Monday, December 19, 2011

حملة المداخلات علي برامج التليفزيون والراديو وتعطيل تليفونات الحكومة



بما ان في ناس فاكرة ان التليفزيون هو القناه الاولي والنيل للاخبار

بما ان في طنطاوي وعسكر كابسين علي انفاسنا بالجزمة
بما ان في اعلامي مصري رسمي وخاص لازال بيمارس دوره الوسخ

في نفاق العسكر بالظبط زي ما كان بيعمل مع مبارك

وتضليل المواطن الغلبان

اللي مش بيشوف في الحارة وادام البيت وقناه الناس وحنفيه المطبخ

غير السلفيين والاخوانيين والمصلحيين

ليه احنا بقي اللي شايفين نفسنا متعلمين وفاهمين
 وفاقسين العسكر والحرامية والتليفزيون

منروحش للمواطن المشاهد الغلبان لحد البيت ونطلع له 

من التليفزيون والراديو وكمان فرن البوتاجاز

وندخل ع الهوا من غير ولا احم ولا دسطور ونقول رأيينا في اللي بيحصل و الاعلام
ووزير الاعلام والمذيعين بالظبط كدا زي ما في ناس محترمين شرشحوا الواد المعفن "زبايدر "ع الهوا في برنامجه

صحيح هيسألوك الاول انت عاوز تقول ايه؟ طبعا العن وسب ف الثورة
 وقول ان البورصة وقعت

وكمان قررت تسحب استثماراتك منها ، واول ما تبقي ع الهوا قول بسرعة من غير حفلطة ولا فلسفة تلغرافات سهلة وبسيطة
لان هيقطعوا عليك

دا مش اختراع جديد حصلت في الجزائر قبل كدا من اجل 


الافراج عن احد سجناء الرأي لما حصل تعتيم اعلامي
لمدة شهر لجد ما تم الافراج عنه

وكمان كان في جزء من الحملة لتعطيل خطوط تليفون 
وزارة العدل والنائب العام من خلال تعليق الخط بعد طلب الرقم
وممكن تشغل الفاكس بانك طول الوقت بتبعت في ورق فاضي
او لو لسانك طويل او انك بلطجي زي العيال
اللي في التحرير ممكن تشتم والعياذ بالله او تعمل كدا مع باقي تليفونات الحكومة



Sunday, September 11, 2011

حقوق النساء المعاقات في أفريقيا : هل بروتوكول حقوق النساء الافريقيات يوفر الأمل؟”

في عام 2011، أطلق مركز دراسات سياسات النساء سلسلة أوراق جديدة على الانترنت لتقديم وجهات نظر مختلفة عن النساء والفتيات ذوات الإعاقة، ومحاولة تقديم وجهات نظر محددة ذاتيا من النساء ذوات الإعاقة ، سواء في الولايات المتحدة أو وعلى الصعيد العالمي ، فيما يخص مجموعة من الموضوعات مثل : الحصول على الرعاية الصحية والحقوق الإنجابية والصحة ، والعنف ضد النساء والفتيات والنساء والإيدز والتعليم والإنصاف ، والحياة العائلية وتربية الأطفال، والعمالة والتنمية الاقتصادية والموازنة بين العمل والعائلة، والمشاركة في الحكومة على كل المستويات ، من المستوى المحلي إلى الوطني ، وعلى الصعيد الدولي.

تأسس مركز دراسات سياسات النساء في عام 1972 بهدف تحليل السياسات الموجهة للنساء ويعتبر من المؤسسات ، النسوية البحثية الرائدة في الولايات المتحدة من أجل صياغة السياسات العامة لتحسين حياه النساء والحفاظ علي حقوقهن من منظهور حقوقي انساني

من أحدث الاوراق التي قام المركز بنشرها في اواخر الشهر الماضي، ورقة بعنوان :

A New Publication: “The Rights Of Women With Disabilities In Africa: Does The Protocol On The Rights Of Women In Africa Offer Any Hope?”

” الهدف من هذه الورقة هو تحليل كيف يمكن للنساء المعاقات الاستفادة الكاملة من الإطار القانوني الذي منح للمرأة الأفريقية من خلال بروتوكول المرأة الأفريقية.

وتدعو الورقة إلى أن التحديات التي تواجه المرأة المعاقة ضخمة، وبالتالي لا ينبغي أن يقتصر على حكم واحد، خاصة إذا حقوق المرأة المعاقة هي التي ينبغي معالجتها بشكل فعال. الورقة تعرض حالة المرأة المعاقة في أفريقيا، ويناقش الآثار المترتبة على وجود حكم مستقل حول حقوق النساء ذوات الإعاقة، ويجعل استخدام المبادئ التوجيهية للإبلاغ الدول بموجب بروتوكول المرأة الأفريقية مع اعطاء اهتمام خاص لتقديم التقارير حول “الحماية الخاصة للنساء ذوات الإعاقة” (المادة 23) للتدليل على القيمة المضافة من وجود العديد من الأحكام الواضحة أكثر حول حقوق النساء ذوات الإعاقة… “

لتحميل الورقة بالانجليزية اضغط /ي

مركز دراسات سياسات النساء

Saturday, September 10, 2011

من حواديت العمدة :حكاية عشر ساعات في وكر العادلي

وصلت الى مصر حوالي الثامنة والنصف الى التاسعة بتوقيت القاهرة بعدما تأخر إقلاع الطائرة من بيروت ومن ثم عبرت مباشرة الى نقطة الجوازات على كرسي نقال تحسباً لأي مضاعفات نتيجة الوقوف الطويل بإعتبار انني قد تعافيت للتو من تكلس فقرات الظهر. عند نقطة الجوازات كان ينتظر ظابط امن سلمت جواز سفري للختم فتسرعت الظابط بختم الجواز قبل ان ينتشله من يدها ظابط آخر نتيجة ما ظهر على الشاشة امامه وطلب من مرافقي ان يصحبني على الكرسي النقال الى حجز الجوازات.

