Monday, March 26, 2007

يا كفاية فينك فينك؟ ...القيادات بيني وبينك

عودة الصورة بناء علي رغبة الجهامير
الصورة للعبقري فتحي ابو العز ولطشتها من عند عرباوي

توضيح مهم جداااااااا

هذه التدوينة لم تكن سوى فضفضة عما حدث ، و هى لا تعنى بأى شكل من

الأشكال الإنتقاص من شأن أى شخص على الإطلاق ، الفكرة ببساطة

إنى كنت معولة على حركة كفاية ، الحركة اللي قدرت تسيطر على اسفلت الشارع،اللي بالتأكيد مختلفة تماما عن باقي التيارات، بمعنى أنا هنا بعاتب موش بهاجم. أنا قلت أعمل التوضيح دا علشان ببساطة موش عايزة أتفهم غلط خصوصا من الناس اللى أنا فعلا بأحترمهم و بقدر مجهودهم زى علاء سيف.


تحديث 2

أدهم خرج وكل المعتقلين

وفي اتصال تليفوني معاه

قال انهم كويسين وبيطمنوا الجهامير

كدة بكل بساطة بلطجية وزارة المقاشات

سابوهم ف الصحرا بعد ما باتوا الليلة

ادهم وجيمي بيجمعوا كل اللي كانوا معتقلين

لان الامن رمي كل واحد في حتة في الصحرا

ودلوقتى بيدوروا علي احمد الدروبيي

مريض السكر) اللي مش عارفين هو فين تحديدا

في الصحرا الواسعة

بعد كدة ادهم

وباقي الللي كانوا معاهم هيطلعوا علي لنقابه الصحفيين

1تحديث


فلكي «الأخبار» في خدمة الاستفتاء..

قال في «برج» الرئيس مبارك: «التجمع الشعبي أنت مصباحه»..

وقال لابنه جمال: «كثيراً ما تبدع بأفكارك الجديدة للوطن»


بالشفا

اسمحوا لي اقولها لاول مرة هنا

أحا



انا بقالي ساعات كتيرررة بحاول اكتب البوت دا، بس مش عارفة، الماسنجر قدامي فاضي

علي غير العادي،الاول كان جيمي داخل خارج ، بمراجيحه ومقالبه، وغلاسته اللذيذة احيانا، وخناقاته

معايا اللى ملهاش داعي، وكمان مفيش ادهم وكلامنا عن السنيما و الافلام ، واخر الاغاني القديمة اللي عتر فيها،

وعن اسماعيل ياسين واغانييه، و لاعزة بكل رقتوضحكتها الهادية، اللي بتخليني اصدق ان الدنيا فعلا بخير.

قبل المظاهرة كنت محضرة نفسي اني اكتب بوست مسخرة، لكن فعلا مش

قادرة، لان مكنش في مسخرة ولا مهزلة اكتر من اعتصام 25 مارس في ميدان التحرير، لكن انا

بس هذكر تفاصيل عشتها .

نازلة جري من الشغل، لسه بقول يا هادي الاقي ادهم وعزة، و مكالمة

تليفون بينا طويلة، عن الجو العام ف الارض المحتلة من ميدان التحرير، وتوصية من ادهم

لو اتمسك، اتصل بعزة(يا دي النيلة، تاني وصية خلال اسبوع، الاول من جيمي، اللي محددش اتصل بمين،وادي ادهم كمان)، يا ادهم بلاش نسبق الحدث، (رغم انه المتوقع)، طول

الطريق الموبيل مبطلش رن، يا حد بيسألنى انتى فين؟ او هنتقابل فين؟
علي قهوة صغيرة، كانت المكان السري بتاعي انا وتنظيم 12ربيع الاول، ادهم طلب

لي شاي، هشام مشغول بالموبيل، حسام معاه ضيوف، جيمي منطلق زي عادته وقالبها

مراجيح. بدأنا نتحرك، المفترض ان اتجاه المجموعة اللي عددها مكنش قليل تتجه لقلب

الميدان وتحتله، ما عدا انا مش هكون مع المجموعة مش ترفع لكن رحم الله امرئ عرف قدر نفسه. المتوقع

كان ضرب وطحن اول ما نقرب من الميدان، وانا حركتي غير سريعة، انا بالكتير اقدر اتصل

بأحد المحامين، اوأن الخبر يوصل لبعض الناس، ممكن ارفع العكاز بتاعي واضرب حد، لكن

مش طرح أحد الخصوم ارضا زي ما حصل في مظاهرات 2000بمساعدة صديقة، ومفيش جري زي زماااااااااااان.


