Monday, March 12, 2007

روضة احمد: من بنات مصر الجدعات قوي

تحديث عاجل

وردنا الآن أنباء عن تأكيد محكمة استئناف الأسكندرية للحكم الصادر على كريم عامر بالحبس أربعة سنوات... والجديد أن محكمة الاستئناف قبلت أيضا بإقامة دعوى حسبة ضد كريم وفريق الدفاع عنه ...مسخرة... يعني من الاخر طز في تعديل القانون اللي اتعمل بعد قضية نصر حامد أبو زيد بأنه لا يحق لأحد رفع دعوى حسبة مباشرة واعتبارها من اختصاصات النيابة، مش من محامين وناس بيدعوا انهم تضرروا من كريم، تضرروا في ايه ان شاء الله؟ يكونش هو السبب في احتلال فلسطين، ولا العراق وافغانستان؟او تلاقيه السبب في انفلونزا الطيور، او برده حادثة قطر الصعيد من كام سنة، ولا بالتأكيد له علاقة في الوكسة القوية للحكومة والنظام بتعديل كام وتلاتين مادة من المرحوم مقدما الدستور واحتمال برده هو اللي وز سيادة القاضي اياه بلطش تقرير الشبكة العربية، او كتب له عريضة الدعوي المسخرة اللي بيقول فيها ان موقع كفاية الكخة دا من تمويل الشبكة وتابع ليها هو ونشاطات الحركة .
كمان الحكم بيقول طزين ولا طز للمرة التانية والعاشرة في مواد القانون المعدلة والجديدة بما انه تم توضيح الدفاع أن حكم محكمة الدرجة الأولى باطل لأن القاضي حكم على كريم بمادة في القانون تم تعديلها، يعني سيادته حكم بنص مادة مش موجودة اصلا، عادي خالص والله يا جماعة متتخضوش ولسه
دا حتي سيادة القاضي الفاضل محبش يضيع وقته ويقرا مذكرات دفاع ووجع دماغ
هو النهاردة في اي متشات يا جماعة؟ حد يفهمني
من الاخر تاني وايه يعني هو فيها حاجة لو اتحكم بنص مادة قانون
مش موجودة او حتي سيادة القاضي ما اخدش بيها خبر
انا بس اللي مش عاوزة اعترف من بدري اننا ف مصر ام الدنيا
وريسها حنتيرة


