لا يأس مع الحياة ولا حياة لمن تنادى..مظاهراتنا فعل بيولوجي حتمي

تحديث معرفش رقم كام

المهم: اعتصام مفتوح أمام قسم شرطة الضاهر للافراج عن المعتقلين اللي الشرطة رفضت الافراج عنهم

انا مستعجلة ممكن تتابعوا الاخبار من عند جرجس من أمام القسم

انا رأيي عصيان مدني

احسن بما ان مفيش حاجة نافعة

مع ولاد ....

عارفة انكم عارفين ان البوست دا عن مظاهرة النهاردة، اللي رجعتني لمظاهرات مارس 2003، مع الفارق، علي الاقل بالنسبة لى، في مارس 2003، الفرق الاول مجرد سماع خبر مظاهرة في التحرير، الناس تحشد بعضها، وتنزل، الفرق التاني حرية الحركة والقدرة علي الجري، وسهولة الانتقال من شارع لشارع، عكس الحشر في شارع كريم الدولة، وحشري انا ف كرنر واحد لمدة ساعة ، الفرق التالت ان مكنش عندي أي استعداد للمشاركة لحد يومين فاتوا، بشكل لا ارادي كل ما اتفق على موعد مع صديق، اقوله "اشوفك ف المظاهرة".

المشاركة في المظاهرة ما تجيش كدة وخلاص، الاول من الافضل اتباع بعض الاستعدادات، بالنسبة للانسات اول حاجة شنطة اليد، بلاش الشنط البنانيتي خالص، الافضل سبورت باج صغيرة، ومتكونش متكربسة ميكاب، او كتب او أي حبشتكنات، الضروريات فقط، ويا ريت شاحن موبيل، صحيح مش عارفين هنستعمله فين؟ لكن كل شيء جايز.
طبعا سبورت شوز، وايشارب قديم مش مهم لو ضاع، في الغالب بنطلون من الغسالة، لكن ممكن جيب للأحجام العائلية، او مفضلي الكلاسيك، مفيش ازمة من ميكاب خفيف، بس الافضل لم الشعر، ديل حصان، او قصه قصير ونريح نفسنا، اما الاخوات المحجبات ايشارب عادي وخلاص، بلاش ايشاربات موديل عربة السيدات ف المترو
لان في مطر، وشد وجذب مع الامن، وبالتالي كل الترتر والحركات والحلقان الكبيرة دي هيكون مصيرها حفر المية في شارع كريم الدولة.
بالنسبة للشوباب يبعدوا اول حاجة عن ارتداء أي اندر وير ملون، لانه بيعمل شغل جامد قوي لدي السادة الظبابيط، بعد القبض والترحيل علي مخابز عمن الدولة، خلوه اسود، بما انك ممكن تقضي ايام طويلة من غير ما تغيره.
بلاش تربط مع أصحابك علي انك تقابلهم ف حتة معينة، كدة كدة الجميع هيتخندق في شارع ضيق، يعني هتخلص الكريديت بتاعك ع الفاضي، خليه لعربية الترحيلات، كمان مفيش داعي صاحبتك تيجي المظاهرة لو عاوزة تشارك، الافضل انها تكون براحتها، لوحدها مع أصحابها مش مهم، والا هتلاقي نفسك متكتف ساحبها وراك ف كل شارع تدخله، وكمان هتضرب اكيد بسببها، بما انك هترفض أي مساس بها، والنتيجة بوكس ف الفك، او تتهور وتروح ماسك وشاتم أي رتبة قدامك، بس يا ريت تبعد عن العساكر..اشتم الظبابيط اخف وطأة، وهو نضال برده

بالنسبة للجنسين شحن بطاريات الموبيلات، وشرا كريديت، بلاش الكريديت اللي ع الهوا ابو خمسة، لانه هيخلص
بعد اول خمس دقايق من المظاهرة، لما تحاول تتأكد ان كل اصحابك وصلوا ولا لسه، يعني احتمال كبير ميكونش معاك اى كريديت، وانت جوا عربية ترحيلات، او حتي براها.
اول حركات الامن القرعة اللي مش جديدة بالنسبة لي الحرص علي كردنة المتظاهرين، اما الجديد فكان اللطف والظرف، من البشاوات الظبابيط الكبار قوي قوي، اللي اتحايلوا على بعض المدونيين، الحاج جرجس، وعرباوي، ودماغ ماك، لدي وصولهم ميدان التحرير انهم يروحوا يتظاهروا بعيد عن الميدان، وبقي كل مدون معاه ظابط هههههههه.

