Monday, January 8, 2007

بمبي بمبي... فرح من غير سبب







أنى أنزل الصبح من البيت مكشرة أحيانا، جايز، أو أنزل من غير ما يكون في أي تعبير، احتمال وارد تقريبا كل يوم، عادى يعنى من ساعة ما رجعت أرض المحروسة، لكن أول أمبارح الصبح (السبت ) كان غريب بالنسبة لي يمكن بسبب شخصيتي السوداوية والاكتئابوية، لقيت نفسي فرحانة ومزقتتة كدة، من غير سبب يذكر. صحيت بكل نشاط- عكس كل يوم- رغم أن اللي نمتهم ساعتين بس، بما أنى بقيت من أصحاب البلوجات المحترمين .
قضيت وقت طويل الليلة السابقة على هذا الحدث الجليل، (حادث الفرح من غير سبب)، في تكملة كتابة شوية حاجات خاصة بأكل العيش، وزيارة بلوجات السادة الزملاء، والأصدقاء، تعليق هنا، ونكتة هناك، وتريقة البعض عليا، ...المهم، بكل نشاط صحيت، أصريت أنى لازم أسرح شعري، و ألبس هدوم ملونة، (ساعتها بدأ يتسرب القلق)، و أنى مش هلبس البطانية قصدي الجاكيت الثقيل قوى، بيفكرنى بالإسكيمو (وكأني شجرة جميز)، و أقنعت نفسي بطريقة ما أن الجو ظريف،مش برد وأنه بس فريش، بالظبط زي جو أوروبا، (مش الاطة والله)، ووقفت علي ناصية الشارع، وشمة نفسي قوى، حتى أن الناس اللي واقفين مستنيين الحشر داخل الميكروباسات، بدءوا يبصوا لي قوي، و أنا ولا هنا.. بعد شوية، هرشت ف راسي، و أول ما ظهر كدا قدامي، شاورت له (المرة دى بألاطة) تاكسييييييييي راح واقف، وركبت بعد ما قلت التحرير لو سمحت؟
وانطلق الحصان، قصدي التاكسي، عابرا مجري النهر، وسار بمحاذاته، وسط خضرة الأشجار، وبجوار مجري النهر الخالد، وتحت سماء زرقاء، حاضنة سرب طيور دفيانة، (اشطة، توفر الماء والخضرة بس فين الوجه الحسن؟) وقارنت شوية بين زرقة النيل (رغم انه ف الحقيقة كان مليان بلاوي) وبين لون البلوفر بتاعي
(اللي ف الأصل كان شحاتة من صحبتي كورينا بنت دوريث).

بعد شوية، لاحظت الأغنية ف التاكسي كانت لامؤاخذة أغنية "عيد ميلاد جرحي أنا"، في الوقت اللي كنت بحاول فيه أخفي ابتسامتي العريضة، والفرح اللي هيفط مني، يغرق مصر كلها، زى انفجار مواسير التحرش، قصدي المياه، وبلا تفكير، قلت :لو سمحت يا اسطي ممكن تغير الأغنية؟، مش طالبة نكد ع الصبح، رد بهزة من دماغه، ويا حلاوة...سعاد حسني، بتغني أغنيتي المفضلة بمبي..بمبي الحياة بقي لونها بمبي، قلت مرة واحدة والراجل اتخض..أيوه سيبها لوسمحت ، الراجل بص لي حتة دين بصة...أنا ولا همني ولو( أن ف الغالب استحالة ابص للناس ف
.(عنيهم دايما مكسوفة وزى اللي عاملة عاملة سودا
وبلا تفكير تاني، شلت التوكة اللي ف شعري، يلا بقي انشا الله ما حد حوش، يتنعكش من الهوا..يفضل في مكانه...المهم أن الهوا يطير شعري ويلمس خدودى(مع أن موتي وسمي حد يلمس شعري
..و أني مبسوطة...و بلا ذرة تفكير تالتة قلت للأوسطي ممكن تطلع على المعادي ؟ هروح الشغل بتاكسي؟
اه يلا خربانة خربانة.(كنت بكلم نفسي
هل ممكن كدة بكل بساطة، تصحي من النوم تلاقيي نفسك مبسوط؟ و أنك تشوف حاجات كثير مختلفة؟ وكمان حلوة؟
زي الهوا الفرش، والسما الزرقا، ودفا الشمس..و حلاوة (بلاش جمال) النيل؟ والله جايز..هي بس عايزة شوية استعداد نفسي
أن الحياة بمبي... بمبي.. وتسيب قلبك يرقص بالية..

