Wednesday, January 10, 2007

عريسنا عليك يا رب..وحسنة قليلة


أمبارح احمد زكي وصلنى عبد المنعم رياض، واحنا زى كل يوم بنتخانق هو يقوللى اركبي تاكسي وانا اقوله لا والف لا مش ناقصة غتاتة،لان لى قصص ومجلدات مع التاكسيات
المهم نزلت من الميكروباس، عشان اشترى كارت اشحن موبيل، ما علينا، شاورت لتوك توك
بعد دقيقتين، بدأ الحوار
?هو :حضرتك انسة ولا مدام
انا: بتسأل ليه (وانت ايه حشر اهلك)؟
هو: انا عارف انه سؤال بايخ، بس هقول لحضرتك السبب بعدين.
انا: ايو انسة (ارتحت؟) في حاجة ، انت جايب لى عريس ولا ايه؟
هو: اهو حضرتك فهمتيها وهى طايرة.
قلت له شكرا يا سيدى
هو: اخويا وهو متعلم ومحترم، وبيصلي
انا : انت بدور له على عروسة من خلال التوك توك ولا ايه؟
هو : لا لا اصلي هو زي حالاتك كدة رجله واجعاه، وحضرتك لا مؤاخذة ممكن تبقى عروسة كويسة.
انا (يا لهوييي) ليه هو حضرتك تعرفنى منين انى كويسة؟ ولا هو لاننا اصحاب عاهات يبقي المكتوب والذي لابد منه اننا نتجوز بعض؟
وصلت.. فطيط من التوك توك ..وقلت له انا اسفة اللى سبق اكل النبأ.. اصل فى معوق بن الجيران تاني متكلم عليا
(افيه كان لابد منه
انا مزعلتش من العرض، و مش مستغرباه، لان بصراحة اتعودت عليه، وعشان كدة احيانا بحاول اتجنب التاكسي، طبعا بعضكم هيقول انى ببالغ، الفرق ان الاول مكنش عندي بلوج، ومكنش غير زكى اللى بحكي له المواقف دى، اما احتفالا بأن دا اول عرض حسنة يجيلي بعد البلوج حبيت اديها شوية نكد بعد ما كانت بمبي بمبي..، يعنى هو مش كفاية ان المعوق فى مصر بياخد على دماغه من الحكومة،لا كمان الجهامير اكتر، خلى الحكومة على جنب لانها عاوزة بوست لوحدها، على رواقة، تعالوا بقي للجهامير، انا فاكرة اول مرة بعد ما بقيت محسوبة على المعوقين، بالتحديد اول رمضان سنة 2003، كنت كل مرة اركب تاكسي لازم اتخانق، يا سواق التاكسي يقدم عرض جواز، يا أما مش عاوز ياخد اجرة، خصوصا اذا كان ملتحى ، وواحد قاللي مرة ، لا انا مش عاوز فلوس، انا هاخد حسنتى من ربنا، (يا لهوىىىىىىىىىىى) كنت عاوزة اوضح له انى بشتغل، وصاحبة مرتب محترم ، وكمان عندى حساب ف البنك(مش الاطة والله)، وحتى اهلى انا مستقلة عنهم ماديا من سن 18سنة، الاول كان بيتحرق دم أهلى، لحد ما روحت على اوروبا والدول المتكدمة(دى بقي الاطة)، هناك على مستوى المجتمع والناس، كله طبيعي، ومعقول، الناس حتى مش بتبحلق لك كدة وتجيبك من فوق لتحت، زى ما المصريين بيعملوا، أول ما يشوفوا ف ايدك عصايا، ولا عكاز، ليه لان فى احترام للخصوصية، و ان المعاقين فعلا