في حجز الجوازات ظابط شرطة برتبة رائد وامين شرطة وشرطيين عاديين ، امين الشرطة اصر على عدم إعطائي اي سبب وجيه للتأخير، بعد نصف ساعة سأل عن سبب جلوسي على الكرسي المتحرك وعما إن كنت قد تعرضت لحادثة في مصر فأجبت بالنفي مظهراً تقريراً طبياً من المستشفى الانجلو اميريكي بالزمالك يفيد بناء على صور الأشعة ان السبب هو تكلس الفقرات وهنا تدخل الظابط وطلب منه عدم الكلام معي

بعد نحو ساعة رحل الظابط وبدأ الإستجواب من امين الشرطة بداعي الحشرية، نظر الى الورقة التي تلقاها بالفاكس وسألني ان كنت مطور برامج فأجبت برامج تنمية او برامج كومبيوتر؟ فلم يعجبه السؤال وقال لا تتذاكى علينا انت هنا لسبب انت تعرفه جيداً، “كل واحد بيعرف هو عامل ايه”.

بعد ساعة اخرى من الإنتظار كنت قد توترت بفعل ما رأيت، عائلة كوبية كاملة تساق الى السجن وسط بكاء شديد لإستخدامهم جوازات سفر فرنسية مزورة، ومن ثم شخص تركي يطالب الإتصال بالسفارة ويحاول افهام ذلك الى عناصر الجوازات الغير مبالين، فتبرعت بالترجمة فقالوا لي “انت لسه جاي عليك الدور”.

سيدة مسؤولة عن التنظيفات تدخل المكتب وتضحك، الحمام مفتوح! كان فقط متاحاً لعناصر أمن الدولة سابقاً …

اطلب تدخين سيجارة فيمنعني امين الشرطة من الخروج فادخل معه في جدال طويل، هل انا موقوف؟ قال لا، حسناً جواز سفري معك ولا يمكنني مغادرة القاعة الخارجية من دونه لما لا استطيع الخروج؟ وهنا علا صوت الجدال فتدخل الظابط وطلب إدخالي الى غرفة اخرى.

لقراءة باقي التدوينة اضغط / ي

Tuesday, August 23, 2011

موقع الكتروني من أجل كرامة ضحايا جرائم الشرف




ووفقا للأمم المتحدة والحملة الدولية ضد جرائم الشرف أن هناك ما لا يقل عن خمسة آلاف امرأة وفتاة في جميع أنحاء العالم يقتلن كل سنة للحفاظ على “شرف العائلة”. ولاتخاذهن خيارات الشخصية لا تتطابق مع الحدود المفروضة عليهن من قبل أسرهم والمجتمع المحلي.

لذلك قامت مجموعة مكونة من مخرج نرويجي شهير وموزع موسيقي فضلا عن مغنية بوب وهي دييكا والمعروفة لدي معجبيها باسم ضيا، في ابريل الماضي ، بانشاء موقع الكتروني باسم مينميني مستوحي من المعني اللاتيني لكلمة ذكري هدفه اعادة الكرامة لضحايا جرائم الشرف

والموقع فضلا عن التوثيق لتلك الجرائم . اهتم الموقع بتعريف جرائم الشرف وتوثيق بعضها ، ويري الموقع ان عمليات القتل هذه تحدث في المجتمعات حيث السيطرة على سلوك المرأة هو العامل في طليعة تحديد مكانة الرجال بين أقرانهم. كما ان الاختيارات الشخصية تأتي في الصراع مع العائلة “شرف”عندما تبدأ امرأة شابة تبدأ تتسائل : من أريده أن يكون شريك حياتي ؛؟ ماذا لو أنني لا أريد زواج مرتب من جانب الاهل او المعارف ، ماذا تريد أن ترتدي من ملابس ؟أي نوع موسيقي أود الاستماع ؟ هل ممكن أن أحصل علي عملي الخاص؟ ، هل يمكنني الذهاب الي الجامعة ؟ هل يمكنني الغناء في الأماكن العامة ، أو الذهاب للرقص ، هل يمكنني طلب الطلاق إذا ضربني زوجي ، هل يمكنني حضور المدرسة؟

هذه الأسئلة يمكن أن تجلب الخطر في مجتمع يتوقع أن النساء والفتيات يجب ان يتبعن مبادئ و توجيهات صارمة.

التحكم بشدة في الحريات الأساسية للنساء ، مثل الخيارات المهنية ، والتعليم ، وأنماط اللباس ، واختيار الأصدقاء وحتى عدد الأطفال الذين يرغبن ،يؤدي بالنساء اللواتي أصبحن ضحايا العنف في دائرة لا تنتهي من الإنكار الذاتي .

دعا الموقع الجديدعلى شبكة الانترنت لاعطاء ذكري رقمية لضحايا جرائم الشرف في جميع أنحاء العالم ،

رصد الخطوط العريضة لحياة 25 امرأة اللواتي قتلن بذريعة الشرف .

وتعلم ضيا جيدا المولودة من أبوين مهاجرين من الباشتون والبنجاب ان ثمة مخاطر تهدد النساء اللواتي خطون خارج “القاعدة الثقافية” لمجتمعهم. وتقول ان جرائم الشرف هي نهاية المطاف للسيطرة وقمع النساء

وأن هذا الشكل الحاد للعنف ضد المرأة موجودا اليوم في جميع القارات. على وجه التحديد، في سوريا ومصر والمغرب والهند وتركيا وبنغلادش والأردن وكردستان العراق وأفغانستان وباكستان ولبنان واسرائيل وفلسطين ، وكذلك داخل مجتمعات المهاجرين في الولايات المتحدة ، كندا ، اسبانيا ، ايطاليا ، ألمانيا والسويد والنرويج والمملكة المتحدة.

