، من اول ما دخلت الجامعة ولحد دلوقت وانا مبتجندش عدي عليا كل الالوان ايشي اخوان ايشي ناصريين ..ايشي اشتراكيين وغيره ،في الجامعة في الغالب مكنتش ببقي فاهمه اوي هي الناس دي لابسه شارة الحداد ليه وقاعدين تحت القبة يندبوا ويجعروا ،
او هم ليه الاخوان ماشيين في طوابير مرصوصه رص وواحد بس بيدعي والرجالة بس وراه اما الستات علي بعد مترين تلاتة ماشيين زي المعيز ووشهم ف الارض وشايلين يفط وولا حد سامع لهم حس .
يمكن بدايه من سنة 1998 يا ذكري نكبة فلسطين او ذكري الانتفاضة الفلسطينية الاولي بدأت انزل مظاهرات كان بيبقي في معارض او مظاهرات كنت بقول وماله دول اهلنا من غير ما ابقي تبع
حد خصوصا اني كنت بروح الجامعه مواسم
اما اصحابي ، فهم من كل الاتجاهات ومنهم العيال بتوع المظاهرات
، والعيال اللي بروح معاهم السيما بس ، وهكذا لحد السنة اللي فاتت بنزل مظاهرات وبتناقش ع القهوة وبتابع الاخبار واقري جرايد واحيانا كنت بكتب في بعض المجلات واحيانا هنا ع المدونة
سمعت عن تأسيس كفايه لما كنت مسافره ولما رجعت كانت كفاية بقت كفاية ...خلصت او اتشفطيت ، يعني لحقت الكام مظاهرة اللي في الاواخر ، وبعدها سمعت عن 6 ابريل ويمكن اكون غلطانه كنت ومازلت شايفة ان اضراب 2008 هو اضراب عمال المحلة اللي وقفوا الماكينات وان والاضراب اللي حصل في القاهرة مش اضراب لانه حصل يوم الاحد وهو اجازة ف وسط البلد ومحستش به في امبابه لان ولا عمال بطلوا يشتغلوا في مصانع ولا حاجة لان معندناش مصانع ف امبابة اصلا الا المطابع الاميرية ومصنع الشوربجي اللي تم خصخصته من سنين التنين .
معرفش ناس كتير من 6 ابريل يتعدوا ع الصوابع وشوش من المظاهرات او الجرايد ومقدرش اقول اننا اصحاب انتيم
وكل النجوم اللي في الاعلام معرفش منهم ولا نفر بعرف شوية من شباب المحلة او طنطا اللي من خلال الورش اللي كنت بحاضر فيها في الاقاليم ، ومكنش فارق معايا اعرف اذا كانوا بيفهموا سياسة ولا لاء .
لكن من بعد 2011 و25 يناير كل ما اروح ف حته الناس بتتعامل معايا علي اني 6 ابريل :-
اول مرة لما قررت اعزل من عند وزارة الداخليه ولاقيت شقه في شارع محمود بسيوني بعد ما اتفرجت والشقة عجبتني واتفقنا الست قالت للسمسار لا دي شكلها من 6 ابريل ..احييه
مرة روحت البنك عشان اسحب فلوس وابلغ عن الكريديت اللي ضاع (كريديت المرتب)و اول ما وصلت ع الشباك الراجل اللي في الشباك اللي جنبي مبحلق لي و فضل يسب ويلعن علي 6 ابريل اللي اخروه وهو جاي من مصر الجديدة لوسط البلد وخلوا المرور زحمة ..يا بن العبيطة ما هو يوم اتنين اول الاسبوع والساعة واحدة الضهر ولما قلت طب وبتبحلق لي ليه وانت بتشتم وتسب ؟ قالي ما انتي6 ابريل وحبيت اسمعك ان انتوا اللي عاملين زحمة المرور ا!!
اخر مرة كنت في اسكندرية من اسبوع وراكبة العربية مع مجموعة من الاصدقاء ودخلنا ف شارع ضيق اللي فيه النادي اليوناني بتاع الابراهيميه بالصدفة كان الناس اللي اشتروه واقفين وبيقولوا انهم هيهدوه واحد من اصحابي اتحمس وقرر يصور المبني قبل هدمه وصور بعدها بدقيقة لاقيت واحد ضخم زي البغل وبيخبط علي ازاز العربية وبيقول ما هم دول 6 ابريل اللي كانوا بيجوا هنا يسكروا هم والبنات دول وراح مشاور عليا ...احححححححححححا
طبعا كان في شارع بحاله بيحاول يهجم ع العربية والصديق اللي نزل يصور المبني اتكسرت له العدسة .
الاسبوع اللي فات برده وانا في الطريق الي العريش عرفت بالصدفة انه عيد تحرير سينا ، واندمجت انا وصحبتي وبنتريق علي الاغاني اللي في الراديو وبعد ما نزلنا في الاستراحة و طلبنا شاي السواق قرر انه مستعجل وعاوز يمشي بسرعه اعترضنا وقولنا له دا احنا يدوب نزلنا م الاتوبيس راح قالك "انتوا شكلوا كدا 6 ابريل ومش هنسلك مع بعض " طب يا بني هو احنا مكتوب علي قفانا اننا 6 ابريل ؟ بعدين ولو 6 ابريل مش من حقنا نشرب شاي؟
طبعا دي عينة ايام الثورة زمااان مفيش سواق تاكسي الا ويقول او يلمح اني 6 ابريل وواخد منهم مرة قال شكلك فلول من بتوع 6 ابريل ، اللهي يهدكوا ، طبعا في حالات كتير كنت مضطره ادافع عن 6 ابريل ، ومرة قررت اكرشم لسواق واقوله ايوة انا 6 ابريل وواحد تاني لاقيت نفسي بدافع بكل هدوء واقوله لما هم جامدين كدا وبيوقفوا البلد علي رجل وبيخوفوا الحكومة وهم اللي عملوا الثورة وهم اللي في التحرير ومحمد محمود و رئاسة الوزرا ، طب ما نمسيكهم البلد ونخلص .
دا حتي في واحد منهم تاني يوم في اخداث محمد محمود نازلة م البيت علي باب اللوق في عز الضهر اول ما المواطنين الشرفاء فجأة وقفوا التاكسي بعرض الشارع السواق تطوع وقالهم انا مليش دعوة خدوها باين عليها 6 ابريل "..والامثلة كتيرررر
نفسي اعرف هو الختم اللي ع وشي نفس الختم اللي ع سحن 6 ابريل؟ هم بتوع 6 ابريل اخواتي التوأيم ؟
