Wednesday, June 6, 2007

اسلاك نبيه عاشر: مش تغطية خالص

أمبارح مكنش ليا نفس فعلا اكتب عن المحاكمة وفضلت مش مهتمة خالص اني اكتب اي تغطية معرفش ليه؟
لو عاوزين تغطية في ناس كتير عملوا دا افضل مني ممكن تتابعوها هنا ثانية بثانية، او
مفاجأت ممكن تفعصوا هنا بالنسبة لي انا كنت مركزة مع تفاصيل تانية خالص
انا كان اول مرة اروح محكمة اقصد جنايات حتي وانا رافعة قضية
ع الحكومة ولا مرة روحت ومش رايحة
أول حاجة خضني السقف العالي بتاع مبني دار القضاء العالي
وكمية البشر والامن وسي سعيد جميل محامي المتهم رايح جاي وماسك الموبيل
ووشه احمر ومربرب ومنتعش جدا وبيقول "أطمن يا حبيبي خير متقلقش كله تمام"طبعا
كان باين بيكلم مين؟
أول حاجة شفتها بعد كدةظابط كدة علي كتفه حاجات كتير مراقب قالي انه رتبة كبيرة جدا
بس الظابط دا مكنش شرطة دا كان قوات خاصة ولابس
اسود ف عز الشمس والحر، بيعمل ايه ف المحاكمة ؟ معرفش
قعدت ف اول مكان شفته فاضي بعد شوية ست كبيرة ف السن
أستأذنت اوسع لها قمت لها ثانية وجات واحدة تانية قعدوا جنب بعض
غصب عني سمعت كلامهم ان الست العجوزة الاولانية بنتها عفاف في القفص
لقيت نفسي ببص للست وهي بتحكي ان بنتها اتلفقت لها قضية مخدرات من محمد حامد
ظابط في قسم بولاق الدكرور يا دي القرف تاني بولاق الدكرور واسلاك نبيه
الست دي كانت شاهد علي تعذيب مواطن مصري هو كمان كان جوا القفص
متلفقة له تهمة ،اللي متلفق لهم بقوا كتير جدا
الست العجوزة بتحكي وعمالة تتلفت حواليها بتحكي لي وخافت مني وانا بسألها عن التفاصيل
وكل شوية تقولي بلاش اسمي يا بنتي دا احنا غلابة
يا نهاري احنا بقينا دولة امنية للدرجة دي كل واحد مرعوب يفتح بقه
دا فكرني بالظبط بالعراق أثناء الحصار كنت في زيارة سنة 1999
الكل يا بيتجسس علي كله أو ان الكل خايف يفتح بقه
احسن باقي الكل يفتن عليه
المهم لما دخل سيادة المتهم قعد في القاعة مش القفص بما انه دفع خمسين جنيه
يا رب تكون الداخلية هي اللي دفعتهم
تخيلوا كان مين بيحرسه؟ عساكر عاديين وظباط ومخبرين بملابس مدني
وبلطجية اه والله بلطجية يعني هتلاقي كذا واحد عنده علامة ضرب وخناق في سحنته
كمان عناصر من القوات الخاصة بملابسها السودا والعصيان
وزي ما انا روحت اتضامن مع عماد نبيه برده لاقي اللي يتضامن معاه
ظباط تانيين متهمين سابقين في قضايا تعذيب وظباط تانيين
لم يوجه لهم اتهام رغم ان في فيديوهات متداولة لهم
اسلاك المرة دي كان خاسس ومتنشن حبتين ابوه والمحامي كانوا بيحاولوا يخرجوه من المود
وبيهزروا معاه، ولما عماد قعد ف البنش اللي قدامه ، جه افراد امن وطلبوا منه
انه يغير مكانه ، معرفش مين قال الجلسة سرية؟
الكل يخرج ويفضل الصحفيين والاعلاميين كانت نكتة بالنسبة لي ومفهمتش هو يقصد ايه؟
الست العجوزة جنبي مش عاوزة تخرج عشان بنتها فضلت اقولها انها هتدخل تاني بعد شوية ومتخفش
فضلت ف مكاني لحد ما جه مخبر يقولي الكارنيه يا انسة؟ قلت له أمن..سابني ومشي
جه واحد تاني قلت له مفيش انت فاكر ان كل صحفيين مصر معاهم كارنيهات؟
راح قالي خلاص خليكي انتى غاوية وجع دماغ انا ممكن اريحك واجيبلك تفاصيل الجلسة لحد عندك برا
هههههههه مفهمتش بس المهم فضلت قاعدة والوقت يمر ومفيش حاجة
بعد شوية الجلسة بدأت الجلسة والنيابة قررت تعرض فيديو التعذيب ولاقيت نفسي جنب عماد
سديت وداني من سماع الاصوات المصاحبة للفيديو لاني لحد دلوقتي مشوفتش الفيديو
ومش عاوزة اتفرج عماد حالته طبيعي انها تكون صعبة ومش بيردد غير حسبي الله ونعم الوكيل
ترافع رئيس النيابة وكنت سعيدة جدا بالمرافعة وكان نفسي
اقوم واسلم عليه واعمل زي فيلم ابو علي بتاع كريم عبد العزيز ومني زكي
واقوله "ممكن كارت منك يا بيه عشان لو الواحد
جري له حاجة في البلد دي واحتاج حد يقف جنبه" اه والله بجد
ساعتها سعيد جميل محامي المتهم وشه كان اصفر بدل احمر ومربرب وفي الارض
بدل الانتعاش والهزار اللي كان ف الاول، موت م الضحك من عسكري جه وقف
قدام رئيس النيابة بضهره ومش راضي يتحرك الا لما البيه الظابط يأمره
ولا لما حاولت اتني العصايا بتاعتي والظابط اللي ورايا فاكرجواها سلاح ههههههه
كنت مبسوطة بخضته وجبنه ضحكت لما جاري ف البنش وهو محامي مهتم انه يحضر القضيةقالي
انه دردش مع سعيد جميل واللي اتفشخر فيها سعادته وقاله انه هيركز في مرافعته
ان الهدف من القضية ضد اسلاك هي تشويه سمعه مصر ولاخراجها من مجلس
حقوق الانسان العالمي اللي دخلته عن جدارة...
رفعت الجلسه للاستراحة فضلت اتجول شوية مع الناس ونشوف باقي الناس اللي في القفص
خصوصا عفاف كل جيرانها كانوا مرعوبين ومش عاوزين يتكلموا كل
ما اسأل عن حاجة انا وسكوت هنصوت خلاص ما بقينا دولة مخبرين
بلاش مخبرين خليها بوليسية اشيك بدل ما حد يقول اني بشوه سمعة مصر
جيت اخرج لاقيته قدامي برزالته وايده علي كتفي
وبيقولي "لو دخنتي تاني في القاعة هعمل لك محضر" ظابط غتيت
من باب الرخامة مع ان الناس كلها كانت بتدخن اثناء انتظار بداية الجلسة
وانا خارجة شفته تاني ظابط القوات الخاصة وبيقول لعسكري
يلا يا حيوان اجمع زمايلك واتلقحوا في العربية
غير المدونيين احب اشكر نهي ، هي ولا مدونة ولا صحفية
هي طالبة هندسة عادية جدا زيها زي كتير من بنات مصر كانت بتحكي ومبسوطة جدا
انها بتحضر جلسات القضية من مارس وان دي اول قضية تهتم بها ف حياتها
الف تحية لنهي وفي انتظار ايميلها
الصورة للمبدع عمرو عبدالله كنت لاطشتها من مدونة كفاية حرام كنت كل مرة انسي اقول

