Sunday, June 3, 2007

أرفض حدوث هذا

صرحت السيدة عائشة عبد الهادي وزيرة القوي العاملة والهجرة انها لن تسمح
بتسفير أي عمالة نسائية مصرية للعمل في أي دولة تحت مسمي خادمة أو مديرة منزل.
بما انها بتحترم وتقدر كرامة العامل المصري، اه والله قالت كدة
عارفة نفسك تسحب صوت عالي زي الشيشة من مناخيرك
استني متستعجلش
وقالت كمان: ان مانصت عليه مذكرة التفاهم‏‏ ويخص المرأة العاملة هو عرض لوضع حالي بالمملكة العربية السعودية مؤكدة ضرورة وضع ضوابط لحماية حقوقها‏.‏
يعني لسه الست الوزيرة هدور علي ضوابط للحقوق
وكمان أن الوزارة لاتتأخر عن بحث أي مشكلة لعاملة أو عامل مادام علي حق
هنا ممكن تقول وتسحب وتقبح زي ما انت عاوز
واخد لي بالك من مادام علي حق دي؟
طبعا هي مش بتتكلم عن العمال الوحشيين اللي عاملين اضرابات ولا
بيطالبوا بالحوافز او رفع بدل المخاطر او الوجبة
والله كتر خيرها واثقل ميزان حسناتها قالت انه تم
الاتفاق مع الجانب السعودي علي مد تأشيرة العمل لتصبح سنتين بدلا
من سنة وامكانية نقل الكفالة من كفيل لآخر
شايفين الكرم؟
قال يعني حلت خلاص كدة مشاكل كل العمالة المصرية في السعودية
طب ايه رايكم نفتح ملف العمالة المصرية بالخارج؟
ونشوف
لو نفسك بجد
تضحك او تعيط او تقول كلمة اختصارها تلات حروف
معناها "أرفض حدوث هذا" او انك تثبت انك سكندري اصيل
وشوف اخر تصريح فللي لرئيس الوزرا احمد بيه نضيف

24 comments:

Xee said...

ماانا امبارح بالليل شفتها على الجزيرة و قعدت أضحك لوحدي بصوت عالي زي الامؤخذه بالظبط

بقيت مش عارف هي بتهزر و لا بتتكلم جد

و من نعم ربنا علينا اننا الشعب الوحيد في العالم اللي يقدر يعبر عن استنكاره أو غضبه أو دهشته و أحيانا عن فرحته كمان بنفس الكلمه الفذه

تحياتي
سكندري أصيل بفضل الحكومه

مُرَاقِبْ مِصْرِي said...

الموضوع تفسيره بسيط... الست عندها سكيزوفرينيا زي كدة دكتور جيكل ومستر هايد وهي معذورة لأن عندها شخصيتين مختلفتين... ندعيلها يا زنزون ربنا يشفيها... بالنسبة للأصوات السكندرية أعتقد أن الشعب المصري كله خلاص قرب ينضم "للاتحاد السكندري" وبإذن الله نادي الاتحاد السكندري هياخد الدوري

Anonymous said...

حتي وانتي جد وبعيد عن الشعر حلوة

رقيقة وزي العسل ومن الاخر تتاكلى أكل

يا ريت نشوفك فى محاكمة اسلام نبيه

وش بيغمز:)

Anonymous said...

الزنزانة

انا زرت الزنزانة افكار مترتبة وزى الفل بس اللى محيرنى الوزيرة بتاع سوق السمك اللى قاعدة على النصبة بتشوى سمك وتهف الدخان وما شاء اللة بالعة عيلين فى بطنها ومنظرها يدل على السكافة العميقة بتاع اللى اختاروها اصل الحكاية يا ستى الستات انها كانت بتفقع كام زعروطة لما الست سوزان تدخل القاعة فى اجتماع وكانوا بيجوبوها فى كل حفلات سوزان علشان تعمل جو وتزغرط وترقص وتقول بقين كلام
يعنى من سوق السمك الى وزيرة فى حكومة وزير الثقافة الشاذ فاروق حسنى

كلام كتير بيوجع وربنا يستر على ولايانا

ام الشبوط

7ntklm said...

اتفقو باسرع وقت علي صيغه شديده اللهجه نرسلها جميعا للست عيشه 00 و نحاول ننشرها في نفس الوقت في كل المدونات و الصحف المصريه 00 حتي لتوعيه اهالي البنات و السيدات دول 00 و اعطائهم فكره واضحه عن الوضع اللي مستنيهم في دول الخليج و حال بناتهم اللي مش هيسرهم لما ييجو 00

و لو حتي صعدنا الموضوع للاعلام المرئي 00 علي شكل ايميلات لبرنامج العاشره مساء او القاهرة اليوم والجزيرة وغيره من البرامج اليوميه

سكوت هنصوت said...

