Wednesday, May 30, 2007

خدامة ...عمار يا مصر

توضيح
بعد كتابة البوست الحالي تناقشت مع صديق لم يرفض ان تعمل خادمات
مصريات بالسعودية، وفق شروط فقد رأي ان البروتوكول الموقع بين السعودية و وزارة القوي
العاملة هو خطوة في صالح العمالة المصرية لانها للمرة الاولي يتم التعاقد مع
العاملة قبل سفرها، وينص العقد علي العمل في اطار قانون العمل السعودي
وراي انه يعد انجازا
اتفق مع الصديق في انه ليس عيبا العمل في المنازل مقابل اجر
وان يتم من خلال التعاقد، لكن اذا لم يكن بالسعودية من الاساس قانون عمل؟
لان القائم هناك هو نظام الكفالة وهو ما يعد بديلا للعبودية
بالمناسبة نسيت اقول ف البوست ان العدد الذي تنوي الوزارة تصديره120
الف خادمة، مع شرط الا يزيد السن عن ثلاثين عاما

رغم ان أي فلوس في مقابل أي عمل شريف، هي وسيلة لحفظ كرامة الانسان ، الا ان اندهشت من قرار وزارة القوي العاملة بتصدير خادمات مصريات للسعودية، لكن بعد دقائق افتكرت حكمة صديق عزيز رددتها كتير وهي اننا فعلا بنعيش عصر الانحطاط في كل شئ، لكن فعلا اندهشت اكتر لما الموضوع عدي كدة، ولا كأنه حصل، عادي ce la vie ، مسمعتش أي حاجة من أي حد، ولا منظمات حقوق انسان، ولا حقوق مرأة، ولا حتي اهتمام من برامج تدعي تواجدها لرصد قضايا الشارع ، رغم اعتراضي وتحفظي علي كل وسائلنا الاعلامية،بما انها بتاعة الحكومة او علي الاقل ماشية في ديلها، كنت ناوية اعمل بوست مسخرة بتاع تهييس ، بما اني من امبابة، واللي بيشتغل كتير من ستاتها في الزمالك ومصر الجديدة كشغالات، لكن فعلا مقدرتش ، مش هقول زي اللى كتبوا ف الموضوع ان يا فضيحتنا بقي بعد تصدير الدكاترة والمهندسين نصدر شغالات، لا حتي دى انا مش معاها، بما انها واضح فيها النظرة الاستعلائية لخادمات المنازل، وداخلة في حيز المنظرة والجعجعة لمكانة مصر البطيخية في المنطقة، بما ان اصلا مفيش مكانة من بدري، لكن كل وجهة نظري هل فعلا ان المصريين وقعوا للدرجة دي، ان حتى بعد الخدمة جوا هيطلعوا للخدمة برا، مش كفاية اصلا اللي بيحصل لخادمات المنازل في الداخل لما هنصدرهم؟

مش هتكلم من ناحية انهم ستات غلابة هيتعمل فيهم اللي ميتعملش لما يروحوا ع السعودية، لانهم من زمان اصلا بيسافروا، واللي بيجري عليهم بيجري علي العمالة المصرية في الخارج ، لكن السؤال هل فعلا احتضان وزارة القوي العاملة للفكرة والقرار معناها ان دا هيكون خاضع لمعايير تضمن لهم كرامتهن الانسانية وكافة حقوقهن؟

خصوصا ان الاتفاق ولا فيه تأمين اجتماعي، ولا صحي، ولا أي حاجة خالص غير ان المرتب لكل شغالة 800 ريال، دا طبعا بما انها هتاكل من بواقي المطبخ، وتحوش القرشين، وتبعتهم لباقي الفقريين اللي ف مصر، واللي دولتهم مسؤولة عن وضعهم المخجل دا، وان 55% من المصريين وقعوا تحت خط الفقر، ويا عالم كام في الميه علي الخط نفسه، وكام علي حركرك الخط، وبما ان مفيش ولاول مرة في السعودية محرم مسافر مع الخدامة (رغم اعتراضي اصلا علي فكرة محرم) يعني الشغالة لازم تبقي علي كيف الزبون، والزبون دايما علي حق.