23 comments:

^ H@fSS@^ said...

بت با زنزانة
قصدي راندا
انا كمان بحب الاغنية دي اوي
و مع انيامبارح سحيت من غير سبب معين و قلتها نكد على صديك عزيز جدا على قلبي لكن برضة حاسة بفرفشة مش عارةف ليه
هو يوم السبت ده يوم ما كلمتك؟؟؟و قلتي لي انك هايصة كده من غير سبب؟؟؟
كويس

سيبي شعرك يرفرف و لا تسريح ولا دياولوه
عارفة انا كتبت برضة من شهر كده حاجة عن موضوع الشعور بطريان الشعر على الخدود
شعور جمييييييييييييييل
ادعي و قولي يا رب اجي مصر و نفك شعرنا احنا الاتنين و نطيره في الهوا
بوسة
باي باي


صحيح ان اكمان بحب الدنيا ربيع اوي
تجنن طحن

zenzana said...

دا احنا هنفوك حاجات كتير بس تعاليييي، ايوه يا ستي كان يوم ما كلمتيني عقبال كدة ما توتا تحن هي كمان وتديني الو، ولا الواد جرجس، انا بموت ف سعاد حسني واحمد زكي، تخيلي الكوكتيل دا ممكن يعمل ايه؟
ويا سلام على اغنية كيكو كيكو

اسمعيها انتى واعملي احلي دماغ
فينك يا كوكو، مافتش يا ناس عليكو كيكو كيكو حبيبي قلبي، قال ايه هربان، يا سلام عليه... واللي يلاقيه اديه جنيه

يلاقي عيشي

تحياتي، أصل البوس دا حاجة مقرفة

ههههههه

yasser_auf said...

ربنا يكتر و يزيد من افراحك
بلاش يبارك ) بما انك قولتي حلاوة بدل :( جمال )
و ان شاء الله دائما مبسوطة و المزاج عالي ( بس ابعدي عن ازازتي ) و المود 100 %

^ H@fSS@^ said...

بت يا شهروزة
انا سماوية و و جذمجية طحن؟؟َ!!!!؟؟؟
طيب عاااااااااااااااااا
انا حوريكي

ماشي

ماشي

اعلنت الحرب على مدونتك

zenzana said...

الوحيدة اللى مكنتش اتوقع الزيارة منها شهروزة يا لهوىىىىىىىىىى، اهلا يا اختشي، والله لقوم واعمل حفلة، وغنى كل اغانى سعاد حبتشي عشان الزيارة الحلاوياتى دى (بلاش المباركة احسن بتشائم)
المشكلة يا روحي ان الاتنين خيرهم عليا، خصوصا البت حفصوتشتى، بما ان اسمها على اسم جدتي، حبيبتي (اوعي تزعلي يا حفصوتشا دى كانت ست مزة مشكلة، طالعة لى ههههه)
أما الزنازين التانيين الوقت بصراحة ضيق لكن المشكلة ان بت تنكة و اليطة حبتين، ادخل المدونة ولف واتفرج، وساعات مفيش حاجة بتعجبني، أو اقرا والموضوع يعجبني لكن معنديش جديدي اقوله، وعليه برجع ع الزنزانة الهف سندوتش حلاوة، مسألة التعليق في اكبر عدد ممكن من المدونات مش سكتي، انا طريقي صحراوي

zenzana said...

