Friday, June 15, 2007

بالعافية وغصب عنك انت مسلم

اسمها نانسي عادل بشري حليم ، تالتة ابتدائي، مدرسة ابو بكر
الصديق، ادارة 15 مايو التعليمية ، نانسي لاقت نفسها ناجحة في
مادة الدين الاسلامي ، وكمان متفوقة 27 من 30 ياااه، يا دي الهنا اللي انتى فيه
يا نانسي، بس يا خسارة التفوق، لان نانسي مسيحية، اه متستغربش
نانسي مسيحية، وأدت امتحان الدين الاسلامي، في الترم التاني من
صفها، لان المدرسة اجبرتها علي اداء الامتحان، مع انها ادت امتحان
الدين المسيحي في التيرم الاول، ومع انها مجرتش قلم وجاوبت
علي اي سؤال المدرسة اصرت تعديها م الامتحان وكمان تبقي ضمن
المتفوقين في المادة، متخليش مخك يروح لبعيد، المدرسة لا سمح الله
محبتش تدلل علي مظاهر الوحدة الوطنية بدليل انها مخلتش تلميذ
مسلم يؤدي امتحان الدين المسيحي، المدرسة بس حبت تساهم
في أسلمة بعض افراد الشعب بالعافية،وضرب الجزمة، زي بعضه اهو تنقذ كام
واحدة من العالم الكفرة من انهم يدخلو النار، لان المدرسة كمان
اجبرت نانسي انها تكتب اسم غير اسمها في شهادة الميلاد و باقي
الاوراق الرسمية، وأصرت المدرسة علي انها تكتب اسم نانسي علي
عبد الله صالح ، اللي هو اسم والد نانسي بعد اسلامه،
في 24يونيو 2003، ورفعه لقضية ضم نانسي وشقيقها لحضانته، ولم
تحكم له المحكمة حتي الان.يعني المدرسة حبت تقوم بخدمة عظيمة وهو
الاقرار والاسهام في اعتناق الطفلة للدين الاسلامي، حتي يسهل
علي والدها ضمها لحضانته بدل ما تفضل في حضانة امها اللي لامؤاخذة
مسيحية، يعني يا جماعة محدش يفهم مدرسة ابو بكر الصديق ومنطقة
15 مايو التعليمية غلط ، ويقول انهم زوروا،ايواااان دول بس حبوا يخدموا
اه الخبر من الدستور وموجود هنا ع الدفترخانة
علي فكرة الخبر مش الاول من نوعه ولا حاجة دا كان قبله بيومين
كان هو هو الحدث مع اندرو وماريو اللي اصرت مديرية التربية
والتعليم في الاسكندرية علي ادائهم الامتحان في مادة الدين الاسلامي
الترم الثاني_لاحظ ان في الحالتين مفيش ترم اول_ رغم انهم مسيحيين
أو دا لوضع قبل أصرار المدرسة علي حكاية الامتحان لان
مش موضوعنا اني أناقش هل طفل في السن دا مدرك لديانته او لا؟ في دول تانية مثلا
يترك امر تحديد الديانة حتي يصل الطفل لسن الرشد ويختار بنفسه
ومش هتناقش مين مسلم ولا مسيحي عن اقتناع ولا وراثة ؟
لانها تنطبق علي الطرفين
2000الطفلين مازالو في حضانة امهم المسيحية بعد ان اعلن والدهم اسلامه عام
وحين قامت الام برفع دعوي ضد وزارة التعليم لالغاء القرار تقدم
نائب الولة المستشار محمد رجب يوم 31/مايو بمذكرة للرد علي
الدعوة المقامة واستند في مذكرته
"ان الاسلام يقع فرضا علي الصغير باسلام ابيه، لانه أصل الفطرة
وخير الديانات ، وأنه لا يجوز أن تنقطع هذه التبعية،أو هذا الفرض الا ببلوغ
خمسة عشر سنة هجرية"
المذكرة بتقول بكل بساطة ان الصغير غصب عنه هيبقي مسلم
لحد ما يبقي عنده 15 سنة طبعا بلاش نسبق الاحداث ونقول
ان الولد هيكون كره نفسه والاسلام والبلد والدنيا كلها طالما انه بالعافية
المذكرة كمان بتقول ان التبعية للأب ، ولا عزاء للأمهات
لان الستات دول كخة ووحشين وميعرفوش يربوا عيل ومينفعشوش ببصلة
كمان المذكرة بتقول ان خير الديانات الاسلام والباقيين دول كخة
طب هو سؤال بيلعب في دماغي من يوم ما قريت الخبر
طب لو مسلم تحول للمسيحية هل يتحول ابنائه للمسيحية بعد ارساء مبدأ
التبعية للأب ؟ وهل يجوز اجبار ابنائه علي اداء الامتحان
في مادة الدين المسيحي؟ تحبوا تعرفوا المذكرة بتتكلم عن ايه تاني؟
أن المسيحي الذي تحول للأسلام ولم يثبت الديانة الجديدة في
بطاقته الشخصية يعتبر مرتد ووجب استتابته او قتله ان لم يتب
ولو كانت واحدة ست نحبسها بس لان القتل للرجالة
ودا بالاستناد الي فتوي للشيخ جاد الحق علي جاد الحق
بما اني غميتكم اسمحوا لي اقولكم اخر نكتة
تلميذ بيسأل صاحبه أخترت مواد ايه الترم ده قال له أحياء و دين
اسلامي قاله بس مش انت مسيحي قال له يا عم الاسلامي اسهل ناجح ناجح
عشان حقوق الملكية الفكرية النكتة من يالالالي

77 comments:

أحمد عبد الفتاح said...

