Friday, March 16, 2007

لا يأس مع الحياة ولا حياة لمن تنادى..مظاهراتنا فعل بيولوجي حتمي

تحديث معرفش رقم كام
المهم: اعتصام مفتوح أمام قسم شرطة الضاهر للافراج عن المعتقلين اللي الشرطة رفضت الافراج عنهم
انا مستعجلة ممكن تتابعوا الاخبار من عند جرجس من أمام القسم
انا رأيي عصيان مدني
احسن بما ان مفيش حاجة نافعة
مع ولاد ....
عارفة انكم عارفين ان البوست دا عن مظاهرة النهاردة، اللي رجعتني لمظاهرات مارس 2003، مع الفارق، علي الاقل بالنسبة لى، في مارس 2003، الفرق الاول مجرد سماع خبر مظاهرة في التحرير، الناس تحشد بعضها، وتنزل، الفرق التاني حرية الحركة والقدرة علي الجري، وسهولة الانتقال من شارع لشارع، عكس الحشر في شارع كريم الدولة، وحشري انا ف كرنر واحد لمدة ساعة ، الفرق التالت ان مكنش عندي أي استعداد للمشاركة لحد يومين فاتوا، بشكل لا ارادي كل ما اتفق على موعد مع صديق، اقوله "اشوفك ف المظاهرة".

المشاركة في المظاهرة ما تجيش كدة وخلاص، الاول من الافضل اتباع بعض الاستعدادات، بالنسبة للانسات اول حاجة شنطة اليد، بلاش الشنط البنانيتي خالص، الافضل سبورت باج صغيرة، ومتكونش متكربسة ميكاب، او كتب او أي حبشتكنات، الضروريات فقط، ويا ريت شاحن موبيل، صحيح مش عارفين هنستعمله فين؟ لكن كل شيء جايز.
طبعا سبورت شوز، وايشارب قديم مش مهم لو ضاع، في الغالب بنطلون من الغسالة، لكن ممكن جيب للأحجام العائلية، او مفضلي الكلاسيك، مفيش ازمة من ميكاب خفيف، بس الافضل لم الشعر، ديل حصان، او قصه قصير ونريح نفسنا، اما الاخوات المحجبات ايشارب عادي وخلاص، بلاش ايشاربات موديل عربة السيدات ف المترو
لان في مطر، وشد وجذب مع الامن، وبالتالي كل الترتر والحركات والحلقان الكبيرة دي هيكون مصيرها حفر المية في شارع كريم الدولة.
بالنسبة للشوباب يبعدوا اول حاجة عن ارتداء أي اندر وير ملون، لانه بيعمل شغل جامد قوي لدي السادة الظبابيط، بعد القبض والترحيل علي مخابز عمن الدولة، خلوه اسود، بما انك ممكن تقضي ايام طويلة من غير ما تغيره.
بلاش تربط مع أصحابك علي انك تقابلهم ف حتة معينة، كدة كدة الجميع هيتخندق في شارع ضيق، يعني هتخلص الكريديت بتاعك ع الفاضي، خليه لعربية الترحيلات، كمان مفيش داعي صاحبتك تيجي المظاهرة لو عاوزة تشارك، الافضل انها تكون براحتها، لوحدها مع أصحابها مش مهم، والا هتلاقي نفسك متكتف ساحبها وراك ف كل شارع تدخله، وكمان هتضرب اكيد بسببها، بما انك هترفض أي مساس بها، والنتيجة بوكس ف الفك، او تتهور وتروح ماسك وشاتم أي رتبة قدامك، بس يا ريت تبعد عن العساكر..اشتم الظبابيط اخف وطأة، وهو نضال برده