معرفتي بروضة بدأت من ثلاث أشهر، كنت حريصة طوال تلك الفترة علي متابعة قضية كريم عامر معها، أحيانا من خلال مناقشة أراء كريم، أو ما تحكيه روضة لي من مواقف تعترضها أثناء سير المحاكمة بعضها طريفة،تحكيها روضة بكل خفة دم المصريات، أو محزنة لما يمكن أن يكنه البعض للاخر المختلف في الرأي، بداية من حارس كريم المصاحب له في جلسات المحاكمة، ويده معه في كلبش واحد، كل أمنيته تتلخص في "خلصوني بجي أنا مش عاوز انزل مع الواد دا تاني"أو أحد وكلاء النيابة الذي حرص علي أقناع روضة بالتخلي عن دورها في هيئة الدفاع عن كريم.
سواء اتفقت مع كريم و أراءه، أو اختلفت ، الا ان كل ما يهمني هنا هو روضة كشابة مصرية في بداية طريق الحياة كمحامية، فحين قرأت بوست نساء المستقبل في مدونة دفتر وطن ربطت بين روضة ونموذج معين لهذا المستقبل نموذج مصر علي تحقيق ذاته، حتي وان رفض البعض، فقد تخرجت روضة في كلية الحقوق عام2000، ومنه للتدريب في مكتب محامي، ثم اتجهت لان يكون لديها مكتبها الخاص،ومعه اتجهت للعمل داخل احدي منظمات حقوق الانسان
سنوات قليلة ربما لم تكن حافلة بالكثير من وجهة نظر البعض،لكن بالتأكيد لدي روضة فقد كان بها الكثير.
روضة بنوتة مصرية خفيفة الظل، وان كانت خجولة،الا انها واثقة من نفسها، مازلت مصرة علي ارتداء الجينز والحذاء الرياضي، حتي داخل قاعة المحكمة، رغم نصائح البعض،"يا أستاذة مينفعش" الا انها مصرة "بلاش كلمة استاذة دي، هلبس اللي انا شايفاه مريح وعملي جدا".الف تحية لروضة أحمد أحدي نساء هذا المستقبل، لعله يكون مبشرا كأبتسامة روضة
قبل الحكم في قضية كريم سألتني روضة لماذا لم يكن هناك بوست عن كريم؟
كان ردي انني افضل ان اكتب البوست عنك انتي، أجابتني بنظرة خجل وابتسامة خفيفة، معناها، لماذا؟
وها انا اكتب البوست عن روضة، مصحوبة ببعض الاسئلة حول اسئناف قضية كريم عامر
- أول معرفتك بكريم عامر؟
معرفتي بكريم كانت من خلال القضية حيث انه اتصل بالشبكة العربية لمعلومات حقوق الانسان، و أخبرنا انه تسلم طلب حضور من النيابة العامة بمحرم بك، ولم يكن يعرف سبب طلب الحضور بالتحديد، لأن الطلب لم يكن واضحا، لكن كريم توقع أنه بسبب التحقيق معه سابقا بجامعة الازهر، كلية شريعة وقانون، فرع دمنهور؟
- هل فكرتي كتير قبل الموافقة علي الدفاع عن كريم عامر؟
في اليوم الذي عرفت أنه سيتم التحقيق معه لم يكن لدي الوقت لمعرفة الموضوع أو قراءة أي شيء عنه وسافرت اليوم التالي مباشرة الي الاسكندرية لحضور التحقيق معه. وعندما قابلته لاول مرة قبل التحقيق أخبرني انه يكتب مقالات علي أحد المواقع الالكترونية، يعبر فيها عن رأيه الشخصي.
- رد فعل الناس؟
رد فعل الناس بدأت بعد التحقيق معه مباشرة ، من وكلاء النيابة الذين تم التحقيق في حضورهم، وكانوا فعلا متحاملين عليه، وطلبوا مني عدم الاستمرار في الدفاع عنه، وترك القضية، لكني رفضت ليس لاتفاقي مع كريم بالدفاع عنه، ولكن لما يحتمه علي واجبي المهني.
- هل كنتى تتوقعي الحكم؟
في ظل ما تم في التحقيقات وجلسات التجديد و أمام القضاء كان الحكم متوقع ولكننا كهيئة دفاع كنا نتوقع أكثر من ذلك بسبب أثارة دعوي الحسبة، وهجوم البعض، ومنهم محامين، علي كريم بسبب مقالاته و أرائه.
- علي أي أساس سيتم بناء الدفاع عن كريم في الاستئناف؟
- الدفاع في الاستئناف سيكون علي أساس عدم تمكن هيئة الدفاع من المرافعة الشفوية عن المتهم وكذلك عدم الاستجابة الي الطلبات التي تقدمت بها هيئة الدفاع وكذلك عدم أستكمال أوراق الدعوي لاننا طلبنا الشكوي التي تقدم بها أحد الطلبة الي جامعة الازهر وكذلك عدم وجود تحريات نيابة أمن الدولة بالملف، بالاضافة لعدم ندب خبير من كلية هندسة لتحديد المكان الذي تم النشر فيه.
- ملاحظاتك علي حيثيات الحكم؟
ملاحظاتي علي الحكم هي:
أولا: تغير القيد والوصف باستبدال المادة 98، و102 مكرر بالمواد 176، و171، من قانون العقوبات، دون اعلان هيئة الدفاع بهذا التغيير.
ثانيا: تم تعديل المادة 176 من قانون العقوبات طبقا لتعديلات قانون الصحافة ولم يعمل رئيس المحكمة بالتغيير وحكم طبقا للنص القديم!!
ثالثا: عدم الأخذ بتطبيق أقليمية القانون وهو تحديد الدولة التي تم فيها العلانية لتحديد القانون واجب التطبيق وكلها أسباب أساسية للحكم. بناء علي كل هذه الاسباب سيكون الاستئناف.
- رأيك الشخصي في كتابات كريم؟
لا أريد أن أخلط بين رأيي الشخصي ومجال عملي حيث انه لايوجد مساحة لذلك، والا لن أستطيع الدفاع عن أي متهم لانه أحيانا يتعارض رأيي الشخصي و رأيي المهني، فمن حق أي متهم أن يكون له محامي يدافع عنه. وهو واجب مهني لا علاقة له بالحياة الشخصية.
- هل لديك صراع داخلي بين رأيك الشخصي والمهني بخصوص القضية؟
أرفض الاجابة عن هذا السؤال

15 comments:

الأغاني للرأفتاني said...

زنزانه
اعتقد انه حان الوقت لكى ننسى رأى كريم..وان نفكر فى حبس انسان لمجرد انه كتب واختلف عن الجميع
كما تعلمين ان الدين فى غنى الناس جميعا..فرأى كريم لن يضعف او يقوى الدين..

النقطه الآن هو حبس كاتب او مدون لمجرد انه عبر عن رأيه رغم اختلاف هذا الرأى..

تحبـاتى ليكى يا قمر ولكل واحده جميله زيك كده شاغله نفسها بقاضا يا مهمه زى دى.

Unknown said...

الله أكبر الحمد و عاشت مصر دولة حرة و مستقلة . مرحبا بالكوارث مرحبا

جبهة التهييس الشعبية said...