بقه ك ده تفتني ؟
أنا صاحب النكتة اه
المهم بقه
انا امي مدرسة بالمدرسة ده وده صدفة غريبة هي قعدت معايا وحكت لي شوية عن تفاصيل القضية وعلي فكرة امي مدرسة اعدادي والبنت ده في ابتدائي
1- المدرسة انا شايف انها اكبر غلطان بداية من الناظر الي مش بيطبق القانون لانه لا يجوز له تغير دين طالب عنده بالمدرسة الا بحكم محكمة والمدرسة طبعا الي نجحت طالب من غير ما يكتب حرف
2- لحاد امتي هنتعامل مع موضوع اسلام واحد وتنصير واحد علي انه نهاية العالم
ياناس افهموا
والله العظيم لا الاسلام هيقل شئ لو كل الناس تنصرت ولا المسيحية هتقل شئ لو كل الناس اسلمت ده دين من عند ربنا يعني اعظم من شوية بني ادمين ذينا
3- موضوع تحديد دين الولد ده امر صعب جداانا شايف اننا نبقي واقعيين ويبقي الولد علي دين ابوه لحين بلوغه سن الرشد وده منعا للغط
4- بالنسبة لاسم البنت من ناحية ابوها حر يغير اسمه وتبعا يتغير اسم البنت بس المدرسة متقدرش تغير الاسم الا بحكم محكمة ده امر منتهي برده
5- سوال محيرني
ايه ذنب ملاك صغير ذي ده انه يعاني كل المعاناة ده ؟
كفاية احكي لكم ان اهل الام ضربوا نار علي ناظر المدرسة بسبب ما فعل بس مجاش فيه وكل ده طبعا قدام البنت
هل المسيحية او الاسلام او حتي الهندوسية ترضي بكده ؟
أعقلوا بقه

Xee said...

ههههههههه

الضحكه دي على الكاريكاتير الجامد اللي في الأول و على النكته المسخره اللي في الاخر

هههههههه
الضحكه دي بقى على الاسم اللي اختاره ابو نانسي لما اسلم

هههههههه
الضحكه دي بقى عشان، الله اعلم بما في القلوب، بس ابو نانسي ده راجل هجاص ولامؤخذه، لان واضح جدا انه اعلن اسلامه بس عشان يطلق المودام، لان اسلامه لا يتطلب ابدا انه يسيب الست و يطلب ضم حضانه و لا حتى ضم كى جي تو
لان زواجه من المسيحية شيئ لا يخالف شريعته و لا يخالف قانون بلده، يبقى هجاص ولا مش هجاص؟

ههههههههه
الضحكه دي بقى، مجرد رخامه

Xee said...

سؤال خارج عن الموضوع شوية

هو المصري اليهودي بيمتحن ايه في المدرسة؟
انا بسأل بجد على فكره مش برخم


و انت ازيك كده؟
دي بقى رخامه

أحمد عبد الفتاح said...

معلش يا راندا عايز ارد علي سوال ذييييييي
يمتحن دين يهودي يا فالح
بس ده بشرط التاكد ان ملوش قريب من الدرجة 589589658965896 مش مسلم
والتاكد ان ملوش جار ولا صديق ولا حتي واحد عدي قدامه مرة مسلم
يعني من الاخر يطمنوا انه يهودي مأصل
اما بقه كتاب الدين اليهودي فموجود طبعا
بس انت الي مبتنسالش

zenzana said...

أحمد معاك في معظم اللي قلته
لكن انا معترضة علي مسألة ان الابن يتحول بالتبعية زي ابوه
اولاهو طفل بيمارس حياة دينية مختلفة
انت عاوز تغير كل حياته السابقة بناء علي التبعية لاحد الوالدين؟
طب ما تسيبه زي ما هو لحد ما يكبر ويقرر هو اللي عاوزه
مش عاوزة اتطرف واقول انه مسألة تحديد ديانة طفل في بعض البلدان تترك للطفل عند البلوغ
بالنسبة لتغيير الاسماء
احنا ليه اصلا في تمييز ما بين اسماء مسلمين واسماء مسيحيين
ذنب الملاك انها مصرية

zenzana said...

زياد

معاك في الضحكة الاولي والتانية
التالتة بلاش اعلق احسن انت عارف لساني ومناخيري
بس هو طبعا حر في اختيار اسمه

مسألة هو طلق ليه؟
مش موضوعنا موضوعنا الحقيقي هو الاكراه في الدين
ومشاركة الدولة في مهزلة اسلمة البشر
بالعافية

zenzana said...

زياد تانى
موضوع اليهودى
دا البركة في النظام الناصري
لانه ساهم في نكبة فلسطين على طريقته لما طرد كل الاجانب من مصر
واعتبر اليهود المصريين اجانب
فا خلصنا منهم اللي راح اسرائيل واللي راح امريكا وغيره
وبالتالي هتلاقي الموجودين دلوقتى تخطوا سن المدرسة بعقود
بس اكيد المدرسة مكنتش هتسيبوه

.:.-=- ELGaZaLy-=-.:. said...
This comment has been removed by the author.
Bou-ME said...

أبناء مصر

بنحب, هنقدر, هنغير

http://abna2masr.blogspot.com/

شمعى أسعد said...

ألحدت أوروبا قديما
بسبب محاكم التفتيش
ويتوقع باحثين ومفكرين كثيرين
أن مصر سيحولها الضفط الدينى
الذى تتعرض له بالنتظام
الى دولة ملحدة
فى خلال عشرين عاما

^ H@fSS@^ said...

الى الاخر شمعي اسعد
يسمع من بقك ربنا
يا رب يا خويا يا رب
ضاقت فلما استحكمت حلقاتها فرجت و كنت اظنها مش حتفك خالص
و على راي عبسلام النابلسي ابسطها يا باسط ابسطها

زنزانة
انا شفت اللينكات بس لسه مش قادرة اصدق عنيا
حاسة ان احنا في ابريل و دي كذبته
معقولة؟؟؟!!!
خدي عندك بق مفتوح من الازبهلال و عنيين مفنجله مش مصدقة لغاية دلوقتي
حاسة ان احنا بنتعاطى حبوب هلوسة او ان في هزار بيحصل
ايه الهبل ده
ايه التخلف و القرف و الرجعية و التشدد الغبي ده
حقول ايه و لا ايه
حتى الدعا مبقلهوش معنى حاجة تقرف
سلام

^ H@fSS@^ said...