مندمجين وسط المجتمع، مفيش معاملة خاصة، الا فى حاجات محدودة زى نظام التأمين الصحي (طبعا عندنا مش عاوزة اابح)، المواصلات العامة مثلا، التعليم شوية من الناحية المالية، كمان الناس مبتتطوعش من نفسها وتعرض خدماتها عشان حسنة من الله، الناس متعاونة جدا اذا انت طلبت دا، اخدا بمبدأ بلاش اكحلها عشان معميهاش، عكس المصريين، احيانا بيعرضوا خدماتهم، بطريقة تخنق و تغيظ، (عارفة ان قصدهم خير) مثلا انا ماشية فى امان الله بنزل درجات سلم المترو الاقي بنوتة تيجي تقوللى محتاجة مساعدة، اشبك حواجبي والله ، يعنى ايه؟ تقوللى مساعدة للنزول، اقولها لا شكرا تصر، ماشي يا ستى حكمى عقلك، انا نازلة على مهلى، ايدي اليمين فيها العصايا بتاعتى الصغيرة، والناحية الشمال، فى الترابزين ، انتى هتساعديني ازاى؟ هتشيليني يعنى؟هى مش فاهمة انها ممكن تتسبب فى ان حركتى تتلخبط، وممكن يحصل لى حاجة انى اقع من على السلالم، ف الاخر تقوللى انا بس حبيت اكسب ثواب، يا لهوىىىىى، دلوقت لما رجعت اعيش ف القاهرة، بطلت اضايق او اتنرفز خلاص، انا اتعودت على الهدوء والروقان، طبعا ناس كتير هتقول انا عندى عقدة خواجة، مش مهم، المسخرة بقي، ان اول ما وصلت بنت خالتى الفلحوسة الاكبر منى جابت لى عريس، جبران خاطر لامي ، قررت انى اقابله، وقلت هطلع فيه القطط الفاطسة بعدين، المهم، مبدأي واضح من الاول، لا زواج ( ال يعنى مقطع بعضه)بدون حب، صعبة دى؟ اتفرجت على العريس، معنديش تعليق غير انى قلت، اشمعنى انا عريس معوق؟ بنت خالتى قالت: امال انتى عايزة تتجوزى مين؟ بس مش هعلق.
اكتر نكتة تبكي كانت تعليق من صديق حديث لي، سألنى مرة، هل فعلا كنتى مرتبطة بفلان؟ قلت اه، قاللى دا قبل ما تبقي كدة؟ قلت لا بعد، ليه في حاجة؟شبك حواجبه وبحلق عينيه،و قاللى انا بس مستغرب، ان واحدة في وضعك ممكن ترتبط بحد مش زيها، (طب اولع فيه) انا عديت تعليقه ونفضت لانه خلاص انا اتعودت على تناحة بعض هذا الشعب، او يمكن هو صح، وان المعوقين دول لازم زيتهم يبقي فى دقيقهم، وان كل اللى ارتبط بيهم بعد ما اتحسبت علي المعوقين ناس فاهمة غلط، لانهم من ثقافة تانية مختلفة، محتاج يتولع فيها بجاز. مش عارفة ليه كل مرة اناقش الموضوع دا مع نفسي، الاقي فدامي صورة زميل قديم ف الكلية، ولد حلو و زى العسل ودمه خفيف، وكان نفسه يدرس هندسة، لكن كل غلطته انه كان أصم، وبالتالي مسموح له بالدراسة ف الكليات النظرية بس.
لكن متكتئبوش احنا ف مصر يا عبلة،لان بعد دا كله ولا يهمنى ...انا فراشة، ولا نحلة زى ما عمو عبد القادر بيقول..هههههههه