و أن مرتكبي هذه الجرائم بدافع الشرف يريدون محو كل مظاهر حياة هؤلاء النساء الشابات تماما ، كما لو أن هؤلاء النساء الشابات لم يكن خلقن من الاساس

عن شبكة ومينز اي نيوز

.memini.موقع

Monday, June 20, 2011

عن التحرش تاني من حواديت جدتي

كنت من الناس الملازمين لجدتي كتير تقريبا هي اللي ربتني وكنت بحب اسمع كتير حواديتها عمرها ما حكيت لي امنا الغولة او السندباد دايما كانت بتحكي لي حكاياتها هي شخصيا :

اول حكاية كانت لما خدت ابتدائية واشتغلت مدرسة كان في التلاتينات هي مش عارفة بالتحديد هي مواليد كام كانت عيلة صغير ايام ثورة 1919 ، المهم اشتغلت في المدرسة اللي اخدت منها ابتدائية ، كان في مدرس زميلها وكبير في السن ، وهي كانت المدرسة الوحيدة ، الانثي في المدرسة ويمكن المحافظة كلها (أسيوط)الاول زميلها دا مكنش طايقها وشايفها قليلة الادب ومش متربية عشان دخلت المدارس وهي كانت بتتريق عليه ، وبعد شوية بقي بيرخم عليها وبيشوه سمعتها وسط اهل البلد اشتكته للناظر مقدرش يعمل حاجة لان المدرس كان من عيلة كبيرة في البلد بعد شوية كان بيحاول يلاقي اي فرصة عشان يهزئها ادام البنات اللي معاها في الفصل .
ومرة كانت لوحدها ف استراحة المدرسين ودخل وهي حاولت تتكلم معاه وتسأله هو بيعمل كدا ليه؟
وهو برر دا ان الافضل لها تروح بيتهم وتشوف لها ابن عم يرضي يتجوزها ..ضحكت علي كلامه
قالها دا لو مكنتش متجوز اتنين كنت خدتك بالعافية وراح هوب ماسك ايدها راحت ضرباه بالقلم ورفعت الجزمة
وهددته انها هتصرخ استهزء بيها وقالها هتعملي لنفسك فضيحة وابوكي هيجوزك ليا عشان يستر عليكي
راحت سبته وخرجت وبعد كام يوم لاقي فوق دماغه مفتش التعليم معرفش بقي بتاع المحافظة ولا ايه المهم لاقي الريس بتاع التعليم عن الصعيد فوق دماغه مسح به الارض ووقفه ف فسحة المدرسة وخلاه عبره لمن يعتبر رفضده ورفد الناظر عشان معملوش حاجة لما هي اشتكت له
جدتي ببساطة بعتت تلغرافات لوزير التعليم في مصر والمسؤول عن التعليم في الصعيد

تاني حدوتة
كنا مرة مسافرين وراكبين قطار في الغالب رايحين الصعيد جدتي وخالي ومراته واولاده الخمسة وانا
كان قربنا ع العيد والدنيا زحمة قاعدين في اماكنا وحلوين وفجأة جدتي غيرت مكانها مع مرات خالي وقعدت هي ع الكرسي اللي من برا وكان في شاب قطقوط واقف وباصص ادامه ولا يمين ولا شمال وفجأه لاقيت جدته ماسكة فيه عند سوسة البنطلون
بأيد والايد التانية بطلطش فيه علي وشه

Sunday, June 19, 2011

حواديت عن التحرش الجنسي..متحرش اهبل بيتحرش بساق صناعية


عندي مجموعة حواديت عن التحرش سواء حصلت معايا او مع غيري او كنت شاهده عليها :

كنت فاكرة زمان اني اعتمادي علي عصاية بمشي اتعكز عليها هيحميني من التحرش ، وكنت بقول ان اي متحرش ممكن تاخدوا بيا اي شفقة ومش هيعمل معايا اي حركة تحرش ، مع اني مش من اللي بيقبلوا بالشفقة ، الا في حالات التحرش موافقة علي الشفقة واتمني رضاها كمان بس تيجي .

من سنة كنت ساكنة في الشيخ زايد جديد ، كان مشوار ، مكنتش بروح لوحدي ابدا، لحد ما يوم جوزي قرر يبات في المكتب ، وانا عملت فيها السبع رجالة ومسمعتش الكلام اني اركب تاكسي وقلت حرام الستين جنيه ، وكان في زحمة علي ميكروباس في عبد المنعم رياض ، قلت انا هركب الاتوبيس الجديد دا وخلاص وكدا كدا بيعدي عند بيتنا ، ركبت ف اول كرسي ع اليمين ع الحرف جنب واحدة ست تانية ، وبما ان السكة طويلة ، طلعت كتاب وبدأت اقرا واتسلي ، بدأت الناس تركب بس مكنتش زحمة اوي ، وفي راجل خمسيناتي وقف جنبي ومسك في العمود الحديد اللي قدامي ، بمرور الوقت حسيت بضغط علي رجلي الشمال (اللي هي ساق صناعية أساسا) المفروض اني مش هحس لو اتلمست لكن لو في وزن هحس بالضغط عليها ، وبما اني كنت منشغلة بالكتاب ، بدأت افقد تركيزي في القراية وبصيت فجأة للراجل اللي واقف ادام ، لاقيته عرقان ومش علي بعضه رغم ان الدنيا شتاء ، وفجأة لاقيته بيحاول ينط من الاتوبيس ، وانا ببص علي ركبتي اللي هي صناعي لاقيت سوائل بيضا ، مفهمتش ومستوعبتش لكن كل اللي كان في بالي للدرجة دي مش قادر تمييز اذا كانت دي رجل حقيقية ولا معدن وبلاستيك وسفنج؟