مش ممكن اقدر طبعا يا سي ياسر انت عاوز تاكلهم عليا ولو انا مبصدق،

ايو يا ايبي فجأة كدة كأنك اخدت ضربة شومة على نفوخك، اهو زى دلوقتى انا قاعدة حزييييينة لان طلعلي ضرس العقل، هوانا ناقصة؟ انا كنت فاكرة ان عندى ضرس لكن عقل دى جديدة قوى
عليا بس ولو بمبي بمبي

alnadeem said...

هيييييييييييييييه
انا وصلت المدونه ياشعبي الحبيب
بقيت معاكوا في نفس الزنزانه
قشطه هي دي الزنزانه واللا بلاش صحبه حلوه مع ناس حلوه
ألف مبروك يا صاحبه الزنزانه
واسمحيلي بعد إذنك يعني اقلبها خناقات زي ما كنتي عامله عندي
سلام

Rikka said...

صباح الشوكلاته بالكراميل اللي بموت فيها .. يا رب معظم أيامنا تبقى كده يا راندا.. بس مش عشان بقى عندك زنزانة محترمة و دخلها شمس و و هوا و شايفاها بمبي تحرميني من زيارتك و كلامك .. و لا هو اللي علي علي خلاص ... فعلا اليطة و تنكة آخر حاجة يعني ... ربنا دايما يبسطك و يفرحنا معاكي و نفرح بيكي يا اختي ... و أحلى حاجة فعلا الاحساس اللي انت حسيتيه ده .. لانه جه فجاة و ممكن من غير ما تعرفي السبب و انا النهارده عندي نفس الاحساس .. اللهم ديمها نعمة و احفظها من الزوال آمييييييييييييييييييين

هي الزيارة كده انتهت و لا ايه ؟؟؟ شدي حيلك و الزفة مستنياكي يا بنت يوم الافراج ..

Rikka said...

اه صحيح يا راندا انت كنت بتسالي مفيش جديد انا بقولك اهو في بدل الجديد اتنين شرفيني بقى و اتريقي انت كمان ما انا كل اللي علق ابدع في التريقة و طلعوني في الآخر لزقة أمريكاني بغرى :):):) مستنياكي تعلقي على الاتنين مش تنفضي .. سلام

zenzana said...

الزعيم المفدي، الفاتح القاهر، زعيم الامة العظمى المهلبية، عندى، ترررلالالالا، لا لا مش ممكن، عقبال كل السامعين، دا يوم حظى يا ولاد، طبعا انت الوحيد اللى من حقك تقلبها مراجيح، وتفتح كل حنفيات المياه كمان..و لو عجبتك الزنزانة حلال عليك
ها اخبار اللحن بتاعي اللى هيكسر الدنيا ايه؟ خلي بالك انا اتعمل لى لوحات والحان ع الجيتار تجنن ، في اطاليا، عاوزة حاجة اتفشخر بيها.ههههه سأضطر انحنى واخرج واسيبك بصحبة الناس العسل هنا، عندى عرض ع النيابة، قصدى المدير ...

zenzana said...

صباحه عسل يا ريكا هانم، مين دا اللى يقدر يتريق شاورى لى عليه وشوفي انا ممكن اعمل فيه ايه؟ اخليه يكره اليوم اللى ابوه حب امه فيه من اول بوسة اوبس قصدى اول نظرة
هههههههه
انا جاييييييييي فى السريع

lastknight said...