22 comments:

yasser_auf said...

انتي طول عمرك غاوية مشاكل ماسمعتيش كلام احمد لية و ركبتي تاكسي ...هو انتي طول عمرك كدة غاوية مناكفة و مناهدة مع الناس ... و هي حصلت عريس عن طريق التوك توك ...عموما و بعد الهزار و الذي منة ...اولا : انت حطيتي ايدك علي كل النقاط ... عدم احترام الخصوصية ....تيجي تكحلها ,تعميها ...عموما لن نتطرق لموضوع الحكومة و موقفها مع التامين الصخي عموما و للمعاقين خاصة ... المواصلات و ....الي اخرة دة بقي نكتب فية سوا و نشعر بقي و ربنا يستر و ما اشرفش معاكي في الزنزانة.
..اما عن كل ما حد يشوفك عاوز يساعد بالطريقة الي يقدرة عليها ربنا علشان ياخد ثواب ... فالعملية موش بتبقي كدة بالمعني ذاتة لا هو او هي كطبيعة الشعب المصري طيب حنين دمعتة قريبة بيتخيل الشخص الي امامة كانة من اسرتة و بيبقي عاوز يساعدة بس مع الاسف اسلوبة او كلامة او تعبيرة في الرد بيبقي بدل التكحيل /بيبقي عمي و عمي ابن ستين في سبعين يعني بدل ما يقولك الاجرة بتاعت التاكسي اية دة انتي ذي اختي يقولك ثوابي عند ربنا مشكلتنا اكشعب ما بيعرفش يعبر ان اي حاجة يقولك ربنا ..كنوع من الهروب ..من انة يقولك يا شيخة انا كنت رايح كدة كدة المعادي دة انتي زي اختي علشان ما يواجهش الي امامة بشعورة يقلبها بقي قال الله و قال الرسول ...عموما احنا عندنا نقص في الوعي للتعامل مع كل شيء ابتداء بكبار السن الي المرضي و المعاقين الي السياح الي حتي المرضي النفسين بيتهيالي اننا محتاجين ثقافة ووعي لكل شيء في الدنيا حتي التعامل مع بعضينا البعض ...رجاء ارسال تعليق الاخير عندي مرة اخري الخاص ب تاريخية حيث انة وصل عبري موش عربي فرجاء ارسالة مرة اخري
اما عن الهدية اياها فحجبها و اجي يوم العيد القومي /22 و بلاها البن بس نضربها سوا بقي
الا ما قولتليش هو انتي انسة و لا مدام هههههههههههههههههههههههههههه...طب انتي مرتبطة و لا مصاحبة

حفصوتشا ام مصطفيتش said...

زنزانتي يا زنزانتي
مش عارفة اقلك ايه
اصل النوضوع ليه كذا ناحية مش بس عشان الاعاقة لكن فعلا زي ما ياسر باشا سبقني و قال

حقلك مثلا على قصص حصلت لصحبتك اللي هي انا
ابص الاقيهم جايبينلي عريس
لكن تخيلي هو اللي يرفضني و ليه؟؟ عشان البنت اللي اهلها يبقوا مطلقين بتطلع هبلة و عندها عقد و هو مش عاوز واحدة بفيونكات
و لان طبعا البنت اللي من عيلة مطلقة هي كمان حتتطلق و تطلع عين جوزها
و الكلام ده لعلمك بيتقالي من ناس قرايبي
شفتي المصيبة السودا
يعني هما ماشفوش ازاي انا اتربيت لكن خلاص حطوا في عقلهم عليا فكرة اني ما دام من اولاد المطلقين يبقى منفعش
و فيه ناس يستغربوا لما يلاقوني مكتملة العقل و المخ زي ما انتي طبعا عارفة و بعد كده يكتشفوا اني من اولاد المطلقين
و لو انا رفضت عريس تخيلي بيكون ايه
التعليق عليا
"
واحدة غيرك تحمد ربنا انها لقيت اللي يستر عليها و يقبلها زي ما هي
"
او
"
متتنكيش اوي و تعملي فيها قرفانة ما صدقنا نلاقي اللي يقبل بيكي
"
و ممكن يجيلي عريس هو كمان اهله مطلقين فاقول خلاص مش حيقدر يتكلم لان الهم طايلني و طايله ابص الاقيه متاسف جدا بس مكنتش اعرف ان اهلك مطلقين
فاقله من باب انه عادي يعني
مش مشكلة ما احنا زي بعض
يقوم يقلي لا اصلي عاوز واحدة متعودة على الاستقرار عشان تريحني و انبسط معاها


شفتي النصايب يا اوخا

مجتمعتنا حتفضل كده و لا عزاء
لمزز ما بعد الحداثة زي و زيك
فعلا عريسنا عليك يا رب

Princess said...

