Friday, May 11, 2007

تنفيض..... أو أحلام مؤجلة؟


منفضة ارد علي التعليقات اللي هنا..ويعني الرد لازمته ايه؟

منفضة أكتب حاجة جديدة هنا ...ويعني هي كتابتي هتغير ايه؟ ولا يكونش انا مصدقة ان لى حد بيقرا لى؟

تبقي مصيبة سودا انى اكون واخدة مقلب انى بلؤتية جامدة ولا حاجة ههههههههه


منفضة أدور علي شغل جديد لان مشروعي الحالى قرب ينتهي... يلا ويعني هو الشغل هيغير ايه ف الحياة؟

منفضة أسأل على كورسات اللغة اللي بحبها... عادي ويعني هو تكملة الكورسات هيعمل ايه؟

منفضة أكلم أصحاب كتير بحبهم ووحشني جدا رغم ان عمري ما قلت لهم دا...عادي ويعني ايه اللي هيتغير لو عرفوا؟

كدة كدة بحبهم وخلاص

منفضة أروح للدكتور ..عادي ويعني لو روحت ايه اللي هيحصل؟ أهو بيعقدني وخلاص

منفضة أدور علي مكان صيانة لطرفي الصناعي الخواجاتى ...دا بقي مفهوش ايه اللي ممكن يحصل؟

منفضة أنزل لعبد الله ابن اختي الحاجات الكتير اللي هو كتبها علي مدونته... يعني ايه اللي هيحصل لو منزلتش؟

منفضة أخلص مقال لعمو عبد القادر عشان عدد المجلة الجديد... ومنفضة كمان أرد علي ايميلات المجلة ... عادي ما انا بقالى بكتب لهم سنين ايه اللي اتغير يعني؟

منفضة أنزل وندوز جديد أ و أصلح الكمبيوتر اللي شاشته بقت حمرا وخضرا احيانا.

منفضة اركب الدي اس ال ومكتفية بالسلكة ..رغم شكوتي المستمرة

منفضة اروح أشتري هدوم صيف أو جزمة جديدة ...وقربت اصرف تمنها


منفضة ارتب الاوضة واكتفيت بترتيب اكوام الكتب والورق والبلاوي ع المكتب


كفاية كدة القايمة طولت قوييييييييييي انا مكنتش متخيلة كدة الله يسامحك يا دماغ ماك في البوست الاخير
انت اللى فكرتني بمسألة التنفيض دي .

41 comments:

أحمد عبد الفتاح said...

تكونيش كمان منفضة تعيشي ؟
ده حالة ياس موقته اسمها تنفيضيشن والسبب هو الزهق بس سهلة ممكن تروح بخروجه حلوه او بحاجه جديده تعمليها
ونصيحيتي ليكي خديها مني كلمه
هكونا مطاطا لان مفيش حاجه تستاهل

Anonymous said...

ذو النون المصري
التنفيض كتر قوي
كلنا بنمر بمرحلة التنفيض دي
و احيانا الواحد بينفض يقوم من السرير لانه مش عارف هيعمل ايه لو قام
حاجات كتير بنفض لها
لكنها مرحله و بتعدي
الموضوع ممتاز و الصوره جميله جدا

Anonymous said...

العزيزة راندا : ـ

وحشتنى كثيراً ، أنا رأيى من راى الزميل أحمد عبد الفتاح ، التنفيض أو الحالة اللى أنت بتمر بيها دى مش كويسة ، ومش عايزك تستسلمى بسهولة للملل ، أنتى مش فاكرة رباعية صلاح جاهين على الملل ، قاومى الملل

الشيطان يعظ said...

يارب
يبعدنا عن السجون
بس هو الشيطان بيتسجن
ياريت تزروني في جهنم بتاعتي

alshared said...

