Sunday, November 18, 2007

اعترافات ف عز الضهر



علي نسق اعترافات شهروزة حبيبتشي، حاولت اعترف بحبة حركات ومقالب وبلاوي ارتكبتها فافتكرت جزء، هقول منه حاجات، وهحتفظ بحاجات مش هقولها ، ولاقيت كمان ان بعض بلاويا اختفي تماما بالظبط زي المكسرات لما تغوص في الشيكولاتة ومتبانش!!

أنا اللي دبرت مقلب الازازة اللي ريحتها وحشة ف شنطة يد أبلة سلوي، لانها حلفت تسقطني في امتحان الشهر،في تانية ابتدائي، لاني فضحت بنت اختها اللي كانت عاوزة تغش مني ف الامتحان، ولزق المقلب في الواد الجتة "عماد"، فتوة الفصل ، انا حطيت الازازة ف شنطتها وفي الفسحة روحت ل "عماد" وقلت له ان ابلة سلوي اديتني شيكولاتة من شنطتها، زي العبيط راح عند شنطة الابلة، وفتحها ، لاقي الازازة فتحها، وانا زقيت دراعه وخلعت، كانت الازازة وقعت جوا الشنطة وعملت الريحة المقرفة دي، وخد حتة دين علقة، يستاهل ما هو كمان قبلها بيومين وقعني في الفسحة علي الارض، وركبي الاتنين اتعوروا، قال ايه مش عاوز بنات تلعب معاهم كرة.

أنا اللي ضحكت علي المسكين اخويا عشان يكسر الاطباق الازاز ، أمي كانت بتحبهم جدا لانهم كانوا هدية من ابويا لما كان مسافر ليبيا، انا شوفت امي بتحطهم علي النار ومش بيحصل لهم حاجة، قلت طالما النار مش عملت حاجة يبقي رزعهم ع الارض مش هيأثر، وتفاديا للضرب لو اتكسروا قلت استخدم المسكين اللي ما صدق ما لقي حاجة يلعب بيها، وكل ما يكسر طبق، اقنعه انه يمكن الباقيين ميتكسروش، وهاتك يا دشدشة.

أنا اللي حرضت المسكين الغلبان برده أخويا انه يحط الميه ف قلب التليفزيون، كنت عاوزة اعرف ايه اللي هيحصل لما احط الميه، كنت فاكرة ان الناس اللي جواه هيطلعوا برا، طبعا انفجر، واخويا اتكهرب وكمان أخد العلقة .

أنا اللي قصيت فستان فرح مامتي حبيبتي، كنت عاوزة اشوف عندي مواهب ف الخياطة زي تيتا ولا لاء؟ وكمان كنت عاوزة اقصره عشان يبقي علي أدي، لبست العملة ف بنت خالتي، اللي هي في نفس سن امي، ساعات كانت بتيجي لتيتا ،وتقيس فساتين أمي من وراها، وعليه اخترت يوم تكون هي جاية، وكشفت انا العملة ،خصوصا انها كانت معجبة بالفستان، ونفسها تاخدوا، طبعا امي كانت بتقول بعين اللي خلفوها . دا اول اعتراف بالعملة من عشرين سنة .

- أنا اللي كنت بقلد مسرحية "ريا وسكينة" و بحط كل مرة الملح علي السكر، في فنجان القهوة، بتاع ابن خالة امي ،أونكل عبد الراضي ،و بعدها معدته تقلب ، ويفضل رايح جاي من والي التواليت، كل مرة يجي فيها م الصعيد، لانه دايما كان يدي اخويا عيدية اكتر مني قال ايه عشان هو الولد، وكمان بيحرض امي ان بقيت طولها، وميصحش العب ف الشارع، مع ان كان عندي سبع سنين، وكل مرة بعد ما يمشي اتحبس واخد علقة لو حبيت العب ف الشارع.