معلش ولا يهمك.. هم اللي معوقين ذهنياً

ذو النون المصري said...

انا كتبت في البوست السابق اي من النوع الشديد الاكتئابيه ممكن اي شيء بسيط يغمني ايام
انا فعلا شايف ان الشعب المصري غلس احيانا و لا تمييز عنده بين ما يجب قوله و ما لا يجب و هذا لا ينطبق فقط علي حالات الاعاقه او الطلاق او غيرها من الحالات الاستثنائيه او الخاصه
تخيلي ان انا ايضا كشاب بلغ السابعه و العشرين اتعرض لعمليات ضغط من زملاء العمل كي اتزوج و كل يومين (اذا اختفيت عن انظار البعض من الزملاء)القيهم فاتحين موضوعي مع بعض ،اول ما ادخل غرفة المدرسين يبدا الحصار اول شيء يقفلوا الغرفه و احيانا يخرجوا المدرسات و يبداو يكلموني عن واحده واحده في المدرسه و في بلدهم و هلم جرا و سحبا و سحلاو ما شئتي من كلام
انا شخصيا باكون متغاظ ،لاني اكره ان اي شخص يتدخل في ما يخصني لكن يقبل اذا طلبت بنفسي او ممكن يعرضوا كجس نبض لكن اذا وجدوا رفض خلاص ينتهوا
تخيلي لو كنت غير قادر ماديا مثلا هل كان ده هيكون رايهم و كلامهم و ضغطهم نفسه؟طبعا لا
باختصار احنا فعلا في حاجه الي تعليم الانسان المصري كيف يحترم خصوصيات الناس و متي و كيف يتدخل فيها ؟
لكي تحياتي

tota said...

راندا

طبعا الكلام كله مش هيوصف احساسك ناحية اللى بيحصل ولا هيقدر كلامنا يعمل حاجة

لكن اللى انت اتبعتيه هو انسب الاساليب والا يا بنتى ممكن تكتئبى

وبعدين انت يا بنتى اللى حضنتى الترام بكامل ارادتك يعنى مش زعلانة من النتيجة بس هو كان خلاص مش لاقيه حاجة غيره


اما بخصوص عريس التوك توك او ما شابه متزعليش والله الشعب غلبان وطيب جدا صحيح التصرف غير لاقىء بس تلقائى

وضمينى لفرقة عريسنا عليك يا رب علشان كل واحد عنده همه

ليه بعد سن معين لازم نكون مضطرين نتنازل بلاها اى تنازل واحنا اهو بكرامتنا ولينا مدونات اهو نتحامى فيها


اهلا بالفريق وبكره تشوفى حجم الاعضاء المشتركين فيه

تحياتى

(zenzana) said...
This comment has been removed by the author.
(zenzana) said...

ياسر انا مستنية الهدية، ولكن انا عيدي القومى فعلا يوم 27مايو احتفالا بذكرى النجاة من التروماى...واللى بدعها احمد زكى عثمان
متقلقش انا بس متكلمين عليا، لكن لو مصر، انا ليا شروط ..ههههههههه

حفصوتشا ام مصطفيتش said...

راندا
ليلتك هباب
ازاي مترديش عليا انا و ذو النون؟؟
انا حاخد لعبي و امشي من هنا
يلا يا ذو النون بينا من الزنزانة دي
ده احنا حتى اول اتنين شجعناكي عليها

صحيح زمن غدار

دنيا غرورة يا زيداحمد

الجحيم هو الحقيقه said...

