Saturday, May 26, 2007

من أجل المسيري

تنبيه

من كان لديه افكار محددة عن طريقة دعم ومساندة
أو مستعد للمشاركة اي كانت يفضل ارسالها عبر البريد الاليكتروني
الي الزنزانة
رجاء
للزملاء المدونيين الاهتمام بالموضوع
حتي ولو بالاشارة الي وضع الدكتور المسيري
علي مدوناتهم
دكتور عبد الوهاب المسيري

سافر امريكا عشان يتعالج من السرطان

سافر بكل اللي حيلته وقلقان ان مكتب ابحاثه يوقف

زمان كان عنده امل ان الدولة تعالجه علي نفقتها

ومن شوية صغيرين كان عنده امل ان الامير السعودي يعالجه

طبعا هو فقد الامل دا دلوقتي في الاتنين

الدولة ودا طبيعي بما انها بتتخلي عن كل مواطنيه وحرماهم

من كل حقوقهم بما فيها الحق في العلاج

اما الامير السعودي فاستحالة الوم عليه لانه مش دوره اللي المفروض يقوم

به كبديل عن الدولة خصوصا انها حصلت كتير
ان الدولة تغسل ايدها من حقوق ومتطلبات مصريين
ويقوم بالدور امير ما سعودي ولا كويتي مش فارقة

المهم هل في امكانية اننا احنا المصريين مش الامير السعودي

وان كنت ضد حصر المشاركة في فئة واستثناء اي حد تاني

هل في حد عنده استعداد انه يدعم ويساند دكتور المسيري؟

انا عن نفسي معرفش ازاى ؟

لكن اكيد عشرة يفكروا افضل من واحد
هل ممكن ان تبقي في حملة لمساندة دكتور المسيري
خصوصا ان هو دلوقتي سافر بكل اللي حيلته
وفي انتظار الفرج لكن هيبقي في موقف حرج جدا لو الاطباء امروه بتجديد العلاج
لان كل اللي حيلته وسافر به يكفي لجولة علاج واحدة
اربعة وعشرين حقنة تكلفة الحقنة الواحدة عشرة الالاف جنيه

تفاصيل اكتر عن الموضوع هنا و هنا

11 comments:

bluestone said...

أنا أصلا لما قريت الخبر امبارح دمي اتحرق ..
بغض النظر عن شخصيته وعن كونه ناشط ولا معارض ولا مفكر ولا اي حاجة ...
بني آدم .. مريض
المفروض الدولة تكون مسؤولة عنه
ايه المسخرة دي .؟؟؟؟!؟!؟!؟!

يعني بني آدم عادي جدا عايش في بلد أصيب بمرض وليس في استطاعته علاجه .. يعمل ايه ؟؟ يتحرق ولا يشحت؟؟
ولا يروح يموت احسن .. خصوصا انه كمان معارض ومش بينافق الحكومة ولا بيمسح جوخ ولا بيتنطط في وسائل الاعلام يسبح بحمد أولياء نعمته في عصر لم يقصف فيه قلم ......

وقصفت فيه رقاب اصحاب الاقلام ؟؟؟؟؟

غضبت جدا وانا اقرأ كلام المسيري نفسه انه في انتظار الامير السعودي .. لما زكيبة الفلوس تتمطع وتقرر تحل الكيس وتشحت المصري الغلبان .. المفكر العالم

اللي بلده اتخلت عنه ورخصت تمنه للدرجة دي .. يا عم مسيري الموت أكرم ..

انا رأيي نعمل حملة مقرونة بمقالاته وبرقم حساب في اي بنك .. يكون مسؤول عنه حد من أسرته مثلا إذا أمكن الوصول إليهم ..

Anonymous said...

طيب ما تفكري ممكن نساعده إزاي
ونشوف هل نبدأ التنفيذ ولا لأ
حطي طرق كويسه بحيث نساعد الدكتور دون أن يتعرض لأي ألم نفسي أو أدني إحراج

zenzana said...

بلوستون

الوصول لاسرة المسيري سهل انا بحاول اتصل بأفراد من اصدقاء المسيري واللي يهمهم امره
اتمني افلح


العميد ميت
كلامي واضح انا بدعو الناس انها تفكر معايا يمكن يكون في حد عنده افكار افضل مني

BeLiEvEr said...

أنا مع "بلوستون"ممكن نعمل حملة تبرعات على حساب بنك لأى واحد من أسرته

بس أنا الأهم بالنسبة ليا، إن الراجل ده تكون معنوياته مرتفعة، لأن ده سلاحة الأقوى فى مرضة
لازم نحسسه إن إحنا وراه، و إن أى واحد قرالة حرف بيدينله بالكتير

ممكن ننظملة ممكن حفلة تكريم، و فى نفس الوقت، تكون جزء من حملة التبرعات

Anonymous said...

