Friday, July 20, 2007

يا تجاتك يا عربي ..حسبي الله فيك


التاج دا من عربي بن ابا الحاج قمحاوي اه والله وبقالي اسبوع اسمع من البت شهروزة ان في تاج

ليا عنده وكل ما أدخل ع البلؤ ملاقيش غير بوست القرأنيين ، أقراه وأنسي التاج

معلش للسن أحكام ، ولسه حالا برده شهروزة قالت لي ع التاج وفضلت توصف لي

حارة جوا حارة جوا زقاق و ف اخر عاطفة يمين لاقيت نفسي خبط لزق قدام التاج

اللهم لا اعتراض ، اللهم لا راد لقضائك ولكني أسألك اللطف فيه

يلا زي بعضه بما ان عربي وعدني بدستة جاتوووه طبعا هيجيبها من عند العبد

بس خلي بالك مش بحب المايفيه ولا الحبشتكنات دي اللي من غير شيكولاته او كريز

احب شخص لقلبك ف الدنيا ؟

مامتي

انسان مستعد تضحي بحياتك -ركز ف كلمة حياتك - عشانه؟

أي حد يستاهل فعلا

انسان كرهته لدرجه الجنون وتمنيت لو تمسك سكينه وتنقض عليه وتغرزها

ف قلبه تقتله وتقف تبص لجثته وتشفي غليل قلبك؟

محدش وصل للدرجة دي غير واحد

بس اكيد مش انا اللي هنفذ

ما هو اجمل كتاب كراته لبشر ومحتفظ به حتى الان ؟ انت متعلق بيه وبتقراه كل فتره؟

هم مش واحد هم تلاتة

الامير الصغير كان هدية من صديقة و للأسف نسيته ف مكان

توم سوير

والعين التالتة ودا بيتكلم عن كاهن بوذي من التبت

اهم جهاز منزلي انت متعلق بيه او بتستخدمه كتير؟اهم جهاز منزلي انت متعلق بيه او بتستخدمه كتير؟

للاسف معنديش غسالة صحون

مكنة الاكسبرسو والكمبيوتر

شئ تحس بالراحه النفسيه لما تنظر اليه ؟

كرات التلج ف عز ديسمبر

مكان تحس فيه بالحنين الى شئ لا تدري ما هو وذكريات جارفة الى لا شئ؟

وماتشات تنس الطاولة مع صحابيDi Garda غابة

عشان نعوم ونصطاد سمكmonticollo بحيرة

اجمل مدينه زرتها داخل مصر؟

اسكندرية خصوصا الكورنيش عند جليم

اجمل مكان طبيعي رايته داخل مصر؟

ذهب بس اكيد اجمل مكان انا لسه مشوفتوش

زي سانت كاترين نفسي اروح وأطلع الجبل كمان

شخصية كارتونية بتحبها؟

شريك

نوع هاتفك المحمول ؟

نوكيا للأبد بس مش عارفة نوكيا كام

si لان مبفهمش غير ان الموبيل يرن وانا أغلط واقول

سرعة بروسيسور جهازك؟

لا معرفش المهم أنه شغال

حجم ذاكرة هارد جهازك؟

40 ومش هغيره

المساحة التي تشغلها المواد الاسلامية ع جهازك؟

أشمعني؟

نفس المساحة السالف ذكرها ف قلبك-الاجابة لنفسك علشان الرياء يا اخوانا؟


مش مهم، لان العلاقة مع الله علاقة خاصة وممكن اعتبرها سرية كمان


اهم هدف انت حاطه لحياتك دلوقتي؟


أحب أحتفظ به لنفسي


مواصفات فتى احلامك؟


مع كامل الاحترام للأخوة المجاهيل اللي بيظبطوا

هنا وعلي مراجيح

أنسان
وعنيه حلوين (كله يبص ف المراية قبل ما يقابلني)واصحاب العيون الملونة
ميحاولوش التجربة أثبتت فشلها معايا
بس لازم يكون دمه خفيف :) هههههههههه