زنزانه

انا ايه اللى جابنى هنا؟
هو انا ناقص ع العموم هى زنز انه دمها خفيف
بصر احه المكان عا جبنى دى احسن زنز انه دخلتها انتم فتحتم امته!ّ!هه
ما علينا ربنا
يسهل واعرف اوصل تا نى للمكان
تحياتى
وتوته هنا كما ن وحفصه
هلا وغلا

انتم بقيتم سوابق خلا ص
محدش احسن من حد

ذو النون المصري said...

يللا يا حفصه انا ماشي

شهروزة said...

شوفى يا راندا
انا مباحبش كلام المواساة لأنه بدل ما بيهدى الجرح بيوجعه أكتر
لكن حأقولكانى فاهمة كويس أوى اللى انت بتتكلمى عنه
لأنى ببساطة واجهته كتير ومازلت أواجهه لحد اللحظة دى

المفترض انى بنت كويسة ووظيفة كويسة وتعليم عالى كويس وتربية والحمد لله كويسة وأهلى أطيب ناس ممكن تتخيليهم
لكن تقوليلى انا من غير جواز لحد دلوقتى لية
أقولك
كل ما بتقدملى عريس يفتكر نفسه ابن ناس غير الناس
يرفضنى ولسبب معين
مهنة والدى
يقول لاء
دى والدها بيشتغل سواق
حيبقا راجل لبط
ومستوى اجتماعى مأطمحش ليه
مع ان والدى دة لوشفتيه؟؟
يا لهوى عالابداع اللى ربنا خلقه فيه

تخيلى لما يتناسى كل اللى قلته عننا دة
ويبص بس لمهنة والدها
ماهى والدتى موظفة كويسة جدا ووافقت به وهو كدة علشان بعيد عنك واخدين بعض عن قصة حب بقا والكلام الحلو دة
والوالد خواجاتى شوية يعنى كان يملا ستين عين فى وقت واحد

لكن برضة مفيش فايدة
ابوها سواق
ومعندهاش أملاك
عادى والله بالنسبة لى
لكن اللى بيجرحنى أكتر من أى حاجة
انه تناسى المخلوقة اللى جاى يشوفها دى
لدرجة انى دلوقتى بقيت اعمل ضربة استباقية لأى واحد يتقدم لى
أعمل كشف عيله عنه الأول
وقبل ما يعرف عنى اى حاجة او اشوف خلقته او يشوف خلقتى يكون مرفوض بالتلاتة
أمى تنجن لية كدة
أقولها أسبق أنا
واللى اتلسع من الشوربة

مستحيل أفكر ارتبط بانسان شايف انه أعلا منى اجتماعيا او ماديا
يا أما زيى
أو أقل منى
علشان نبقا متفقين
بس علميا يعنى المفترض نبقا متكافئين

يا بنتى دى عمتى اللى هى أخت الوالد بما انها مش بتطيق اللى جابونى
جابتلى عريس والله لو واحدة عانس عندها خمسين سنة ماترضى بيه
اتشالت واتهبدت انها تعمدت تهيننى بحاجة زى دى
قالتلى نفس التعليق اللى قريبتك قالته
أومال انتى عاوزة تاخدى مين يا بنت أخويا؟؟
سفير انجلترا؟؟
انكتمت فى نفسى وفشيت غللى فى اخوها
اللى هو ابويا
من يومها
بطلت حتى تسلم عليا بقت تشوفنى تستخبى فى اقرب ركن


شفتى نظرة الشرقيين لأى حاجة مش على مزاجهم اية؟؟
مش المعوقين بس
لسة موصلناش لحرية النفس والروح يا عزيزتى
لسة لم تنبت لنا عقول ولا أرواح
مجرد أعجاز نخل خاوية

روحى يا شيخة الله يسامحك
الواحد كل ما يطنش الحكاية الرزلة بنت الأبيحة دى
يلاقى حد تانى بيفكره بيها
أدعى عليكى بايـــــــة؟؟

(zenzana) said...

