Friday, February 16, 2007

يونس شلبى : عندما ساعدنا لكى نقتل الخوف فى قلوبنا


بداية البوست دا ببساطة هو للناس غير التقليدية فى
حياتنا،و اللى هما جزء مهم من ذكريات الطفولة و الشباب
و يمكن الشيخوخة. علشان كده البوست دا هيتكلم عن شخص
غير تقليدى فى حياة ناس كتيرة. أنا أعرف الحكمة الأبدية التى بتقول
إن الصديق الحقيقى هو الصديق وقت الشدة.
أو A friend in need is a friend indeed
بس فى نوع تانى من الأصدقاء بيزرعوا الضحكة
و الإبتسامة جوا قلوبنا حتى من غير ما نعرفهم. أيوة أنا من
الجيل المحظوظ اللك كان بيجهز نفسو علشان يشوف
بوجى وطمطم ، كنا بنضحك و بنفرح من كل
قلبنا لما نشوف شخصيات "بوجى وطمطم" و نحاول
نسمىأصحابنا بإسم كل واحد فينا دا عم شكشك ، و دا
زيكا، و الأروبة دى زيزى ، و طلعت
صاحبة المدونة دى باسم طماطم ، وطلع صاحب
صاحبة المدونة بإسم زيكو، بس كان
مفيش حد كان إسمو بوجى و لا فى واحدة كان إسمها
طمطم، ممكن علشان الإسمين كانوا أكبر
مننا، أو يمكن سبنا مكان ليونس شلبى اللى هو
بوجى و لهالة فاخر اللى هى طمطم.الله
يرحم المخرج "محمود رحمي"

لما كبرنا شوية كنا إتفرجنا على مدرسة المشاغبين ، و ناس كتير حبت تكون إبن
الناظر ، الولد الشقى اللى مش فاهم حاجة فى الدنيا .


و فى العيال كبرت
كام واحد مننا ضحك من كل قلبه على سذاجة
و براءة "عاطف" فى مقابل عصبية أبوه " رمضان السكري". كام
واحد برضو إبتسم إبتسامة فرح لما
سمع "جاموسة راحت تقابل جاموسة،، آه ،، جاموسة راحت تقابل جاموسة
يا عينى مالقتهاش جاموسة يا ليلى لقتها بقرة يا عينى يا ليل،،يا عينى علـ الجمايس لما تتقابل يا عينى ،،
بس
مع كده الناس إنهارت فعلا من مشهد فى فيلم شفيقة و متولى ، اللى كان بطولة الراحلة العظيمة
سعاد حسنى، لما راح يونس شلبى "الساذج" لكى يعدم بدلا من "أحمد مظهر" بحجة تجارة العبيد.

يونس شلبى ماكنش "نجم شباك"، كان دايما صاحب الأدوار التالتة و الرابعة
أو حتى الخامسة إذا كان فيه، بس كان ليه فعلا حضور. هو اللى كان بيأكد على أهمية
الإبتسامة و الضحك فى أى فيلم عملوا. حصل دا فى أفلام كتيرة ،أظن إن أجملهم فى
فيلم "امرأة واحدة لاتكفى"، لما عمل دور الشخص المرعوب من أى حاجة مرتبطة
بالأمن و المخبرين. آخر فيلم ظهر فيه "يونس شلبى" كان أمير الظلام، و كان
هو حكم اللقاء بين فريقين من العميان، كانت لقطة صغيرة. بس
كانت لقطة حلوة، يمكن فكرتنا بإبتسامات زمان.
فى فيلم "إسم الوردة" (عن رواية لإمبرتو إيكو)، كان هناك حوار
فلسفى بديع حول الضحك ، و أذكر
بشدة سؤال الراهب ويليام عن "ما هو الشئ المزعج فى الضحك؟"، و كان رد
الراهب "بيرجوس" أن "الضحك يقتل الخوف".
شكرا ليونس شلبى
الذى منح البعض منا الإبتسامة، بل الذى ساعد فى أن نتغلب على خوفنا. أقول
شكرا ليونس شلبى فى هذه اللحظة و التى
أعلم أن المرض أنهكه تماما، ربما بسبب تفانيه فى أن يرسم البسمة على وجوهنا جميعا،،، و
ألف ألف سلامة عليك يا بوجى....
ملحوظة:البوست دا وصل الزنزانة من صديق عزيز جدا، يعني مش انا اللى كاتباه وبالتالي هعلق زيكوا

22 comments:

Anonymous said...