***** ##### **********

اغرب حالات التحرش بالنسبة دايما كانت التحرش بالعربية ، يعني المتحرش كان بيستعمل عربيته كأداة تحرش وكنت فاكرة اني انا لوحدي اللي بيتعمل فيه كدا ، اكتر واقعة مش ممكن انساها لما مرة كنت بعدي الشارع وكان في عربية راكنة ادام ، بعدي من ادامها لاقيت السواق طالع خطوة وخابطني قلت اكيد مش قاصد ، رجعت اعدي من وراه راح راجع خطوة لورا، قلت اكيد مش قاصد، وثانية راح رامي جملة من اياهم ، لاقيت نفسي بمسك العكاز اللي ف ايدي وبخبط به اول فانوس في العربية ، قال جملة تانية مصحوبة بشتيمة روحت نازلة ع الفانوس التاني وهكذا لحد ما اتهمني بأني مجنونة ، مردتش غير بضربة قوية من عصايتي في نص الباب الشمال وروحت ماشية .

بس من ساعتها وحاسة اني طالما عصايتي ف ايدي هاخد حقي من التخين ومن ساعتها بستعملها وقت اللزوم .

***** ****** ***** ***** *****
الواقعة اللي لسه قريبة ومش عارفة سببها بجد كان تاني يوم التنحي في شارع باب اللوق عند جراج الفلكي كنت بعدي الشارع ، العصاية في ايد وشنطة الكاميرا بتاعتي علي كتفي الشمال ، كنت شايفاه جاي من بعيد عربية كبيرة معرفش ماركتها جاية من ناحية الميدان وبيعمل غرز
انا قلت خليني في مكاني احسن مش هعرف اجري ، لحد ما جيه علي مسافة قريبة مني وهدي تماما انا قلت دا ابن ناس وبدأت اعدي الشارع
وفجأة اتحرك وانا ادام العربية لاقيت نفسي فوق الكابوت زي افلام الاكشن وقلبي انخلع نزلت بالراحة وانا رجلي مش شايلاني وبقولوه "ليه كدا؟ ما انت كنت محترم وواقف؟" راح شتم باللي قدره عليه ربنا ، واعترف اني رديت عليه الشتيمة بشتيمة "دي امك اللي كدا عشان تجيبلك اللعبة اللي انت راكبها "راح شاتم وهدد ينزلي من العربية عشان يوريني ، انا اتحديته انه ينزل لو شايف نفسه "دكر"، زميله اللي راكب جنبه قاله انت الغلطان راح ضارب صاحبه بالقلم ، قلت اخلع انا ، راح شاتم روحت كاسرة اول مراية علي الجانب اليمين من العربية بعصايتي ، راح نازل من العربية و هو بيشتم ومع كل شتيمة خبطة في العربية ، صاحبه هو كمان اتحمس وقرر يشتم وجيه ينزل م العربية روحت رازعة الباب بالعصايا عشان اثبته في مكانه ، الشابين اللي في العربية في الكرسي اللي ورا قرروا ينزلوا ، لاقيت عمال محل لوكس بتاع الكشري خارجين من المحل وماسكين سكاكين البصل وغطيان حلل وراحوا واقفين صف جنبي وحوالين العربية وقالوا للواد "لو هوبت ناحيتها مش هنسيبك" ركب عربيته زي البتاع وماشي .

من يومها بطلت اعدي اي شارع بركب التاكسي الابيض ويلف ان شالله يلف الكرة الارضية .

***** ***** **** *****

كانت واحدة صحبتي واقفة ادام بيتهم هي واختها بيحاولوا يوقفوا تاكسي ، مكنش في تاكسيات كتير ، فجأة عربية ملاكي سواقها ماشي تاتا تا تاتا و مادد ايده من الشباك وبيحاول يمسك صحبتي من "صدرها" هي لمحت ايده قبل ما تخبط فيها ، وكرد فعل راحت ماسكة ايده هو كمان هدي وتبت في ايدها ومسك جامد وساق العربية بالايد التانية وسحلها علي ارض الشارع لمسافة 100 متر !! معرفش جاب الجرأة دي كلها منين ؟

***** ***** ***** **** **** **** ***

كنت فاكرة ان اللي بيتم التحرش بيهم هم بس الستات اللي لابسة هدوم شفتشي لحد ما مرة كنت راكبة تاكسي ودخل شارع طلعت حرب و وقف في اشارة مرور وببص جنبي لاقيت واحدة ست منقبة منقبة يعني متغطي من راسها لحد رجليها ماشية هي وواحدة تانية معاها وفجأة واحد بيقرب منها جدا وبيمسك صدرها . انا اندهشت لمدة ساعة ، المسكينة فضلت واقفة متجمدة ف مكانها .