هم لحقوا يحكموا في الاستئناف؟

يعني ايه ده حكم نهائي وللا لسة فيه مش عارفة باين استشكال وحاجات كده؟

Anonymous said...

الإستئناف إتسلق خلاص إيه السرعة دي إمال قضية العبارة مطولة معاهم ليه
إيه ده

جبهة

أعتقد إنه حكم نهائي و حتى لو في إستشكال و أي حاجة تانية مافيش فايدة الحكم صدر من قبل المحاكمة
واحد قال لي مرة إنهم عاملين 3 سنين إزدراء أديان و سنة إهانة مبارك يعني ثلاثة مبارك يساوي أديان

Gid-Do - جدو said...

زنزانة

اسمحيلى اخرج برة موضوعك مش تفاهة منى ولكن علشان مش عاوز ارد عليكى فى مدونة من دفتر الوطن ـ وابقى بهرج وخارج مواضيع كتبها احمد ـ على الاقل هنا حبقى برد فى بيتك حتى وان كنت خارج موضوعك لكن بتكلم معاكى ـ ارجو ان اكون واضح رغم ان شكل كلامى مش معروف لية راس من رجلين ـ
---------------------------
-كان ردك علىّ بتقولى فية
شكرا يا جدو
اتمني لما تيجي مصر
اخطفك (ويقولوا في الستالايت :اختطاف مواطن علي يد زنزانة)في فلوكة او تمشية ع شط النيل مع كوزين ذرة
ايه رايك بقي؟
-----------------------

خطفك ليا شرف كبير ياريت استحقة لكن عندى اقتراح ان احنا نشترى تلات تكواز درة ونعمل زى فيلم غزل البنات انت بنت الباشا واحمد الطيار وانا الاستاذ حمام

وانت تغنى حمام انا عايزة حاجة
وانا اقول ضحيت هنيا فدا
وناخد الفلوكة ـ بدل العربية الجيب اللى فى الفيلم ـ وكيزان الدرة
وتعد بنت الباشا مع الطيار
واعد انا اتفرج على البانورما
اية رايك فى السيناريو دة ؟
--------------------------
عنوان الايميل بتاعى وهو موجود على مدونتى
proud92@yahoo.com
اذا لم يكن لديك ما يمنع ارجو مراسلتى لمعرفة الايميل الخاص بيكى ـ تحياتى

zenzana said...

رافت حبيبي
مختلفناش انا كل الحكاية حبيت ابرز دور محامية شابة في القضية واهتمامي بالقضية نابع من نقطة حرية الراي والتعبير
هتلاقي كتير مهتمات بقضايا مهمة يمكن بشكل افضل مني

احمد
ولسه مسمعتش عن قانون تقييد المدونات اللي ولله الفخر والحمد الحاجة الوحيد اللي وحدت مابين كل وزراء الداخلية العرب في قمة تونس الاخيرة للمعلومات؟


جبهة
سلقوا وحمروا و أكلوا كمان
انا بتفق مع مصري في الراي

جدو
انت معاك جرين كارد تعمل كل اللى انت نفسك فيه هنا وعند احمد حتى لو هو اعترض
انا طبعا عجبتني فكرتك لكن ممكن نغير في الادوار ان حضرتك تقوم بدور الطيار واحمد بدور استاذ حمام
لان احمد مش البوي فرند بتاعي لسؤ حظي ومن حظ احمد الحلو
هو صديق العمر بس وانا متبنياه ثواب ههههههه
طبعا انا يشرفني جدا مراسلتك حتي لما توصل مصر اعرف اخطفك واتتبع خطواتك عبر الفضاء الالكتروني
ههههههه

ذو النون المصري said...

استئناف بعد محاكمه علي حتة شاب لسه ابن عشرينات!!!!!!!!!!!؟
هو ده اللي بيهدد الاسلام !!!؟
امال مبارك بيعمل ايه؟
مدد يا سيدي مبارك مداااااااااااااااد

الأغاني للرأفتاني said...

راندوووووووووووش
بالنسبه للتعديل ..الظاهر العربى بتاعى بقى وحش

معنى كلامك ده ان فى قضيه مرفوعه على هيئه الدفاع بتاعه كريم؟؟؟؟؟؟؟؟؟؟

يعنى مجموعه المحاميين دول دلوقت مرفوع عليهم قضيه؟؟؟؟؟؟

soosa el-mafroosa said...

أول زيارة ليا لمدونتك الجميلة

مدونة راقية و عميقة

و احييكي عليها

بالنسبة لكريم عامر

أنا بس صعبان عليا السنة اللي خدها في اهانة الريس دي

والنبي ده اسمه كلام؟؟؟

بس روضه فعلا مثال مشرف لبنات مصر
تحياتي

Anonymous said...