سيبك بقي من التنفيض ده وعيشي حياتك


لا تحاول أن تعيد حساب الأمس وما خسرت فيه ...
فالعمر حين تسقط أوراقه لن تعود مرة أخرى...
ولكن مع كل ربيع جديد سوف تنبت أوراق أخرى...
فأنظر إلى تلك الأوراق التي تغطي وجهه السماء ...
ودعك مما سقط على الأرض فقد صار جزء منها ...

تحياتي

Xee said...

مش عارف ليه حسيت من ردود الكل ان فيه تحامل ملموس على مبدأ التنفيض؟
على فكرة التنفيض ظاهرة صحية جدا في بعض الاحيان
انا رأيي تمتعي بتجربة التنفيض حتى النهاية
انا لما تجيلي الحالة دي بنفض بعنف لدرجة اني اخر مرة اضطريت اجيب أم وائل تنفض معايا، لما خلينا الصالون فلة
Enjoy

تحياتي
زي

واحـــد مـــــن الـنـــاس said...

والله بجد انا بحسدك

انا بجد ساسعات ببقا نفسي انفض لحاجات كتيرة جدا جدا جدا

ومببقاش قادر

وبستحمل ضغوط نفسية كبيرة جدا
عشان مش عارف انفض

نفسي انفض

والله واحد صتاحبي الاسبوع اللي فات قالي على وصفة اعملها هتخليني انفض لكل حاجة
بس للاسف معرفتش


يا بختك

Anonymous said...

مش عارفة لية شامة فى الكلام دة ريحة مش تمام
فكرتنى بالشوطة اياها

انا عن نفسي لما الضغوط بتزيد على عقلى
بأرمى كل حاجة
وأتناسى انى عليا ضغوط
وأأجلها كلها
لحد ما أسترجعنى تانى من نفسى

وقتها بيكون التركيز احسن وأجمد

بصى
تعالى زورينى ونقلبها مراجيح وفسيخ لحد مانقول يا ليل
أهو تغيير من الروتين
وروّق الطاسة يا عبعال

يختشى عليكى فى الآحمريكا
أموااااااة يا حبيبتشى

^ H@fSS@^ said...

bas iyaki tinafadili

Anonymous said...

سبحان الله
هو الاكتئاب التدويني رجع تاني
فيه علي فكره حالات كتير من التنفيض في المدونات هذه الايام
ناس بتقفل و ناس بتاجل الردود
انا شخصيا باجل الردود
و بعلق و ارد من غير باس وورد
تنفيض برضه
اخرجي من حالة التنفيض بعيد عن نية اغلاق المدونه او هجرها
تحياتي
ذو النون المصري

.:.-=- ELGaZaLy-=-.:. said...

سعات بقوم الصبح قلبى حزين ...

اطل برة الباب ياخدنى الحنين
الى اشتريتة انباع والى لقيتة ضاع
والى قابلتة راح,,وفات الانين

وارجع واقول ارجع واقول لسة الطيور بتفن والنحلات بتزن والطفل ضحكة يرن مع ان مش كل البشر فرحانين

رندا العزيزة الغضوبة دائما...

يا سيدتى من قال ان الحياة لا يلزمها بعض التنفيض احينا ...

احينا بس لكن صدقينى ...الموضوع مش بيبقى تنفيض على ما هوا قلة رغبة فى ان نعيش الحياة كما يجب

صدقينى انتى تستحقى الافضل

وعامة لو مرتاحة مع التنفيض

فى مثل حلو جدااا

ولا بلاش

المهم انك تعيشى حياتك لانها مرة واحدة وبس

كفاية اوى انا رغيت كتير جدااا

karakib said...

دي حالة عامة علي فكرة
كنت لسه باتكلم مع واحد صاحبي فالكلام ده و علي ما اعتقد انه يمكن يكون تغيير الجو
فوقي فوقي يا راندا مش انت اللي تقولي الكلام ده خالص

BeLiEvEr said...

