Thursday, March 22, 2007

مش عاوزة مظاهرة ولا وقفة احتجاجية ... عاوزة عصيان مدني

تحديث
للسادة اللي مش مقتنعين
بمظاهرة ولا وقفة احتجاجية
او السادة اللي مش مقتنعين بعصيان مدني
أقدم لكم دستور دولة العبيد
قبل ما تقروا الخبر اللى تحت روحوا شوفوا اللي هيتعمل
في الشعب المصري من أول يوم الاتنين علي مدونة
مش أنا اللي لقيتها دا دماغ ماك
ممكن تشوفوا التغطية بالصور لمؤتمر نواب المعارضة
مسخرة ...علي مدونة يا لالالي


يوم الاثنين 26/3 فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا, التعديلات دي الحزب الوطني عملها بمعرفته .. تعديلات تفصيل على مقاس جمال بيه , عشان محدش يتكلم أو يعترض أو يطالب بحقه أو يرفع راسه , مش كدة وبس كلنا هنكون مهددين في الشارع وفي شغلنا وبيوتنا وأكل عيشنا . تعديل المادة 179
بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير
إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش
عدل ولا صحافة ولا قانون , وكله بالدستور يا بيه ! أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها . التعديلات كمان هتمنع أي مستقل يترشح للرئاسة يعني

انكتب علينا وعلي ولادنا ولادنا رئيس من الحزب إياه لحد ما نموت , ورئيس الجمهورية بقى من حقه يحله

مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه . يعني من
الآخر البلد هتبقى عزبة مبارك وولده , واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين .

دي اخر فرصة ولا هنوافق نكون انفار وعبيد في العزبة؟
يوم الاحد25/3 الساعة 6مساء هنعتصم في ميدان التحرير

كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا
ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل
الشارع ومش هنخاف ومش حنسيب بلدنا عشان احنا أصحابها

دي اخر مظاهرة قبل الغاء الجمهورية



قبل اعلانها عزبة مباركية هبابية علي دماغه

وبما ان وزارة المقشات و أمن المخابز هيحاولوا يمنعوها زي مظاهرة16/3
ووقفة 20/3
أنا مش عاوزة مظاهرة ولا وقفة احتجاجية انا عاوزة عصيان مدني
عصيان مدني لحد ما يغور

ويسقط يسقط حسنى مبارك

فما ضاع وطن وراءه مدافع

14 comments:

إسلام محسن said...

أزيك يا رندا ، أكيد يوم الأحد كلنا حنكون مع بعض وربنا معانا ، بس هى كده كده ملكية من زمان ، ولم يعد لنا حل الأ الثورة وترحيل مبارك
بكرة الثورة جاية مادام فيه معارضة

Anonymous said...

يجب ان تقوم الثورة
يحب ان لا نصمت
يحب ويجب ويجب
يا استاذة راندا انا مبسوط بيكى كتير لانك بتحبى البلد دى جدا بس لازم شوية عقل الا ان واثق ان عندك منة كتير
دلوقتى كل اللى عايز يغير دة
قراء اصل التعديل المقترحة
(على فكرة انا مش عجبنى منهم تلاتين مدة وانا بقول الكلام دة كمحامى لان التعديل فى مشاكل فى الصياغة هتعمل بلوى فى التفسير لمواد بعد كدة)
نكمل طيب واللى قرا لو انت بتقول ديمقراطية قول انا شيف ان التعديل دة مش سليم
وانا اقترح كذا وكذا
مفيش حزب واحد قال غير انا معترض وبس حتى الاخوان وكفاية
احزاب مصر تعترض من اجل الاعتراض عندك بديل يا حاج لا طيب انت بتعرض لة كدةوانا معترض
حتى طريقة الاعتراض بيقت بيخة اقوى اعمل مظهرة
الامن حفظ وزى ما الاحزاب عايزة الحكم الوطنى كمان عايز يفضل فى الحكم ولانة عارف خطة المعارضة بيقفل عليهم
انا بقيت احس ان العيب مش فى الاحزاب ولا الحكومة ولا الحركات
العيب فى ان المصرين بقى شعب غبىىىى
سعيد وطنى

amira said...

