Wednesday, April 18, 2007

الست الوزيرة عيشة عبهادي مع الارهاب والكباب


فاكرين فيلم الارهاب والكباب؟
فاكرين المشهد بتاع كمال الشناوي أخر ما زهق
وجعر ورفع صوباعه(انا مش فاكرة نص الحوار بس هحاول) و
قال جبنا لكم كباب وسلاطات واخدناكم علي اد عقلكم
لكن للصبر حدوود..للصبر حدووودددد
(صديق فكرني بالجملة امبارح)
(مع رفع الصباع اكتر وحدة صوت عالي) لو
مسمعتوش الكلام
يبقي عليا وعلي اعدائي
الصبح الساعة ستة الاقي المجمع فاضي والارهابيين
يسلموا نفسيهم
بالظبط كدة




أخر ما الست وزيرة القوي العاملة عيشة عبهادي زهقت من محايلتها
للعمال الكخه الوحشين اللي وجعوا دماغها ليل نهار
كل شوية اضراب ولا اعتصام
عشان بدل مخاطر ولا رفع الحوافز
ولا رفع بدل الوجبة الغدائية
برده وقفت لهم كدة وقالت وهي رافعة صوباعها
وقالت في برنامج على الهواء على شبكة أوربت
بتقصد الاضرابات والاحتجاجات العمالية أن
"الموضوع كده زاد عن حده وسيتم التعامل معاه بحسم وشدة خلال الفترة المقبلة".
يعني العمال الكخه دول بلاش يعكننوا ع الست الوزيرة

والا الوزارة هتضرب بيد من حديد
يعني هتخلي ايامهم اللي جاية زي الطين
وأسود من الايام دي
ومش هيبقي في حنية ومش هيبقي كله شتيمة
هيبقي كمان في ضرب جامد قوييييييي
وهددت حضرتها باستخدام القانون في معاقبة العمال القلق دول
بالخصم من المرتب والاجازات للمشاركين ف الاعتصامات
"بزعم تردي أوضاعهم"، وهو طبعا مش حقيقي ولا حاجة لان
العمال كدابين وبيدلعوا ع الحكومة اللي مش مخليه نفس
الشعب و العمال ف حاجة
ومن حنية قلبها اتمنت ع العمال أنهم يلجؤوا لقنوات المجاري
يييي قصدي القنوات الشرعية ويكبروا دماغهم من الاعتصام
والاضراب واعتبارها اخر الحلول زي اخر الحروب كدة
بس بصراحة الست جدعة برده نسيت تقولنا ايه هي المجاري الشرعية دي
طبعا بما ان فيها مجاري اكيد شميتوا ريحة مقابلتها لحسين مجاور رئيس
عصابة حواش مصر ييييي قصدي اتحاد عمال مصر
وغيره من السادة اللي دماغهم صدعتها الاضرابات
الست الوزيرة عيشة عبهادي برده ست سكره
بتاعة العمال مش بتاعة حد تاني ودايما ف صفهم وان الحكومة ام قلب
زي القطن والشاش استحالة تلجأ لفض الاضرابات بالعافية
وان الامن بيبقي واقف بس لحماية العمال
لولولولوللييييي شايفين الناس دي يا جماعة
ناس ذوق ذوق ذوق...الصراحة
كنت قربت اعيط من حنية الحكومة والست عيشة
لما قالت انها بتعتبر نفسها محامي العمال
في كل قضاياهم ...عيب اوعوا حد يقول حاميها حراميها
دا مثل قليل الادب ومدسوس علينا من قلة مندسة
الست قالت انها والوزارة هيكونوا الحيطة التي تصد
أى حد يفكر وتسوول له نفسه الاقتراب من حقوق العمال المنهوبة
شايفين حيطة صد مش حيطة مايلة خالص بالص
زي ما الدهماء وشرازم الغوغاء ما هيقولوا