انا سمعت اشاعة كده لكن الحقيقة ممش متاكده من صحتها..ان الست الوزيرة دي معهاش مؤهل عالي....وانما مؤهلها متوسط...ومع كامل احترامي لحاملي المؤهلات المتوسطة...طالما لسة منبتلهمش قرون...فأنا عايزة يعني اعرف..الست الوزيرة اتعينت وزيرة على اساس ايه يعني....يعني عايزة امارة والنبي لحسن مش فاهماها دي
اما بقى بخصوص اقتراح الخطاب شديد اللهجة...فانا اقر و بشدة...و مستعدة كمان لتقديم صيغة مناسبة...اذا ما كانش فيه متطوعين..الا ان اي كلام هيكتب من غير محترف زيي..قد يخرج على قدر من الركاكة تضيع هيبة الطلب...رندا...ان سارعت بكتابة الطلب فمن الممكن اننا بالفعل نفعل التوقيعات سواء الإلكترونية او حتى اليدوية...من خلال حملات زي بتاعة توكيلات سعد زغلول...ونطلع بيها لأي جهة غير حكومية محايدة...انا مستعدة اتطوع بلم تطوعات..وهحط لنفسي رقم 300 توقيع...مستنية منك باقي الإقتراحات
تحياتي

Anonymous said...

زنزانة
انتى ليه بتتجاهلى تعليقاتى؟
انا علقت قبل كدة كتير ولا مرة رديتى
يا ترى ليه؟
خصوصا انى مقولتش حاجة وحشة او غلط
كل الحكاية انى خايف اقولك مشاعرى مباشرة خصوصا انك منفضة لناس كتير
ايوة انا اعرفك وبشوفك فى وسط البلد
متحاوليش تدورى على الاى بى بتاع الجهاز لانه من نت كافيه
:)

أسوور said...

انا مش شايفة أى مشكلة ان الخادمات يروحوا يشتغلوا فى السعودية
الظاهر ان ما حدش من اللى بيكتب فى الموضوع دة عارف ايه اللى بيحصل للخادمات فى مصر
وعجبى

Xee said...

العزيز مجهول الأمور

وجهة نظرك في موضوع بوست الزنزانة قوية جدا ، فتحت للقراء أفاق جديده للتفكير

اشكرك نيابة عن كل زوار الزنزانة

و بعتذر لادارة الزنزانة عل ردي،و لكني كزائر دائم بعتبر التعليقات كلها موجهه للجميع

ابقى عدي خدلك بوقين من اختراعي العظيم يا استاذ مجهول

تحياتي للجميع
زي

BeLiEvEr said...

بصى مش هاتسمعمونى بقولها كتير، بس معلش
"أرفض حدوث هذا"
يا مصر

و ردا على "سكوت هنصوت"،الوزيرة مهاش أصلا مؤهل متوسط، دى معاها إبتدائية بس و الكلام ده بجد، و ده كان سبب إنتقادات كتير أثناء تعيينها وزيرة، بس أكيد هيه ليها مواهب فذة فى العمل العمالى النقابى، و فى دى ممكن تسألى زنزانة، هيه بقى أدرى

zenzana said...

زياد
جعلك الله زخرا ومواطنا سكندريا اصيلا
ههههههههه

مراقب
وانا اقول الناس واقفة طوابير ليه قدام الاتحاد السكندري؟

zenzana said...

الاخ المجهول
لو سمحت بلاش تخرج عن الموضوع او انك متعلقش من اصله


الاخت ام الشبوط

شكرا نورتينا بالزيارة

zenzana said...

حنتكلم وسكوت هنصوت

انا معرفش الصياغة ممكن تتكتب ازاي لكن مش هنغلب وطالما جاهزة عند سكوت هنصوت يبقي الموضوع منتهي

انا راي ان الموضوع مش جمع توقيعات لكن ممكن نبعت ايميلات لمواقع اخبارية زي العربية والجزيرة او للجرايد اللي بترصد علي بعض صفحاتها المدونات وغيرها دا اللي ممكن يعمل ضجة حوالين الموضوع

كمان يتفتح ملف خادمات المنازل في مصر
وملف العمالة المصرية بالخارج
لانهم فيهم كتير
انا هستني البيان من سكوت هنصوت
علي الايميل
تحياتي لكم

zenzana said...