الاخ عبفتاح
واقعيين مين ؟؟!!!؟؟؟
و ليه تحكم على الولد انه يبقى مسلم حسب ديانة ابوة؟
طيب افرض بقى عمره 21 و بص لقى نفسه حابب يبقى مسيجي مش ساعتها حيعتبر مرتد في وجهة نظر المجتمع المتخلف و تحق عليه الحكم بالقتل و يفضل عايش مطارد؟
او انه يفضل مسلم مضطر و ظاهريا محسوب علينا مسلم لكن ربنا اعلم بقلبه و ممكن يتحط في خانة المنافقين؟
ها انهي وضع فيهم احسن لك؟؟
دي مش واقعية
اسفه و اسمح لي اقلك دي تعصب لكن بشياكة
صحيح مانتاش بتكفرة او بتقيم عليه حد او بتشتمه عيني عينك لكن ده اولا و اخيرا اسمه تعصب لكن زي ما قلت لك بشياكة
و اسفه مقدما اذا زعلت انا كلامي دبش و اسال زنزانة

BeLiEvEr said...

شئ لا يصدقه "عكل" بجد!!!
:/

إيه منظومة الأفكار المتخلفة اللى ماشية فى البلد اليومين دول،
إحنا وصلنا للدرجة دى من السطحية و عدم الوعى و الجهل و سوء التصرف؟
طيب دول مديرين مدارس ، يعنى بيعلموا أجيال، شوفى بقى الأجيال اللى طلعوا من تحتهم عاملين إزاى

ماهو اكيد لما يكون ناس بتربى و تعلم و بتفكر كده، أكيد حيطلع من تحت إيديه جهابذ فى التخلف.

صاحب البوابــة said...

لي عودة لمناقشة هذا المقال القيم

تحياتي

.:.-=- ELGaZaLy-=-.:. said...

هقرا اكثر ولما افهم هاجى وارد

بس مش من الاسلام ابدا

انى اجبر اى حد على تغيير دينة


ليى عودة

Ayyam said...

Changing wifes by switching the religion is a kind of funny technique that was only endorsed my idiots and hypocrites ..King Henry the 8th did something similar to get married...for that reason only, he created his own church or the Church of England!. Perhaps our church should think about solving the real problems of Egyptian Christians rather than just playing deaf ...
أهلاً زونزونه: هيه فكره معقوله نخلى الناس تختار بس إنتى عارفه أننا مش قادرين نختار أى حاجه حتى بعد كل التعليم والبصبصه...أما دى مسأله صعبه سببها الرجل المتخلف "أو مراته" اللى فاهم الأسلام غلط زى بقى الرعاه...إذا كان مقتنع بالدين يبقى لازم يتصرف بما يرضى الله مش بما يتمناه هو...أنا من رأيى أن الناس ديه بصراحه جربانه... وكمان ياريت بقه الكنيسه تحلل الطلاق علشان الحكايه ديه جايبه مشاكل كتير مع الأخوه المسحيين أو بلاش يتجوزه فى الكنيسه على الأقل أسهل وأرخص ومفيش وجع دماغ...يعنى ياجماعه اللى عاوز يطلق يبقى مش محتاج يغير دينه البلد مش ناقصه فتنه خروبيه كفايه الهم اللى إحنا فيه...بس بصراحه صعبانه عليه البنت العسوله أنها تمر بظروف صعبه ذى ديه...

Xee said...

منتحرمش يا عم تاح

راندا,
معاكي حق الصراحة ، الموضوع الاساسي هو تغيير دين طفل بدون وجه حق

طب لو كان والدين نانسي اللي في تالته ابتدائي غيرو دينهم هما الاتنين - البابا و الماما يعني، كان هيفضل رأيك برضه انها تفضل على دينها و تخير لما تكبر؟

و خلي بالك عشان السؤال ده جاي في الامتحان على فكره
يعني اجابته محتاجه تركيز وواقعية

تحياتي

Alaa said...

المدرسة مش من حقها شرعا و لا قانونا تعمل كده
انما الاب من حقه يطلب ان ولاده ينضموله
بس يارب الولاد ميكونوش كرهوا الاسلام بسبب اللي حصل

bluestone said...

اموت انا في الجهاد التطوعي ده .. :)
ده الواحد شاف ايام سودا على ايد ناس زي دول ..

انتي عارفة يا زنزانة .. اسوأ ما في الأمر ان علاقتنا بالآخر بتتشكل قوي في المرحلة دي اللي هي مرحلة المدرسة .. زي ما بتتشكل اغلب قناعات الانسان في بداية حياته ..
لو تجربتك سلبية مع الآخر في فترة مبكرة يفضل انطباعك سلبي وبتتعبي قوي لحد ما بتعدليه .. عشان تكوني انسانة موضوعية نظرتك لنفسك وللاخرين افضل

.. قعدت فترة طويلة جدا اتغلب على مجموعة من التجارب السلبية مع الآخر واقدر اقيم الناس على اساس فردي .. رغم اني كنت في مدرسة راهبات .. :))

بس هو سؤال .. مش فيه قانون بيقول ان الطفل في حضانة أمه في حال طلاق او انفصال الوالدين حتى البلوغ على ما اعتقد ؟؟؟

طيب هو مش كده تناقض في القانون ؟؟

وبعدين المدرسة دي وغيرها .. هما فاكرين ان الطفل لو نجح في مادة الدين الاسلامي هيبقى مسلم .. ده ايه الحلاوة دي؟؟
لو المنطق ده صحيح .. كان زمان عندنا مليون ونص زويل ,, عشان بينجحوا في الفيزياء والكيميا بتفوق ..