- أنا اللي بعت هدية لاستاذ الفيزياء ف أولي ثانوي، عبارة عن ببرونة أطفال، وجواها ورقة بتقول "علي أد سنك"، طبعا الورقة مكنتش بخطي انا، كانت بخط اغلس بنت ف الفصل، وكانت حدفتني بالورقة ف الحصة، كنت مزقططة جدا وغلست عليها ، لما جه الاستاذ تاني يوم وهزئها قدام الفصل كله علي عملتها الهباب.

أنا اللي كنت السبب في حرق شعر بنت خالتي في فرح أختي، من تسع سنين، كنت انا وعبير صحبة اختي ماسكين الشمع، اتكعبلت مش عارفة ف ايه؟ (وش بيغمز) ، شمعتي جات علي ايد عبير اللي شمعتها مالت علي راس بنت خالتي ، فاتحرق شعرها، بعدها الاتنين اتخانقوا وقاطعوا بعض، بصراحة بنت خالتي تستاهل، كانت بتتنك وبتتمنظر بدون داعي.

- أنا اللي ناديت علي أبلة وفاء مدرسة التاريخ في تالتة ثانوي، عشان تشوف سمية صحبتي ورا باب الفصل كانت بتعمل حواجب بنت صحبتها بالخيط، اتحولوا لمكتب الست الناظرة، اللهم ما احفظنا،
تستاهلي يا سمية ، حاولت كتير اقولها بلاش ف الفصل ممكن التواليت.
أنا اللي دمرت عشرين شريط كاسيت بصوت أم كلثوم ، لبابا أول ما رجع م السفر، لان وقتها مكنتش بحبها خالص، وهو واجع دماغي باغانيها الطويلة علي مدار 24 ساعة، فسجلت عليهم حلقات مسلسل " الشهد والدموع " و "ماكجيفر" ، وجزء منهم كنت بقلب البكرتين عكس بعض، وأول ما هو يحط الشريط في الكاسيت يتشد ويتقطع ، لزقت في أختي لانها الوحيدة اللي عبرت له عن عدم حبها للست ام كلثوم، وأمنيتها انه يرحمها م الشرايط دي.

اعترف اني انا اللي فيرست اللاب توب بتاعه مش صديقته الانتيخ ، كل مرة كنت اروح أسافر أقضي اجازة هناك، كانت بتحب تيجي البيت من باب الغلاسة، وف المرة دي اتصلت عاوزة تيجي عشان تستعمل الانترنت، وكمان كانت عاوزة تستعمل اللاب توب بتاعه، مش الكمبيوتر العادي لانه بطيء، أنا كمان اتصلت بصديقي الانتيخ، انه يبعت لي لنك لاي فيروس، وفعلا اول ما هي جات تستعمل الجهاز كان الفيروس انتشر، وشل الجهاز ، ودي كانت أخر مرة أشوف خلقتها ف البيت، خصوصا ان الجهاز خد كام يوم لحد ما اتصلح، تستاهل لانها عارفة أني مش كنت بحب استعمل اللاب توب احتراما لخصوصية حاجاته كمان كنا رايحين السنيما .

اعترف كمان أني أنا اللي دبرت وخططت لكسر سي دي بتاع لعبة "الحضارة"، مش بحب الجيمز، وكنت بتغاظ لما كان قاعد قدامي بيكلمني وماسك اللاب توب وهاتك يا لعب، وفشلت محاولات اقناعي باني اتعلم اللعبة، ونلعبها سوا، ولاني درست خطواته كويس في البيت، حطيت السي دي جنب رجل ترابيزة المطبخ، وهو زي كل مرة، جه حرك الترابيزة جامد، ورفعها، وحط اللاب توب عشان يلعب ، وهوب السي دي لوحده كان تحت رجل الترابيزة، وديشششششش، لزقتها فيه هو لانه دايما كان سايب حاجاته مبعترة ف الشقة من غير نظام..

أخر حاجة لسه طازة امبارح بس، حطيت رجلي قدامه وهو بيعدي، وقع اتكوم وهو نازل من عربية المترو، غلس عليا، وغتت، وكمان البادي سبراي بتاعه كان يقرف، كبرت دماغي اني ازعق له، قلت الطيب أحسن، اللهم لا شماته
.