بالنسبة للجنسين شحن بطاريات الموبيلات، وشرا كريديت، بلاش الكريديت اللي ع الهوا ابو خمسة، لانه هيخلص
بعد اول خمس دقايق من المظاهرة، لما تحاول تتأكد ان كل اصحابك وصلوا ولا لسه، يعني احتمال كبير ميكونش معاك اى كريديت، وانت جوا عربية ترحيلات، او حتي براها.
اول حركات الامن القرعة اللي مش جديدة بالنسبة لي الحرص علي كردنة المتظاهرين، اما الجديد فكان اللطف والظرف، من البشاوات الظبابيط الكبار قوي قوي، اللي اتحايلوا على بعض المدونيين،
الحاج جرجس، وعرباوي، ودماغ ماك، لدي وصولهم ميدان التحرير انهم يروحوا يتظاهروا بعيد عن الميدان، وبقي كل مدون معاه ظابط هههههههه.
اضطر الجميع للرضوخ والاتجاه لحزب التجمع اللي اتحول لدار مناسبات، بيأجر قاعات الافراح، قصدي الحزب، لاحزاب اخري، اهو برده تنسيق حزبي، وتخيلوا 400مناضل ناصري جوا حزب التجمع عشان انتخابات الحزب
و ميتين بره مطحونين من 1000عسكري امن مخابز، و لا حياة لمن تنادي بالمشاركة..يا لهوييييييييييي
احلي حاجة انك تقف في كورنر قريب من الامن، مش خطوط التماس الاولي ولكن ع الاجناب اللي الرتب
المتوسطة قوي قوي تدير من خلالها المعركة مع المتظاهرين.. ولو حبيت تعقد اتخن ظابط بص له كل شوية وانت ساكت، خصوصا وهو بيدي تعليماته لعساكر امن المخابز اللى لابسين مدني، هياخد باله انك متابعه وبتراقبه، بعد شوية هتلاقيه خرس وبطل اعطاء اوامر بالاندساس وسط المتظاهرين..هيخاف انك تسيح والاخ اللى لابس مدني ممكن ينضرب.
المكان التاني ياريت فوق بس مش بلكونة يعني حاجة اقصر شوية زي كابل الكهربا اللي علي يمينك وانت داخل حزب التجمع سابقا، دار مناسبات حاليا، عشان متفقدش اتصالك بالمظاهرة واصحابك،
دا غير انك هتشوف كل الناس، وهتاخد بالك من مين زعلان من مين، ومين بيزوغ ف الزحمة، ومين بيربط مع مزة، ومين فعلا رايح يتظاهر ....بس الحاجة اليع فعلا كانت التحرش والتلكيك للكلام مع الانسات ف المظاهرة من بعض الاخوة المناضلين هههههههههههه



هي هي ف كل مظاهرات مصر تقريبا، تنازع الهتاف ... كل واحد عاوز الناس تردد هتافه هو، لانه هو الصح،
اللي يديه الحق انه يضرب القوي المعارضة له بهتافاته.
وهو هو الشو اللي بيعمله البعض للفت انتباه الكاميرات بأنواعها. ومفيش مانع من كام حديث تلفزيوني، ولو مهتم ان صورتك تطلع وتبقي مشهور، الزق قريب من الكاميرات أو الزق جنب حد مشهور جدا هتلاقي نفسك في كل الجرايد، والقنوات الارضية والجوية والبحرية.
ازفت حاجة شفتها اوحش حاجة فعلا كان دفع و ذق المنسق العام لحركة كفاية الدكتور عبد الوهاب المسيري، رغم حالته الصحية الصعبة لاجباره علي دخول كردون كريم الدولة شارع سابقا، رغم ان المسيري لم يعترض علي دخول الخندق، ما أدي لثورة البعض ودفاعه عن المسيري ضد السقوط،افتكر بالتحديد الصديق احمد عاطف من جريدة الكرامة، فما كان من الامن الا انه هاجم الجميع بما فيهم المسيري نفسه
.



:-المهم نخرج من المظاهرة بمجموعة استنتاجات وهي
- انه لم يكن هناك استايل معين للملابس الشوباب هي هي التي شيرتات والجينز، والجاكت بمناسبة البرد، والمطرة.
- البنانيت كانوا في منتهي الاناقة والشياكة، والبوت كان عامل عمايله، الا ان الاسدال يظل اكبر انجازات تلك المظاهرة ليس بمجرد المشاركة في ترديد الهتاف، بل تأليف الهتاف نفسه.
- ان موضوع المظاهرة ف ميدان التحرير ومن الساعة خمسة لسبعة دي فضيحة، ميدان التحرير مكان لتشتيت المتظاهرين، وبما ان الميدان كبير، هتلاقيهم زي الجزر متوزعين كل شوية ف حتة ، مجمع تحرير، هارديز، كنتاكي ، واخيرا ثواني الامن بيسيطر علي كل الناس بما ان محدش بيجي في ميعاده، فاكرينها اوبن اير بارتي .
- صحيح ان المظاهرة لم تفشل الا ان كان عندي امل انها تكون اقوي من كدة، ومش ف الخون بتاع كريم الدولة، اللى مش عارفة كريم مين؟(يمكن كريم عامر) ودولة مين؟ (دولة العصابة).





