Sunday, January 14, 2007

لا بسيطة...مش عايز حقي!!



مش عارفة هوخوف؟ولا خجل؟ ولا عبط؟ ولا حتى استهبال؟ أو جايز الطبع؟ هل فعلا بقي طبع فينا احنا كشعوب عربية، أو حتى مصريين، سهولة التفريط في الحقوق؟ هل مازالت جملة ماضاع حق ورائه مطالب لسه موجودة؟
طب لو الحق موجود، هل له حد معين يقف عنده؟ هل ممكن حقك يتعارض مع حق الاخر؟ هل في منطقة فاصلة مابين حقك وحق غيرك؟ او ان الحقوق متداخلة ف دواير بتكمل بعضها؟


مشهد تقريبا بيتكرر كل يومين تلاتة قدامي (مش عاوزة ابالغ وقول كل يوم)، بالتحديد في المترو، وهو أن عشرات واقفين، متشعبطين، وعلي بعد خطوة في كرسي، يا أما
انسة مزة حلوة زى العسل، قاعدة وجنبها طفل صغير، أو حتي شنطة الخضار(اه والله شفتها قبل العيد بيومين)، و ولا واحد من الاخوة
المتشعبطين،كان من الجرأة أنه يطلب منها تاخد الولد الامووور أو شنطة الخضار علي رجلها،و يقعد هوعلى الكرسي، حتي أن مرة قلت ما تقعد يا باشمهندس وخلي الانسة تشيل الشنطة؟،
بكل رقة وحنية (وصوت واطي جدا)الباشمهندس قال: ما خلاص انا اصلي نازل قريب، أربع محطات مترو فضل انه يتشعبط، ولا يطلب
منها حقه في الجلوس


المشهد التاني ،اختصارا للوقت ميكروباس من ميدان الحرية لمحطة المترو، السواق مصر على ان الكابينة فيها مكانيين، والباشا
الزبون مصر انه واحد بس، بعد شوية كلام، وزعيق، الزبون لفح السواق، قلم وبونية، وكمان قال (أح...)، وطلع جملة الارهاب المعروفة "انت مش عارف بتكلم مين؟"اماالوكسة ان الزباين مكبرة الطاسة، وبعد ما السواق انضرب،كل الزباين في نفس واحد اطلع يا اسطى، وخلص!!،
السواق بكل سهولة طلع!!

المشهد التالت ميكروباس، وعربية ملاكي (سورى مبفهمش ف الماركات)بتحاول تسبق الميكروباس، وهب خبطت الميكروباس،
السواق نزل، وراسه والف سيف عايز حقه، فالباشا صاحب الملاكي، شخط ف السواق، وعمل حركة بأيده وطلع صوت من مناخيره، وبقه..وقال للسواق عايز تروح القسم؟ تعالى يا روح أمك؟
السواق رد بأيه؟ يا باشا ما انت حدفت عليا، بس الظاهر انك مكنتش قاصد، حصل خير.ورجع للميكروباس، وفي الميكروباس تسأله
طب انت مش هتعمله محضر؟
محضر ايه؟انا مش هروح القسم، يا عالم انا لو روحت القسم ايه اللى ممكن يحصل؟
مش جايز يطلع مهم، واروح انا في داهية ، وكمان الخدش بسيط ومش مستاهل.!!
المشهد الرابع ولو انه مش جديد، لكنه كان طازة النهاردة الصبح، البيه المحترم، قاعد بكل شياكة فى المترو، العربية اللى على طول بعد عربية الستات، وقبل ماينزل،راح تكرم ونادى على الست المحجبة اللى ساندة ضهرها فى اخر العربية،عشان تقعد مكانه، ولو ان في واحدة مش محجبة كانت واقفة قدامه،سيادته حب يعمل حركة شهامة وماله، لكن سيادته كان فين من ساعة ما ركب من الاول؟ولا هو السيد الوالد ساب له الكرسي ورث؟ ولما حب يعمل حركة شهامة، حب يتأكد برده ان حقه محفوظ فى الثواب، فنادى على الست المحجبة، وطنش اللى قدامه غير المحجبة!!
هى فعلا بسيطة؟ ولا هي مسألة تكبير دماغ؟ولا خوف؟ولا هو جرى الناس ورا اكل العيش، خلاها تتنازل شوية شوية،
ومتحبيكهاش؟ ولا هو ممكن يكون كسل وتراخي، وان الحق لازم يجي على الجاهزة؟ احتمال انه نوع من انواع الجهل بالحقوق، او الاصرار على عدم فهمها، تخيل بقي لما تفرط في حقك انك تقعد في المترو على كرسي فاضي، او عليه شنطة خضار، او حتى طفل صغير(مش استهانة او تقليل من شأنه)، يا ترى باقي ايه تانى ممكن منفرطش فيه؟
احتمال ييجي يوم نصحي فيه ونفوق، او نتحرك شوية ونبطل خمول، والا فعلا
نستاهل الجملة اللى قالها زمان حد مهم.."غطيني يا صفية..الظاهر مفيش فايدة؟"..ههههههههه
ملحوظة:
انا مش عارفة اللوحة لمين؟حرصا على حقوق الملكية الفكرية اللى يعرف صاحبها يبعت لى.

21 comments:

yasser_auf said...