انا حاسة ان معظمكم اشتغل مطيباتى لهذا الشعب، ما عدا شهروزة حبيبتى نياهااااهاها
انا مقصدتش احكى لكم مأسي ولا نيلة، لان بصراحة انا مش مستعدة أدفن نفسي في البكاء على اللى مش عارف ايه، لان بعد الشهر الاول فى حياتى الجديدة انا حسمتها مع نفسي بعد ما عيط واكتئبت وفكرت كمان ف الانتحار، بما ان بقي فى سبب انا بعتبره منطقي، يا توتا يا حبيبتى، عكس الحالة الاولي ، اللى انتى اعتبرتيها انى حضنت التروماى (في حد يحضن تروماى حتى لو عايز ينتحر؟).

لكن انا قصدت من وجهة نظرى او خبرتي الشخصية حاجتين الاولي ان الناس لها نظرة متدنية لمسألة الكفاءة،مع من هم مختلفون سواء في المستوى المادى والاجتماعي، او حتى مجرد المستوى الوظيفي زى ما شهروزة وضحت، وان الكفأة بالنسبة للبعض، لم تعد المستوى العقلي والفكرى، او حتى الانسانى،
وان الكمالاو كمال الشخصية، ولو ان مفيش كمال، الا للخالق، بيركز اكتر على الجسد، والشكل الخارجي
الحاجة التانية، ان الناس معندهاش فكرة تقديم المساعدة او التطوع لخدمة الاخرين، الا اذا كان هياخد عليه مقابل وهو الحسنة
او مدفوع بالشفقة.

(zenzana) said...

شهروزتى ، الحال من بعضه، يعنى الاول كان نفس موال عمتك من العيلة المجانيين (عيلتى)، وبعد الاعاقة، بقي قمع مضاعف
الاول كان يتقال ليه انتى عاوزة تتجوزى مين؟
بارم ديله؟
دلوقتى بقي انتى تبوسك ايدك وش وقفا اذا اصلا حد بص لك، اللى لولا الثواب والحسنة، مكنش عبر اهلك
فقولك ادينا قاعدين على قلوبهم، وان لا للتنازلات

lastknight said...

موزة التدوين المصرى فى عصر مابعد الحداثه .. منك لله .. متخيله أن موضع زى ده هايعدى على شخصيه سوداويه زى حالاتى من غير ما يعملها نظريه و تطبيق و دراسه و استنتاجات و بلا أزرق على دماغك ؟ شوفى .. أنتى و ياسر عوف فى آخر مواضيعكم وضعتوا مشاهدات عميقه لعيوب حقيقيه ف الشعب المصرى .. الرد عليها هايكون على الأقل بمقالين من النوع السوبر سوداوى .. انتظرى تعليقى قريب على مدونتى فى صوره نيله دراسه تصد نفس الأراجوز
و الله المستعان
على فكره ..كفايه ابتسامتك و النور اللى بيشع فى وجودك .. انتى تستاهلى سيد العرسان .. اوعى تتنازلى .. لا أقل من كوكو الضعيف فتى أحلامك

lastknight said...

معلش بقى ياموزة مابعد الحداثه هاعمل مدونتك مراجيح انا كمان .. عاوز اعلق على شهروزه .. بصى يا شهروزه .. الراجل اللى ربا بنت زيك فى وعيك و ثقافتك و أخلاقك يستاهل تتباس أيده مش يتبصله من فوق .. لازم تكونى فخوره بأبوكى مش بس عشان مهنته شريفه لكن كمان عشان عرف يكون اب بجد و يربى بنت زيك .. و لما تسأ عن حد متقدملك .. أعرفى كويس أن ولاد الناس بجد بيبصوا بس على الأخلاق و التربيه و الشرف .. مش على الأملاك و الأموال
....
عموما متهيألى بتترفضى عشان التربنه اللى عندك من تأثير وقوعك من السطوح على دماغك و انتى صغيره ..بس معلش دى تتعالج .. هاهاهاهه
شهروزه و راندا ... أنتوا جوهرتين و اللى يفهم مايفوتش واحده منكم .. الحمد لله أنى مش بافهم

yasser_auf said...