بجد انا لما قرأت البوست دا عجبنى اوي اوي عشان انا أفتكرت ايام الطفولة اللى كانت من أجمل الأيام فى حياتى ياااااا أد إية مسلسل بوجى وطمطم كان يعتبر محور اليوم بتاعى
وكان عندى فى أصدقائى بوجى وطمطم وأنا كنت طماطم
كانت ايام جميلة اوى وبجد كان فى براءة فى برامج الأطفال عموما... مثلا (ماسنجر) كان ديما الخير هو اللى بينتصر فى الأخر .... غير دلوقتى تماما انا من وجهة نظري إن برامج الأطفال دلوقتى تتناسب مع برامج الشباب المهم عشان ما خرجش من الموضوع ....
انا أنا فعلا بشكر يونس شلبى على النموذج الجميل اللى يعتبر كان قدوة فى فترة كبيرة للأطفال وأتمنى له الشفاء العاجل.
رشا سيف الدين

zenzana said...

بما أني مش انا اللى كتبت البوست من حقي أعلق

انا لسه فاكرة الغنوة أو تتر المسلسل "بوجي وطمطم في رمضان" وفاكرة الفيل فلافيلو ف رمضان قبل الفطار دايما كنت بلعب ف الحارة مع العيال ومكنش صوت المدفع يهمني لكن أو ل ما اسمع تتر المسلسل طيران ع البيت وقفز للسلالم لحد ما أوصل قدام تليفزيونا الابيض والاسود مقطوعة النفس
كل رمضان اقول يمكن يغلطوا ويعيدوا المسلسل لكن مفيش غير أن احيانا يوم الجمعة بتذاع حلقة ولا حاجة
النهاردة كنت مبسوطة جدا ان مريم وعبد الله كانو جنبي وانا بنشر البوست وفرحانيين بصورة بوجي وطمطم

Anonymous said...

لا أنكر إني كنت وما زلت من كبار المعجبين ببوجي وطمطم وبمسرحيتي "مدرسة المشاغبين" و"العيال كبرت" وبشخصيات يونس شلبي فى كل من هذه الأعمال.ولكن إجمالا لا يمكنني القول أني من المعجبين بيونس شلبي (أو أى من ممثلي الكوميديا فى مصر. وعلى الرغم من ذلك فقد تأثرت بشدة بالبوست، فمن ناحية أولى يذكرني البوست بجانب جميل من ذكريات الطفولة من الجيد أن يظل فى خلفيتي دائما، ومن ناحية ثانية يرد البوست شئ ولو قليل من الجميل لصاحبه حيث اعتقد أن يونس شلبي لو قدر له قراءة هذه السطور ستدمع عيناه فرحا. ومن ناحية ثالثة وهذا هو الأهم بالنسبة لي، شكل هذا البوست علامة فارقة بالنسبة لي فى كيفية النظر إلى الأمور.. كل الأمور ، أقصد بذلك كيفية البعد عن التنميط فى النظر للأشياءو التجرد من التابوهات بما فى ذلك تلك التى وضعناها نحن لأنفسنا وذلك بغض النظر عن القيود والتنميطات المفروضة علينا بحكم المجتمع والبيئة المحيطة.. بشكلما يمكنني القول (أو أتمنى ذلك)أني سأحاول دائما أن أتعامل مع الأمور بشكل مختلف يتجاوز ما رسمته لنفسي من محددات وضعتها فى وقت كنت أنا فيه مختلفةعني الآن، وإن كنت أتمنى أن يظل هناك دائما ملمحا مشتركا بين أنا القديمة وأنا الجديدة!
لذلك كله.. شكرا جزيلا جداجدا لكاتب البوست..
وجزيل الشكر ليونس شلبي وألف سلامة عليك.
Nazanizo

المهــــاجر المصـــــــرى said...

باقول ايه يا زنزانه هانم
فاكره كان فى برنامج زمان بيجى
اسمه روبى او حاجه زى كده..مش روبى العريانه
ده كان كرتون..اسمه روبى
فكراه ده؟ ولا انتى من الجيل الحديث

Anonymous said...