المهم اول ما اتجهنا للميدان الزملا راحوا ناحية اليمين قدام كنتاكي التحرير، انا قلت يمكن

بيتفاءلوا بالدكان، الوقفة طولت وانا واقفة بعيد بتفرج ع العساكر والظبابيط، بما ان دايما مش بيجي في بالهم

اني تبع المظاهرة-دا الجانب الايجابي للكوارث-بكلم ادهم، نتحرك؟ قال اه قفلت ثانية تليفوني رن، برد، الدنيا اتلخبطط، لقيت جيمي بيجري ناحية الصنية وبعده اسد، طبعا الظبابيط وصبيانهم البلطجية شدوا أسد وجيمي، وأرمي ف عربية الترحيلات رقم5496،اه اخدت رقمها، روحت عند العربية والبيه الظابط قالي بتعملي ايه؟ قلت له باخد رقم

العربية،اللي كانت قدام عمر افندي وأنا فضلت قدامها معرفش اد ايه؟ ...
معظم المجموعة اتجهت لميدان طلعت حرب بسبب دفع الامن ، وانا فضلت ف مكاني، وبعد ما كلمت

ادهم اتحركت ف نفس الاتجاه قبل ما اوصل لهناك كان في مجموعة من كفاية بتهتف، كنا خرجنا من

دايرة سقوط شبكة المحمول اللى فى ميدان التحرير،ادهم سمع الهتافات ع التليفون جري

وهتف وسيطر المتظاهرين علي الاسفلت،لمدة عشر دقايق، كانوا افضل عشر دقايق في

اليوم كله، وفشل الامن في السيطرة ع الشارع، لحد ما اتكردن الرصيف قدام اير فرانس، وهجم

البلطجية بتوع وزارة المقشات، بالملابس المدنية طبعا، والضرب اشتغل ف كل الناس. وانا

اتجهت للرصيف المقابل امام كافيه ريش وسط المصورين
اللي حزني اكتر ولو انه مش جديد تعليقات الناس "يستاهلوا" فعلا شعب تلمه زماره وتفرقه عصايا، بعدها

حاول عزيزي ايوب اني ادخل كافيه ريش، لكن الحمد لله احيانا الدماغ الصعيدي اللي زي قالب الطوب بتنفع، زي الجانب الايجابي للكوارث، البعض جري، ودا طبعا مش عيب ف مواجهة جحافل البلطجية، ولا وزارة

المقشات، بدأ شحن المتظاهرين، ف عربية الترحيلات، ومنهم ادهم، تليفونه فضل يرن بس

مش بيرد، كلمت عزة، لقيت ادهم سبقني وبلغها بنفسه، كملت اتصالي بعدد من

الناس (محاميين وحقوقيين)...كل دا وايوب بيناديني وانا ولا انا هنا، مردتش عليه، ولا

علي البيه المكلبظ الظبوط اللي فاكر شكلي من يوم مظاهرة 16مارس

وسبت كافيه ريش ومشيت، عرفت بعدها بدقايق ان الناس اللي ف كافيه ريش اضربوا واتحاصروا من

بلطجية النظام ، بعدها كان كل قهاوي وسط البلد مترشقة مخبرين وامن اخبرني صديقي

احمد عبد الفتاح عن المظاهرة اللي قدام النقابة

وقال يلا نروح، انا بصراحة قلت لا طبعا مش هروح،وملقتش تفسير لمنطق

ان يبقي في مكان بديل لمظاهرة سبق وتم الدعوة لها ان تكون في ميدان التحرير، دعوة قالت وحددت هنكون هناك الساعة 6كلنا واخدين بالكوا من كلمة كلنا دي؟

طبعا الساعة كانت 6 ومفيش كلنا، صحيح كان في مجموعة من كفاية وصلت لكن بلاش

نسأل ع العدد لتبقي فضيحة، مع كل احترامي لشباب الحركة اللي شاركوا في

احتلال الاسفلت من البستان لميدان طلعت حرب، لان بالتأكيد حركة كفاية مش هم بس، فين لا مؤاخذة القيادات ؟ وغيرهم من اعضاء الحركة؟ يا فرحتي قال نقلوا المظاهرة قدام نقابة الصحفيين، ايه خايفيين يضربوا؟ وايه الجديد ف تعامل الامن؟ ولا هم اللي انضربوا ف طلعت حرب ناس هبلة؟ وأغبيا انهم لبوا نداء الحركة للاعتصام؟

