شايفين الصورة دى؟شايفين البنت دى؟
الحلوة دي، ام ضفاير و ضحكة تقول للقمر وسع انا جيت
اقعد مطرحك
اسمها أميرة وهي اميرة علي الاقل لقلوب امها وابوها
ماتت وعارفين اللي قتلها مين؟
وزير التعليم يسري الجمل
وكمان وزير الصحة اللي مش فاكرة اسمه
ومش عاوزة افتكره ..اصل انا في طار بايت بينى وبين وزارة الصحة
ومش مهتمة اعرف اسمه
مش كفاية سي يسري الجمل واجع دماغنا بالغاء سنة رابعة ؟
ولا رابعة ابتدائي ..ولا نظام ثانوية عميه جديد؟
مش كفاية تصريحاته المسخرة؟ مش كفاية كادر المعلمين؟
مش كفاية كل دا؟
والتاني وزير الصحة اللي بقت مفيش
عند تلات تربع شعب مصر والربع الباقي علي وشك
مش كفاية صحة المصريين اللي خربت؟
مش كفاية القمح المسرطن علينا؟
مش كفاية مستشفيات مصر اللي عاملة
زى المراحيض العامة؟
مش كفاية الدم الفاسد علينا؟
مش كفاية وحدات الريف الصحية اللي مفهاش غير
شاش معفن وقطن وسخ
ومن غير حتى ممرض ولا تمرجي
بلاش دكتور حتي
مش كفاية التأمين الصحي اللي كان مشلول
وبقي مقتول؟
مش كفاية كل البلاوى اللي اكيد المستخبي منها اكتر
لا كمان ادوروا علي أطفال مصر
وبينشوهم زى العصافير بالنبلة
يا تري هيتم اضافة الحادثة لسجل انجازات الوزيرين؟
ولا هتم محاكمة وزير الصحة و وزير التعليم
ولا عادي الخبر هيعدي زي غيره؟
أكيد طبعا هيعدي زي غيره
بما اننا ف عصر الانحطاط ف كل شئ فعلا
انا عن نفسي لو طلبوا ان مريم وعبد الله يقفوا ف تشريفة وزير هولع ف المدرسة
الخبر استفزني جدا ومقدرتش انفض
الخبر من المصري اليوم عدد النهاردة
الخبر من المصري اليوم عدد النهاردة