انا زعلان جدا تلات مرات
الاول علشان حرام اللى بيحصل فى القضاء ومن القضاة فى مصر
ثانيا هل لانى مجرد صحاب راى مخلف اتبهدل كدة زى كريم حتى لو كانت اراى شادة وغريبة مش احسن لما اكون من غير راى (عجبى عليك يا زمن يا مشى بالمقلوب)
ثالثا يا ست زانزنة مبسوطة كدة اهى اهى المحامية بتاعتك سبقتنى انا كمان عايز اكون زيها
بس انا مبسوط ان فى محاميات بالفكر والنشاط دة علشان كدة انا مش مغموم
على العموم انت اكيد فى مصر
سعيد وطنى

محمد هانئ said...
This comment has been removed by the author.
محمد هانئ said...

ازيك يا راندا ياللي نورتي مدونتي ب الكومنت بتاعك
انا اول مشوفت صورة في التلفزيون
استغربت قلت مين ده
معقوله ده بتدافع عن كريم-مش تقليل منها والله لكن كان باين صغر سنها -
طبعا اشكالية اشمعني كريم من وسط كل المدونين يختاروه اكيد ده مش خافية علي حد فكريم كلامه كان ينم عن عدم فهم شديد الي اقصي حد
و اي واحد قرا في الدين حيرد عليه المشكلة سيكولوجية كريم المهدمة من كره اهله الواضح ليه ورغبته في التمرد علي تدين اهله
وهنا كانت فرصة نطلع المدونين عيال ملحدين وكفرة ونطسه سنة اهانة رئيس عشان المدونين يتعلموا
كان الضحية المثالية
روضة كانت محامية شاطرة لقضية خاسرة
ربنا يوفقها
مدونة في الكلبش

zenzana said...

ذو النون مبارك
حامي الاسلام وخارب مصر وقاعد علي تلها

ايوة يا رافت العربي بتاعك لسه بخي
قضية الحسبة كريم ومحاميه كمان

سوسة
اكيد نورتي المدونة
شكرا جدا جدا
بخصوص السنة اهانة
معني كدة ان في سنة حبس ل70مليون
سنة لكل مواطن هيبقي شعار المرحلتو الكادمة للحزب الوطني
انا بس حبيت اقول ان مصر معدمتش من المواهب وان ستاتها وبناتها جدعات قوي ويسدوا عين الشمس

سعيد وطني
متخفش مش هتتحبس عمرك لانك حزب وطني
ربنا يهديك وتبقي حزب اي حاجة تانية ف الحياة يا رب
هو الافضل عشان ماتتحبس في المرحلة القادمة انك تكون في مظاهرة بكرة للتعديلات الدستورية لانك لو مرحتش
كن متأكد ان الحزب الوطني قريب جدا مش هيعتق حتى اعضائه الصغيرين اللي هم مش حيتان ولا قطط سمان
بالنسبة لروضة انها سبقتك دا المفترض مش لان روضة بتاعة افعال وبس
دا لانها مش حزب وطني

المصرص افندي
نورت يا فندم
من حقك البكوية
انت اللي نورتني
روضة صحيح صغيرة سن لكن كبيرة مقام
وفكر
بتفق معاك في طريقة اختيار الضحية
ربنا يستر مين اللى عليه الدور

Anonymous said...

ملاحظة عابرة: لا تزال هناك إمكانية الطعن في الحكم أمام محكمة النقض
الحكم في الطعن سيشير إلى مدى رغبة النظام في الاستمرار في الحرب على المدونات
كريم هو مجرد أداة استخدموها ليكسبوا تأييد شعبي ثم يطيحوا بالباقي أو يكتفوا بالتلويح
اضرب المربوط يخاف السايب
انتظروا باقي حلقات المعركة مع كل من تسول له نفسه معارضة الحكومةحتى لو كان النشر يتم في بلاد الواق الواق

جبهة التهييس الشعبية said...

اتقبض على ناس في مظاهرة

اظن التظاهرة التدوينية مش شغب ولا حاجة

رجاء من كل المدونين وضع هذه الأغنية في مدونتهم:

يا قبضتي دقي على الجدار

لحد ليلنا ما يتولد له نهار

يا قبضتي دقي على الحجر

لحد ما تصحي جميع البشر

مش فاهم اللي حاصل

لكن بقلبي واصل

واللي مش فاهمه عقلي

بتشرحه السلاسل

يا قلوب بتنزف دم في العتمة

يا قلوب بتنزف دم وتغني

سجنوكي والكلمة

غصبن عنها وعني

طلعت من القضبان وم الاسوار


الاكواد بتاعة الاغنية اهه

رجاء تبقى شعار المدونين في الوقت اللي بيتعرض فيه كل صاحب رأي للظلم

الاكواد بتاعتها اهيه

كنت اخدتها من غزالي


"http://www.macromedia.com/go/getflashplayer"