********* ***** *****

مرة كنت راكبة ميكروباص وكنا تلاتة ستات قاعدين جنب بعض ،البنت اللي كانت قاعدة جنب الشباك مكنتش علي بعضها طول الوقت كل شوية يا تلزق في الشباك، يا تحاول تقرب اكتر من الست اللي بيني وبينها ، فجأة مسكت ايد كانت بتحاول توصلها عبر فتحة ما بين المسند والكرسي اللي كلنا قاعدين عليه، مسكت الايد وصرخت ، صاحب الايد شتمها واتهامها انها هي اللي دخلت ايدها ومسكت ايده بالعافية ، الركاب ولاواحد فتح بقه، السواق بس هو كان صاحب القرار طرد المتحرش من عربيته، بعد ما الدنيا هديت شوية الست اللي كانت قاعدة بيني وبينها نزلت فيها بستفة وقالت لها "بنات الناس المتربيين ميفضحوش نفسهم ايه المشكلة لو كنتي سكتي؟ مش كنتي سترتي نفسك؟"البنت بدأت تعيط بصوت مكتوم وباصة ادامها مش قادرة تبص لها ، لاقيت نفسي بقولها يعني انتي لما بيفعصوا فيكي بتسكتي وترضي؟ معناها انك مش بتضايقي وان الموضوع عاجبك لو صعبان عليكي طرده م العربية انزلي حصليه.

Thursday, June 2, 2011

عزيزي المجلس العسكري ممكن نكشف عليك؟



عزيزي المجلس العسكري
عزيزتي القوات المسلحة
ممكن نكشف عليكم؟
ممكن نكشف علي عائلتكم؟
ممكن نكشف علي بناتكم؟
بما انكم مثال للديمقراطية والمساواة؟
بما انكم حريصون علي التواصل بينكم وبين الشعب
بما انكم حريصين تعرفوا كل معلومة تخص الشعب
الشعب هو كمان حريص يعرف كل حاجة عنكم وعن اسرار حياتكم
الشعب خلاص انكشف عليه و اتعرف ان نصه فيرجن والنص التاني مش فيرجن
بس الشعب لسه معرفش اذا كنتم انتوا كمان فيكم فيرجن ولا لاء
الشعب يريد الكشف علي عذرية المجلس



Monday, May 23, 2011

الجيش والجيش ايد واحدة



هو ليه من حق الجيش يشد اي واحد ويرميه ف المتحف ثم ع السجن الحربي؟

وعادي خالص ممكن يضرب نار علي متظاهرين واللي يموت يموت واللي يعيش يعيش
هو ليه من حق الجيش انه يحاكم مدنيين امام محاكم عسكرية؟

و ليه مش من حق الشعب انه يمارس رقابة علي اداء الجيش؟
وليه مش من حق الشعب انه يعرف حاجة عن الجيش؟

يعني هو الجيش دا او قياداته بالتحديد مش جزء من النظام السابق؟

يعني طالما في فساد في النظام السابق مش فيه فساد في الجيش؟

طالما في رموز للنظام السابق بيتم محاكمتها ولو صوريا ليه مفيش معلومات عن الفساد في الجيش؟

سؤال فاقع مرارتي هو ليه معظم المنظمات الحقوقية والمدنية و الناشطين اللي منهم كتير بيقوم بالتوثيق لانتهاكات المجلس الموئر

مش بتحاول تاخد خطوة لتقديم الانتهاكات للمحكمة الجنائية الدولية؟

وهو ممكن وجائز قانونا او حتي طرح بديل اخر للمواجهة

هل خايفين من اتهامهم بالعمالة؟ عادي ما هو دا اتهام موجود منذ الازل

هل شايفين ان دا بيهدد استقرار مصر؟


لو دا السبب انا شايفاه تستر علي الفساد مش الاستقرار
لو بندعو لتطهير لازم التطهير في كل حاجة لان


الحرية لا تتجزأ


دور وسائل الإعلام الجديدة في دعم الإصلاح في صلب اهتمام ملتقى الشباب الإعلامي 2011



يهدف ملتقى الشباب الإعلامي إلى تعزيز الحوار ودعم التواصل بين صانعي الإعلام من العالم العربي وألمانيا. لقاء العام الحالي سيعقد بين 24 و 26 مايو في القاهرة وسيركز على دور وسائل الإعلام الجديدة في دفع عجلة الإصلاح.
بدعوة من أكاديمية دويتشه فيله والمركز الألماني للإعلام في القاهرة يلتقى ثمانية عشر مدوناً من ألمانيا والعالم العربي في إطار فعاليات ملتقى الشباب الإعلامي الثاني المنعقد بين 24 و 26 مايو في القاهرة، حيث يتناقش المشاركون موضوع “وسائل الإعلام الجديدة والإصلاح في العالم العربي”. وسيختتم الملتقى يوم السادس والعشرين من مايو بمناقشة ختامية مفتوحة في جامعة القاهرة.
وسيتطرق الملتقى بشكل خاص إلى التغيرات التي أحدثتها الثورتان في تونس ومصر، حيث قامت القوى المعارضة بتنظيم نفسها عبر شبكات التواصل الاجتماعي وحشدت أعداداً هائلة من الناس. كما ساهم المدونون في كسر طوق التعتيم الإعلامي الذي حاولت وسائل الإعلام الحكومية فرضه اثناء الثورة. واليوم يطرح السؤال عن الدور الذي يلعبه المدونون بعد سقوط الأنظمة السابقة، وماذا يمكنهم فعله من أجل المشاركة في تجسيد الإصلاحات ومراعاة مصالح فئة الشباب فيها.
وبعد نجاح دورته الأولى التي انعقدت في أكتوبر من العام الماضي، سينضم إلى ملتقى الشباب الإعلامي الحالي في القاهرة ستة ألمان واثنا عشر مدوناً عربياً من مصر وتونس والجزائر وسوريا والبحرين وفلسطين ولبنان واليمن. وسيقوم المشاركون بنشر نقاشاتهم من خلال الموقع الإلكتروني لملتقى الشباب الإعلامي ومدوناتهم الخاصة.
وسيشارك تلفزيون دويتشه فيله DW-TV ARABIA في ملتقى الشباب الإعلامي من خلال إنتاجه لبرنامج حواري مدته ساعة واحدة يسمح للمشاركين الألمان والعرب بمناقشة جمهور من الشباب. وسيبث البرنامج في السابع والعشرين من مايو على قناة DW-TV ARABIA.
وإضافة إلى ذلك سيتقصى المشاركون مواضيع محددة مثل: مدى تغير علاقة المصريين تجاه دولتهم بعد الثورة، و أي دور لعبته المرأة أثناء الثورة، وما الدور الذي تلعبه الآن. وفي مناقشة ختامية مفتوحة سيعرض المشاركون نتائج الملتقى وسيناقشون جمهورهم فيها.
“الناس والإعلام في الثورة العربية”
“بين الفيس بوك وميدان التحرير وقناة الجزيرة: الناس والإعلام في الثورة العربية” هو عنوان المحاضرة التي سيلقيها مدير المشروع في أكاديمية الدويتشه فيله يانس أوفه بجامعة القاهرة في السادس والعشرين من مايو في إطار فعاليات ملتقى الشباب الإعلامي 2011.
ويقول يانس أوفه راهه في هذا السياق: “لقد تغير الوضع تماماً في مصر منذ آخر مؤتمر، مما يتيح الفرصة للمشاركين هذه المرة للتحدث بحرية أكبر”، ويضيف:”الكثير من المدونيين ومستخدمي الإنترنت يتساءلون عن كيفية مشاركتهم في إحداث تغيير في بلادهم ومجتمعهم على المدى الطويل.”
ويهدف ملتقى الشباب الإعلامي إلى تعزيز الحوار الثقافي والحضاري ودعم التبادل والتواصل بين صانعي الإعلام من العالم العربي وألمانيا. وينعقد بصورة سنوية بتنظيم من أكاديمية دويتشه فيله بالتعاون مع مركز ألمانيا للإعلام في القاهرة وبتمويل من وزارة الخارجية الألمانية.