راندا
تنفيض إيه يا بنتى، أمال حفتح مدونة مين كل شوية علشان أشوف إذا كانت كتبت حاجة ولا لأ؟

تعرفى أنا رأيي إيه؟
ممكن تكتبى تدوينة عن موقف حصلك مرة ضحكك، عن مواقف السفر دى اللى بتكون مسخرة، إسالينى انا

إديها بوست خفيف من غير إضرابات ولا إعتصامات، و على رأى شهروزة
إديها شوية مراجيح، مرة كده من نفسك بقى

على العموم، انا مستنى البوست اللى جاى، هبقى اعدى عليكى كل ممممممممممم، خمس دقايق كفاية؟
:)))

Gid-Do - جدو said...

حبيبتى راندا

ايوة حبيبتى ـ كدة خبط لزق ـ والمعترض يعترض على كيفة ـ انا اكتشفت بالفكاكة كدة ان ـ تنفيض ـ دية كلمة معناها ماجلة او مطنشة او مش عاوزة اعمل ـ وبحكم ان انا من الاجيال الغابرة ـ وفية كلمات جديدة معرفهاش نزلت فى قاموس هذا الجيل من الشباب ـ وطبعا دائما فية جديد مع كل جيل من الشباب ـ المهم ـ زى ما قال حبايبك من المعلقين دية مسالة زهق ومتستسلميش ليها وفكرتينى بنفسى انا بقالى مدة عاوز اسيب كل حاجة واهج على مصر ومرجعش هنا تانى والفكرة دية مسيطرة على دماغى ـ اية رايك تيجى تطفشى معايا ؟ بس نروح فين ؟ طنطا مثلا ـ اجمل تحية ياقمورة

Alaa said...

التنفيض عمره ما كان حال
بدليل ان التأثير بدأ
بدأت مضايقات يعني بدأ صوتك يوصل
بدأ ضغط اذن بدأ الصوت يؤثر
عشان نبقى اسمنا بنحاول
مش منفضين
و دمتم

مُرَاقِبْ مِصْرِي said...

هو ليه الناس كلها بتناشدك بالتخلي عن التنفيض؟
الناس ي ما قرتش العهد الدولي الخاص بالحقوق التنفيضية والمهلبية خالص؟؟؟

من حق كل مواطن بغض النظر عن الدين أو الجنس أو العرق أو اللون إنه يمارس حقه في التنفيض لأي فترة تحلو له بملء إرادته التنفيضية الحرة ولمدد يحددها هو طالت أو قصرت طالما لم يتأذ من جراء هذه الممارسة التنفيضية ضررا ما على السلم العام أو الأمن القومي والمصلحة العليا للبلاد

دعوا راندا لتنفيضها من فضلكم
التنفيض حق أصيل من حقوق البدنجان
ولو ما سبتوهاش تمارس حقها في التنفيض المباح أهددكم ببدء حملة للتضامن مع العزيزة راندا تحت شعار تنفيض تام حتى الموت... أنا هانفض مع راندا

وهانعمل بانرات ونعممها في كل البلؤات التي تدون من أجل حموم البدنجان ولتحيا البلؤات متسعا أخيرا وملجأ عتيدا للمنفضين

ويا التنفيض يا بلاش حل غيره ما ينفعناش

يقال إن جماعة محظورة ستلجأ إلى استعمال شعار التنفيض هو الحل بعد قمع النظام لها وحظره استعمال أي شعارات لا تنفيضية في المعركة الانتخابية

MaMaDo said...

A wise Chinese has this to say about the strategies of the warrior of light:
'Convince your enemy that he will gain very little by attacking you; this will diminish his enthusiasm.'
'Do not be ashamed to make a temporary withdrawal from the field if you see that your enemy is stronger than you; it is not winning or losing a single battle that matters, but how the war ends.'
'Even if you are very strong, never be ashamed to feign weakness; this will make your enemy act imprudently and attack too soon.'
'In war, the key to victory is the ability to surprise one's opponent.'


Manuals of Worriors of Light, by Paulo Coelho

جبهة التهييس الشعبية said...