يعني احوال العمالة المصرية زفت، ومن ضمنهم الستات، وأحوال خادمات المنازل في مصر اصلا هباب، وكل يوم حادثة تعذيب لخدامة الفنانة فلانة، دا غير طبعا اللي مش بيتعرف من حوادث، طالما ان الشغالة رضيت بشروط الذل والعبودية ف منزل المخدومين، يا تري الكوكتيل دا بتاع أحوال برا زفت، واحول جوا هباب اكتر ممكن يقي ايه لما خدامتنا المصونات يروحوا يشتغلوا؟ رغم ان عارفة مفدما ان حالهم مش هيفرق كتير عن احوال اللي سبقوهم، هو بس الدولة حبت تتتجمل وتقنن الحكاية بما ان من الاساس في ستات مصريات بيسافروا للخدمة في دول الخليج عموما، تقننه بما انها هتقبض المعلوم، واظن ان طالما وزارة القوي العاملة في الموضوع، يبقي مش بعيد انها تنقل موظفات المصانع اللي شغالين اضرابات الي مشروع الخادمات المصريات في السعودية، ويمكن تتوسع والبلية تلعب ويبقي الخليج كله، طالما ان الستات الموظفات ومن اشهرهم عاملات المنصورة- أسبانيا عاملين صداع للوزارة لانهم مش ساكتين وبيطالبوا بحقوقهم .

عمار يا مصر

13 comments:

Xee said...

قضيت حوالي سنة في السعودية، شفت فيها العجب ، أبشع أنواع الشيزوفرانيا الاجتماعية ، مع إني كنت في جده و اللي المنطقة الشرقية و الرياض بتتهمها بالانحلال!!!
النظام السعودي في الاستقدام (استخدام عماله اجنبيه) اشبه ما يكون بالاستعباد
من أول حجز جواز السفر لدى الكفيل بالقانون لغاية منع سفر أي أجنبي إلا بإذن من كفيله وولي أمره
حضرت و سمعت قصص كتير عن معاناة العمالة هناك و خصوصا العمالة الاسيوية و العماله المصرية الرخيصة ، رخيصة في الكلفة و في التعامل لإن الجوع و الحرمان في بلادهم علمهم إزاي يطاطو و يستحمله المهانه لإن ببساطة مهندهمش بديل ، وده كله و احنا لسه بنتكلم على عمال مصريين ياكلو الزلط ، فما بالك بالبنت أو الست اللي لو لا قدر الله اتعرضت لأي نوع من أنواع المهانه أو التحرش مش هتقدر تفتح بقها لسبب بسيط جدا، لو الكفيل قال بس انها سرقت حاجة منه هتروح ورا الشمس
اللي انا مش فاهمه خالص... ليه السعودية بس هي اللي حصلها الاستثناء ده؟؟ مع ان قانون العمل لحفظ حقوق الوافدين في السعوديه يعتبر اسوأ قانون في دول الخليج!!! و إيه العائد على البلد من ورا القرار ده؟؟؟ اللهم إلا لو أسرة مصرية عايشه في السعودية أخذت معاها خادمتها من هنا

ده ما بقاش تعليق دي بقت خطبه
قمة البيئنه الصراحة


تحياتي
زي

Xee said...

ألا صحيح كده حسابنا بقى كام بخصوص الربع جنيه و أول تعليق و بتاع؟؟

:)

zenzana said...

زياد
بخصوص الربع المخروم

مش خالصين :)


اما بخصوص ليه السعودية؟
ممكن افتي يعني جات عليا انا؟
واقول ان بكل بساطة الحكومة هنا مش مكفيها للي بيحصل للعمالة المصرية علي يد نظام العبودية اللي هو الكفالة وكمان اللي بيحصل للخادمات ف مصر من تعذيب وعنف وقررت تعلمهم الادب وعقابهم علي انهم فقرا وتبعتهم السعودية لانهم مش عارفين يبقوا هبيشة وحرامية

كمان اهي تطلع لها بعكمة محترمة واهو كله بتمنوا طالما كل حاجة ف البلد بتتباع مجتش ع البني ادمين

.:.-=- ELGaZaLy-=-.:. said...

هيا جت على الخدات يا رانيا بقى

دى بلد بنت ستين ....


ce la vie

مصرى said...

و الله يا راندا مش عارف أقول إيه بس الموضوع محتاج قاموس شتايم قوي جدا
الموضوع من أوله نخاسة
كل اللي هايسافروا مافيش أي ضمانات
العمال المصريين الرجالة بيتعاملوا معاملة زبالة في السعودية مش عارف الخدامات إيه اللي هايحصل

sokoothansawat said...