ده احنا مش فاكرين ولا كلمة من اللي درسناه في المدرسة (الحمد لله) :)))

صحيح اصحاب العقول في شقاء دائم .. وطبعا الكلام بتاع السيد المستشار ده محدش قال انه عنصري ولا متخلف ولا بغيض ابدا ... ولم يحاسب الراجل على كلامه ..

اكيد .. هو الكلام بفلوس؟؟؟

على العموم النكتة جامدة جدا
واسم ابو البنت ده اللي نكتة شديدة علي عبد الله صالح .. :)))))
مفارقة غريبة

سكوت هنصوت said...

يا ترى لو المذكرة دي...قدمت لقاضي مسيحي...كان هيبقى الحكم ايه..طبعا ده كلام اهبل لإن حاليا مفيش في مصر قاضي مسيحي..
مع ان كان عندنا رؤساء محاكم مسيحيين ايام الدولة الملكية..نهايتة..انا بقيت اتقرف من الحوارات دي...ما نسيب كل واحد يدعي لدينة زي ما يعجبة.والي عايز يسلم يسلم..والي عايز يتنصر يتنصر...هو يعني هيصليلنا ولا هيصلي لربنا

bluestone said...

فكرت شوية في مسألة الطفل يرجع لابوه ولا لأمه ويتربى على انهي دين..
بعاطفتي وميولي اقول طبعا يفضل مع امه

بس المفروض ان الحكم مايبقاش بالعاطفة ولا بالميول ولا كمان بقانون مش محايد
مقدرش اقول الطفل يبقى مع ابوه لان الاسلام خير ديانات الارض أو ان الولد يفضل مع أمه لان المسيحية هي الدين الحق وهي الطريق الوحيد الي الله

.. لان الكلام ده مش محايد ..

مش المفروض فيه قانون بعيد عن الاديان والميول الشخصية .. يعني القانون في حالة الطلاق بيقول الطفل يظل مع امه حتى سن معين لانها الاجدر على تربيته ولانه لا يجوز فصل الطفل عن امه حتى سن معين

لكن في النهاية القانون لازم يبقى محايد تماما في المسألة دي .. والا يبقى مالوش لازمة

اما بالنسبة للاختيار .. مش عارفة يا زنزانة .. هو احنا اصلا اتربينا على اننا نعرف نختار اي حاجة ..؟؟ يعني الولد اللي ابوه بيختارله من اول المدرسة للجامعة للعروسة كمان .. تفتكري هيعرف يختار دين بحاله .. مش عارفة ..

كل اللي اعرفه ان الايمان (ومش الدين) تجربة روحية خالصة تصدم الانسان في لحظة ما في حياته والمسألة في النهاية تجربة شخصية خالصة

MOHAMAD HANI said...

اول حاجة
احب اوضح مشكلتنا
او واحدة منهم
ان كل واحد بياخد دينه عن اهله
من غير ميفكر انا ليه مسلمو يا ريت يا استاذه زنزانة تقرأي موضوعي في هذا الصدد اللي علي
الحوار علينا حق
تاني حاجة
يعني واخده الصورة من موقع عمرو خالد
و مسحه الكلمة الاصلية وحاطه
دين
عمرو يرفع عليكي كده قضية
ده تزروير في كاركاتيرات مولانا عمروخالد
ربنا يسامحك يا شيخة
كنتي حتي شيلي اسم الموقع

Gid-Do - جدو said...

رندا

تعليقى حيكون بعيد عن الموضوع وفى نفس الوقت حولين الموضوع واللى خلانى اعلق نوع الجدية الموجود بين المعلقين

حفيدتى ياسمين تقترب من تسع سنوات الان امها ـ زوجة ابنى ـ امريكية مسيحية شديدة التعلق بجدها وجدتها من ناحية الاب وكلاهما قريب جدا من الكنيسة حتى ان الجد واسمه جيم يطوف العالم متطوعا لبناء الكنائس وهو فى حدود السبعين
وهو صديق عزيز وقريب جدا من نفسى

جيم يحب ياسمين بجنون ـ فهى ابنة حفيدتة ـ وياسمين تحب الجميع وفى سن حب المعرفة تسال جيم عن الله والدين ويجيبها حسب ما يعتقد كمسيحى

تسالنى ياسمين واجيبها حسب اعتقادى كمسلم

تناقش ياسمين كل منا فى راى الاخر ونجيب

ـ لم يحث ان قال لها جيم ان تعاليم
الاسلام خطأ واذا قال لاخبرتنى

لم يحث ان قلت لها ان تعاليم المسيحية خطأ

لا اشعر باى حال من الاحوال ان ياسمين تعانى كما قد يظن البعض من اضراب وعدم فهم ـ لخبطة ـ هى تعرف الان وجهة نظر الدين المسيحى والدين الاسلامى من الله عز وجل وتشارك ابوها ـ ابنى ـ فى الصلاة وتحفظ من القران ما يحفظة من سنها وتذهب الى المسجد كلما سمحت اوقات المدرسة بذلك وتذهب الى الكنيسة مع امها بدون اعتراض من ابيها ـ اعلمها اللغة العربية عن طريق النت وقطعنا شوطا كبيرا الان ـ اصبحت فى خمس شهور تقراء وتكتب الحروف ـ وبذلك تستطيع فى المستقبل ان تقراء القران كما انزله الله وليس مترجم المعانى فقط

الاعتقاد مساله سابقة لااونها فى هذا السن ـ انه سن المعرفة فى نظرى ـ وجيم وانا لسنا متشددين الا فى حبنا لياسمين فكلانا يحبها بجنون ويجيب على اسالتها وبدون فرض راى


لما تكبر ياسمين حتقدر تقرر لنفسها اى طريق تختار

مصر تعانى الان من تسلط الفكر الدينى المتشدد من الجانبين الاسلامى والمسيحى وان لم نؤكد ونعلم الناس وننشر بين الافراد اولا وفى كل وسائل الاعلام وخاصة داخل المساجد والكنائيس ان الدين لله والوطن للجميع وننسى مبوسة وتمثلية الوحدة الوطنية ـ اذا لم نفعل فهى الكارثة ـ ايا كان نوعها ـ ارجو من الله ان لا تحدث وان نسهم كافراد فى منع حدوثهاـ نشر الوعى كل واحد فينا يعلم اللى حولية الدين لله والوطن للجميع ـ تحياتى

.:.-=- ELGaZaLy-=-.:. said...