زنزانة
اخبردة نشر ـ فهل هذا صحيح ؟

انفراج في أزمة علاج الدكتور عبد
الوهاب المسيري .. رجل أعمال مصري يتحمل كامل نفقات العلاج وعشرات المواطنين يرسلون عروضا بالتبرع عن طريق "المصريون"


المصريون ـ خاص : بتاريخ 25 - 5 - 2007
أخيرا حدثت الانفراجة المنتظرة في قضية علاج الدكتور عبد الوهاب المسيري على نفقة الشعب المصري ، بعد أن تقاعست الحكومة ومؤسسات الدولة عن رعايته وإنقاذ حياته ، ورفضت أن تنفق عليه جنيها واحدا ، رغم أنه علم من أعلام الفكر والمعرفة في مصر والعالم العربي ، فقد تعهد أحد رجال الأعمال المصريين المحبين للثقافة في اتصال شخصي بالدكتور عبد الوهاب المسيري بتحمل كامل نفقات رحلة علاجه إلى الولايات المتحدة ، في الوقت نفسه أخبر الدكتور المسيري "المصريون" بأن مكتب الأمير عبد العزيز بن فهد ، الذي سبق وأن تحمل كامل نفقات علاجه في المرة الأولى ، قد اتصل به مبديا استعداده لمواصلة تحمل نفقات العلاج ، وكان عشرات المواطنين المصريين من المقيمين داخل مصر وفي الخليج العربي وأمريكا وأوربا قد اتصلوا بالمصريون على مدار أمس وأول أمس مبدين استعدادهم للتبرع ، عن طيب نفس ، لتحمل نفقات علاج الدكتور المسيري ، وتم نقل معظم هذه الرسائل والاتصالات إلى الدكتور المسيري بناء على طلبه ، من أجل أن يتوجه إليهم بالشكر بشكل خاص لكل منهم ، حيث أبدى المفكر الكبير امتنانه لجموع المواطنين الذين حاطوه بحبهم ودعائهم وعونهم .
جدير بالذكر أن الزميل جمال سلطان كان قد نشر مقالا في زاويته يوم الخميس بعنوان "المواطن مصري" عرض فيها لمحنة الدكتور المسيري والموقف الرسمي في مصر المتجاهل لمحنة مرضه الشديد ، وموقف الحكومات المصرية المتعاقبة التي رفضت أن تتحمل نفقات علاج المفكر الكبير رغم أنها تتحمل علاج الراقصات والممثلين وشخصيات أقل قامة بكثير من المسيري ، بينما تدخلت شخصيات خليجية رسمية لتحمل نفقات علاجه ، ودعا سلطان إلى أن يقوم "المجتمع" بدوره في إنقاذ المسيري بعد أن خذلته "السلطة" .

ذو النون المصري said...

يارب يا هادي
ياريت تكون اتحلت فعلا
انا دمي هيتحرق خلاص من الاحداث المؤسفه دي

loumi said...

اللى يسيب اكتر من الف
ياكلهم السمك
وقدهم يتحرق فى القطر
وقد ربعهم يتحرق فى بنى سويف
وغيرهم وغيرهم
ما يهموش الانسان سواء
كان غفير والا دكتور
ناشط او معارض او حتى مالوش
فى الطور ولا فى الطحين
الانسان عندنا مالوش قيمه
مع انهم من غيره
مش حيلاقوا اللى يحكموه
عندى اقتراح
فى الايميل عندك
تحياتى

صاحب البوابــة said...

لا اعلم بماذا ارد

اتمنى تفعيل حملة لدعمه

وسأكون في خدمتكم

ادعو الله العظيم رب العرش العظيم ان يشفيه لنا سريعاً

تحياتي

Anonymous said...

الله يفرج عليه
ويشفيه من مرضه
معقولة
هكذا يصل الحال بعلماءنا ومفكرينا
حاجة تحزن
:(

zenzana said...

بليفر

بالاتصال بأحد المقربين الدكتور المسيري معنوياته مرتفعة جدا

مجهول

الخبر عار تمام من الصحة لم يوجد اي رجل اعمال مصري عرض ان يدعم او يساهم ف تكلفة الدكتور المسيري


ذو النون
بلاش دمك هيتحرق علي ايه؟ ولا ايه؟


لومي
بشكرك علي اهتمامك جدا

واسفة ع التأخير

صاحب البوابة
اشكرك علي استعدادك

ماشي صح

ايوة فعلا معقول بما
اننا عايشين ف الزمن المقلوب
تحياتي مدونتك عظيمة

zenzana said...

للجميع

اشكر اهتمامكم علي ايميلاتكم واقتراحاتكم انا مش مطنشة ولا حاجة
انا بس بعرض الاقتراحات اول بأول علي اصدقاء اخرين وهتكون في تدوينة عن الاقتراحات والاراء اللي وصلتني

شكري مرة تانية للجميع