الصفحة الالكترونية
الصفحة علي فيس بوك
علي تويتر

Wednesday, May 11, 2011

رأي فلاحات مصر في الثورة وأحلامهم للمستقبل










مدونة ارزاقيات الصعيد لمجموعة من فتيات الداوادية
احدي قري محافظة المنيا

http://orzqyat.wordpress.com/

Thursday, March 31, 2011

خريطة للتشبيك بين اللجان الشعبية :مصر دولة مدنية


خريطة اليكترونية للتشبيك بين عدد من اللجان الشعبية وبعض المبادرات الحرة .. بوسيلة اتصال لكل مجموعة ما بين تليفون او ايميل ، لتنسيق الجهود على الارض

الخريطة بها اغلب المجموعات التي تم رصدها في القاهرة والاسكندرية وقليل بالمحافظات الاخرى ، وتوجه الخريطة الدعوة لتنسيق الجهود مع المجموعات والجان الشعبية في باقي المحافظات

ايضا الخريطة ترصد لجان (لا) للتعديلات الدستورية بنسب 40% واكثر باعتبارها مناطق حاضنة للقيم المدنية والمواطنة

المزيد من المعلومات جاري تحميله علي الخريطة ..والدعوة عامة لرفع تقارير وهي خاصية متاحة للزائر العادي .. املا في اثراء محاولة التشبيك

لمشاهدة الخريطة اضغط

الفن ميدان


السبت 2 ابريل 2011 من 12 ظهراً إلى السابعة مساءً

احتفالية ثقافية في ميادين وشوارع مصر


القاهرة – الاسكندرية – أسيوط – السويس – المنيا – بورسعيد


يتشرف ائتلاف الثقافة المستقلة بدعوة العائلات والشباب إلى أكبر مهرجان ثقافي في مصر للإحتفال بثورة الشعب

المصري في 25 يناير والتأكيد على مطالبها والإستمتاع بالموسيقى والشعر والمسرح والفنون البصرية والمشاركة في

ورشات فنية وأنشطة للأطفال والشباب. فيما يلي المواقع وبعض الفنانين المشاركين:


القاهرة: ميدان عابدين – علي الحجار، فتحي سلامة، رامي عصام، زين العابدين فؤاد، أمين حداد، خالد صالح


الاسكندرية: ش شيجابي بجوار أوبرا سيد درويش – فرق ستورم وستيشن وكراكيب، ورش فنية ومعارض


أسيوط: ميدان البنوك – أوبريت الثورة، فرق مسرح بدايات والعلبة وأجيال، فرقة دافميز للراب، كورال كنيسة سانت تريز


السويس: أول السور – أحلام، فرقة قصر الثقافة للسمسمية، محمد كشك


المنيا: كورنيش المنيا – كورال الصعيد، فرقة ملوي للتحطيب، فرقة مسرح الجزويت


بورسعيد: ميدان الشهداء (المسلة) – فرقة أولاد المرسي للسمسمية، فرقة الائتلاف الشعبي للغناء والموسيقى

Sunday, March 20, 2011

اعتصام 60 من ذوي الاحتياجات الخاصة امام مجلس الشعب بعد تفريق الجيش مظاهرتهم بالقوة

تحديث

محاولات من اللواء المسؤول عن تأمين رئاسة الوزراء لفض الاعتصام ومحاولة اقناع ذوي الاحتياجات الخاصة بأن في قرار ممضي من عصام شرف لدي الامين العام المساعد لمجلس رئاسة الوزرا ب20 شقة في محافظة الجيزة وعدد من الاكشاك والمعتصمين رافضين يمشوا