مع الاعتراف ان الدعوة مكنتش من كفاية وحدها،لكن معظم المدونيين او المستقليين

والاتجاهات اللي دعت للاعتصام كانت موجودة،لكن كفاية كانت فين؟

هل ممكن دا يخليني بعد كدة اروح للمكان البديل اللي رضيت به كفاية؟

ولا من الاساس مصدقش اى دعوة منها للمشاركة ف مظاهرة او اعتصام، كان عندي

انطباع ان كفاية هتشارك بكل ناسها، كبير وصغير، لكن للأسف الصغير بعضه شارك، وكبيره معرفش فين؟ قال ايه بيريح اعصابه خارج القاهرة يا فرحتي..الحمد لله اني مصرة على ان افضل مستقل ولا

حزب ولا لا مؤاخذة حركة قياداتها قافلة موبيلاتها وبتريح اعصابها من وجع

الدماغ، او راحت تتظاهر في مكان غير المكتوب ف دعوتهم للشارع بالمشاركة، مع

احترامي ان اكيد مش كفاية لوحدها هي المفروض تعمل كل حاجة وتقود الشارع، لكن طالما

ابو العروسة دعا للفرح ومحضرش معناها انه مش موافقة ع الجوازة

السودا، وطالما انه مش موافق دعي ليه من الاول؟

رجعت البيت لمامتي اللي عرفت اخبار وسط البلد من

القنوات الفضائية، واضطريت احلف ان كويسة وراجعة البيت حالا

واول ما دخلت البيت كانت حفلة استقبال كل يوم من ولادي، مريم(4سنين)وسؤالها

المعتادة، جبتي لي حاجة حلوة؟ انتى كنتي فين؟ رد عليها عبد الله(7سنين) كانت في

المظاهرة، مريم قالت يعني ايه مظاهرة؟ قالها يعني تروحي تهتفي ف الشارع بصوت عالي

والعساكر ينزلوا فيكي ضرب. في الخلفية كان في مشهد من فيلم فرحان ملازم

ادم، فيه (ام فتنة) الفنانة لبلبة بتقول لفتحي عبد الوهاب، من مشي جنب الحيط سلم

لاننا غلابة، واللي يعافر مع الحكومة يبقي بينطح زي الجديان في حيطة.معرفش ادهم

كان ممكن يعلق ايه علي مشهد مريم وعبد الله و الحوار الداير ما بين فرحان وام فتنة.

مش معني كدة انى موافقة ع الحوار، اللي اترسخ جوا

بعض من امخاخ الشعب المصري، انا ضده بالثلث، انا مع النطح

كما الجديان ف الحيطان، والحيطان مش ممكن تطرحني ارضا بسهولة


اه نسيت اقولكم اخر اخبار الاستفتاء المزور مقدما

احمد راح يشارك لاقي مفيش اشراف قضائي

يعني المادة 88 اللي ف الدستور اللي الاستفتاء

بخصوصه خلاص تم تغييرها من غير

استفتاء ووجع راس

والله مش عارفة لازمته ايه من الاول

17 comments:

محمد هانئ said...

مش عارف اقولك ايه يا راندا
انا اه مرحتش امبارح لكن تابعت م مصادر كتيرة جدا الااحداث في لحظتها
حسيت بالقرف والمهانة
كفاية دلوقتي بتتبرأمن الظاهرة ويقولوا اسد هو اللي دعا ليها
فيه حاجة غلط
تصرفات غلط تخطيط غلط
قيادات بتتصرف غلط
حركة كفاية و تعاملها مع كل شئ غلط في راي
ومع اني لم اشرف بعد بالانضمام اليها لكن حاسس بالغيرة والحزن عليها
هراركية القرار في الحركة مش ماشية صح
كفاية حاليا بتغرق
متشائم.......يمكن بس ده الحقيقة

Anonymous said...

راندا

مش عارف أرسم وش واحد بيعيط و لا بيضحك
الغلط في الحكومة و لا في الحكومة و المعارضة مع بعض

إقترب الهدف ليصبح الجدي ثور
على حسب الأبراج

Anonymous said...

الاعتصام كان مبادرة من مجموعة أفراد لعى رأسهم أسد، كفاية لم تتبنى الاعتصام و الدعوة للاعتصام المنشورة على موقع كفاية

http://harakamasria.org/node/9245

و في صياغتها مكتوب
دعا نشطاء مصريون من مختلف التيارات للاعتصام بميدان التحرير في دعوة تداولوها عبر الانترنت:

و الامضاء
شباب بيحلم ببكرة

و الدعوة مصنفة تحت فعاليات صديقة.