زنزانة...أو رندا..اول مرة اجيلك..بس شدني الموضوع..خصوصا اني سمعته على اكثر من قناة إذاعية و من وزيرة الشؤون الإجتماعية نفسها...و حيث اني ممن اراد الله ان يبتليني بخمس سنين عجاف على ارض المملكة اطال الله عزها...فمن حقي ان ادلي بدلوي( على راي ابونا المعلم الكبير فتحي سرور) بعيدا عن الفرقعة الإعلامية...البروتوكول لا يتضمن فقط خادمات..و لكن يشمل مربيات..و ممرضات...و مدلكات...و مدلعات...يعني مش عايزين مبالغات...و تصوروا الأمر على غير حقيقته يا بتوع المعارضة للمعارضة...المشكلة الحقيقة..هو في نظام الكفيل الي يمنع اي عامل او موظف من ان يرحل عن البلد المستضيف في اي وقت يشاء...و يظل محتجز تحت رهن رب العمل بدون اي وجه حق..وهو امر لا يتم في اي من دول العالم..سواء المحترمة او الغير محترمة..مما يجعل الخليج بلا منازع صاحب السبق الأول في استعباد العمالة الأجنبية...المشكلة دي مش جديدة يا اخوانا...دي من يوم ما وعيت السعودية والخليج وربنا نفخ في صورتهم و بعتلهم اكلهم تحت رجليهم...يعني ااحنا جايين نصرخ النهاردة على ايه...ما احنا طول عمرنا كده...تونا ما فهمنا يعني...
تحياتي

zenzana said...

غزالي

خدامتك راندا يا فندم

zenzana said...

مصري

من غير شتايم انا بس طرحت سؤال عن الضمانات بس بخصوص اللي هيحصل عارفينه مقدما بما انه كان بيحصل قبل كدة

zenzana said...

سكوت هنصوت
نورتينا يا فندم ومتابعاكي ف تعليقاتك عند الزنازين اللي جنبي

انا مش مندهشة خالص من الخبر انا اللي اندهشت له ان الموضوع اتذاع وبس مفيش تعليقات من اماكن تدعي الدفاع عن المرأة او عن العمال خصوصا انها عاملة هباب من ضمن عمايل وزارة القوي العاملة الهبا ب


يمكن انا قصرت انى اوضح ف البوست اني مش ضد فكرة العمل في اى مكان ف الدنيا بس يكون فيه شروط وضمانات
وان الموضوع مش جديد خالص بالنسبة لي
بيحصل من زمان وهيحصل ان العمالة المصرية ومن ضمنها الستات هيواجهوا ظروف هباب بما ان الدولة لا تقدم اي نوع من انواع الحماية لهم

شبابيك عربية said...

الست الوزيرة فرحانة أن البنات اللى مسافرين لاول مرة هيكونوا تحت راية الوزارة وأن فيه بروتكولات ما بين الطرفين (مصر و السعودية) لحماية العاملات وانا الحقيقة عايزة أسألها هى مصر اقدرت تحمى دبلوماسيها لما تحمى خدماتها

مصري كريم العنصرين said...

حسب نظام الكفيل المعمول به في السعوديةفان مربية الاطفال او الممرضة المقيمة في المنزل او اي مسمى اخر فهي جارية
اما بالنسبة للضمانات فعندما تستطيع الحكومة ان تضمن حقوق اساتذة الجامعات والدكاترة والمهندسين وباقي الخبرات المصرية التي تبني السعودية,ساعتها نصدق ان الحكومة تستطيع الحفاظ على حقوق الجواري
الفكرة ببساطة ان هناك عجز في الخادمات الاسيويات في السعودية بسبب ان دولهم بدات في الحفاظ عليهم حتى وطل راتي الخادمة 3000 ريال,فاهتماما من الوزيرة باحوال الاسر السعودية محدودة الدخل وبالرغم من محدودية دخلها تريد خادمة ,قررت الوزيرة بيع الاعداد المطلبة وبسعر اقصاه 900 ريال ,لأ وكمان تكون جامعية وتجيد اللغة الانجليزية,وذلك حتى ارخص من السعر في مصر
وعلى حد تجربتي فان هذا المرتب لا يكفي شخص بطوله,وايضا عدم اشتراط وجود محرم
وسؤال اخير اين اكثر من ثمانين عضو في البرلمان من الاخوان المسلمين ,لم نسمع حسهم ,والمفروض انهم من المعارضة ,ام انهم لا يريدون ان يغضبوا العودية احد مصادر دخلهم.

zenzana said...

شبابيك

لا طبعا حوادث ضرب القفا للدبلوماسيين لسه متواصلة شفيها عند شهروزة


مصري كريم العنصرين

الاخوان مش بيتكلموا الا لما تكون الممثلة الفولانية معرية كتفها او اعتراضا علي بوسة فلان

يا اخي شوف مين كان بيدافع عن هيديلينا في البرطمان؟
الاخوان بعد ما الحزب الواطي نفسه تبراء من هاني سرور ودمه الفاسد

حكمتك يا رب

Anonymous said...
This comment has been removed by a blog administrator.