بدأ اليوم مجموعة من ذوي الاحتياجات الخاصة اليوم وال12 ظهرا وقفة احتجاجية امام مقر رئاسة الوزراء احتجاجا علي تغطية الصحف المصرية للقائهم الاسبوع الماضي برئيس الوزراء وعصام شرف ووزير التضامن الاجتماعي حيث تحدثت الصحف عن الترحيب بهم والاستماع لمطالبهم في حين انه حدث العكس وتقريبا تم طردهم .(حسب شهود عيان)
في الواحدة بدأ تحرش الشرطة العسكرية بهم رغم وجود حالات من اصحاب الشلل الرباعي الذين كانت لهم مطالب خاصة بالسماح لهم بشراء سيارات مجهزة لانه يوجد حظر علي هذه الفئة في الشراء وكذلك الصم والمكفوفين .
في الثالثة تم فض وقفتهم بالقوة الجبرية من قبل الشرطة العسكرية واحتجاز عدد منهم داخل مقر مجلس الشعب ثم الافراج عنهم بعد ساعة
ثم حاول بعضهم تنظيم انفسهم مرة اخري لعمل مسيرة حاملين نعش كتب عليه اكرام المعاق دفنه
قرر الان 60 منهم المبيت امام مقر مجلس رئاسة الوزرا لعل وعسي

هنا تقرير الائتلاف المصري حول صعوبة مشاركة ذوي الاحتياجات الخاصة في الاستفتاء


Thursday, March 17, 2011

لا للتعديلات الدستورية




هنقول لا للتعديلات الدستورية

علشان
الثورات تجٌب ما قبلها

1
مش معقول تكون ثورتنا دي كلها لم تسقط الدستور ودستور 71 ليسة لازق فينا

2
علشان التعديلات محدودة و وبتضرب حقوق المواطنة في المساواة والمشاركة

3
علشان جقنا نبدأ من جديد ونستعيد ثقتنا في التغيير

4
لان اللجنة الدستورية للتعديلات لم تمثل كل التيارات السياسية

5
لان ولا تغيير الدستور ولا حتى تعديله هو يخص الخبراء اصحاب الحرفة فقط انما مطلوب يشارك كل من هو على درايه بالمجتمع وثقافته وقيمه

6
لاننا من حقنا تكافؤ فرص في كل حاجة ومنها حرية العمل السياسي و الجماهيري خاصة واحنا على مفترق طرق

7
لان خطوات الوصول للجنة تغيير الدستور لا تضمن تمثيل كل المصريين

8
لاننا عندنا البديل بص فوق ... فيه رسم بيوضح طرحنا للبدائل في حالة لا ومصر مليانه كوادر ورموز وطنية ومحترفة كتيييير

9
لاننا وثقيين في نفسنا وفي ثورتنا..، وثقتنا بتقول هنغيير مش هنعدل

10
دا غير مهام رئيس الجمهورية اللي متغيرش فيها حاجة


Saturday, February 5, 2011

LIVE news Feed From Egypt تابع الاخبار هنا



تابع اخبار اعتصام مصر في ميدان التحرير

من موقع
LIVE news Feed From Egypt

Tuesday, February 1, 2011

من اخبار امبارح بالليل





دعي بعض الناشطين في العاصمة الاردنية عمان ، الف أردني للتظاهرة اليوم أمام السفارة المصرية في عمان ، ودعو الي ألفية أردنية للتضامن مع المليونية المصرية
***** **** ******** *******

منذ ساعات والقناة الاولي والفضائية المصرية تتلقي مكالمات ممن يدعون انهم مواطنون مصريين مكالمات

تهاجم المتظاهرين المصريين وتتهم بالتخريب كما تتهم باقي القنوات الفضائية التي قامت بتغطية اخبار المظاهرات بالشماتة وعدم الحيادية، واشعال الاحداث ، كما اجري التليفزيون المصري مجموعة من المكالمات مع الفنانيين المصريين مني زكي واحمد حلمي واحمد السقا ويسرا ورجاء الجداوي، ومها ابو عوف وعزت ابو عوف رئيس مهرجان القاهرة السينمائي الذي اتهم جنسيات اخري بالمشاركة في المظاهرة ونقيب السينمائيين مسعد فود ةواجمعوا علي تأييد مبارك واستعدادهم علي الخروج في مظاهرة غدا لدعم مبارك من مبني التليفزيون وتوجيه الاتهام للمتظاهرين علي انهم ناكرين لخير مبارك وضرورة اعطائه فرصة اخري مؤكدين علي ظلام المستقبل والفوضي التي ستعم اذا رحل مبارك عن مصر ، كما طالب التليفزيون ضرورة ان يخرج فناني مصر العظماء خاصة النجم محمد منير وعمرو دياب بالخروج في مظاهرة غدا لدعم مبارك ، وتوعية الشباب المصري .

***** **** ******** *******

قامت احدي شركات التي تقدم خدمة التليفون المحمول الكبري باعطاء موظفيها جميعا غدا الثلاثاء اجازة ، بسبب مظاهرة غدا ،

وكذلك قررت الشركة قطع الخدمة عن مصرخلال الساعات القليلة القادمة

***** **** ******** *******

اذاعت القناة الفضائية المصرية لقطات من مظاهرة تقف امام مبني الاذاعة والتليفزيون بها بعض "المواطنين"واحد ممثلي الصف الثاني هشام المليجي ، ونقيب المهن التمثيلية، لدعم مبارك وأدلي كلا منهم بتصريح للتأكيد علي ان من يجلسون في ميدان التحرير هم "قلة مندسة"تعمل علي التخريب و التدمير لاعطاء فرصة لاعداء مصر الطامعين في الحكم .