اهم حاجة بالنسبة لي ان العكاز بتاعي رجع لي بعد فقده بساعة ونص وانا مش عارفة اطنطط ، ومحبوسة ف كورنر جنب العساكر، لحد ما بقينا عشرة، احمد ورزق والاتنين عساكر امن مركزي جداد طازة ف السلاح، اللي تقوله اخوانك ف السلاح بتوع المحلة اضربوا يقولك "اه وبعدها كان في تأديب، لا يا ست هم تلات سنين، هيعدوا بالطول والعرض". أما شعبان وزميله العسكري في ملابس مدنية فسبوا ميت دين للحكومة والمظاهرات، والظابط "اللي نافخ ريشه" بسبب الاجازة اللى اتلغت لمجموعة كبيرة من العساكر، اللي رجعوهم من علي باب المعسكر، وشحنوهم علي المظاهرة؟ عكازي طلع في الاخر قدام كاميرا العربية وواحد مصر انه يخص سي الحاج محمد عبد السلام، والحاج جرجس يقنع فيه دا تبع الانسة يقوله ابدا الحاج عبد السلام، أما أحمد دفتر وطن بما انه كان مزنوق قدام الكوردون فغرم كارت شحن جديد وكل شوية لقيتوا العكاز؟ عرفت بعدين ان كان في متابعة من الجهامير مش للمظاهرة، لكن لاختفاء العكاز، ومحاولات تتبعه
رست علي ان سي احمد استلف مني تمن كارت الشحن قبل ما اروح،مش قلت لكم اشتروا واشحنوا قبل المظاهرة.

- ان مظاهراتنا تظل كما أجاب الدكتور المسيري "فعل بيولوجي حتمي"، قاصدا الذهاب الي التواليت، وفي عينيه تلك الابتسامة عندما سألته "حضرتك رايح فين؟".
الاقرار بأن مع السلامة أكذوبة الاصلاح السياسي ف مصر
.

16 comments:

جبهة التهييس الشعبية said...

تصحيح اللنك



http://www.mp3asset.com/swf/mp3/minime.swf?myid=1575758&f=3

Anonymous said...

اللى حصل امبارح مسخره بكل المقاييس

Anonymous said...

أزيك يا راندا وألف حمدالله على سلامتك بس حلوة قوى حكاية التعليمات التى لابد من إتباعها عند نزول المظاهرات ، المهم ان حنا فعلاً حققنا نصر كبير أمس فالذى حدث من قبل الأمن المصرى لا يدل إلا على ضعف النظام وقرب نهايته وأصبح الآن فى مرحلة الاحتضار ، وحتماً سيأتى اليوم الذى يتحرك فيه الشعب وينطق أبو الهول

Gid-Do - جدو said...

العزيزة زنزانة

اشكرك على الكراش كورس مظهرات دة ـ انا دلوقت بقيت خبير فى الاستعدات المطلوبة للمظاهرات بعد ما كنت جاهل مظاهرات ـ ربنا يخلى الحكومة اللى بتخليكوا تتدربوا على المظاهرات ـ ايام حكم ابو خالد كان فية مظاهرات بينظمها علشان تهتفلة بس لكن تهتف ضدة زى عمال حلوان ما عملوا 1968
يفتح عليهم النار عيدل ـ مش حكومة اليومين دول اللى بتدلعكم وكل اللى بتعملة فيكم انها تقبض عليكم وتعذبكم ودخلكم السجن وتعمل فى الولاد اللى عملوة فى الشرقاوى وتقطع هدوم البنات وتمشيهم عرايا فى الشوارع انا مش عارف لية انتم عاوزين حكومة طيبة زى دية تمشى لية؟ انتم عالم مفترية ده حتى مدحت صالح مطلعكم بتفتروا على الحكومة الطيبة وبيغنى من حبة للحكومة ويقول ـ اتحدى لو واحد يوم انضرب بالقفى والشغل فى كل حتة واللحمة بسبعة جنية وسعات تلاقيا بستة ولا حد بيرتشى الله على الحياة بقى لونها شفتشى ـ ربنا يخلى الحكومة ـ تعديلات سطور اية وخوتت دماغ اية ؟ هو يعنى لو السطور الى انتوا بتقولوا علية دة اتسن زى مانتم عاوزين ولا الحكومة سنتة عند اى محل بيسن السكاكين راح تفرق اية ياعنى ؟ الحكومة كدة ولا كدة راح تستعملة فى تقطيع لحم العيال بتوع المظهرات دول ـ تحياتى

Anonymous said...