بالعند في العوازل والمتغاظين، أخر اخبار الاضرابات
تضامن عمال كفر الدوار مع غزل المحلة، و استمرار اضرابات عمال الطوب

الرملي بحلوان وشركة أبو المكارم بمدينة السادات لليوم الخامس عشر علي التوالي

كمان احتجاج واعتصام جزئي لعمال هيئة الطاقة الذرية يوم الاتنين أمام قصر عابدين

وقبلها هدد حوالي الف وخمسمئة عالم من العاملين بهيئة الطاقة الذرية البدء في
عصيان واسع والنزول للشوارع بشكل متصاعد ومنظم
اللي طالبوا فيه "ببدل مخاطر" ونشر خبر تكديب عن حدوث الاعتصام في
المصري اليوم أول امبارح الاثنين.أخر حاجة قريتها في الدستورعدد امبارح17ابريل
اضراب عمال مصنع السلام لصناعة الخميرة لليوم الثالث مع تجاهل النقابة والاتحاد
والقوي العاملة والست الوزيرة عيشة عبهادي لمطالب العمال وهي غياب الامن
الصناعي وتدني الاجور حيث يحصل العامل الدي يعمل بالمصنع مند 20سنة
علي راتب أساسي قدره 230جنيه..230جنيه ومش عجبه؟
ايه الطمع دا؟

هو فاكرها تكية؟


ابشركم بقي المدرسين في كل محافظات مصر بيفكروا ف الاضراب
ومقاطعة امتحانات الثانوية العامة احتجاجا علي الكادر الخاص
من الاخر الايام السودة هتبقي اسود ، وهنتحول من دولة العبيد الي دولة الفتافيت
ودولة المخبرين دا اذا كان هيفضل حاجة اسمها دولة اصلا
خبر تانى شفته بسرعة الحكومة بتفكر تعدل القانون المنظم للجمعيات
واحتمال كبير قوي ان القانون يتمرر ف الهيصة قبل نهاية الدورة البرطمانية الحالية
بهدف قفل دورف كتير من الجمعيات والمنظمات. ففي الهجمة الشرسة
علي دار الخدمات النقابية والعمالية وقفل فرعيها في قنا والمحلة
خلوا بالكم مش ببشر ولا حاجة مش فاضل غير فرع حلوان
ربنا يستر
لمتابعة اضراب غزل المحلة وتضامن كفر الدوار معهم
اه كنت هنسي .. الصورة الثانية ملطوشة منه

12 comments:

essam said...

ولا تنسى ياراندا ما تم فى السر من تحويل التأمين الصحى الى شركة قابضة يعنى الناس لا تاكل ولا تشرب ولا تتعلم ولا حتى تمرض

zenzana said...

انا كنت واحدة من الناس اللى جربوا يعنى ايه مفيش تأمين صحي؟
ويعني ايه لما تحصلك حادثة وتتحمل تكاليف مستشفي وعمليات ودكاترة بألافات
اسكت متفكرنيش

ذو النون المصري said...

ربنا يستر في الايام الجايه
انا حاسس انها هتكون اسود
و بعدها طبعا الفجر هيهل
هههههههههههه
مش عارف ليه كل متسود اكتر مبكونش مقتنع ان ده اخر سواد موجود و ان لسه فيه كمان
كل مفكر في كده اتغاظ و اكتئب
تحياتي

شــهــروزة said...

يعنى على كدة نتوقع أن الثورة القادمة حتكون ثورة عمالية ومش عسكرية؟؟

يا ريــــــــــت
على الاقل لو عامل او فلاح مسك الحكم
حيفكر فى غيره قبل ما حيفكر فى كرشه وجيبه

طيب انا نفسى نجرب حكم النوع البعيد عن البدل الميرى والطبنجات والكرابيج وعصيان المقشات

تفتكرى حيجيب نتيجة؟؟

BeLiEvEr said...