الموزه التدوينيه الأولى لعصر مابعد الحداثه .. انتى شربتى ايه بالظبط ؟ فرحانه ؟ و بهجه ؟ و سعاد حسنى ..؟ انتى بتجيلك تهيؤات ولا أيه ؟ انتى مش معانا فى مصر برضه ؟ طيب تفرحى على اساس أيه يعنى ؟ و بأمارة أيه طيب ؟؟
المهم ربنا يفرحك أكتر و اكتر و مش فاهم ليه بس أهى دعوه و خلاص .. و عموما بأكد عليكى أن شاء الله نعمل حفلة عيد ميلادنا أما الخميس أو السبت .. حسب تساهيل ربنا .. و ممكن تاخدى نمرتى من جرجس أو عمر تكلمينى عشان نرتب أكتر .. و تبقى فرصه بقى أحب فيكى شويه من غير عزال .. بس المشكله أنك صغيره قوى .. يعنى عيله بالنسبه لى .. عموما مش مهم الحب فيما بعد الحداثه لا يعترف بفروق السن .. صح يا موزه ؟

zordeak said...

احساسك جميييل اوى

ربنا يفرحك كمان وكمان

زنزانتك كمان جمييلة

انا سبتلك العيش والحلاوة مع عم عبد الستار الشاويش


ايه ؟

مداكيش حاجة ؟

ابن الايه

ده انا ظرفته علبتين سجاير مورلبورو ابن الايه

يللا بقى ملكيش نصيييب


المرة الجاية بأذن ربونا

ههههههههه

تحياتى للمدونة الجميلة
راندا

zenzana said...

فارس احلام مزز ما قبل الحداثة وما بعدها، وكمان عصر انحطاط الحضارة، شكرا على دعواتك، وبالنسبة انى نونو بالنسبة لك متقلقش، احنا ناس جدعان قوىىىى، ها؟ ثم المفروض انك فارس اوبن ميند، دونت كار متش ابوت ديتيلز، هههههههه، يعنى سيبك من الفروق الصغيرة دى، وبلاش تشكيك فى قدراتي لو سمحت، اعمل زى صحبي تومى كان دايمان يقولى اوعى تقولى لا من غير ما تخوضى التجربة!!
امال فارس ما بعد حداثي ازاى؟
بالنسبة للحفلة معرفش الظاهر انى اتحسدت وبقالى يومين كدة مدياها اكتئاب، ومش عارفة هاجى ولا لاء؟
صباحه فله
انت بتفكرنى باغنية شادية فارس احلامييي

zenzana said...

شكرا يا عم ع الحاجات اللى موصلتش، تعديل بسيط، الشاويش بتاعي اسمه جرجس، وظابط الترحيلات فارس، ومأمور السجن عمر قناوى، اما الندابة اللى بيصوتوا عليا ريكا وحفصوتشا، البت شهروزة لا لانها جامدة قوى، وعلشان ميبقاش تنميط وتمييز عن ان المزز بس هما اللى بيندبوا معاهم كمان احمد زكى، ومينا، وانجى، ورجب سعد.
هههههههههههه
زنزانتك حلوة كتير،

Rikka said...

و طلعت في الآخر انا و حفصة ومينا و احمد زكي و رجب سعد و انجي ندابين ... ليه الهلمة ده كلها يا راندا ده انت لو رئيسة دولة مش هتجيبي 6 انفار يندبوا عليكي كده ... مقبولة من كيا ستي و بلاش موود الاكتئاب .. خليكي دايما شاحنة صباحك و على رأيك لسه في أمل و لا ايه ؟؟؟

أنا عايزة وظيفة غير الندب لو سمحتي يعني و ظروفك سمحت .. انا بعرف استعبط حلو اوي و عندي قدرة على الخروج من المواقف المحرجة زي الشعرة من العجينة .. شوفي المواصفات ده ممكن تنفعك في ايه ده غير المستخبي بأه و انا معاك على طول خلف الاسوار .. ماشي

zenzana said...

خلاص هغير توصيفك الوظيفي وتبقي مدام حضرت المأمور عمر قناوى وبتشتغلي صحفية وبتكشفي ان سي عمر علي علاقات وثيقة بالمافيا الايطالية والروسية والصينية، وكمان المخابرات الامريكية، وانه بيخطط مثلا لاغتيال كاسترو فى المستشفي، او صدام قبل الاعدام، وبنتعاون سوا علشان نكشف حقيقته ، وبعد كدة جرجس يفضحه ع المدونة ويسيح له، و و و
اكمل ولا كدة كفاية؟

الأميره أوسه said...