دي حاجة جميلة و الله ان كاتب البوست فاكر شخصية لطيفة زي يونس شلبي اللي ماخدش حقه الاعلامي. فكرتني بايام الطفولة من خلال بوجي و طمطم مسلسل الاطفال الرمضاني بس انت ناسي الفيل (فلافيلو) والاغنية الشهيرة اللي اتغنت ليه فلفل فلافل فلافيلو على العموم انا احكيلك الصراحة كان وقتها مفيش في التليفزيون غير قناتين الاولى و الثانية اللي كانت يدوب تيجي واضحة و دا يمكن سبب كبير كان مخليني مرتبط بشكل كبير ببوجي وطمطم لما دخلت الاعدادية فجاة تفاجات ان يونس شلبى هو صاحب صوت بوجي و هالة فاخر هي طمطم بعد ما شفت حلقة من برنامج صباح الخير يا مصر و كان يونس شلبى بيتكلم عن الارهاق الكبير لانجاز الحلقة الواحدة. من يومها كان الاعجاب الحقيقي و مقلكش طبعا عن مدرسة المشاغبين و لا حتى دوره في فيلم احنا بتوع الاتوبيس ارجو من ربنا يشفيه و يطولنا في عمره.
حسام يونس-غزة
hussamyounis@maktoob.com

Anonymous said...

سي مهاجر انا طبعا كنت من المعجبين بروبي اللى مش عريان ، وفكراه فعلا بتفاصيله، وحواديته، كمان، وعلي فكرة كنت بتنافس علي اسم روبي مع بن خالتي لحد دلوقتي تلاقيه قد الشحط وقرب يتجوز والناس تناديه روبي بدل مصطفي تخيل
بلاش كلمة الجيل الحديث دي انا مش من مواليد الشمعدان او القناة السادسة، انا بلا فخر من مواليد بم بم فاكره؟
بقولك فين الشيكولاتة ولا هو كلام ف الهوا؟

زنزانة من خارج الزنزانة
مكسلة ادخل باليوزرنيم لاني عيانةةةةةةةةةةة جدااااا
سلام

karakib said...

فلافيلو اللي كان مستخبي و محدش بيشوفه
تصدقي فكرتيني بأول فيل أعجبت بيه
انا فاكر الكلام ده طشاش لأني كنت صغير أوي أوي وقتها كنت في اولي أو تانيه ابتدائي و كان بوجي و طمطم و طنت شفيقه اللي البوست نساها
حد ينسي طنت شفيقه اللي كانت مخنفه و كانت مجرد ظهورها عالشاشه بيضحكني أوي
ياااه مشاعر الطفوله أيام ما كان الضحك ضحك بيخلي الواحد يقشعر لما يفتكره كأنه في يوم حر أوي قاعد في حمام سباحه الميه فيه لذيذه و بتغطيه و هو مستمتع بشكل حلو أووووي
بوجي و طمطم عندي عروستين ليهم كان كنتاكي منزلهم هديه مع وجبه كنت باقعد احوش تمنها علشان اروح اجيبها و اديها لأي حد ياكلها و أخد الهديه
طول عمري ما بحبش الأكل ... و كنت معلقهم فوق السرير عندي .. مكانهم دلوقتي في غياهب النسيان داخل سحاره في سرير قديم منسي ... ممكن تقولي عليهم جزء من الروبابيكيا اللي محدش يقدر تمنها الا تاجر البيكيا اللي زيي لما يدخل مخزنه القديم و يقعد يقلب يقلب يقلب
بس طنت شفيقه لازم اسمها يضاف الي البوست لو سمحتي أستأذني صاحب البوست و قولي له في واحد زعلان أنه طنت شفيقه سيرتها ما جاتش فالبوست ده الخنفه دي اوعي تكوني نسيتيها علشان دي من الشخصيات المحوريه في بجي و طمطم
مدرسة المشاغبين أكيد ما حضرتهاش أول ما نزلت بس هي مسرحيه صالحه للعرض في اي زمان و أنتزاع البسمه من أي حد و كلها مشاهد تفطس من الضحك زي بتاع كل ما تتضايق أقلع ... و الخرطوم الطويل بتاع الشيشه
و بعد 14 سنه خدمه في ثانوي
و الاباصيري :) و سهير البابلي و أحمد زكي و سعيد صالح و طبعا يونس شلبي
زمن و فات ... بس مش كل اللي فات مات

ذو النون المصري said...