أجندة فعاليات كفاية بيتنشر عليها تنويه بكل الفعاليات اللي متقاطعة مع أهداف كفاية مش مجرد الفعاليات اللي كفاية نظمتها أو تبنتها و راجعوا
http://harakamasria.org/event

هتلاقوا فعاليات خارج مصر و فعاليات في مركز الدراسات الاشتراكية و الساقية الخ.

جورج اسحاق حاليا المنسق الاعلامي لكفاية مش المنسق العام، يعني دوره لا يستدعي بالضرورة المشاركة في المظاهرات (و المؤكد أن دوره لا يستدعي بالضرورة المشاركة في مظاهرات الحركة لم تنظمها و لم تتبناها).

أصحاب الدعوة طلبوا بنفسهم أن الناس تساعدهم في نشر الدعوة

Anonymous said...

أممممممممم
واضح ان كله بقا سيما أونطا

كله بقا بيلعب دور المناضل من خلف الدروع البشرية

واللى اتعكشوا هم الدروع دى

جاتهم القرف كلهم من كبيرهم لصغيره
خللوا الواحد عاوز يرجع اللى فى معدته فى وشهم

ودة رأيي بعد التحديث برضة يا راندا على فكرة

الامضاء
مقهورة
مش شهروزة

Anonymous said...

ايك يا راندا

حمدا لله على سلامك والشباب..

المهم وانا في الجامعه الصبح وبعد مغطيت اعتصام الاخوان كلمت زميلي وبقوله يبني هنروحبليل نغطي اعتصام التحرير قاللي لا اصل والي واحد من قيادات كفاية ومقاللي مترحشي عشان النهارده هبقى في لم واعتقالات قلتله يالا انته جبان وانا نزل بليل ونزلت بليل لقيت بعا اللي اتي شفتيه ميدان مرشق بالامن المركزي وعلى كل متر من كل جنينه وكل رصيف عسكري..

فضلت ادور عليكوا واشوف انتوا فين عشان نقوم بعملناالصحفي بس ملقتكمشي..

كنت جي فدائي والله بس هنعمل ايه بقى نصيب والواد اللي ابوه من كفاية طلع ابوه من الكبار اللي بريحوا اعصابهم..:)

خلي بالك من نفسك من بكره احنا تحت قانون مكافحتنا..

bluestone said...

انتي قلتي كلمة كانت واقفة في زوري
وشهروزة قالت الكلمة التانية

كله بقى بيناضل على كله

حاجة آخر قرف

تصدقي بالله ..
أقل حاجة كانت مضايقاني اليومين دول هو موقف الحكومة ؟؟؟

المسخرة الاعلامية
موقف المؤسسات الدينية
المتاجرين بالنضال وبالشباب وباي قضية
سلبية رجل الشارع وعدم اهتمامه
تخاذل الجهات الدولية

كله بقى آخر قرف ..
مفيش حاجة عدلة

حد بقى في الغمقان ده يدلنا على نقطة نور وحياة ابوكوا لاني خلاااااااص
اتخنقت

أحمد عبد الفتاح said...

زنزانة الله ينور
بس اقري عندي عشان تربطي الكلام ببعضة لانه مرتبط جدا
ثم انا مقلتش ليكي يلا نروح النقابة نشارك قلت لك تعالي نشوف بيينيله ايه علي دماغهم ودماغ الي خلفوهم
وروحت وممكن تسال سارة انا كنت ناوي اعمل ايه بس هي الي منعتني باعالعافية

أحمد عبد الفتاح said...

صحيح نسيت اقول لك
أخويا الاصغر مني اتريق علي الي نزلوا الاعتصام والمدونيين وقال دول أخرهم يتظاهروا علي شات روم في البالتوك واحد يهتف والباقي وراه لانهم مبيعرفوش الا النت
بصراحه
معرفتش ارد عليه

إيمــــان ســعد said...

و الله يا راندا

تقريب الكبار لهم حسابات اخرى تختلف عن المعلنة

و مش ح يهمهم لو كان فيه عدة معارضين من الشباب ككبش الفداء

حركة كفاية بقيت حاسة ان عندها

موت اكلينيكي

مجرد عايشة عل ىلاتنفس الصناعي

و كل الاحزاب التى تملك الافواه فقط

في مقاعد المشاهدين طول الوقت

لكي الله يا مصر

تحياتي

الأستاذ جمال بيه said...

خلاص يا مدونين يا عرر مبالكوش غير الحاج وسيرة الحاج
جتكم ابلا حزم والباقى جزم
اسفوخس
وليحيا ابو جمال وعزبته وحكمه المديد

zenzana said...