ليه يا حبيبتي

مكتئبة ليه؟

ده انت فخر الصناعة المصرية

ياريت كل البنات زيك

وياريت نص الرجالة زيك

ما كانتش حال البلد بقى كده

بكرة تروق وتحلا

zenzana said...

اولا انا فعلا تنحت جامد قدام تعليقاتكم لاني متوقعتش خالص ان حد هيهتم بالتهييس اللي كتبته خالص

انا كتبت البوست تقريبا ف عشر دقايق ومن غير تفكير انزله ولا لاء

سامحوني اني فعلا مش بعرف ارد لكن انا سعيدة بأهتمامكم فعلا وخلتوني اخجل من تنفيضي لحاجات كتير واكتشفت اني شخص غير قابل للتنفيض اكتر من كدة
كمان حبيت انكم تعرفوا اني اول مرة ألجأ للتنفيض ف حياتي بجد مش مبالغة
ويمكن يكون دا سبب ان كان تنفيض بالجملة من حاجات كتير وتقريبا م الدنيا بحالها

zenzana said...

أحمد عبد الفتاح

للأسف معرفش ازاي تنفض تعيش؟ الا انك تنتحر ..ودا انا متأكدة انى فاشلة تماما فيه .

يأس مين يا بني؟ انت كبرتها خالص انا والبتاع دا سي يأس مش بنجتمع ف مكان

اقدر افهم من ده انك ناوي تفسحني ؟
يا تري فين؟ مكتب الارشاد؟ ولا ..بلاش دي احسن تزعل
او هتجيب لي حاجة حلوة؟
يا تري ايه؟
:)

zenzana said...

دو النون

اه انا عملت كدة يوم الجمعة تنفيض متحركتش من ع السرير مع ان كان في حاجات كتير ومازلت لازم تتعمل
ان شاء الله هيعدي

zenzana said...

اسلام
انت فين من زمان ؟ شكلك لقيت حد يتخانق معاك غيري
احنا هناك دايما يا ريت تيجي

zenzana said...

الشيطان يعظ

اكيد هنكون عندك حد قالك
اشكالنا دى رايحة جنة هههههه

zenzana said...

الشارد

الله ع الكلام
انا بطلت ابص ورايا من زمااااان

انا عايشة بس المهم تعيشها ازاي؟

zenzana said...

xxe

انا فعلا استمتعت بالتنفيض لكن ضهري اتكسر خصوصا ان ام وائل مرديتش تيجي الا بزيادة خمسة جنيه عن كل مرة
وعملت اضراب عن العمل حتي تلبية مطالبها وبما انى من المساندين لحقوق العمال لم أجرؤ علي فض اعتصامها بس برده بما ان مفلسه ومرتبي خلص من يومين مدفعتش وبنفض لوحدي

zenzana said...

واحد من الناس
هي الكحة كدة ف ايد راندا عجبة
يا سيدي اديني ودانك وانا عندي وصفات هايلة

zenzana said...

شهروزتي

بلاش قرون الاستشعار دي
هههههههه
ايوة حضري الفسيخ بس انتي و هقلب دسوق كلها مراجيح مولد النبي دانييال

zenzana said...

حفصوتشتي

وانا اقدر برده
كان يحضني تروماى تاني لو عملت كدة

zenzana said...

ذو النون

ارجع سيادتك انت الاول وهتلاقيني وراك
بهتف
لا للتنفيض

zenzana said...

غزالي
يا سيدي براحتك دي زنزانتك برده

اتكلم براحتك هو انت بتيجي كل يوم

علم يا فندم وجارى تنفيذ نصايحك الحلوة
تحياتي

zenzana said...

كراكيب

ماشي يا عم بقي دي اخرتها عاوزني افوق

طب خليني شوية

zenzana said...