ياااه انتي لسه فاكراه
انا افتكرته من كام يوم لما كان في مسلسل خليجي و شفته لكن زعلت جدا لان دوره في الشويه اللي شفتهم له كان مش قده
كان مهمش
لكن انا لسع فاكر كل حاجه في بوجي و طمطم حتي اغنية فلفل يا صاحبي لما غناها للفيل لما ضاع

شهروزة said...

راندوووش
وهو أنا كان يجيلى نفس أفطر ولا استقر بعد الفطار فى رمضان الا لما أشوف بوجى وطمطم؟؟
يااااااااه
رجعتينى لذكريات حلوة أوى ومرة

كانت الحاجات دى هى الحسنة الوحيدة فى التليفزيون المصرى المهطول على روحه

أنا فاكرة القط روبى يا رأفت على فكرة
كانت صفاء قطب بتعلق على المسلسل دة بصوتها هى
وفاكرة كمان برنامج اجمل منه مبقاش ييجى نهائى كنت باتابعه وانا مكملتش خمس سنين
كان مخصص لكارتون لحكايات هانزكريستيان أندرسون
من كل شكل ولون

والمذيعة هى اللى كانت بترجم
كنت شغوفة لدرجة كبيرة بالبرنامج دة

يلاااا بقا
ليت الطفولة تعود يوما

وشكرا لمن أسعدنا واحنا أطفال
وأضحكنا ونحن كبار

.:.-=- ELGaZaLy-=-.:. said...

بوجى صديقى ..والاخ شكشك ربنا يفك حبسة بقى...

بجد جميل اوى البوست دة..ويونس شلبى فنان جميل اوى بس مخدش حقة لانة حصر نفسة فى ادوار معينة...بس بجد بوجى كان شخص مميز فى حياتنا كلنا

zenzana said...

اعذروني يا جماعة مش هرد علي كل التعليقات لان مش انا اللى كتبت البوست

مستر كراكيب انت فين؟ انا يا سيدي استحالة انسي طنط شفيقة لان جارتي كانت شبهها وخنفة ونفس حركاتها وكنت بما اني الشعنونة بتاعة الحارة كنت محرمة الست تطلع ف البلكونة (شقاوة معلش استحملوني)كمان مدرسة المشاغبين عندي وبتخانق انا وعبدالله (7سنين)علي الفرجة عليها
لكن انا لسه بدور علي العيال كبرت

ذو النون الغنوة دي بحبهافلفي يا صاحبي انت فين؟ هئ هئ هئ حتي وانا اد الشحطة هتلاقيني بغنيها خصوصا لمريم وعبد الله (دا غير اني بطبعي عيلة وام المعيلة)
شهروزة مش ممكن انتي كنتي بتتفرجي ع الحاجات دي كمان زيي؟ لا لاء انا حاسة اننا اخوات وزي افلام فاتن الحمامة الحياة والباشا بتاع الافلام فرقوا بينا ههههههههه لازم نسأل ابوكي وابويا فالموضوع دا يا انا تبع دسوق يا انتي تبع هنا؟
هههههههههه (بهزر احسن عمو يكون بيقرا المدونة)

غزالي طب هو محبوس ليه؟ انت ضايقته فانفعل عليك واتحبس لانه ضربك؟ بما ان اسمك غزالي يبقي اكيد كنت زيكا :)

karakib said...

تحت النظر يا فندم متابع بس الامتحانات بتخليني ما ابقاش عالاف اسيب تعليقات لمحاولتي قراءة أكبر عدد من التدوينات

أحمد عبد الفتاح said...

التدوينه ده بخصوص قمة وسط البلد الاخيرة الرجاء زيارتها والتعليق وياريت تبعتيلي ميلك عشان نسيت اخده
http://a-ablog.maktoobblog.com/?post=216615

أحمد عبد الفتاح said...

بالمناسبة يا شباب رانده مش هي الي كتبت التدوينه وممكن اقولكم علي كتبها بس تدفعوا كام ؟

daftarwatan said...

أيوه أنا عرفتو يا أبو حميد مش دا برضو واحد من الإخوان؟

tota said...