بصى يا ستى انا عملت كذا مثال كدة

ممتاز الى عايزة الكلام واللينك علشان اديكى الكود بس كدة

Gid-Do - جدو said...

توضيح

كتبت
-----
اعلمها اللغة العربية عن طريق النت وقطعنا شوطا كبيرا الان ـ اصبحت فى خمس شهور تقراء وتكتب الحروف
------
تقراء هنا بمعنى انها تقراء اى شئ مكتوب بالعربى ومتشكل ـ تقراء ايات القران كمثال

وبدءت اعلمها كتابة الحروف
وكله عن طريق النت

^ H@fSS@^ said...

بعد تفكير تالت اعتقد ان اللي حصل للاب ده نتيجة تعاطيه قات ساعة المغربية و لم معاه القاضي و مدير المتيسة و مضغولهم شويتين قات قام حصل اللي حصل
و حفلة القات دي كانت معمولة على شرف الرئيس اليمني علي عبدالله صالح
الاصول اصول
مش لما واحد بيتسمى على اسم واحد بيهادوا بعض
بس خلاص تلاقي الرئيس اليمني بعته شحنة قات مخمختله دماغة هو و اصحابه و من مجلس القات الخايب بتاعه قرر القاضي و مدير المتيسة انهم يعملوا اللي يعملوه
تحياتي و وكساتي

Xee said...

صفصف

ههههههههههههههههههههههههههههههههههههههههههه

ibn_abdel_aziz said...

مشكلة البنت دي
شبه مشكلة البهائيين

جهاد تطوعي علي رأي ماريان

طول عمرهم بيتكتبلهم بهائيين في البطاقة
لحد ما واحد " تقي " من الناس اللي كانوا بيحولوا البطايق لرقم قومي
لقي قدامه بطاقة وعليها كلمة بهائي

يعمل ايه؟
يتحول الامر الي قضية امام مجلس الدولة
طب والسنين اللي فاتت دي كلها نوديها فين ؟
مش مهم

الدولة في موقف سيئ
فهي فاسدة فسادا ابديا
ولكن التدين الهوياتي - من هوية
اصبح علي اشده في مصر
يخرج الناس لنصرة النبي الذي لا يحتاج لنصرة
ولا يخرجون لنصرة انفسهم من الظلم والفقر

تقوم الدولة تزايد هي كمان
وياتي حكم المحكمة كما علمنا وشهدنا

المشكلة خرجت من ايد الدولة
اصبح الناس يتطوعون بتحويل حياة الاقليات الي جحيم باسم حماية الدين

مبادئ الف باء العقيدة الاسلامية
تحرم فرض العقيدة علي بالغ
فما بالك بطفل
يكفيني هذا لانه معلوم من الدين بالضرورة

وحضانة الطفل مع الام من الثوابت في كثير في المذاهب الفقهية بغض النظر عن دينها

الذي صنعته المدرسة تطوع غير مطلوب بل وخاطئ ويخالف مبادئ العقيدة واصولها
ويحرم الطفل من حقه الطبيعي في الحضانة
ويجعل " فلسفة العقيدة " أهم من " حرمة الامومة والطفولة" وهو تهريج بكل المقاييس

يستطيع ان يعيش الطفل بلا دين
اصلا
لكنه لا يستطيع ان يحيا بلا أم
وحضانة الام اولي من عقيدة الاب
لان حضانة الام تنفع الطفل نفسه مباشرة
وعقيدة الاب لا تطعم ولا تسقي ولا تكسو

المصالح والمفاسد واضحة بشكل مفحم

كل هذا
لا يفهمه شخص يعمل في ادارة مدرسة
كل ما يريد فعله هو
"ارضاء "
الله

دنـيـا محيراني(ايناس لطفي said...

و الله انا مش عارفه اقول ايه و حتي بعد التعليقات ده كلها المفيده و الاي الكل بيرفض الاساليب الغريبه ده بس انا بقي عايزه اقول شيء تاني احنا عايزين نغير الافكار السوداء ده ازي ازي لازم نفكر سوا و نجد حل لازم نشارك كلنا في تفكير عملي لمحاوله حل ازمه الافكار المتخلفه ده بعيد ا بقي عن احضان الشيوخ و القساوسه في التلفزيون دورنا الحقيقي لما نعمل حاجه حتي لو كانت صغيره اكيد هاتفرق اكيد في حل صغير و حل كبير اقصد بالصغير كل واحد يبدا باسرته انا عن نفسي حاحاول ابداء مع اطفالي لانشائهم علي افكار الاسلام الصحيح اما الحل الكبير الاي مفروض كل واحد فينا يتشارك فيه انا مش عارفه بس نحاول نفكر مع بعض للوصول لحلول عمليه فعلا ده مش احلام ده فكر انا بطرحه لمحاوله انقاذ مصر من الشر الاي قرب اوي من ابوبها

Anonymous said...

أنا فاكر برضه إني قريت عن طالي في أولى إبتدائي مدرس العربي بيخليهم يحفظوا القرآن المقرر عليهم في مادة العربي و بيجبر الطالب ده ( المسيحي ) إنه يحفظ و يسمع في الحصة و لما يغلط يتريق عليه و يخلي أصحابه يتريقوا عليه لمجرد إن نفس المدرس مريضه و شايف إنه كده بيعمل الصح

ذنب العيال دي إيه إنها تتعقد من و هي صغيرة كده

شـريف الصيـفي said...