راندا

أنا معنديش تعليق على اللي إنتي كاتباه
أنا عايزة أحييكي وخلاص

تحياتي

ذو النون المصري said...

اعوذ بالله
لحد امتي هنفضل يبيعوا و يشتروا فينا
مفيش حتي واحد ارهابي محترم يخلص الموضوع ده
حتي الارهابيين المحترمين خلصوا
طب واحد عسكري مخلص
برضه مفيش
طب العمل؟

دستورك يا محروسة said...

الأخت العزيزة راندا
شكراً جزيلاً على مرورك على دستورك يا محروسة و شكراً أيضاً لدماغ ماك اللي لقاها :))

zenzana said...

اسلام يا بن عمي محسن
الله يكرمك ثورة حتة واحدة؟
يسمع من بقك اللى زي السكر دا

zenzana said...

شكرا يا سي سعيد يا وطني

فعلا اثبت لي ان الشعب المصري غبي
بس متنساش انك ابن هذا الشعب

zenzana said...

اميرة
شكرا جداجدا
نورتيني وانا استمتعت بمدونتك جدا


ذو النون يا حبيبي
يسمع من بقك اللي زي العثل
بس الدنيا لا توخذ بالتمني بل قفشا

دستورك يا محروسة
اه فهمت..العفو يا فندم
كمان شوف اللنك اللي علي شمال الزنزانة يا ريت يعجبك

أحمد عبد الفتاح said...

تدوينه جميلة تسلم ايدك
بس روضة وعدتك بالتدوينه ده ب 3 سنين سجن
فالي يدخل هنا يخلي باله
ملحوظه روضه محامية كريم عامر

zenzana said...

طيب يا احمد يا اخوانى متفولش احسن بتشائم لما الاخوان ينبروا فيها
هخدك معاياان شاء الله

Anonymous said...

على فكرة انا لما قولت انا الشعب غبى انا مش قصدى اشتم يا راند بس بجد انا اغبى بنى ادمين الارض مش اذكى زى مابندعى اقولك امثل
ايام سيلم الاول عمل شى خطير جدا جمع كل الحرفين والصنيعية اللى فى مصر من كل صنعة وبعتهم لتركيا مفيش مصرى واحد فاتح بقه
عبد الناصر والسادات بسبب قرارت غبية زى التاميم والمقولة الشهيرة للسادات ( انا ريس مسلم احكم دولة مسلمة ) فاتحو الهجرة الجماعية من سنة 1960 لحد اول التامنينات
وقف ايام مبارك اللى يلعن فى سلسفيل ام مصر من عرب / واجانب واخرهم المرشد بطظ فى مصر
واحنا زى الكرسى وحتى لما بتكلم بيتكلم بطريقة واحدة اتعلم العلم كلة ازى يسكتها
يمكن البلد اتبعت ؟
يمكن يكونة عايزين الناس تمشى ؟
يمكن اية تانى
بس اللى انا عارفة ان البلد دلوقتى متاجرة اجار جديد ركزى قوى فى الكلمة دى وابقى افتكرينى لما تشوفى الايجار الجديد
مش احنا اللى نتكلم اللى يتكلم اللى اجر مش احنا
سعيد وطنى

Anonymous said...

راندا انا معرفكيش و هيبقى ردى مش حلو اوى بس بعد اللى بنسمع انه بيحصل للبنات انا افضل ان الشباب يتولو الحوار دة لكن بنات و يحصل تحرشات و حقارة مظنش انه صح سامحينى بس دة رايي

zenzana said...

وانا مقدرة رايك جدا

Anonymous said...
This comment has been removed by a blog administrator.