راندا
يظهر ان ذكريات كل واحد فينا مختلفة
من اول بوجى وطمطم وروبى بتاع الرأفتانى
وبقلظ بتاع ماما نجوى وارنوب بتاع ماما سلوى وده مش هتعرفيه خالص

كلها شكلت فينا اشياء ربما ندركها الان
ربنا يديله الصحة يونس شلبى فنان لكن لم ينل ابدا حظ النجوم
تحياتى

Epitaph said...

دايما كان عندي اقتناع غريب و انا صغيرة ان بوجي و طمطم مش اخوات انما متجوزين..و معرفتش الحقيقة غير متأخر

و عم شكشك و باباه
و بيقوله الزباااااااااادي يا ولاااااااه
و فين العصايا هاتوا العصايا

و الفيل فلافيلو
و زيزي
وطنط شفيقة ههههه

و مدرسة المشاغبين
انا باصاب بحالة ضحك هستيرية بدموووووع
و هو بيقول لسعيد صالح
ايووووة احود شمال و الا اعمل اي حاجة
ايوة منز يا جدع

و العيال كبرت

يونس شلبي

البطل اللي مش لازم يكون وسيم و طويل و رشيق و شعره مسبسب عشان تحبيه هو كسر كل ده..و كان نجم من نوع خاص جدا.. ربنا يديه الصحة يا رب

اشكر اللي كتب التدوينة دي و رسم علي وشوشنا ابتسامة جميلة..و اشكرك يا راندا علي نشرك ليها

:)

تحياتي يا جميلة

zenzana said...

طيب يا جماعة شكرا تعليقاتكم كلكم

اللي كتب البوست كانت امنيته ان الناس تهتم اكتر بيونس شلبي
مش بوجي وطمطم رغم ان البوست رجعنا كلنا لذكريات جميلة
وعشان انتوا استفزتوه قوي بذكرياتكم الجميلة ، وبما انه كان رافض فكرة انه يعمل بلؤج
وقدر يقنع ناس كتير انهم يخضوا تجربة التدوين ومنهم انا
اسمحوا لي اسيح له وقول انه عمل بلوج النهاردة، وانا متأكدة انه هيكون من افضل المدونيين بما اني بسمع افكاره دايما عن التدوين واللي اخدت بها معظم الوقت
فا علي ضمانتي ادخلوا مدونته
هو موجود ضمن التعليقات لكن اكتشفوه براحتكم واقروا له لانه حد محب لهذا الوطن جدددددااا

ذو النون المصري said...

مبروك علي النيو لوك الجديد

إسلام said...

هاااااااااااااااااااى راندا وحشتنى جداً ، معلش أعذرينى لعدم دخولى لمدونتك كل الفترة اللى فاتت دى ، بس معلش كنت فى شوية مشاغل اليومان دول وعموماً أنا مادخلتش آى مدونات الفترة دى وماعلقتش عند حد ، عموماً أنتوا وحشتونى قوى كلكم ، وألف مبروك يا ستى على التغيير الجديد فى مدونتك عقبال ما يحصل التغيير اللى فى بالى وبالك وبال كل الناس وأكيد طبعاً أنت عارفة أنا أقصد آيه ، وأنا عموماً مش عندى حاجة أقولها بعد كل هذة التعليقات ، مش حأقول الا طبعاً كلنا وكل جيلنا كان بيعشق بوجى وطمطم بالذا الحلقات القديمة قوى ، لما بوجى أكل كتير وقعد يقول أه يا بطنى بطنى بتوجعنى ، وفى نهاية كل حلقة لما كانوا يقولوا حلو الكلام ويردوا بوجى وطمطم يقولوا كلام جميل ،و ربنا يشفى الفنان الجميل يونس شلبى

zenzana said...

شكرا يا زيزو انتوا السابقون ونحن اللاحقون

اسلام انت فين يا بني

لو عديت هناك بعد الضهر هتلاقيني هناك
فهمتني؟

koukawy said...

ربنا يشفيه و يشفي كل الناس 00
انا بتضايق اوي لما الناس اللي زيّ يونس شلبي يعييوا و محدش يعبرهم في التلفيزيون 00 و زيه سيد زيّان و جورج سيدهم 00
ربنا يشفيهم
حقيقي لفته جميله من اللي كتب و اكيد هياخد ثواب عشان خلانا كلنا ندعلهم