26 comments:

أُكتب بالرصاص said...

يا جماعة ...
انا قلتشهروزة هاتفتح نفس المدونين على الاعترافات

ومن ناحية تانية

إحنا ممكن نجمع كل الاساليب دي ونعمل كتاب عن الطرق الخفية في الغيقاع بالضحية
ونطلع منها زي البصلة من الملوخية

يعني بصراحة

ادمغه اجرامية ..
هي دي الجريمة الكاملة

مجموعة المقالب دي موسوعة لوحدها


إزيك يا راندا ؟

Anonymous said...

إنتو أشرار كلكم أشرار
:D
بس بجد بجد بجد
إيه ده يا راندوشكا دانت عبقرية يا بنتي
تعملي ده كله و براءة العيل في عنيكي و تدبسي حد تاني
:D

Lemonada said...

انت يا بنتي عفريتة
اي دةوانا فاكرة نفسي منعنشة واخر العنقود في البيت والي مهما عملت مش مشكلة
وعندي حكايات ومقالب وتمثيليات
دانا طلعت ولا حاجة جمبك
مجنونة مش قلتلك
تحفة يا بنتي
كويس البوست دة عشان ابقى اخد بالي منك :)

Anonymous said...

loooooooool

you always accused someone else lol how innocent of you

zenzana said...

اكتب بالرصاص

ماشي يا عم شكرااام
انا كويسة مغسي

شغال يا فندم

zenzana said...

سي يحي المصري

هو انا عملت حاجة؟
:)

zenzana said...

ليمونادة

ما هو سيادتك انا كمان اخر العنقود
:)

متخافيش دا كان زمان
دلوقتي انا مستأنسة
ساعات بس بمارس الشر مع اﻻشرار
نياهاااااااااااااا

zenzana said...

ايبي
وحستيني جدااااااااااا

ﻻ يا بنتي خالص
دا انا بريئة جدا
اوي
خالص

None said...

هههههههههههههههههههه

انتى مفيش حاجه اتقفشتى فيها ابدا
علطول كده تلبسيها لحد تانى

شكلك هتتقفشى قريب بعمله زى دى بعد نشر الاعترافات

وسلااااااام

zenzana said...

fnan_geology

دي امنية ولا دعوة عليا ؟
سيادتك لو فكرت كنت هتكتشف اني جبت سيرة الحاجات اللي متقفشتش فيها
لكن الحاجات اللي اتقفشت فيها فكانت اكتر محتاجة بوست تاني

ثم انا مش لبستها لحد خالص هي بس اللي ظروفهم كانت وحشها وحظهم سيئ
:)

BeLiEvEr said...

هوه ليه إنتى و شهروزة محسسنى إنى مكنتش طفل؟
:(

لا و قال إيه ده اللى إفتكرتيه، امال اللى مفتكرتهوش إيه يا بنتى؟
و بعدين اللى عاجبنى إن دايما الموضوع بيلبس فى حد تانى، الواحد بجد ياخد حذره منك بعد كده
:))

zenzana said...

BeLiEvEr

ليه بس كدة يا كابتن
اكيد طفل وسيد الاطفال كلهم
:)

بصراحة بسبب عوامل السن والنحر الزهايمر بدأ يزحف عشان كدة بفرق شعري م النص بحاول افتكر
:)
انا قلت اني لبست حد حاجة؟ حاشا لله
هي بس بتيجي مع العمي طباش

sohier said...

yalahwey ya randaa enty 3amla zay el welad el ash2eya enty makonteesh bent!!!!!!!!!!! yanhar abyadd

zenzana said...

كبر دماغك
ليه بس كدة يا سوسو
مين قال اني مكونتش بنوتة ؟
طب أسألي كل وﻻد الجيران
:)
الشقاوة ملهاش جنس يا سوسو
دا تنميط يا روحي
هههههههههه
ازيك صح؟

اسكندراني اوي said...