بليفر
شكرا علي الاهداء جدا جدا
اخجلتني والله

بس احسن اصدق

حاولت اكتب بوست مسخرة لقيت انه يوم لذكري اهم النكبات ف تاريخنا
لقيت ايدي بدأت تكتب عن حزن النكبة اعمل ايه؟
ايامنا كلها نكبات
مينفعش انفض لها
طب ممكن نخليهم كل دقيقتين
هههههههههههه
:)

zenzana said...

جدو
مين يقدر يعترض يا فندم علي حبك ؟
محدش طبعا ..بس دا كتير أوي عليا

لا يا جدو خليك هناك تعالي اجازة بس لتجديد النشاط وتزورنا ..عارفة احساسك دا
اللي خلاني اتهبشت ف عقلي ورجعت مصر
بس انا مش ندمانة ع الهبشة دى
هههههه هبشة يعني ...مش عارفة اهي ف القاموس وانت هتكتشف معناها بالحدس
القوي لديك
تحياتي

zenzana said...

علاء
بقي كدة تطلع اخوان؟ وداخل برجلك الزنزانة؟
مش خايف من ابطال الابطال لو طلعت براءة؟ ههههههههه
نورتنا يا اخ

التنفيض مش حل لكنه مطلوب من وقت للتاني خصوصا للمعندهمش مرارة جامدة زيي

zenzana said...

مراقب

ميحرمنيش منك ابداو
جعلك الله زخرا لدفاعك عن حقوق البشر

بس اسمه حقوق بتنجان ؟ اخص مطمرش فيك تجنيدي لك ..كدة تقلبها تريقة ومراجيح ع المواثيق والعهود ؟

zenzana said...

مامدو

اهلا يا فندم

استمتعت جدا بقراية بوستاتك الاخيرة

صحيح مليش اعداء (أدعي ذلك احتمال في بس مستخبيين) لكن لا ميغركش صحيح انا وش كسوف علي طول بس انا قوية ومفترية وغاوية خناق مع البشر عمال علي بطال وفي الغالب نهاية اي حرب بتكون ف صالحي والا هعمل زي الساموراي
ههههههههه

zenzana said...

ست جبهة هنا؟
لا مش ممكن ازغردت يا ولاد
احتمال مكتئبة عشان لسه متقابلناش بس هانت البت شهروزة جاية قريب وهنطب عليكي اكيد
يا بنيتي دا انا حتة عصفورة لا روحت ولا جيت واكيد فييييييييي كتييير بنانيت وشوباب افضل بكتير مني

هتخليني اصدق بجد يا فخر الصناعة العربية والعالمية ضد الامبريالية والبؤرة وكل الحبشتكنات (علي الله جيم ميشتمنيش انحيازا للبؤرة والتوسعية والامبريالية )
نورتينا يا فندم

Anonymous said...

مع احترامي لك او لكي ورغم اني تفائلت عند تصفح المدونه لم اقبل قرائة شئ منها عندما وجدت الصورة الموضحه في هذه التدوينه
اخي او اختي الفاضله التدوين الاخواني او الالامي له اداب ومن باب التناصح اقول لك لا يصح
وجزاكم الله خيرا

zenzana said...

انا قلب

شكرا علي النصيحة
ولكن يعني انت تفحصت كل حاجة ف المدونة ملقتش الا الصورة بس هى اللي مش عاجباك ع العموم دى شهادة اعتز بيها، مع احترامي لرايك لكن
هل التدوين دلوقتى بقي مصنف تدوين اخواني وغيره؟
ثم مين قال لحضرتك انى مدونة اخوان؟
التدوين ليس له قيود كل شخص حر في التعبير عن نفسه بالطريقة اللي تعجبه واللي مش عاجبه مدونة ميدخلهاش

zenzana said...
This comment has been removed by the author.
Anonymous said...

أنا تقريبا فهمت مغزى كلام الأخ هو قلب

ابقى استرى الموديل اللى فى الصورة يا بت يا رندوووش قبل النشر

والا الموديل حيضطر يرضع رواد السيبر سبيس كله علشان الخلوة بنها وبينهم تبقا شرعية

نيااهااهاااااا

العوافشى