انا قريتالبلوج يارانداعجبنى قوى لدرجة انه فوقنى من الغيبوبة اللى انا فيها شوية مش عارف هو ده المفروض ولا لا

Anonymous said...

اه نسيت اقول انا مين انا واحد من المفقوعين

ايــــــــــــــــــوب said...

جميل التغطية المعلوماتية اللى انتى مقدماها ، يبدو لى انى اتاخرت فعلا فى زيارة المدونة بتاعتك

بالنسبه للاستعداد للمظاهرة انتى نسيتى قزازة مية ... وعلبة مناديل
بالنسبة للمدخنين لازم يعملوا حسابهم فى سجاير زيادة علشان مايستلفوش منى ويخلصولى سجايرى

اخيرا فى حاجات كتير اتغيرت من ايام 2003 للأيام دى ولو راجعتى مشاهد المظاهرة وكلامك اللى فى البوست هاتكتشفى ان اهمها على الاطلاق ان التظاهر تحول من فعل بيولوجى حتمى الى فعل سيكولوجى حتمى مع الاعتذار للدكتور المسيرى

Anonymous said...

وبعد وصفة طبق العام لكل عام من البنتش راندووش

نتكلم فى المهم

هى دى يا اؤختشى كانت مظاهرة ولا سوق التلات؟؟

حلوة اوى المطالبة بالحفاظ على حقوق الشعب الجائع المطحون أما كنتاكى وهارديز وفخافيخ التحرير

نيااهاااهاااااا

ذو النون المصري said...

انا فعلا اسعدني الوصف و التحليل للمظاهره لكن نفسي اعرف ليه حركة كفايه بس اللي بتعمل المظاهرات ؟ليه باقي الاحزاب مشاركتش و الاخوان ايضا ليه مشاركوش؟
و ليه في القاهره بس بتكون المظاهرات؟
تحياتي

جبهة التهييس الشعبية said...

بصي يا أختشي

أنا آخر مرة نزلت مظاهرة من أيام الكامحة

الجامعة يعني

يعني من يجي خمسة وستين سنة كده

ايه بقى

الناصريين والشيوعيين ضربوا بعض في المظاهرة

ليه بقى

اكمن ناصري انسحب من لسانه وقال: لا إله إلا الله الصهيوني عدو الله

راح الشووعي قال له: لاحظ ان فيه مسيحيين معانا في المظاهرة يا فلان

قمت شادة الشووعي من قفاه وقايلاله: لاهو انت ما تعرفش ان المسيحيين مؤمنين بإن لا إله إلا الله زينا بالظبط

قال لي طيب واللي مش مؤمنين بربنا خالص؟

المهم الواد كان واقف على كتاف العيال وبيقول ينشد والاقيلك الواد التاني راح جاي ناطط وماسكه من ياقة القميص وهوب جايبه أرضا

وويك ويك ويك ويا ولود كذا ويا ولود كذا

قبلها كنت قلت للاخوان ما تيجوا في المزاهرة قالوا لي: لا مش ح نيجي الاتنين اياهم بيتخانقوا كل مظاهرة واحنا مكتفيين بنفسنا وهم اللي محتاجينا عشان المزاهرة تبقى شكلها حلو عشان احنا عددنا كبير مش احنا اللي محتاجينهم

بس يا اختشي

من يوميها

وانا قلتها بيني وبين نفسي

لا ممكن ابدا انزل اي مزاهرة مع المعارضة المصرية لحد ما يبطلوا شوية منهم يستندلوا والباقيين يضربوا بعض

ولحد ما المعارضة بتاعتنا تبقى محترمة

ما ناوياش انزل مزاهرات ابدا

بس ده كلام في سرك يعني

اوعي تجيبي سيرة احسن ده سر

خدي بقى لنك الاكواد بتاع المظاهرة التدوينية وخليكي جدعة


http://www.linux-fr34k.com/Soka/Blogger/Cod.rtf

Anonymous said...

وهي دي مصر يا عبلة و لا ايه؟

!!!!!

Anonymous said...