أحلم
بأن تكون حصص الديانة في المدراس بكل مراحلها
تعريف بكل الديانات الحديثة والقديمة
يقوم بها بشر دارسين لتاريخ الأديان، لا يفصل فيها بين التلاميذ
يتعرفون فيها على صورة الرب الخالق في كل الديانات، والظروف التاريخية والاجتماعية التي افرزتها
واتاحة المجال للنقاش بين التلاميذ



أحلم
بأن تصبح حصة الديانة
حصة في علم الأديان المقارن
للتعرف على الاخر
وتأسيس لأجيال محبة
ولا تصبح أولى خطوات التباعد بين عنصري الأمة ولا من خلالها يبدأ غرث نبتة الطائفية البغيضة
______________
عرض رائع للموضوع يا راندا
احييك على كتاباتك

هيباتيا

صاحب البوابــة said...

تنحصر تلك المشكلة في إزدواجية المعايير عند بعض المسلمين

فهم يرون في فرض الدين على طفلة نصراً للإسلام الجريح

الذي أثخناه نحن قديماً بتخلينا عنه

كما تعود المشكلة بالأصل الى تدين اجوف لا يعلم من الدين الا مظاهر سطحية

فهو لا يعلم ان فرض الدين على غير المسلم بالأكراه لا يجعله مسلماً اصلاً

عموما الكلام يطول

وأنا ارى انه لم يعد هناك وقتاً للكلام

تحياتي لقلمك الحر

3rby said...

"أن المسيحي الذي تحول للأسلام ولم يثبت الديانة الجديدة في
بطاقته الشخصية يعتبر مرتد ووجب استتابته او قتله"
علي فكرة انتي عكستي في الحتة ديه




المهم يعني انا عاوز اقول اننا ناس واطية واطية واطية وهانفضل نفشخ في بعض ومبارك يفشخنا ماهو اللي مش قادر عالحمار يتشطر عالبردعة

-_- said...

ولي امر الفتاة مسلم

و طالما الفتاة قاصر و غير راشدة فالقانون بينص للرجوع لولي امر الطالب في كل شئ

المدرسة طبقت القانون لحد كده و المفروض من الام رفع قضية اذا كانت مطلقة و حاضنة للطفلة لانها ولية امرها القانونية وقتها

zenzana said...

مريم
انتي متفائلة قوي لكن دا حقك اﻻنساني


شمعي أسعد

مش هقول يسمع من بقك ربنا بس المهم ان تكون حرية اﻻعتقاد مكفولة للجميع


صفصف ﻻدي
يا حبيبتي امال لو كنتي سمعتي الوقعة دي عرفتها من صديق بعد كتابة البوست دا
ان في واقعة ان بعض من اسلم أبائهم راحوا يعملوا البطاقة بتاعة الرقم الرسمي اجبروا علي كتابة الديانة مسلم
وتحية عصور المهلبية

AL-MASIHI-AL-MAGHOUL said...

عمالة تعزميني اجيليك و شوفوا الإبداع و معرف شو
اقوم يوم ما آجي القي عندك النكته دي و الله حاجه تضحك!!!!
طب لو العيل ده استني لحد ١٥ سنه مسلم هه معايا و لما بقي ابن ١٥ قرر يرجع مسيحي هتسيبوه يرجع و لا يبقي كافر و يتهدر دمه!!!!!!
و هو غلباً ابوه اسلم عشان يطلق المودام زي ما
xee
بيقول
و انت عامل ايه يا مليجي
؟؟؟
تحياتي

Anonymous said...

انا فاكرة ان ماما كانت بتحكيلي الموضوع ده و انا في العربية رايحة الامتحان

لا الاسلام ح يزيد و يعز بطفل
ولا المسيحية ح تنتصر بطفل

مش بابسط الاقوال ان ديانة الطفل تنسب للاب..يعني يبقوا مسلمين
لكن يا فرحتي يضمهم بالقوة و هما كارهين الديانة.. ح يستفيد ايه و لا الام ح تستفيد ايه

ليه الديانة بالاكراه.هما بيطلعوا بالفطرة لغاية ما عايزين بقي مسلمين مسيحين بوذيين هما المسئولين عن القرار و حياتهم

حد فكر في نفسية الاطفال دي عاملة ازاي
حد فكر ان نفسيتهم و عقليتهم ابتدت تشكل فكرة ايه عن الدين و الاله و الرب و الصراعات دي

ايش حال ماكنش هو الله واحد في الديانتين

و بعدين موقف المدرسة غريب جدا
حامي حمي الاسلام يعني
ماسكين سيف
بينتصروا بدينهم لما يجبروا عيلين علي ديانة بيكرهوهم فيها يعني

للاسف الموضوع دخل في سيكولوجية العند
من جهة الاب و من جهة الام و من جهة المدرسة

ولا عزاء للاطفال

karakib said...

ان الاسلام يقع فرضا علي الصغير باسلام ابيه، لانه أصل الفطرة
وخير الديانات
==================
يعني ايه مواطنة ؟؟ في كلمة مواطنة قريتها فالدستور
يعني ايه الكلمه دي ؟؟من حق كل واحد يحب دينه و يقول انه الافضل بس بالنسبة له هو مش بالنسبة للبلد كلها

david santos said...

The Summer arrived. We go to wait that it brings light. That it brings hope. That it brings peace. That it brings the end of the curse.

alzaher said...

إزيك يا زنزانة
أنا مبسوط إن إحنا إتقابلنا ويا ريت تزوريني على مدونتي في أي وقت
البيت بيتك
:)

Unknown said...

يا أخت راندا
أنا كنت فاكرة إننا كده كده داخلين السجن
إكتشفت إننا مش هانلحق
يا إما هيهدروا دمنا ويموتنا قبلها
أو إحنا هيجرلنا حاجة
وبرضه هانموت قبلها

أنا بس عندي سؤال محيرني
ليه المسلمين بيفرحوا لمّا حد يسيب دينه الأصلي ويروح للدين الإسلامي ويضايقوا لمّا يحصل العكس ؟؟؟
وبرضه المسيحيين .. علشان المصداقية الخاصة بصفحة التعليقات
خايفين على بعض من نار جهنم مثلاً ؟
خلاص يعني .. الحب مقطّع بعضه ؟؟؟
ولا بيآخدوا نسبة من الحسنات ولا إيه بالظبط ؟؟؟

Gid-Do - جدو said...