أنا كنت مستغرب برضه هما ليه طيبيين قوى كده مع العمال

و الله لو الناس اللى يتحكم البلد دى عملت نص المجهود اللى بتعمله فى قهر الناس، فى التفكير إزاى تخدم الناس، حيلاقوا إنهم مش محتاجين النص التانى اللى يقهروا بيه الشعب لان الناس حتكون مبسوطه
و لو مصرين قوى يعنى، خلوها نص قهر و نص تفكير فى حلول للوطن و حنبقى فله والله

ibn nasser - ابن ناصر said...

حلوه فكرة الثورة العماليه دي..انتي عارفه مره برد علي التليفون لقيتها عائش عبدالهادي!!! طبعا قولتيلها كلام وبعدين قولتليها النمره غلط !!
تحياتي

Anonymous said...

السلام عليكم
انا عرفت فكرك ايه...؟؟؟ ربنا يهديكي
قولي امين
امين
امين

karakib said...

راندا :) أزيك ؟؟ و أيه اخبارك ليكي وحشه جامدة .. أغيب أغيب و أرجع الاقيكي زي ما انت متألقة و بتنبحي في صوتك
بس مين بس اللي يسمع ... كل حاجة بترجع لورا بس ورا ده اخره فين
الله أعلم

zenzana said...

زو النون الف سلامة م الاكتئاب دا حال مصر من زمان ومضات خافتة وسط الظلام


شهروزة
يسمع من بقك اللي زي السكر

بليفر
لا هو كله ضرب مفيش شتيمة واذا كان
عاجبك احنا برده حكومة مقشات مش اي حد
ابن ناصر
احتمال نمرتك صح بس الوزارة ولا الوزيرة هي اللي غلط
الاخ المجهول

عرفت فكري واتجاهي كدة مرة واحدة لاني حاطة لنك لشبكة اخبار ومعلومات؟
لا حلوة النكتة دى
انت فتحت الموقع اصلا؟
اشك لانك ببساطة لو فتحته هتلاقي الموقع مجرد تجميع اخبار عن المرأة في كل المواقع الصادرة باللغة العربية مع ترجمة لها
انا كمان عرفت اتجاه وفكرك م التعليقين
ربنا قادر علي يهديك

كراكيب
وانت لك وحشة والله
انبح ف صوتي لان دا اضعف الايمان اللي اقدر عليه لكن قريب مش هتبقي مجرد نبح صوت وبخ كلمتين

هــيـبـاتـيـا said...

أهنيك على مجهودك
ورغم مشاعر الأرتياح التي قد ترتسم على وجهي عندما أسمع أن عمال مصر يتحركون
لكني لا أشعر بأن هناك ثمة أمل من هذه التحركات والتي تتمحور حول مطالب اقتصادية دون ربطها بالشأن السياسي العام

تحياتي

zenzana said...

هيباتيا لو كل فئة او حتي فرد اتحرك من منطلق مطلبي اكيد دا ممكن يغير شيئ
ولاحظي ان الشعب المصري عايش بمبدأ عض قلبي ولا تعض رغيفي
في انتفاضة يناير 1977 الناس اتحركت مع ارتفاع الاسعار وزاد السخط لما ارتفع تمن رغيف العيش بالذات
لما عمال السكة الحديد يقرروا الاضراب علشان بدل مخاطر ولا عمال مصنع تعلن الاضراب علشان اجرءات الامن والسلامة ولا حتى رفع بدل وجبة غذائية كلها تراكمات ممكن تبني شئ في الاخر
انا مع الثورة حتى وان كانت من اجل رغيف العيش

spellz said...

el set l wazeera l mo3geza eli m3aha satta ebteda2i?

3yzaha t3ml ih!!!
l 3eib 3alli m3aynha

bgad 7kayt l modarseen?
yesma3 mn bo2ek rabenaa w yfoo2oo b2a

maho asl lnas teh2et w kefret 5las

w 3o2bal l drs maan wl talaba wana awel wa7da ha3tesem m3ahom!