Sunday, January 30, 2011

اخبار النهاردة من ميدان التحرير





بعد تصريحه اول امس لقناة الجزيرة انه سيحاول اختبار رد فعل الامن حيال


خرقه للاقامة الجبرية اخيرا قرار

النزول الي الشارع ليكون مع المتظاهرين البرادعي


في ميدان التحرير ، واعلانه عن حكومته الوطنية ، ربنا يهديه وميكونش


اتحالف مع الاخوان قبل ما ينزل


***** **** ******

\طالب مجلس ادارة تحرير الاهرام كبري الصحف القومية في اجتماعه افي

الساعات القليلة الماضية مبارك بالرحيل


***** **** ******

يجتمع الان حوالي 150 الف مصري في ميدان التحرير واستمرار التظاهر ، والجيش المصري

يعلن تضامنه مع الشعب وانهم في حمايته ويحبط عمليتين شغب ويقبض

علي عنصرين منالشرطة السرية اندسوا لاثارة الشغب

***** **** *****


الجماهير المعتصمة في التحرير تحاول تجميع 2 مليون مصري في


الميدان يوم الجمعة الجاية


follow Us in Arabic and English


Tuesday, January 11, 2011

سميرة صادق عوض ..مسيحية بس كويسة

سميرة صادق عوض...

، محتاج تمشي كتير في اسمها علشان تعرف انها مسيحية، أو ببساطة لأنها مش محجبة

..

أخذت أتأمل في ملامحها ولفتاتها، ربطة شعر بسيطة.. الشيب يتسلل من قبضة الصبغة..النظارة المستديرة. لم يكن هذا الجسد النحيف، والسنة المكسورة باعثا لأية نظرة شهوانية، لأي أحد على الإطلاق، ولم تكن ببعيدة عنا لأمكث فجأة متأملها أحفظ تفاصيلها..

" جاي امتى يا خالد..أكيد..مش عايز حاجة؟..مش عايز حاجة؟"

شيء بداخلي تعجب لـ"مش عايز حاجة؟"، فالملابس التي أصبحت جزء منها والجوارب البالية والحذاء العتيق..وحتى الموبايل الذي يرضع من الشاحن طيلة اليوم..وأيضا سنواتها الأربعين بدون حلقة في أصبعها.. تجعلها "هي" "عايزة حاجات"

لكنها كانت تقولها " مش عايز حاجة.." باختلاج غير عادي..لم يقطعه سوى ضحكتها "..يا واد اتلم..ما تعوقش..".. ثم عادت لاختلاج لا يكتنفها كثيرا.. ليقطعه من جديد صوت الطلبات المعتاد.

سميرة..ناوليني المية

سميرة.. والنبي لونزلتي تقبضي اقبضي لي معاكي

سميرة.. ماتشوفي لي جمعية علشان الطقم بتاع إيمان

سميرة.. انتي قلتي لي هتنزلي معايا درب البرابرة علشان النجفة والأبليك

سميرة.. أنا جربت الغرز اللي علمتيها لي امبارح وشلة الخيط كلها باظت

سميرة..مش عايزة تاكلي..تعالي ننزل نجيب سندويتشات.. بحق..انا هسيب عبدالرحمن معاكي بعد بكرة علشان هودي ماما التأمين الصحي اللي في السابع..

"حاضر".."حاضر" بعدد ما نودي اسمها. ورغم ذلك يظل لديها ما تبقى لتقول "مش عايز حاجة؟"..بالطبع لم تكن كما قالتها لخالد..ولكنك تشعر أنها ليست مجرد كلمات

***

في شاحن تخين

مع سميرة

هي فين صحيح كنت موصياها على طحينة سايبة

انهاردة ايه

الحد

تبقى في الكنيسة

ايه ده.. هي سميرة مسيحية

أه.. بس كويسة قوي

***

فوجئت بالمصادفة بمكتبتها..أو بالأصح مكتبة والدها، وفوجئت أنه كان يكتب في "الطليعة".. حرصها الشديد على العناية بالمكتبة وبترتيبها لا ينبيء مطلقا أنها لم تقرأ فيها سطرا سوى اسم والدها في مقالات متفرقة تعرضها عليك..

لم تكن تلك المكتبة الضخمة.. ولا التاريخ الناصري لوالدها كافيين لأن أنجح في توطينها وسط البلد.. ولا المقالات التي حملت كلمة "أقباط".. كانت قادرة على تغيير كلمة مسيحية من لسانها..

***

كلامها عن "خالد" شيء آخر.. حياته وشغله وذكرياتهم، ومشروعات الخطوبة الثلاثة التي "مشيت له فيهم" وفشلوا..صورة تفصيلية لعلاقتها بخالد..لكنها لا تكتمل، بالقدر الذي يسمح لقلمي أن يؤلف قصة حب ممنوع بين قبطية ومسلم. فهي حتى لم تقل اسمه الثنائي.

صوتها يتلاشى وهي تواصل الحكي..بينما أغرق في تأملها..

حقا لم تكن بعيدة..لأهتم فجأة بملامحها

حقا..إن أشخاصا يكونون أحيانا أقرب من أن نضعهم صوب عدساتنا

***

شوفتوا اللي حصل امبارح

ايه..موضوع الكنيسة بتاع امبارح

بيقولك 23 واحد ماتوا ياعيني

بيقولوا فيهم مسلمين

الداخلية قالت ارهابيين من برة

بس بس.. سميرة جاية

وايه يعني..أيه ده .. هي سميرة مسيحية.. والنعمة.. بس دي كويسة قوي.

(11/1/2011) الجيزة

ملحوظة:

البوست دا لم تكتبه زنزانة بل الصديق دكتور محمد حسني كتبه كنوت علي الفيس بوك

وسمح لي باستعارته هنا لنك التدوينة علي الفيس بوك .