Monday, August 20, 2007

يا فقرك يا مصر : بعد أكفل يتيما أكفل أسرة بحالها


الكلام مش جايباه من عندي دا اعلان منشور علي جنب كدة ف الاهرام

في عدد امبارح 19/أغسطس

صحيح انا تنحت لما شفت الاعلان بس بعدين قلت هو انا مستغربة ليه ؟

دا احنا في ازهي عصور المهلبتية من المهلبية مش من التهليب احسن تفهموا غلط

وبالتالي مفيش داعي للدهشة فعلا، فقلت لما اشوف حالة فقرنا مثلا ف الجرايد
هحاول اختصر واحط لنكات بس واخد الجرايد من أول الشهر دا بس اغسطس يعني
يلا هي طالبة نكد اسمحوا لي انكد عليكم
دا تقرير دولي لمركز معلومات البنوك وبيتكلم عن حالات الاقتراض
بين الحكومات العربية وان مصر بتاخد من البنك روبع القروض المخصصة للمنطقة العربية كلها
ونصف القروض المخصصة لشمال افريقيا وكمان مصر بلا فخر
اكبر مقترض من البنك عموما وان الفقر طال 40%من المصريين عام 2005
يعني حوالي 28 مليون ومنهم اكتر من 13 مليون تحت خط الفقر
مع ان الاستثمار الاجنبي زاد من 500مليون دولار الي 1و6مليار دولار
اللهم حسد
بيع المصريين لعيالهم وتصديرهم كمان
دي بقي لا مؤاخذة خطة الحكومة لحصار اللي اسمه ايه دا سي فقر
دراسة بتقول أن بيتم قتل 41 سيدة شهريا وان 80%من ضحايا السيدات
مش حقدا ع الاغنيا ولا حاجة بس فعلا الارقام خضتني
دا غير ان كل الناس اللي اعرفهم وقابلتهم مش من ضمن الرقمين الاول والتاني
وجود 100 ألف مليونير و91 ملياردير في مصر وان 50%من الشعب الحمد لله تحت خط الفقر
التحقيق بعنوان ناس هايصة وناس لايصة افعص هنا
دي طفلة شبر واقطع مصرة انها بياعة مش شحاتة يا تري كان حلمها تبقي ايه؟
دا بقي تحقيق البديل عن حوجة المصريين وبيعهم لاولادهم
باقي التحقيق هنا
دا خبر عن خريطة الفقر في مصر
دي عيلة عائلها مرفود من شغله ومريض
وكل حلمه فرصة عمل
دا بقي معرفش يتجوز فانتحر يلا كدا كدا منتحر
من أسباب ارتفاع معدلات الفقر في سوهاج مثلا
هنا عن فقرا منشية ناصر الحكومة رفضت تسلمهم المساكن البديلة
رغم انها تبرع من الشيخ زايد يعني الحكومة مش هي اللي خصصتها
لهم م الاساس هي بس حبت تلهفها
بصراحة انا تعبت من كتر اللنكات انا هريح نفسي والطع هنا لنك ملف الفقر من كل الجرايد المصرية
لاطشاه من موقع الدفتر خانة اللي اخدت منه كل اللنكات اللي فاتت

15 comments:

حـنــين said...

قلب لغــزة
هل تعرفون، ماذا يعني مدينة بلا كهرباء؟
غـزة منذ يومين بلا كهرباء
مستشفياتها، منازلها، مؤسساتها التعليمية والصناعية، متاجرها، شوارعها
غزة الجائعة تختنق في الظلام
أدعو الجميع
بوقفة أحتجاجية
بتعتيم المدونات ليوم واحد
الخميس
وعلى كل من يعرف اللغات الأجنبية
الإنجليزية والفرنسية والأسبانية والألمانية... وغيرها
رجاء ترجمة هذه الدعوات وإيصالها للمدونين الأوربيين
مع أرسال نسخة للأخرين لتوزيعها
ربما أستطعنا توصيل صوتنا لمن يشاركنا الحب والغضب في اوروبا

محمود الدوح said...

مصر بلد جعانة
وهتموت جعانة

وهتموت لية
ما احنا كدا كدا ميتين
ناقص الدفنة وبس

Anonymous said...

اكفل شعب ولك الجنة بإذن الله

amr220 said...