ههههههههههههههههههه
وبعدين بقى تقريبا انتي وصاحبتك دفعه واحده

Desert cat said...

ده انتى طلعتى بريئة برائه الذيب من دم ابن يعقوب
يا عينى عليكى يا غلبانة يا اللى مش بتعرفى تعملى مقالب ابدا

Anonymous said...

هههههههههههههههههه
هههههههههههههههههههههه

اااة ياأمااا

وأنا أقول البراءة اللى فى وش البنت دى مش لوجة الله أبداااا
أنا اعرف انك قردة مسلسلة
لكن مش للدرجة دى

ههههههههههههه

بس مش واخدة بالك ان اغلب ضحايانا احنا البنات بيكونوا أخواتنا الصبيان؟
خخخخخخخخخخخخخخ

ومش واخدة بالك ان اغلب ضحايانا شالوا جرايمنا واحنا نظهر ملايكة ومش ناقصنا غير جناحين؟؟


ههههههههههههههههههه
هههههههههههههههههههه

يخرب بيت سنين البنات
وقال احنا ألطف الكائنات
والنبى احنا ننفع مخططين عسكريين
خخخخخخخخخخخخخ

وحشتينى يا بنتى يا رفيقة كفاحى
يا قنبلة ذرية
خخخخخخخخخخخخخخ

انتى فيـــن من زمااان مش عارفة اعتر فيكى

Anonymous said...

أكتب بالرصاص

أبووس رجل اللى يعرفووك نفر نفر

قر واعترف باعترافاتك انت كمان
دى حتبقا قنبلة الموسم
وانا احساسى ميخيبش أبداااااااا

Unknown said...

ايه ده؟؟؟؟؟؟

انتي أستاذه

نفسي أتعلم البلاوي دي
لحسن انا طول عمري عامل زي المسكين أخوكي ألبس العمايل السودا من غير معرف مين اللي لبسهالي

:)

أحمد عبد الفتاح said...

يا ما بتكشف المدونات من حقائق
ده لو كل مدون قال شوية حقائق ذي ده في خلال اسبوع هنعرف مين السبب في احتلال القدس ومين السبب في خروج مصر من كاس العالم
بس تفتكروا لو ريسنا العظيم حب يعترف يقول ايه ؟

zenzana said...

اسكندراني اوي اوي جدا
ههههههههه

فعلا دفعة واحدة مين قالك؟

zenzana said...

Desert cat
هههه اه والله بريئة جدا
بس بصراحة مش غلبانة
:D

zenzana said...

شهرررر
انا قردة؟ ماشي لما اشوفك
طبعا يا بنتي البراءة دي لجر رجل الزباين امثالك ههههههههه
هو طبيعي ان الجنس الاخر هو اللي يدبس بما ان الجنس الناعم جدا أذكي ودا راجع لاختلاف تشريح مخنا عن مخهم، يعني عندهم مثلا هتلاقي المناطق المهتمة بالاكل مساحات كبيرة، وغيره فدا بيغطي علي مساحات تانية الخاصة بالتخطيط الاستراتيجي مثلا للمعارك

سلام يا فنبلة

zenzana said...

أنونيمس

دي مش بتتعلمها للاسف دي بنتولد فيها
زي الماكستون فورت ماشية ف العروق مع الدم ههههههه أوعي تكون مباحث مخدرات بس

لا يا فندم طول عمري بعترف بعمايلي السودا لان كله بيبان علي وشي، وببقي فضيحة، بس بستني يكون تأثير الموقف انتهي زي ان حد انضرب وخد العلقة بدالي كدة يعني

zenzana said...

يا تاح

وليه بس يبني السيرة دي ع المسا هو انا عملت فيك حاجة؟
طب انتظر مقلب ف الطريق اليك
سي يووو يا تحاتيحو

Anonymous said...

ah ya shreeeeera ana b2a elly kan beyt3ml kda fya bgd el e5wat el soghyren dol ashrar awyyyyyyyyyyyy alla yesam7ko