Wednesday, January 24, 2007

ولد وبنت...الأيدين متشبكة


من زمان مشفتش ايدين متشبكة
والنهاردة شفت ولد وبنت
من البرد
او الحب ف عز الشتا
الكتف جنب الكتف
و
الايدين متشبكة
و العيون مطمنة
ففتكرت و أفتكرت
حبيت .. لكن حب من غير حنان
وصاحبت .. لكن صحبه مالهاش
أمان رحت لحكيم واكتر ، لقيت
بلوتى إن اللى جوه القلب مش
ع اللسان
عجبى !!

6 comments:

Rikka said...

صباح الخير يا جميلة
هو محدش بيصحى بدري غيري و لا ايه :):):)ايه الكسل ده يا بشر ، حسيت دلوقتي اني جاية ابيع لبن على الصبح .. ما علينا
كل اللي هقوله سيبك من كل احداث يوم ميلادك الغريبة .. ده ذنب الناس مش نحس منك لا قدر الله و لا حاجة ( في ضحكة خبيثة هنا ) و يا رب العمر كله ليكي و تكون عينيكي مطمنة دايما يا رب . و فعلا صلاح جاهين جاب من الآخر كفى و وفى بصراحة لما قال :

لقيت بلوتي ان اللي في القلب مش ع اللسان ...

و يرجع يرد و يقول ..

يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك
عجبي !!!

zenzana said...

الله عليك يا ريكا يا حبيبتي

انتي اللى فهماني، انا بالنسبة لليوم دا باخده بمبدأ اضحك ع الدنيا ومتشمتهاش فيك، وحول قهرها لصلابة فيك(ههههه ايه تخاريف الصبح دى)معرفش مين قال كدة؟

yasser_auf said...

حلو بس ربنا يستر من طلعتك علي العيال .. طلعتي عليهم طلعة تودي في داهية يعني نقيتي عليهم نقة جامدة ربنا يستر و محدش من اهلهم يقفشهم او يقعوا ضحية عين مدورة و مقورة

تحياتي

Aoossa said...

أختشى
أيدين مين متشبكه
الدنيا برد
وعم حنفى بيسقى الورد
أتفضلى هدية عيد ميلادك
موقع للراحل أمل دنقل وقصايده

http://www.jehat.com/ar/amal/

الموقع اللى جاى ده فيه
كل شعراء العاميه
ومنهم الفاجومى أحمد فؤاد
وصلاح جاهين
http://arabicpoems.com/test/apoeters.html
كل سنه وأنت طيبه
أوعى تركبى تاكسى
أنا بكره التاكسيات

esraa said...

لقيت
بلوتى إن اللى جوه القلب مش
ع اللسان عجبى
فعلا الانسان لازم يتكلم رغم ان ده شئ مش بيقدر كل الناس انهم يعملوه.
علي العموم ربنا يهني الولد والبنت وانت ان شاء الله قبل الشتا ده مايخلص هيكون موجود اللي يشبك ايديه في ايديكي(:

zenzana said...

شكرا يا سي ياسر مكنش العشم تشمت فيا العدا (طبعا انت عارفهم)، انا عيني مدورة يا برجوازي يا اصيل؟

اوساوستى شكرا على اللنكات انا بس بحب اغتت علي جرجس

اسراء يا عزيزتي
شكرا على امانيكي الحلوة بس احتمال رأيي ف الموضوع يصدمك
ان العلاقات العاتفية بقت تسد النفس، وبالتالي انا رافعة شعار مع صاحبي الانتيم(مش عاوزنى اسيح له)وهو ان عام 2007 عام بدون تشبيك ايدين
لكن ممكن يبقي تشبيك بين منظمات المجتمع المدني
او تشبيك بين اي حتتين غسيل ف البلكونة