اضطر الجميع للرضوخ والاتجاه لحزب التجمع اللي اتحول لدار مناسبات، بيأجر قاعات الافراح، قصدي الحزب، لاحزاب اخري، اهو برده تنسيق حزبي، وتخيلوا 400مناضل ناصري جوا حزب التجمع عشان انتخابات الحزب
و ميتين بره مطحونين من 1000عسكري امن مخابز، و لا حياة لمن تنادي بالمشاركة..يا لهوييييييييييي
احلي حاجة انك تقف في كورنر قريب من الامن، مش خطوط التماس الاولي ولكن ع الاجناب اللي الرتب
المتوسطة قوي قوي تدير من خلالها المعركة مع المتظاهرين.. ولو حبيت تعقد اتخن ظابط بص له كل شوية وانت ساكت، خصوصا وهو بيدي تعليماته لعساكر امن المخابز اللى لابسين مدني، هياخد باله انك متابعه وبتراقبه، بعد شوية هتلاقيه خرس وبطل اعطاء اوامر بالاندساس وسط المتظاهرين..هيخاف انك تسيح والاخ اللى لابس مدني ممكن ينضرب.
المكان التاني ياريت فوق بس مش بلكونة يعني حاجة اقصر شوية زي كابل الكهربا اللي علي يمينك وانت داخل حزب التجمع سابقا، دار مناسبات حاليا، عشان متفقدش اتصالك بالمظاهرة واصحابك،
دا غير انك هتشوف كل الناس، وهتاخد بالك من مين زعلان من مين، ومين بيزوغ ف الزحمة، ومين بيربط مع مزة، ومين فعلا رايح يتظاهر ....بس الحاجة اليع فعلا كانت التحرش والتلكيك للكلام مع الانسات ف المظاهرة من بعض الاخوة المناضلين هههههههههههه

هي هي ف كل مظاهرات مصر تقريبا، تنازع الهتاف ... كل واحد عاوز الناس تردد هتافه هو، لانه هو الصح،
اللي يديه الحق انه يضرب القوي المعارضة له بهتافاته.
وهو هو الشو اللي بيعمله البعض للفت انتباه الكاميرات بأنواعها. ومفيش مانع من كام حديث تلفزيوني، ولو مهتم ان صورتك تطلع وتبقي مشهور، الزق قريب من الكاميرات أو الزق جنب حد مشهور جدا هتلاقي نفسك في كل الجرايد، والقنوات الارضية والجوية والبحرية.
ازفت حاجة شفتها اوحش حاجة فعلا كان دفع و ذق المنسق العام لحركة كفاية الدكتور عبد الوهاب المسيري، رغم حالته الصحية الصعبة لاجباره علي دخول كردون كريم الدولة شارع سابقا، رغم ان المسيري لم يعترض علي دخول الخندق، ما أدي لثورة البعض ودفاعه عن المسيري ضد السقوط،افتكر بالتحديد الصديق احمد عاطف من جريدة الكرامة، فما كان من الامن الا انه هاجم الجميع بما فيهم المسيري نفسه.

:-المهم نخرج من المظاهرة بمجموعة استنتاجات وهي

- انه لم يكن هناك استايل معين للملابس الشوباب هي هي التي شيرتات والجينز، والجاكت بمناسبة البرد، والمطرة.
- البنانيت كانوا في منتهي الاناقة والشياكة، والبوت كان عامل عمايله، الا ان الاسدال يظل اكبر انجازات تلك المظاهرة ليس بمجرد المشاركة في ترديد الهتاف، بل تأليف الهتاف نفسه.
- ان موضوع المظاهرة ف ميدان التحرير ومن الساعة خمسة لسبعة دي فضيحة، ميدان التحرير مكان لتشتيت المتظاهرين، وبما ان الميدان كبير، هتلاقيهم زي الجزر متوزعين كل شوية ف حتة ، مجمع تحرير، هارديز، كنتاكي ، واخيرا ثواني الامن بيسيطر علي كل الناس بما ان محدش بيجي في ميعاده، فاكرينها اوبن اير بارتي .
- صحيح ان المظاهرة لم تفشل الا ان كان عندي امل انها تكون اقوي من كدة، ومش ف الخون بتاع كريم الدولة، اللى مش عارفة كريم مين؟(يمكن كريم عامر) ودولة مين؟ (دولة العصابة).

اهم حاجة بالنسبة لي ان العكاز بتاعي رجع لي بعد فقده بساعة ونص وانا مش عارفة اطنطط ، ومحبوسة ف كورنر جنب العساكر، لحد ما بقينا عشرة، احمد ورزق والاتنين عساكر امن مركزي جداد طازة ف السلاح، اللي تقوله اخوانك ف السلاح بتوع المحلة اضربوا يقولك "اه وبعدها كان في تأديب، لا يا ست هم تلات سنين، هيعدوا بالطول والعرض". أما شعبان وزميله العسكري في ملابس مدنية فسبوا ميت دين للحكومة والمظاهرات، والظابط "اللي نافخ ريشه" بسبب الاجازة اللى اتلغت لمجموعة كبيرة من العساكر، اللي رجعوهم من علي باب المعسكر، وشحنوهم علي المظاهرة؟ عكازي طلع في الاخر قدام كاميرا العربية وواحد مصر انه يخص سي الحاج محمد عبد السلام، والحاج جرجس يقنع فيه دا تبع الانسة يقوله ابدا الحاج عبد السلام، أما أحمد دفتر وطن بما انه كان مزنوق قدام الكوردون فغرم كارت شحن جديد وكل شوية لقيتوا العكاز؟ عرفت بعدين ان كان في متابعة من الجهامير مش للمظاهرة، لكن لاختفاء العكاز، ومحاولات تتبعه
رست علي ان سي احمد استلف مني تمن كارت الشحن قبل ما اروح،مش قلت لكم اشتروا واشحنوا قبل المظاهرة.

- ان مظاهراتنا تظل كما أجاب الدكتور المسيري "فعل بيولوجي حتمي"، قاصدا الذهاب الي التواليت، وفي عينيه تلك الابتسامة عندما سألته "حضرتك رايح فين؟".

الاقرار بأن مع السلامة أكذوبة الاصلاح السياسي ف مصر

.

الصور من مدونة دماغ ماك