الواحد بيتفرج علي الافلام القديمه

مصر في الاربعينات و الخمسينات

شوف الشوارع كانت نظيفه ازاي

و الناس كان عندها ضمير و اخلاق

شوف ظابط البوليس النبيل

و الدكتور اللي كان في قلبه رحمه

و اتفرج علي مصر النهارده

مثال للفوضي و الفقر و القذاره

مفيش اي احترام لأدميه الانسان

والله الكلب في امريكا ليه حقوق

اكتر من المواطن المصري

عاوز تعيش في مصر؟

لازم ابوك يبقي لواء شرطه

و أمك تبقي عميد جيش

و تكون انتي نفسك حرامي

و مراتك في الحزب الوطني

و عيالك امناء شرطه

و الا حايطلع عين ابو اللي جابوك

و ماتنساش تروح تنتخب مبارك

في فتره ولايته المليون



قالوها زمان

يا فرعون ايه فرعنك

قال مالقيتش حد يلمني


ياريت نبطل نكره امريكا

و نبطل نكره اسرائيل

ياريت نتعلم منهم

ازاي الشعب بيختار حكومته

و ازاي الحكومه بتحترم شعبها

شـــــهــــروزة said...

بادىء ذى بدء

انت كمان الاعلان وصللك هنا؟
خخخخخخخخخخخخخخخخ



بصى يا بنتى
انا من كتر ما اتخنقت من ام سيرة الفقر وحقوق الآدميين والبشر فى مصر

قررت انشر بتاعة كدة زى التقسيمة
وصلتنى فى الاميل ماعرفش من مين يختى والنبى

بس لما لقيتها منشورة عند واحدة تانية ومن الاميل برضة
عرفت انها دعوة عامة

وحتبقا لمة باذن الله



فى الواحاااااات

بس معبرة تبعبيرا شديدا كدا كدا عن مشاعيرنا ومحاسيسنا

وحسنة قليلة تمنع بلاوى كتيرة
وهنيالك يا فاعل الخير

محمد said...

دى كلمة فقر واسعه علينا
دا احنا تحت مستوى الفقر بمراحل
والله انا مش مستغرب من الاعلان ده
فعلا فيه اسر كتير ملهاش عائل او ليها عائل لكن ميقدرش يكفى حاجات اسرته الاساسيه و خاصة لما يكون واحد من العيله مريض
يا رب عفوك عنا

zenzana said...
This comment has been removed by the author.
zenzana said...

حنين
ههههههه وبتكتب للتضامن مع فلسطين ايه العز اللي احنا فيه دا
مش فلسطين دي سيادتك كنت بتسميها مراهقة فكرية وسياسية؟

كفاية كدا عليك عشان انا مش بحب الفصاميين هتلاقيني بطيح زي البلدوزر

zenzana said...

محمود الدوح

الله يطمنك
طب اروح الحق الحانوتي

zenzana said...

مجهول
الشعب كله هيدخل الجنة
بس مش عشان هيكفل بعضه وبس
دا عشان شعب فقري وغاوي فقر

zenzana said...

عمرو

انت غاوي تحسرني اني معشتش في الزمن اللي فات؟
كمل باقي العيلة
وجوز خالتك احمد عز
وجوز عمتك المغربي
وجدك كمال الشاذلي

اه امريكا دولة مؤسسات
والشعب بيختار
وكمان اسرائيل
لكن مفيش ديمقراطية كاملة
اسرائيل صحيح دولة مؤسسات
وتجربة عرب 48ودخولهم الكنيست ممكن تثبت دا
لكن متقدرش تقول انها ديمقراطية 100%كفاية انها دولة اتبنت علي حساب شعب وارض وما بني علي باطل فهو باطل
وكفاية ان مواطنيها متقسمين درجات
ولحد دلوقتي لا يقبل تبرع بالدم من يهود الفلاشا
تحياتي

zenzana said...

شهروزة
متقلقيش يا روحي
كلنا ع السيدة قريب
بس الكارثة لو لقينا مصر كلها هناك
مش هلاقي حد يشحتنا

zenzana said...

محمد

احتا سبنا خط الفقر بمراحل
في يوم خليك شجاع
وهات جرايد الحكومة والمعارضة
والمستقلة والخاصة
وخليك اشجع واقرا صفحة شكاوي الناس
يالهوييييييي
هتعرف يعني ايه مصر
اصل انا تقريبا بقرا الجرايد كلها كل يوم ربنا ما يحكم عليك بقرايتها
فعلا هتعرف ان هي دي مصر يا محمد
بلاش عبلة

يا مراكبي said...

أعذريني ماليش نفس أفعص أي لينك من دول .. قلبي مفعوص خلقة من كتر الأخبار اللي زي كده عن بلدنا

وعجبي

zenzana said...

مراكبي
بعد الشر علي قلبك م الفعص
ان شالله الوحشيين والحكومة
واللي بالي بالك
نورتنا يا فندم
:)