الي شهرزودة : اظن ان العريس الي بتتكلمي عن نوعيتة دة بيبقي معاق ذهنيا لا اكتر و لا اقل ... و اي كانت وظيفة اي حد فينا بدل شريفة و ما فيهاش سوحت و اكل من الحرام يبقي احنا كدة و الناس تاقلم نفسيها علينا و الي موش عاجبة عندة البحر يشرب منة صدق من قال : نفوس خنازيري

اما عن الامكانيات و الي بينظر لكدة فدي بتندرج تحت جوازات الهف و اجري و فلوسها تداري علي عيوبها و كدة يعني فدة من اساسة موش بني ادم دة بيبقي ولامؤاخذة كدة تيس ... بكل معني الكلمة داخل يتجوز بمجهودة ياكل و يشرب و ينام علي حساب الست الي بتصرف هو وظيفتة الوحيدة انها لما تكون عوزاة تنادية ....
عموما انا لم اقابلك و بالتالي لا اعرفك و لاكن اثق في حكم فارس عليكي حيث ان ثقتي فية عميا ( بغض النظر عن اننا نقيدين مختلفين في كل شيء ) ولاكن بحكم عشرة 20سنة اعرف انة ما بيمدحش في حد الا ازا كان يستحق فاذا كان الوالد في هذا الزمن زمن شارع الهرم و و المحترمة الي اتباست و اتحضنت بس نجح في ان يصل ببنتة الي بر الامان و ان انضج مخها ( كما انا احكم عليك مما اقرائة من تعليقاتك و كتاباتك و ردودك فاقدر احكم علي مخك )و سلمها زمام امورها لحرية التصرف بعد ذلك يعني بالعربي عرف يربي و يطلع بيها لبر الامان في زمن الت...ص فلة الف تحية و لنرفع لة القبعة

اسف اذا كنت ادخلت و رديت عليك عند زنازينو بس بجد الماسوف علية عرف يستفزني باعاقتة الذهنية

قوليلة دة محمد علي ابوة كان دخاخني و الانسان بنفسة و يقدر يوصل لفين طول ما مافيش حاجة لا تعيبة و لا تعيب اهلة مثل قضية رشوة زنا سرقة ( قضايا مخلة بالشرف عموما ) موش بابا بيشتغل اية
جتك ستين نيلة فيك و في امك عايش في عصر بابا بيشتغل اية طيب ما تقولينا انت الاول عملت لنفسك اية ؟؟؟؟؟

(zenzana) said...

عزيزي ياسر
معلقتش على كلامك لان بتفق معاك وحسيت انك تكفلت بالرد على معظم الناس

خليني احكي لك الحدوتة دى، مع ان احمد زكى امبارح نصحنى بلاش الحكي عن بره، لان الناس اللى يعرفونا انا واحمد اقتنعوا اننا عندنا عقدة خواجة، ممكن وانا مش بنكر دا، القصة ان كان لى صديق، بيدرس ف اكاديمية للفنون، وبعدين بقي مدرس، فى اكاديمية بادوفا للفنون، اللى تصنف انها اقدم جامعة للفنون فى اوروبا، اتعزمت ف بيتهم، واتعرفت على والده، وكان فى صور له اثناء العمل متعلقة على الحيطة، الصور كان هو موجود فيها و على وشه ابتسامه من الودن دى لدى، واقف مع زملاء جنب عربية نقل قمامة، والصورة متعلقة ف الصالون. بس

tamer afify said...

أول مرة أدخل زنزانة
بس مكونتش أعرف ان الزنازن بالجمال ده
مدونة رائعة
تحياتي

(zenzana) said...

