الدور الاولاني اول شقة يمين

علي غير العادة صحيت بدري النهاردة، ومن غير صربعة نزلت ، الشمس كانت حلوةحسيتها بتلسع خدي، ولاول مرة من فترة طويلة كان في احساس بالدفا الصبح، وحفاظا علي حالة الهدوء والسكون النفسي (الذي دائما ما يسبق عاصفة اكتئباوية)و التأمل الفليسوفي والفرجة علي الناس في الشارع، وبما ان لسه في باقي بعد معرض الكتاب قررت اركب تاكسي ،متهورة بقي وعلي ناصية الشارع شاورت للتاكسي، وقف لي و لسه باتحرك افتح الباب لقيته علي بعد خطوتين، كان بيشاور للتاكسي نفسه، هي هي الابتسامة اللي مهما كان مودك لا تملك الا انك ترد عليها بابتسامة عريضة مزقتطة، وقالي :انتي رايحة فين؟ الشغل؟كنت متنحة (ودا مبيحصلش مع كل الناس، في الغالب بحاول ابقي مستأسدة) وهزيت راسي، قالي: انت رايحة رمسيس عشان المترو للمعادي صح؟ هزيت راسي تاني، (مكنتش اعرف انه متتبع اخباري) ففتح لي الباب وقالي: اتجاهنا واحد، انا رايح مصر الجديدة(مفهمتش اتجاهنا واحد ازاي؟)من غير تفكير ركبت بعد الاسئلة اللي بدل علي ان الكلام خلص (اخبارك ايه؟ اخبار شغلك؟)، قلت تمام، شغال، بس بعدها صمت لمدة خمس دقايق طوييييلة، وبيني وبين نفسي بردد اغنية "حبيبي انت يا فيلسوف"من فيلم المتوحشة، كنت بغنيها له كل ما نتقابل، ملقتش حاجة اعملها غير اني البس نضارة الشمس العريضة، تفاديا لاي نظرات، بعدها رزعت السؤال، انت عامل ايه؟ وابنك كويس؟، قرب يروح المدرسة ولا لسه؟ ضحك وقالي : يوسف (دا اسم كنا مختارينه سوا)اه كويس بس انا قررت يروح الجامعة مباشرة، بما انها احلي سنين ، وسألني انتي هتسافري تاني؟ انا عارف انك رجعت عشان خاطر ماما (هو كان بيناديها كدة) ، و كمل شكرا علي الكتاب، اللي بعتيه مع احمد(اخويا)، من تحت النظارة وصوت ضايع(عندي برد ومشاكل تدخيناوية)قلت العفو، بس شوية ووصلنا رمسيس ، نزلت وضربت لخمة ومعرفتش اسلم عليه.يمكن لاحساسي بالذنب، اللي مش عاوز ينتهي تجاه. لاني بكل ندالة نهيت العلاقة (دا احساسي تجاه نفسي)لاسباب ممكن تكون مش مهمة، وف توقيت حرج. لكنه القلب اللي في الاصل هو قلاب.

دا كان ابن الجيران الحب الاول (هو كدة لو في القاهرة بن الجيران لو الصعيد ابن العم)حب التلامذة من ثانوية لحد الكلية، وما بعدها،كنا فاكرين ان محدش يعرف لكن بعد ما وصلنا الجامعة اكتشفنا اننا منعرفش ان الناس كلها عارفة هههههههههه، رغم اننا كنا عاملين زي المخبرين، نتقابل في الجامعة، وايام الثانوية بنذاكر سوا في بيتهم او بيتنا، طبعا في وجود محرم (في الغالب كان اخويااللي

كان يطنش يذاكرمعانا )هو يذاكر لي فلسفة وعلم نفس، وفرنساوي (اللي متعلمتش منه الا جملتين جوما بل راندا/ جو تام)وانا اذاكر له انجليزي لانه كان بيسبقني بسنتين، وكانت اعلي درجات جبتها ف ثانوية عمية كانت المواد دي. كان كل مقابلة خصوصا الصبح يجيب لي وردة(طول 8 سنين)، خصوصا البنفسج، كتب شيرك وكمان درة مشوي علي النيل لما نكون مفلسين

كان صديق لمامتي، اللي كانت مكبرة دماغها وعاملة مش فاهمة حاجة، لانه هو ومامتي كانوا اصحاب علي الاقل لحد سنة فاتت.شخص مختلفش عليه اتنين، حتي بن خالتي اللي كان غيران منه عليا كان صديقه اللدود، والانتيم ، اللي كان لمجرد يلمحنا بنكلم سوا، يقلبها مراجيح، لكن اول ما يتكلموا سوا تلاقي براكين ضحك اتفجرت، بسبب خفة دمه (انا دايما بتكعبل في اللي دمهم خفيف بس)هو في شكل وملامح وحجم الممثلين احمد رزق ويحيي الفخراني (عشان كدة تلاقيني بموت في يحيي الفخراني) نوع من البني ادمين استحالة تلاقي زيه دلوقتي، بالظبط زي الفرسان اللي في الروايات بتاعة الكسندر دوماس، اتبرع لي بدمه قبل كدة وكأني مكتوب عليا اكفر عن ذنبه،لحد النهاردة مش قادرة انسي امي لما اتصلت بيا مرة علي غير المعتاد مكالمة دولية عشان تقوللي جملتين : اخبارك ايه؟ انا لسه كنت في فرح فلان، انا رغم ان كنت مرتبطة بشخص تاني، الا ان مش فاكرة اذا كنت رديت من اصله، وبعدها قررت اني مش هنزل الاجازة.

انا مش ندمانة علي قراري، ولو الزمن رجع اكيد هختاره، لان كل حاجة في الكون بتبدأ صغيرة وتكبر، الا الحب يبدأ كبييير ويبدأ يصغر،وتبقي الذكري الحلوة، والناس الحلوة اللى مش ممكن تقابل زيهم، مش ممكن تنساهم، مش ممكن تصادقهم بعد علاقة حب، لان مش من المفروض انهم يبقوا اصدقاء، ومش من المفروض ميبقوش اصدقاء، كفاية قوي يتقابلوا صدفة

كان نفسي احط اغنية حبيبي انت يا فيلسوف مع البوست.