25 comments:

شـــــهــــروزة said...

هههههههههههه
فكرتينى باللى كان بيركب أتوبيس ويتهرب من التذكرة
الكمسارى يقوله تذاكر
هو يرد ويقول....بوليس


وانتى تقوللى للحارس ...أمن

ههههههههههههه

===============
امبارح فى القاهرة اليوم
عمرو أديب أشاد جدا هو ومن معه بأداء النيابة فى تلك المحاكمة ولأول مرة

وكمان أتوردوا نقطة مهمة جدا محدش من القضاة سمعها ولا أخد باله منها والا كانوا حاكموا اسلاك بدل المرة عشرين

سجين فى قفص الاتهام اول ما شاف اسلاك داخل القفص قام ونطق الشهادتين وشكر الله أنه اخد له حقه من اسلاك وعاش لحد ما شاف انتقام الله منه

لأنه فى القفص ف اللحظة دى بسبب قضية لفقها له اسلاك فى قسم الشرطة


قضية مخدرات

أحمد عبد الفتاح said...

رائهع يارانده
تغطيتك متميزة
كونك انك تركزي عالجوانب الانسانية في الجلسة والملاحظات الدقيقة الي بعشقها ده فده شئ رائع
وياااااااااااااااااااااااارب الجلسة الجاية ابقي حاضرها عشان اشوف اسلاك وهو واخد 6542864684 سنة سجن

.:.-=- ELGaZaLy-=-.:. said...