ياسمين
لا طبعا اكيد في مشكلة من سفر خادمات مصريات للسعودية وعارفين انه مش جديد لان من يومهم وهم بيسافروا ومن يومهم وهم بيتبهدلوا هناك زيهم زي العمالة المصرية ف الخارج
واللي اكيد ميفرقش كتير لخادمات المنازل في مصر
لو تحبي مزيد من التفاصيل حوالين الموضوع ارجعي للبوست اللي اتعمل بعد تصريح الوزيرة مباشرة والظاهرة انك مأخدتيش بالك منه

http://zenzana.blogspot.com/2007/05/blog-post_30.html

ولو تحبي في مناقشة لنفس الموضوع عند حنتكلم
http://7ntklm.blogspot.com/
وممكن تردي هناك علي صديقنا اللي بيعيش ف السعودية اللي وجهة نظره تتعارض مع وجهة نظرك

zenzana said...

زياد
شكرا يا فندم جعلك الله زخرا للغلابة امثالي

لا طبعا انت ترد براحتك الزنزانة زنزانتك

zenzana said...

بليفر
اكيد كفاية انها بتزغرد لماما سوزان

عشان تبقي وزيرة

معني كدة ان ابشروا ف يوم من الايام هبقي وزيرة قوي عاملة لاني بعرف ازغرد تقريبا مش بعرف اعمل حاجة غيره وان كنت ف الرقص مش ولابد بس هحاول اتعلم لعل وعسي
يبقي لنا ضهر ف الحكومة الواطية

Anonymous said...

ياسمين
اسمحيلى أقولك

احااااا بالجامد
دة أنتى بنت متناكة وسخة بجد مش عايشة فى أم المخروبة دى
قال خدامين فى عيلتكم وعند صحابك
انا اقطع دراعى اذا ما كنتى انتى نفسك شغالة ونفسك تطلعى تحت جناح الحكومة برة وتتناكى برة

بالمناسبة
سبت لك رد عند شهروزة ابقى روحى شوفيه

zenzana said...

أم هانم الشغالة
أظن انك م الافضل تحترم نفسك
وجودك غير مرحب به هنا ع المدونة

Gid-Do - جدو said...

رندا

بما انك سبقتينى وردتى على المدعو ـ أم هانم الشغالة ـ اسمحيلى اقول لاخينا اللى لسانة فلت منه من فرط غيرتة على مصر ـ اختلاف الراى بين الناس شئ طبيعى ولازم يكون ـ لكن تجريح الناس بالشتيمة دة بيخلى الناس تتعاطف مع المشتوم وتنزل الشاتم من عنيها ـ والشتيمة اعتراف بالعجز من الشاتم تجاة حجة المشتوم

رندا

من فضلك احذفى التعليق يالشيمة اللى فية ـ والاخ الشاتم يجب الاعتزار لياسمين

وان رفض الاعتذار ارجو ان ياسمين تقبل اعتذارى انا نيابة عنة

أسوور said...

جدو
أشكرك لموقفك
وأرجو من زنزانة مسح التعليق لأنه يخدش الحياء العام أصلا

3rby said...

راندوشا:
الكيس كيس يا معلم

zenzana said...

المجهول
ام هانم الشغالة
ياريت تحترم نفسك ومتهوبش ناحية الزنزانة لان وجودك غير مرغوب فيه
وهقولك زي شهروزة توجهه كلامك لي وليس لزوار المدونة ويا ريت فعلا متشرفناش هنا تاني


جدو العزيز بتفق معاك في كل كلمة قلتها وارجو من ياسمين انها تقبل اعتذاري عما حدث لها

لكن اسمح لي انا ضد فكرة حذف اي تعليق من التعليقات دا فعلا ضد افكاري ارجو انك تعذرني وتتقبل دا مني

zenzana said...

عربي

نورت يا فندم
اخيرا شرفت؟
:)

ibn nasser - ابن ناصر said...

اول حاجه الموضوع ده مايتعلقش عليه يتقري بس! اصلي هعلق اقول ايه ! لكن انا هعلق علي بعض التعليقات بتقولي انظام الناصري مش عارف ايه طرد اليهود يعني احنا يا رندا ناقصين يهود! مش شايفه اهل البلد نفسها بيعملوا ايه في بعض تخيلي لو كان في يود كان مع كل مذبحه اسرائيل تعملها او حرب زي لبنان الاخيره هتقوم حرب هنا وشوفي بقي تخيلي ردود الافعال ودول كبري تقولك دول بيتم اضطهادهم والكلام ده انتي عارفاه,, تاني حاجه اللي بيقولك كمان عشرين سنه هنبقي ملاحده ! هقولوا احنا ناقصين احنا بقينا كل حاجه وعملنا كل حاجه فعلا يعني جت علي دي ! مع اني مش مع النقطه دي لان الشعب المصري تاريخه بالكامل الدين اهم شيء-وهومش متدين بس مظاهر الدين يعني - في حياته

تحياتي