دا مش كلام عم الراجل بتاع الحاجة الساقعة ع الكورنيش لما متدفعش
تمن القعدة الروشة مع المزة، ولا كلام عمو اللي في السنيما اللي انت
مدتهوش جنيه زيادة عشان يظبطك في مكان في الصف اللي ورا خالص
ولا حتي كلام الكمسري في الاتوبيس لوالدم غلي في عروقه لما عدي كام حركة
تحرش واتغاظ لما لاقاك انت عرفت تبوس وهو لاء ، ولا كلام الموظفة الغلبانة للمدير
اللي نازل تحرش فيها وناوي علي بوسها او فصلها
وغيره وغيره
دا كلام الناس اللي بدأوا تأسيس أول جمعية لحظر القبلات بين المصريين..
قال ايه البوس له مخاطر ومشاكل وبلاوي غير انهم ممكن لو ظبطوك مع المزةاو حتي المودام واتهموك بقضية فعل فاضح وادوك علقة محترمة مأخدهاش
حرامي صرم في جامع وبعدين يحلقوا لك شعرك زيرو
قالك يا سيدي علي طريقة فيلم فول الصين العظيم ان القبلة اللي ترجمتها البوسة
حسب القاموس، لها مخاطر صحية وانها السبب في 15 مرض وان العدوي
بتتنقل من خلال الرزاز واللعاب والاحتكاك الجلدي ومن خلال النفس المباشر
والجمعية فيها رجال دين واعلاميين واجتماعيين وناس كتير عشان يفهموا
الناس فن الاتيكيت عند المصافحة زغرتوا وهنتعلم فن التيكيتاك
سوري الاتيكيت يا سلام بقي لو نطلع علي قلعة الكبش والجمعية تروح هناك تعلمهم
الاوتوكيت ولا ياخدوا الكتالوج بتاع البوسة دا ويطلعوا علي امبابة هتبقي هيصة
واتخيل بقي لما يجوا كدة زي حملات التطعيم بتاعة شلل الاطفال ويقولوا مثلا
واتخيل بقي لما يجوا كدة زي حملات التطعيم بتاعة شلل الاطفال ويقولوا مثلا
لعم حسن الفران اللي انا لسه متخانقة معاه من شوية اسمح لي اعلمك الاتيكيت
ويروحوا مطلعين الكتالوج ، ولا لو في مزة كدة حلوة تقول للواد بريزة الصايع
اللي قاعد علي قهوة عم جمال طول النهار اسمحلي اعلمك الاتيكيت وفن البوس
دا معندوش تفاهم ولا حتي تحرش ..هيقولها زي عادل ادهم كدة
انتى لابسه لموني الليلة دي دا احنا نهارنا لمون يا قطة
الجمعية كمان استندت الي رأي الدين "إن الاسلام بشكل قاطع وحاسم يحرم
القبلة في غير الزوجية أو الأخوة أو البنوة". يعني من الاخر كله
هيبوس كله وملهاش لزوم الفتوي م الاول
قال يعني البوس مقطع بعضه قوي مش عارفين ان المصريين
عندهم فقر بوس ولا ايه؟ مش الاولي بالفلوس دي يعملوا جمعيات تدافع عن
حقوق اللي مش عارفين يبوسوا م الاساس لحد ما بقي عندهم عقد وكلاكيع
وبيقضوها تحرش ،طب ما يعملوا كبسولة منع البوس زي منع الحمل كدة
للوقاية او يعملوا كوندوم للسان واحتمال الست كريمة مختار تطلع ف الاعلانات
وتقول "جوزك اوعي تبوسيه وصاحبك علي ما تعوديه" ويجيب اتنين
كانوا ناويين يبوسوا ورجعوا في كلامهم ويروحوا كحيين في وش بعض
ويطلع شعار الحملة استعمل الكمامة علي بوزك انها اكثر امانا!!نياهااااا
اه الخبر قال ان في انواع كتير للبوسة لكن اشهرهم الفرنش كيس
ودي مهمة جدا لانها هي الأكثر حرقا للسعرات الحرارية فهي تحرق 239 سعرا
حراريا وبالتالي فانها تساعد على خفض الوزن يعني بلاها دايت وخليها
فرنش بوسة اهي ارخص من الجيم والايروبكس ولا مراكز التخسيس
انا ماليش دعوة لوحد من الاخوة اللي بيبوسوا طلع صاحب كرش
دا هم اللي بيقولوا مش انا