الحاج ابو جمال يحترم نفسه
ويجي يشيل تعليقه من هنا

^ H@fSS@^ said...

there is nothing left to say, even saying A7A,isnt useful anymore, previously i used to say it and it made me feel a bit better , but now, i just feel "3al2am" in my throat whenever i think of the new constitution, i lost my hope in coming back and living in egypt again. what do you think? do you think we can live unable to speak our own mind or at least feeling secured about ourselves just walking in the streets?? i dont think so, am truly and deeply depressed.
still missing u alot ya dazma. 3aaaaaaaaaaa

أدهم الصفتى said...

عارفه يا ست الناس

و حياة كل الحاجات اللى باحبها أنا مش متضايق من أى حاجه غير من كلمة قيادات دى

المصيبه اننا بعد ما نقرر نعارض المهزله اللى البلد عايشه فيها , نرجع تانى ندور على قيادات
ايه الهم ده؟

من سيد لسيد يا قلبى لا تحزن

أنا باعمل اللى باعمله , و كمان الشباب اللى كانوا معايا فى القبضه الكوميديه دى , و احنا عارفين كويس ايه التمن اللى ممكن ندفعه , و قابلين تماما التمن ده , لأنه حاجه بسيطه قوى قدام احترامك لنفسك و لقناعاتك , و لزمايلك

عارفه يا ست الناس
لو ليه أخت بنت فى سنك , ما كنتش حاحبها و احترمها قدك

أنا باروح مبسوط بعد ما باشوفك انتى و كل الجدعان و الجدعات , لأنى باحس قد ايه فيه بنى آدمين يستاهلوا بجد انك تبقى معاهم و جنبهم , مهما حصل

بكره بتاعنا يا بت , أوعى تصدقى حاجه غير كده
ولا يقدر علينا حد
ده انتى لوحدك تقومى بخمسه , همه فاكرين ايه يا رندووووود

هع هع هع , يسقط يسقط محمد كوبرى مبارك

BeLiEvEr said...

يا جماعه، اللى نزل مظاهره أو إعتصام، ده نزل علشان بلده.
و كل الناس اللى كانت نازله، كانت نازله و هى عارفه إنها مشدوده مشدوده.
إحنا قعدنا نتكلم فى الموضوع ده على مدونة "جبهة التهييس الشعبيه" و قلنا للبنات متنزلش علشان اليوم ده شكل الأمن كان ناوى.

بلاش نضيع مجهودنا فى إن إحنا نلوم بعض، الأحسن نفكر إيه اللى ممكن نعمله بعد الموافقه على التعديلات دى.

(على فكره، أنا مش من كفايه، و لا منضم لأى حزب، أنا واحد مصرى عادى بس عنده امل فى كل الناس اللى بتحب مصر دى)

BeLiEvEr said...

على فكره، أنا حاطط بوست عندى فى مدونتى عن موضوع الفلكى بتاع الاخبار
ده
ممكن تزورينى و تشوفيه بنفسك
http://believer76.blogspot.com

šσяšαяαα said...
This comment has been removed by a blog administrator.
zenzana said...

شكري وتقديري لكل اللي اهتموا بالموضوع وعلقوا


انا بالنسبة لي يكفيني ما كتبه المدون اسد فى بوسته الاخير تعليقا علي اصل فكرة الاعتصام و مدي اهتمام حركة كفاية بها
http://asad.blogsome.com/2007/03/28/asad_in_the_desert/

وان لم يتغير راي كثيرا فأنا ضد فكرة المكان البديل للمظاهرة واتجاه المتظاهرين له مباشرة

اما بخصوص جورج اسحاق فأعتقد ان من حق الجميع معرفة سر الزوبعة الغامضة لاختفاؤه قبل اعتصام التحرير بيوم واحد ليس لانه جورج اسحاق الشخص ولكن بوصفه المنسق الاعلامي والمنسق العام السابق اي بحكم منصبه

ثالثا لم انتقد اى من شارك ف الاعتصام او التظاهر او لم يشارك لان المشاركة باي شكل مسألة تحددها قناعات الاشخاص فالجميع احرار ف المشاركة او رفضها
وليس انا من يحاكم الاشخاص علي خياراتهم
فكل انسان حر بشكل مطلق دا رايي الشخصي

عذرا ف التأخر ف الرد علي الجميع
لكن كان لابد لي من الانتظار للحوار مع
جيمي هود احد اثنين اقترح فكرة الاعتصام

تحياتي للجميع
عذرا سأضطر لغلق التعليقات في الموضوعات حتى لا اضطر لمسح اى تعليقات احتوت علي سب وقذف لبعض من علق سابقا