اقمورتى راندا

انا بمر المرة دية هنا مش علشان اكتب تعليق
ولكن بمر علشان اقول الف شكر على مرورك
عندى وكتابة كلامتين اسعدونى فى مرضى
دة جميل فوق راسى وابسط شئ لرد جزء بسيط
من هذا الجميل انى اجى لغايه هنا واقول ...شكرا

كل اللى قولتية حنعملة ـ البالونات الحمرا والجرى فى الحوارى واكل الدرة والسنكحة على الكورنيش ـ وانا كمان بحبك قوى والف شكر على شاديةـ جدو

Muslim&Quptia said...

انا بجد مش فاهم مصدر معلومات السادة المدرسين عن الدين ايه
بس واضح انو من كتب الرصيف
او منشورات الرصيف زي ماواحد صاحبي مسميها
الرحمه بقي...ارحموالاطفال
ثم الاب اسلم وللا اتنصر ..ضنب الطفلة او الطفل ايه ؟
انا مع الرأي اللي بيقول ان الحضانة للام ايا كانت ديانتها
والسيد الناظر ده المفروض يتنقل موظف ارشيف..او مطبعجي
كمثل الحمار يحمل اسفارا
وحسبي الله ونعم الوكيل
مسلم

صاحب البوابــة said...

سعدت للغاية بمعرفتك في المؤتمر

تحياتي

Anonymous said...

هههههههه كراكاتير ظريف سعدت جدا بمعرفت حضرتك فى نقابه الصحفيين كنتى رائعه

.:.-=- ELGaZaLy-=-.:. said...

انتى فين كل دة؟؟؟

zenzana said...

BeLiEvEr

أكيد بيطلعوا جهابذة فتوي بول ورضاعة

صاحب البوابــة
مستنياك اوعي تغيب

الغزالي
في انتظارك يا فندم

Ayyam
أنا عن نفسي لو الحكاية كدة يبقي يحيا الزواج المدني للكل


Xee
انا جاوبت عن السؤال في مدونة الحوار عليكوا حق وهو ان اول خطوات علاج فتنة طائفية تبدأ من المدارس وتربية النشء واتكلمت عن تجارب شفتها بنفسي وهي عن ان في مدارس الابتدائي يدرس الطالب جميع الاديان بالتساوي من باب المعرفة وبعدها من حقه يختار ما يريد مع العلم اني عارفة كويس اني الحل دا غير واقعي لمجتمع زي مجتمعنا

علاء
وليه من حق الاب فقط؟
هي الام كخة؟ دا اذا كنت مصر علي ان احد الوالدين له الحق

zenzana said...

bluestone
متفقة معاكي في مسألة تكوين معرفة سلبية او ايجابية في هذه السن وزي ما انتي لك خبرة انا وغيري لنا خبرة وفي الغالب مكنتش ايجابية
اه يا ستي في قانون فعلا بس هو احنا من امتي دولة قانون؟
انا عن نفسي مش فاهمة هو ايه اللي هتستفيده مدرسة من عملة سودا زي دي الا محاولة تزييف واقع واقراره وتسهيل الحضانة لابو الطفلة او الطفليين
بالنسبة للاسم انا لقيت ان له دلالة دولة زي اليمن بتحكم بنظام المشيخة اللي هي من حق اي شيخ قبيلة حبس وقتل اي حد من غير ما يقدم للمحاكمة
ربنا يشفي

zenzana said...

sokoothansawat
دا ايام الملكية مش في ازهي عصور الانحطاط في كل شئ

يسمع من بقك ربنا ع الحتة الاخيرة


bluestone
مصرة تتكلمي عن المفترض ودا بعيد عن الواقع يعني مسألة القانون عندنا دي بقت مطاطة قوي شوفي كام حكم بيصدر مخالف لنصوص القانون لان القاضي بيحكم بما يمليه عليه ضميره او حتي ميوله ؟
فكرة الاختيار بما اننا في مجتمع منتهك للاختيارات والحياة الخاصة فأول الخطوات اننا نعالج مسألة تربية النشء بشكل مستقل في العملية التعليمية بشكل محايد عن دين الوالدين
معرفش دا رايي

zenzana said...

MOHAMAD HANY

قريته يا فندم
عمرو خالد خليت اسم الموقع لاني مع حقوق الملكية الفكرية

zenzana said...

جدو
هو دا الكلام بتفق معاك في كل الي قولته وتعليقك في صميم الموضوع اكيد


غزالي
لو تقصد بخصوص البانر في ايميل علي البروفيل
والف شكر يا فندم علي تعاونكم معنا


جدو العزيز

ربنا يخليك لها ولنا

zenzana said...

صفصف لادي

ههههههههههههههه
هههههههههههههه ربنا يهدك
انتي بتجيبي الكلام دا منين
حلوة

zenzana said...

ibn_abdel_aziz
هو مفيش دولة اصلا او موجودة ومهربدة
وتم استبدالها بقيمين وأوصياء علي حياة البشر ومدراء مدارس ورافعي قضايا حسبة وغيره
ربنا يرحمنا

zenzana said...

ابن عبد العزيز
بمناسبة الفتاوي
انا لسه النهاردة شايفة في اخبار الادب ملف عن الفتاوي
ومنها فتوي للشيخ محمد عبده بخصوص الطفل من ام مسيحية واب مسلم قلت ما اهو الناس المهتمة بالفتاوي مأخدتش بالفتوي دي ليه؟

zenzana said...