حتى فى عصر الأنترنت والتقنيه الحديثه يحاول النظام تغطيه الأخطاء الفادحه عن طريق منع المظاهرات بحجج مضحكه بالإضافه إلى قوانين الطوارئ التى أصبحت القوانين الفعليه لحكم المدنين ...كلها أساليب وقحه من شله مرتزقه مكانها السجن بدلا من الحكومه...على مدار 26 عاماً من حكم أحمق ،لايعرف حتى مصلحته، تحولت مصر إلى أضحوكه بين الأمم وجحيم لايطاق لكل مصرى حر أو إنسان سوى ...المظاهرات من أنبل السبل للتعبير عن سخطنا وعدم الرضى عن الأوضاع المهينه وربما تكون بدايه الطريق للوصول إلى حريتنا المسلوبه..إيضاً يراها "الجحش" وأعوانه كمؤشر يقاس به مدى التذمر عليه وعلى أساليبه المستبده وتمثل قلقاً بالغا له خصوصاً فى هذه الفتره الحرجه التى يأمل فيها أن يُوَرّث مصر ومن عليها لحصاويه الألمعى..

ومن ناحيه أخرى أعتقد أن أكبر الأخطاء الفادحه التى يرتكبها أعوان الجحش العجوز فى أستمراريه نظام التهليب هو السعى الجاد لتنصيب أبنه للحكم...لحسن الحظ هذا فى مصلحة الشعب لان أبنه الحصاوى غبى وغير محنك سياسياً، بالإضافه لايدين العسكريون له بجناح بعوضه ولذالك من المحتمل الطيبعى هو أنقلاب فيما بعد!
وأمريكا ( بدوافع من أسرائيل) بلا شك لايعرها أن تحكم مصر بحكم عسكرى أو مدنى أو حميرى كالوضع الحالى....كل ما فى الأمر أنها ترغب فى وجود خيال ماءته يعطى لها تسهيلات و ينفذ التعاليم بحزافيرها مقابل أعطاءه لقب مزخرف مثل رائد الديمقراطيه أو حكومه صديقه ..الخ.
المهم الطريق طويل ووعر بس فى خلال عام أو عامين، أن لم تحدث معجزه من الله، أعتقد سوف تدخل مصر عصر الحصاوى بما فيه من همجيه أكثر وصراع على السلطه (والفلوس) وربما عصيان مدنى كما أشرتى فى مقالك ،ومعه تبدأ تكات الساعه إن شاء الله.

zenzana said...

حاضر يا جبهة علم وينفذ

نبيذ
انتي كنتي هناك؟

اسلام انا بس اشرت لبعض الاستعدادات
تابع الباقي عند يا لالالي عشان تعليمات لبكرة

جدو العزيز جدا
انا مستعدة اعملها بوستات مسلسلة عن كيفية الاستعداد للغلاسة ع الظبابيط
او مواجهة التحقيق بأعصاب هادييييية
اصل النظام الو...دا علمنا كتير

ناصر ولا الهباب دا سيان تعددت الاسباب والموت واحدو كل شيخ وله طريقة

سي مجهول عرفتك يا حبيبي الغيبوبة دي مش غريبة عليا
معني كدة ان هشوفك ف مظاهرة بكرة؟


ايوب
متأخرتش ولا حاجة جيت ف وقتك
انا بس محبتش اجيب سيرة السجاير لاني مش من اللى بيشتروها
من اللى بستلفوها
اما ازازة المية بتنفع والله ف غير الشرب
بتنفع تحدفها ع ولاد ال...لو ممعكش حاجة



ماشي يا شهرو اتريقي
طبعا عنكم هيبقي فب مظاهرة قريب لك انتوا وذو النون لوحدكم ويعملوا عليكم كوردون
محدش هيطلعكوا منه غير ي بالعصايا

ذوالنون يا روحي
اقري البوست تاني
قلت لك الناصريين كان عندهم فرح
قصدي انتخابات
والتجمع مأجرين صالة الفرح لهم
يييييييييي قصدي الحزب
والاخوان جم يهنوا ويباركوا
ييييييييي قصدي يغطوا الحدث بس

جبهة
طب كدة مش هتنزلى ابدا
دا احنا ممكن نشوف الغراب الابيض الا ان المعارضة مش هتبطل خناق مع بعضها

هي دي مصر يا ابيي
كنت قربت انسي منهم لله الخواجات

عمرو عزت said...

مالقتش ليكي ايميل في البروفيل

بخصوص المحشي مع خالد عبد الحميد
ما تشرفينا بكره - الثلاثاء- الساعة 8:30

راسليني بخصوص العنوان علي
amrezzatt@gmail.com

او تعالي علي طول مع خالد

Ahmad Hegab said...

يخرب بيتك عقلك
بوست رائع

zenzana said...

عمرو

شكرا جدا جدا ع الدعوة



احمد يا فنان
خليك دقيق يخرب عقلي ولا بيتي؟
انا ولا عندي دا ولا دا
هههههههههههه
شكرا علي زيارتك