ذو النون ارجع المدونة احسن لك، مش عاوزة اقولك هعمل ايه؟
هسرب خبر للمدرسين زمايلك انك هربان من مراتك،مع حفصة، ورامي اورطيت عيال هههههههههه
اسمع الكلام

شهروزة said...

lastknight
يبدو أن فارس حيسيب البلوة الكبيرة ويعمللنا مطيباتى يا زنزانة
نيااهاااهااااا

====
يا عموو عادى جدا
بس الظرف هو اللى حكم يعنى نفضفض شوية
لأنى بأكرة طول عمرى النظرة الدونية للناس
وزى ما قريت بوست معبر جدا جدا عن الحالة دى عند عزيزنا يا مراكبى

الحقير هو من يرى أن هناك من أحقر منه

محسوبتك مش مكلكعة ولا يحزنون
بس يعنى
ساخطة على الأوضاع والناس اللى بتدعى التحضر والعلم والتدين
وهى فى أفعالها أبعد ما يكون
وزى ما قلت لزنزانة قبل كدة
أن مواساة الجرح أصعب من ألم الجرح نفسه
أنا كل الأمور أدام عينى سواسية
ليس لها مقياس محدد الا العقل فقط
غير كدة يبقا ميلزمنيش

واحمد ربك انك لسة بعقلك

شهروزة said...

yasser_auf
ولا يهمك أنا كمان استوليت على الزنزانة أهو وبأرد بدل صاحبتها
نياااهاااهاااا

بعد اذنك يا راندا يا اؤختشى يعنى

------
الموضوع مش من واحد او اتنين أو تلاتة يا عزيزى
يعنى ممكن تحسب نص دستة أو دستة تقريبا بالفكرة دى
يعنى لسعة لسعة مش مجرد شكة دبوس

لأنى لم أبنى الضربة الاستباقية بناءا على واحد عبيط وخلاص
أنا اكتشفت ان الغالبية العظمى عبيطة وكدة يعنى

يبقا خلينا فى حالنا أحسن

انت متعرفش الوالد عندى مقداره اية؟
كفاية انه ربانا أنا وأخويا على حاجات مش لقياها دلوقتى
والدى يا ياسر كان كل ما يدخل على نينا اللى هى والدته أول حاجة يعملها هى انه يوطى ويبوس ايديهاو راسها..يعنى كأطفال مش متعودين على مشهد زى دة من الوالد اللى شامخ أددامنا على طول ومش بينحنى أدام حد
أنا وأخويا نقف مستغربين شوية
لكن الاستغراب راح لما شدنا وخلانا نعمل زيه
دلوقتى
منقدرش نشوف أى حد منهم
الا لما نبوس الأيادى
دى أبسط حاجة يعنى
ناهيك عن ان أول انسان شكل لى عقلى وتفكيرى هو الوالد
واللى أصر اننا لازم نكمل تعليمنا العالى للنهاية
انتوا مش اقل من أى حد
واللى تطلبوه
وكانت أدوات المدارس دى مالية البيت بزيادة جدااااا
علشان مش نحتاج حاجة ونسيب الكتاب وننزل نشترى

وهو اللى أصر اننا نمتلك جهاز كمبيوتر
يعنى على كلامه
ميبقاش العالم كله فى الفضاء وانتى وأخوكى لسة عالأرض
وأهو بيخلينا نعلمه عليه هو كمان علشان مش بيشبع من انه يعرف أى حاجة
مش بيخنقنى منه
الا انه من مدمنى مشاهدة المصارعة الحرة
نياااهااااهااااا

دى أبسط ملامح الوالد الغالى ربنا يعطيه الصحة وطوله العمر يا رب هو والوالدة أحسن تزعل هى كمان

الله يكرمك على الاطراء دة ولو انى مش استحقه يعنى

انما بالمناسبة
أنت مستحمل فارس 20سنة ازاى؟؟
نيااهاااهاااااااا

(zenzana) said...

لا يا شهروزتى انتى معاكي جرين كارد ف الزنزانة تعملي ما بدالك، عاوزين نشوف سيادتك
بدخل عندك لكن ما بعلقش، والبوست الاخير جامد جدا