السلام عليكم يا راندا


هقولك بيعمل اية ضابط القوات الخاصة

الى هوا مش قوات خاصة اصلا...

دول يا امى جهه فى الشرطة خاصة بمحاكمة الضبط محاكمة عسكرية... فى واحد بيبقى متولى المتهم علشان يتابعة..

غريبة انك مش عارفة دة


انتى بتكتبى اسلاك قاصدة بقى...؟

انا كنت فاكرها غلطة كيب ورد علشان كدة قولتلك فى الرد الى قبل كدة يعنى هوا اسمة اسلاك...بس انتى احسن منة فى حجات كتير طبعا

وى حاجة غريبة اوى هنا بقى...ان الضباط الى ليهم نقاط سودة فى ملفاتهم

بيتحدو مكونيني رابطة غير معروفة المصدر

بالتعاون مع شوية بلاطجية

لحد هنا انا مشيت معرفش انكم قعدتو وكدة كرانية النقابة بيعمل شغل بقى

وكدة كمية التفاصيل الى بتزودنا بيها بجد رهيبة

ربنا يكرمك يا راندا يارب

zenzana said...

شهروزتي

فعلا بما اننا شعب فهلوي فكان الفهلوي الناصح اللي يقدر يلطخ المخبر علي قفاه

لالا موضوع الراجل اللي كان ف القفص مش زي ما قالوا ف البرنامج واتحدي اصلا لو حد صوره
لان الراجل في ثانية علي صوته اثناء مرافعة النيابة وكلم القاضي مباشرة وقال يا بيه انت العدل علي الارض دول عذبوني وبهدلوني من الساعة خمسه لخمسة وعمودى الفقري بأصاباته يشهد كان الظابط وصل له في القفص وخرجه ورجع تاني لما الجلسة خلصت
ولما كان الراجل بيتكلم كانت قاعة سكوت عشان تسمع والقاضي سمع كل كلمة والجميع انتبه

zenzana said...

تاح
انت فين؟
الجلسة بكرة يا عم سيب الامتحان وتعالي

شكرا يا فندم اخجلتم تواضعنا
انا بس حبيت ارصد تفاصيل غير اللي اهتم بها الزملاء اللي فعلا عملوا جهد جبار

zenzana said...

غزالي
شكرا يا فندم انك قلت اسمي صح

شكرا كمان لمعلومة الظابط انا فعلا معرفش كان ليه؟
مفترض ليه اني اعرف كل حاجة؟
نوارة قالت اني اعرف ابليس مخبي ابنه فين اديني قابلت ابليس نفسه ومعرفتوش
طبعا يا فندم قاصدة اسلاك لاني بصراحة مش هقدر اشتم او اقول المجرم العنتيل وكل الحاجات دي دا غير اني ههتم بحقوقه الانسانية كمجرم اثناء المحاكمة
معلش اصلي محبكاها حقوق انسان شوية

كان نفسي تكمل البوست للاخر خصوصا اخر سطرين اللي فيهم تفاصيل حكاية نهي
تحياتي

sokoothansawat said...

رندا...رغم اني كنت هناك...لكن استمتعت قوي بالبوست ده...كان نفسي تعرفيني على نهى...كان نفسي اوريها للمحامي..الي مكنش مصدق ان الشعب فيه ناس عايشة زي نهى...الف تحية لنهى..امتى هنضمها لعالم النت بقى...

zenzana said...

سكوت هنصوت
لا والنبي خلي البنت ف حالها
هتصعب عليا قوي والله لو دخلت العالم الافترائي

شكرا يا فندم انا قريت البوست عندك بس السلكة كانت زفت تلات مرات والتعليق يطير بس هرجع له تاني

REEMOO said...

أنا قريت التغطيه بتاعه المحكمه فى مدونات كتير
بس تغطيه كانت أول واحده أكملها للآخر بجد
عجبتنى جدا مش قادره أقولك قد ايه
دى مش تغطيه لمحاكمه على قد ما هى نظره خاصه لقاعات المحكمه والعلاقات الانسانيه والمفارقات الجتماعيه داخلها
زى اللى بيكتب عن جزء من مجتمع داخل المحاكم بنظره خاصه جدا وطريقه سرد خليتنى اتخيل كل كلمه كتبتيها
احييكى بجد على البوست
احترامى وتقديرى يا راندا

بحب السيما said...

