Tuesday, August 21, 2007

يا حبيبى...يا روحي...يا بيبي


يا شعبي حبيبي يا روحي يا بيبي

يا حاطك في جيبي يا بن الحلال

يا شعبي يا شاطر يا جابر خواطر

يا ساكن مقابر وصابر وعال

يا واكل سمومك يا بايع هدومك

يا حامل همومك وشايل جبال

يا شعبي اللي نايم وسارح وهايم

وفي الفقر عايم وحاله ده حال

احبك محشش مفرفش مطنش

ودايخ مدروخ وآخر انسطال

احبك مكبر دماغك مخدر

ممشي امورك كده باتكال

واحب اللي ينصب واحب اللي يكدب

واحب اللي ينهب ويسرق تلال

واحب اللي شايف وعارف وخايف

وبالع لسانه وكاتم ماقال

واحب اللي قافل عيونه المغفل

واحب البهايم واحب البغال
واحب اللي راضي واحب اللي فاضي

واحب اللي عايز يربي العيال

واحب اللي يائس واحب اللي بائس

واحب اللي محبط وشايف محال

واحبك تسافر وتبعد تهاجر

وتبعت فلوسك دولار أو ريال

واحبك تطبل تهلل تهبل

عشان ماتش كوره وفيلم ومقال

واحبك تأيد تعضض تمجد

توافق تنافق وتلحس نعال

تحضر نشادر تجمع كوادر

تلمع تقمع تظبط مجال

لكن لو تفكر تخطط تقرر

تشغلي مخك وتفتح جدال

وتبدأ تشاكل وتعمل مشاكل

وتنكش مسائل وتسأل سؤال

وعايز تنور وعايز تطور

وتعمللي روحك مفرد رجال

ساعتها حجيبك لايمكن أسيبك

وراح تبقى عبره وتصبح مثال

حبهدل جنابك واذل اللي جابك

وحيكون عذابك ده فوق الاحتمال

وامرمط سعادتك واهزأ سيادتك

واخلي كرامتك في حالة هزال

وتلبس قضيه وتصبح رزيه

وباقي حياتك تعيش في انعزال

حتقبل ححبك حترفض حلبك

حتطلع حتنزل حجيبلك جمااااال
======================
ملحـــــــــوظة
قلنا نعيش مع الكلام مجهول الصاحب زى ما قالت شـــهـــروزة
واتنشر عند
وشـــهــــروزة أخدت تصريح من اللى نشرته
وحبينا نعيـــّش الشعب فيه
وخللى الشعب يعيش

8 comments:

بنوتة said...

اولا تحياتي
و كلام لايق اوي اوي على بعده
و كمان سعيدة ان انا اكون اول تعليق عند القمر ده
دي مدونة من عالم الخيال للمدونات
ده المكان الى مدونة دي جاية منه
تحياتي

Anonymous said...

وحشتينى يا بنتى ومش عارفة اتلم عليكى

الله يخرب بيته كونيكشن العالم التالت وسنينه

مش عارفة اقعد هان كام ساعة على بعض

خدشى دى مؤقتااا

اموووااااااة
لحد ما نتكلم

بنت القمر said...

قريت القصيده عند شهروزة وقلت امر للتحيه من شكرها فيكى

zenzana said...

بنوته
شكرا يا فندم
كلامك اخجلني
نورتينا وان شاء الله متكونش اخر زيارة
عجبني العالم البمبي عندك
الله ينور

zenzana said...

شهروزة

السلكة يا روحي

هتكعبل فيكي

حضري الفسيخ والجيلي
بس يع انا مش بحب الجيلي
خليها بسبوسة بالقشطة
:) نياهاا

zenzana said...

بنت القمر

انتي فين يا شيخة
عملت لنا قلابان بقالك يومين
متابعة يا اوختشي البوستات الاخيرة عندك ووعند شهروزة واسكندراني وكل الحركات وكمان الخناقة
هههههههههههه
تحياتي انتي تنوري

Daana said...

القصيدة حلوة جدا. ذكرتني بنوع من الشعر بنسميه في السودان حلمنتيشي. بتكون كلماته ساخرة و مضحكة لكن بتتكلم عن مشاكل حقيقية

zenzana said...

دانا
عندنا يا مرحب يا مرحب
نورتينا
الشعر الحلمنتيشي موجود هنا كمان
وبرده اسمه حلمنتيشي هههههههه
تحياتي
:)