دنـــيـــا
انا بتفق معاكي بس انتي شايفة ممكن نعمل ايه اكتر من اننا نفهم اولادنا ان مفيش فرق ولا افضلية بين ابني وزميله المسيحي اللي قاعد جنبه؟
انا عن نفسي بعمل دا انا بيوصلني كلام اهطل وهبل من مدرسين حصص الدين في المدرسة وصلت لبس مش الحض علي كراهية الاخر المختلف دينيا ولكن كمان المختلف في لون البشرة
ربنا يستر

zenzana said...

مصرى
لا انا شفته بنفسي زمان في المدرسة صحيح الموقف دا خلق نوع من الصداقة بيني وبين زميلتي زمان من الابتدائي لحد الاعدادية وفضلت طول الفترة ينادوني بصاحبة البت المسيحية لكن كل دا مكنش بيهون عليها ومرات كانت تقولي انا بكره المسلمين


هيباتيا
شكرا يا فندم
انا كمان بحلم معاكي

zenzana said...

صاحب البواية
اشكرا علي رايك وان كنت لم اتوقعه
بتفق معاك اننا نعيش عصر قلة ايمان وكثرة مظاهر تدين اجوف



3rby

بتفق معاك ان النظام هو الوحيد المستفيد من الوضع الحالي واذا كنا نسعي لتغيير الوضع الحالي يبقي نغير النظام كله
تحياتي

zenzana said...

Sharm
لم يصدر حكم قضائي يجبر الطفلة علي اداء الامتحان
واذا صدر المدرسة ليست سلطة تنفيذية
المدرسة مؤسسة تعليمية

zenzana said...

AL-MASIHI-AL-MAGHOUL

شرفتنا يا فندم في السيرك
فين الكباب؟

المهم لما يكبر هنهدر دمه بوصفه مرتد ونقيم عليه الحد
زي مليجي
تحياتي

zenzana said...

Epitaph

مع ان المفترض ان المدرسة محراب علم
بيشع نور
شكله بما ان الكهربا ارتفع تمنها
بقت المدرسة بتشع نار

zenzana said...

karakib
مواطنة؟يعني ايه ؟ دي اسم أكل ولا دوا؟
شكلها كلمة ابيحة يا بني

zenzana said...

alzaher

الشكر لك يا فندم
شفتها وقريتها كلها
شغل جميل

zenzana said...

amira
هههههههههههه
هم شكلهم بيحاولوا يعقدوا صفقة مع بواب الجنة علي مين يبعت له مؤمنيين اكتر واهو ينوبهم من الحسنات والجنة حتة

zenzana said...

جدو يا حبيبيي
تشكرني؟ دا اسمه كلام؟
لا يا فندم انت تفضل مكانك مرتاح واحنا نيجي لحد عندك
بوسةةةةةةةةةةة علي خد جدو
مستنيا البلالين

zenzana said...

Muslim&Quptia

شكلهم بيسمعوا كتير لقناة الناس

مش معاك في انك عاوز تنقل الناظر انه يبقي مطبعجي لان مش كل كل المطبعجية جهلاء
تحياتي

zenzana said...

صاحب البوابة
وعمر الشرقاوي
انا سعدت اكتر ان شاء الله متبقاش المقابلة الاخيرة

تحياتي

zenzana said...

غزالي

عايشة يا فندم

جهاد خالد said...

إذا كنتِ ممن يرون للفتاة المسملة
دورا هاما في الحياة
إذا كنتِ ممن يحلمون بفتاة تصلح لتربية الاجيال
شاركينا آراءكِ ومقترحاتك
في مدونة
بـنـاتـيـت
www.banateet.blogspot.com

لكِ من القلب أعذب التحايا

Anonymous said...
This comment has been removed by the author.
zenzana said...

سردية

تعليق مش مفهوم تماما
ارجو الايضاح

Alaa said...

زنزانة أنا محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

Anonymous said...

دي اول مره اجي عندك
حبيت اتفرج عل زنزانه

عمرو بتاع الكباب :)

.:.-=- ELGaZaLy-=-.:. said...

الحمد لله يا افندم يديك طولة العمر ان شاء الله لتشاهد احفاد احفادك وكدة..كنا بنطمئن على حضرتك يعنى وكدة

Anonymous said...

زنزانة
هو أنا كمان لبخت معاك؟؟
اعتذر بشدة
كانت ليلة نكد وشربت كتير
وكنت فاهم شوية حاجات بشكل مش صحيح
اعتذر مرة اخرى
سردية

zenzana said...

سردية

واي مسطول تاني

مفهمتش يعني ايه تدخل تشتم ناس في اكتر من مدونة وبعدين تعتذر او تحذف تعليقاتك لمجرد انك كنت مسطول؟
(ملحوظة انا مش ضد المساطيل نهائي)

انا في الاول اخدت تعليقك جد ودورت اني اكون علقت عندك تعليق مش ولابد او غلطت وكتبت عنك حاجة مش صحيحة او اكون علقت عند حد وكان ردي قاسي عليك
اتضح لي التالي اني اصلا مش من رواد مدونتك من فترة طويلة جدا
ويمكن اخر تعليق لي عندك كان محاولة انصافك ورد علي تعليق احدي المدونات اللي طعنت في شرفك ودينك

كمان اتضح لي اننا لسنا اصدقاء او معارف حتي تتبسط في مخاطبتي

سردية او
شريف الصيفي
او حتي مسطول مش واخد باله
ايا ما تكون
وجودك غير مرحب به هنا
واتمني الا تتكرر زيارتك

مش مهتمة ازا كنت هتشيل تعليقك ولا لاء

Unknown said...

للأسف الناس الى بالشكل ده هما الى بيسيؤا للأسلام
أنا مثلا جاتلى شغلانة مدرسة فى مغهد أزهرى بشبرا و أشترطوا على عشان يقبلونى لازم أتنقب و كأنى أجرمت لما رفضت الشغلانة عندهم بقوا يبصولى بنظرات أتهام و سخرية عمرى ما حنساها كأنى رفضت الدخول للجنة

Anonymous said...
This comment has been removed by a blog administrator.