جميل اوى ياراندة البوست
الناس كلها اتكلمت على وقائع المحاكمة وانتى اتكلمتى على اللى فى رأيى اهم من الوقائع اللى ممكن نشوفها فى اى برامج من برامج الرصد اليومى اللى بقت موضة الفضائيات بس الحالة الانسانية الجميلة ديه اللى اقرب للحدوتة ماكانش ممكن نشوفها الا معاكى فشكرا ليكى .. على فكرة انا اختى اسمها نهى وفى هندسة برضه

اتفضل عندنا said...

والنبي يا راندا بحلفك بالغالي لا تعرفينا اخبار كلب الحكومه ده اول باول، انا بقيت حاسه زي ما يكون التار بيني و بينه، ربنا يحرق قلبه

BeLiEvEr said...

قولتى للمخبر أمن و صدقك؟!!
:)))

أجمل حاجة فى البوست هى ’نهى’،لسه فيه ناس عادية عندها امل

zenzana said...

remoo

شكرا جدا جدا ليكي
انا مكنتش متوقعة ان ممكن حد يكمله لانه مفيش سرد لوقائع الجلسة لاني كنت عارفة انى في زملاء اشطر مني في دا
رغم انى كنت عاملة ورقة بتسجيل الملاحظات والوقائع بس سبتها اول ما بدأت اكتب

تحياتي
استمتعت بكلماتك الرقيقة ع المدونة وكمان الصور علي المدونة التانية

zenzana said...

بحب السيما
انا بحب الفيلم دا قوي

شكرا جدا جدا انا سعيدة جدا بزيارتك
ومتابعة تعليقاتك عند الاستاذ خان
كمان شوفت مدونتك اصلي بحب السيما لكن اخري انى اتفرج بس لكن معرفش اتكلم عن الفيلم
متشكرا لك جدا
ويارب متكونش اخر زيارة

zenzana said...

اتفضل معانا
فينك يا ستي؟
غايبة ليه؟
من عونيا انتى عارفة اختك امن
هههههههههه
يا رب اشوف فيهم يوم

zenzana said...

بليفر
ايوة يا فندم تحب تشوف الكارنيه؟
طبعا صدقني بما انه اغبي من رئيسه
اللي دخل مخابز الشوربة أكاديمية الشرطة سابقا يعني
بخمسين في الميه يبقي المخبر بقي مخبر بكام في الميه؟

نهى said...

ايه الكلام الكبيير قوى ده يا راندا
الناس افتكرتنى حاجة وانت عارفة اللى فيها ....ههههههههههه
انا افتكرتك بتهزرى فى الميل بتاعك لما قلتى انك كتبتى عنى
على العموم تحياتى بجد لكل الناس اللى عندك وانا مش حالة شاذة خالص بالعكس اللى زيى كتير بس مش عارفين يعملوا حاجة
وطبعا
انت مينفعش اقولك مجرد تحيات
.......قولى قبلات

zenzana said...

نهي
اللي اعرفه انك انسان خلص الامتحان وخبط المشوار وجه
رغم انه مش صحفي ولا مدون ولا قريب عماد ولا يعرفه ودا كفاية بالنسبة لي اعرف معدنك بيه
صحيح في ناس تانية زيك بس انتى اللي قابلت اتمنى اقابل غيرك ولو انى مش بعتب ع الناس خالص بمشاركتهم في حاجة زي دى او حتي مظاهرة
الف تحية تانية
:)

Xee said...

حلوة نوعية التغطيه دي جدا


والله يا ابلتي كان نفسي اكون معاكم، بس انتي عارفة بقى المترو بتاع الخرطوم و عكننته

:)


تحياتي

amy lee said...

هم هيفضلوا ياجلوا كده كتير
مايخلصونا
الموضوع مش محتاجه مرافعه

ibn nasser - ابن ناصر said...

تغطيه رائعه فعلا ..
تحياتي

zenzana said...

شكرا يا زيزو

طبعا عارفة انت هتقولي عليه عندنا زيه بالظبط
:)
شفتك عند تماحيك كانت تماحيكك حلوة
روح اقرا بتاعتي
نياهااااا

zenzana said...

amy lee
مش عارفة والله
انا الفار دأ يلعب في عبي

ربنا يستر

zenzana said...

ibn nasser

شكرا يا فندم نورتنا
فينك من زمان

Anonymous said...
This comment has been removed by a blog administrator.