمنا لملامح مدينة الاسكندرية التاريخية والمهملة، أواخر القرن التاسع عشر، متضمنة شخصيات تاريخية و مثقفين من النخبة، في الوقت ذاته فسر أينشتين النسبية، و لعب شونبرج موسيقي متعددة النغمات، و رسم بيكاسو لوحته الناقصة "أنسات أفنيون"، وكتب جيمس جويس عمله التكعيبي "الميت"، المبني علي أحدى الاساطير الايرلندية، اعقبه بروايه "أوليسيس"، فضلا عما قدمه فرويد.
عاش كفافي بحي العطارين، بالتحديد 10شارع أبسيوس، شارع شرم الشيخ حاليا، وحيدا حتي وفاته في 29 ابريل 1933. تاركا مقهي "أدونيس" و مقهاه المفضل "التريانون" لاصدقائه من المثقفين، الذين نقل أحدهم لنا ما ردده كفافي عن نفسه "أنا شاعر- مؤرخ...أحس بداخلي أصواتا تقول لي أن بأمكاني كتابة التاريخ. ولكن ليس لدي الوقت الكافي".

الصورة بعدسة زنزانة