مبروك علــ الزنزانه
جوها يرد الروح
هو النهارده الزياره
على العموم أنا جيبالك معايه
شندوشتات مربى وشندوشت كشرى
و أربع سجاير فرط
السجن ده بنات بس ولا أيه
فين الشوباب
عارفه أغنية بمبى لسعاد ليها ذكريات جميله عندى فى أيام الدراسه
بس أيه حكاية التاكسى ده
مفيش أحسن من زحمة الأتوبيس
والرغى مع طوب الأرض والخناقات على الصبح والبياعين السريحه و النشالين
ويا سلام لو فى أيدك وأنتى طالعه الأتوبيس شندوشت فول ونازله تأطيع فيه
بسنانك بصراحه هاتحسى بأنك قريبه من الشعب
سلام بقا

zenzana said...

اميرة اوسا وريثة عرش مدغشقر، اصلي انا بت تنكا، وعندى عقدة خواجة بسبب العيش وسط الخواجات، وبكل قلة ادب اقدر اتبجح واقول انى مقاطعة الاتوبيسات من حوالى سبع سنين، والله، مقضياها ميكروباست، موافقة ع الفرط، بس بلاش كليوباترا تناكا بقي
يا ريت ال ام عشان سي عمر بيذل اهلي
وبيتخلا عن كل مبادئه الاشتراكية.
نهاهااا
الشباب طفشوا النهاردة، اولهم جرجس راح يدور على حد يطلع عين اهله
فارس قديم مع مزز المدونات
عمر، بيكتب مقال غير قابل للنشر زى العاادة ف الدستور
هههههههههه
يعنى مكتوب علينا القاعدة الناشفة دى
بتاعة للستات فقط

lastknight said...

موزة مابعد الحداثه أم لسان فالت .. جدعان قوى ده أيه ؟ أيه اللى جاب الجدعنه لأنى أتغزل فيكى ؟ انا باقول نحب فى بعض شويه مش نتخانق على قهوه بلدى
و بعدين مزز مدونات أيه اللى هاتطلعيهم عليا دول ؟ أنا أساسا فى حالى خالص من البيت للشغل للجريون و بالعكس .. يعنى لا مزز ولا غيره ..المهم خلينا نشوف حكاية الحفله دى تانى .. لأنها هاتبقى وحشه من غيرك فعلا .. عموما مافيش حاجه اتحددت خالص لسه .. بس أول مايبقى فيه شبهة احتفال هابلغك طبعا .. حتى لو مكتئبه تعالى و انتى تفرفشى .. هاخلى جرجس يجيبلك بانجو

zenzana said...

فارس اصلك استعيلتنى قوي، حبيت اقولك متقلقش ،شبر ونص صحيح، لكن جبارة
بلاش بانجو كفاية جرجس، مع ان ودنى هتكبر شوية
ههههههههه

ذو النون المصري said...

بمبي ع الصبح يا راندا ؟!!!!!!!!!!!!!!!!مزاجك غريب جدا
انا مستحيل اصحي الصبح و الاقي الحياه بمبي زي ماانتي شفتيها
انا يا بنتي اقوم من نومي و عارف اني رايح المدرسه للتلاميذ بامر كل اسبوع علي اكثر من 600 تلميذ في الفصول اللي بدرس فيها هاصحي الصبح اشوف الدنيا بمبي ازاي بس؟
نوريني و فهميني

zenzana said...

انت شكلك اصلا تايهه كل يوم بتقع في
الترعة على رأى حفصوتشا، حمدا لله انا نفذ من موضوع التدريس دا ، ، انت مش مدرس رسم؟ المفروض انك تشوفها بألوان قوس قزح مش بس بمبي
فكها بقي يا عم ذو النون
ادعي انها بمبي