شعورك لما تسمع كلمة مصر؟

علي حسب لو براها بتكون وحشاني

لو جواها عادي

لما تسمع كلام عن اليهود؟

ولا حاجة

لما تشوف ظابط شرطة ؟

ولا حاجة انسان زيي زيه

طالما مش بيقل أدبه ع الخلق

لون البطانية اللي بتتغطى بيها ف الشتا؟

اللي ع السرير لونها لبني وازرق زي البحر كدة

اما التانية اللي ببقي سحباها قدام التليفزيون برتقالي وبحبها اكتر


لون الجورب او الشراب المفضل لديك؟

هو بصراحة معظمهم بينك وأخر اتنين بحبهم كانوا هدية

من البت ماريا

افكارك تجاه شاب ماشي ف الطريق لابس جلابية بيضاء قصيرة

وعمامة وله لحية وبجيبه سواك وف ايده مصحف؟

ولا حاجة هو حر

احساس يراودك ف اشارة مرور مغلقة بسبب مسئول كبير ؟

بقي عادي كل يوم بتزنق في شارع القصر العيني بسبب اللي رايحين

وجايين ع البرطمان المصري


مين اكتر ست اشخاص بتحبهم؟

لو من خارج القبيلة هم عارفين نفسهم

هل انت سعيد؟

احتمال

لو اجتمعت انت وحسني مبارك ف مكان واحد هتعمل ايه؟

الله أعلم

لو معايا مليون ونص هتعمل ايه؟

أول حاجة هشتري كاميرا أحسن من اللي ضاعت مني

عشان أسلفها للواد تاح لانه مش هيوافق اديها له هدية

تاني حاجة الواد زيكو يتقدم لهند صبري اللي وجع دماغي بيها

بعدين انا تذكرة طيران و بس

بتحب مصر ؟

وليه لا؟

انت مسلم؟

وأنت مالك ؟ دا سؤال عنصري جدا

ليه؟

لاني ضد تصنيف البشر حسب دينهم وكمان قلت قبل كدة العلاقة مع الله خاصة جدا

مين اكتر شخصية متقدرش تستغنى عنها ؟

كل اللي بحبهم ويحبوني ولو أن كتير شخصيات مش بتحبها

ولا تكرها لكن متقدرش تستغني عنها

ايه اكتر موقف محرج؟

مش فاكرة بس في موقف ف عيد ميلادي قبل اللي فات

كان في ناس كتير جدا وكان في مجموعة أسبان

وقالوا ان في تقليد لازم اعمله أني اسلم علي كل الرجالة الموجودين ف الحفلة

بس سلام من العيار التقيل انا كنت ف روبع هدومي


الامنية اللي تتمنى تحققيها؟

هو في كذا حاجة بس واحدة بس ممكن اقولها

ان قبل نهاية السنة دي أروح ازور اصحابي ف مكان بعيد


التاج يتمرر لمين ؟


اللي هيهرب فيهم هوريه





4 comments:

3rby said...

ايه الكروتة اللي في الاخر ديه؟
بس اول التاج حلو ضحكني
الامير الصغير ده تحفة بس ماكملتوش مش عارف ليه يمكن عشان خياله بيشد اه لناس كتير بس صدقيني مش في مستوي خيالي
علي فكرة انا اللي هنفذ
الجاتوه محفوظ والله بس انا ليا عندك
رشفة اكسبرسو
بتشوفي فين التلج ده
علي فكرة انا لسه مكتشف انك مش اسكندرانية بس روحك اسكندرانية جدا جدا
مالك ضحكتي من دلوقتي ليه امال لما تشوفيني
انا عينيا عسلي تنفع؟
ممكن لما تاخدي المليون ونص تجوزيني انا هيفا واهو تاخدي فيا انا وزيكو
علي فكرة انا اتخانقت مع اخويا فدخلنا الكومبيوترين بتوعنا جوا فمافيش نت عندي دلوقتي انا في نت كافيه فاسف للتاخير

شـــــهــــروزة said...

نفس الأمنية اللى نفسى فيها

اتفرج عالتلج الأبيض وألعب بيه ولو ساعة من عمرى

ماتسيبى المجاهيل ياكلو عيش يا بنتى؟؟
انتى دايما كدة قطاعة أرزاق؟؟؟

هاتشى بوسة هاتشى

امواااااااة

zenzana said...

عربي
طالما انت اللي هتنفذ يبقي اتكل ولك عندي الجاتوه دستة بحالها ام 32جنيه من عند العبد ههههههه
انا مش اسكندرانية بس عشت فيها جزء كبير من مرحلة الطفولة كل اجازة صيف امي كانت بتوزعني عند بنت خالتي ف المعمورة والله كانت ايام

بصرة وانا كمان عينيا عسلي هههههه
الاكسبرسو محفوظ يا مان بس انت انوي

انا ارفض بصراحة موضوع هيفا واشجب واندد يا بني نقي هي دي مزة؟
دا انت زوقك طلع اخي خالص

بس لك الاكسبرسو اول ما تسلم الجاتوه

zenzana said...

شهروزة

اه انا مش بيوحشني حاجة في اليومين الحر دول
أد ايام التلج والزحاليق والنوم كمان ع التلج والفرجة ع السما
وكور التلج ف خلق البني ادمين مباشرة كنت هدافة ههههههههه

انا مع ان التظبيط حق انساني وان شاء الله يتم اضافة بند التظبيط للعهد الدولي
نياهاااااا