فعلا غطيني يا صفية يظهر ما فيش فايدة

و السبب بصيت و سهل خالص طول ما فية محسوبيات و فية عربيات ما بتدفعش مخالفات بتتشال و هي بتعدي ال 7000 الاف جنية و فية الباشا المامور ( الي في الاصل امة معددة من كرموز ) او الباشا وكيل النيابة او الباشا الظابط ابو دبورة واحدة .... يعني طول ما فية تفرقة ما بين الناس و بعضيها من المسؤلين خوفا علي مراكزهم من هذا البية او الباشا او الهانم او بنت الباشا الي يمكن تكون امها كل وسطتها انها مرافقة وزير او مسؤل كبير او رقاصة او صاحبة غرزة بيتلموا فيها البشاوات ( بس خلي بالك بشاوات زمان حاجة و باشاوات اليومين دول حاجة تانية )و الله العظيم يا زنازينوا ساعات تبقي عارفة اصل الضابط الي واقف او اللي مركب السارينة او الي بيقولك موش عارف انا مين او بتكلم مين تلاقية هو شخصيا سواق مسؤل او شغال عند واحد لية حسية او تلاقية مثلا ابوة كان صنيعي او كان زبال و عاملك وزير( هي وظيفة شريفة محدش قال حاجة بس بيبقي الابن معقد من يومة حاقد علي الاخرين و خايف ان حد يعرف ان ابوة او امة الي طلع عينة او عينها و شقوا علشان يربوة و يعلموة هما مين يعني واطي بالصليقة من اساسة )فبيداري نفسة بانة بيدي لنفسة الحق بان يتنطط علي مخاليق خلق الله من الغلابة مثال اذا كان الباشا قائد السيارة الي لطش الميكروباس مثلا لطش في مرسيدس او بي ام كان نزل متردد في ان يعمل الحبتين دول لو كان لطش في سيارة من زوي ال 3 او 4 ارقام حتي لو كانت ملاكي كفر الغلابة كان نزل ملموم مقدما ...عموما دة من غضب ربنا علينا من عمايلنا السودة وسكوتنا علي ما يحصل فينا و احنا ساكتين يا بنتفرج انة سلطنا علي بعض ... يعني لما بتقفلي شارع ساعة الامتحانات الصبح علشان حتة مدير امن برتبة لواء رايح مكتبة و تضيعي علي العيال الامتحان او علشان وزير معدي فيبقي من حق اي حد يعمل اي حاجة في اي وقت و علي المتضرر ان يشرب من البحر

اذا كان رب البيت بالدف ضاربا , فشيمة اهل البيت الرقص

zenzana said...
This comment has been removed by the author.
karakib said...

و كم في مصر من مضحكات و لكنها مضحكات كالمبكيات
مثلا مثلا ما دام بتفردي مساحه للأشياء الغريبه ...
أمناء الشرطه و الموظفين اللي في مترو الأنفاق اللي بيمنعوا الناس تدخن هما نفسهم بيدخنوا في نفس المكان اللي ممنوع حد يدخن فيه و المفروض أنهم مسئولين عن تنفيذ القانون

مثلا مثلا ... يوم العيد التذكره فالمترو بخمسه و سبعين قرش ... قوم أيه الناس مش عارفه و محدش بيقرا ... نسبه الأميه 54 % نساء و 45% رجال .. و هي دي الحاجه اللي أحنا محافظين عليها بنفس المستوي من حوالي 20 سنه طبقا لتقارير جهاز المركزي للتعبئه و الأحصاء .. يقوم الرجل بتاع التذاكر اللي قاعد قالب وشه و فاكر نفسه رمسيس ال300700 ياخد جنيه من كل واحد .. أتسائل يعني هو لم كام ربع جنيه فاليوم ده ؟ و دي فلوس حرام و لا حلال و لا أيه بالظبط ؟؟؟ أما عن أتوبيسات النقل العام أو الخاص كما خصخصوها و هي فالأصل كانت خاصه (شركة أبو رجيله ) فهنا بقي لن تكفي أنهار من الأحبار و أطنان من الكيبوردات التي لن تتوقف عن التكتكه أثناء كتابه سلبياتها ... تصدقي أنه هيئة النقل العام في مصر بتخسر :) و اللهي ما باقول نكته .. بتخسر .. أزاي أكون محتكر حاجه و بأخسر ... طيب أزاي أكون باركب حمل الأتوبيس 10 مرات فاليوم و برضه باخسر ... مش عارف .. هي أكيد حاجه كده من بتوع راجي عنايت و ما وراء الطبيعه و الغيبيات و الباراسيتامول ... و لا مش عارف أسمها أيه دي :) اللي ممكن تفسر لنا ما سر خسارة قطاع النقل العام بمصر .. نقول أيه بس و لا أيه
أما بقي عن اللي بيشتموا و يضربوا بعض فده مشهد مألوف و لذلك يجب علي كل من يريد أن يمشي أمن نسبيا في شوارع القاهره أن يفعل مثلي ... يجب تمرين عضلات الظهر و الساقين جيدا .. حتي تستطيع الشعبطه و التنطيط في كل مكان أيضا الذراعين ... لن يسلم الأمر و يجب من وقت لأخر أن تسدد بعض اللكمات في وجه أحد السائرين نياما الذين لا يشعرون بفداحة ما يفعلون من أختراق واضح و صريح و بجح ليس للقوانين فقط و لكن لكل المباديء الأدميه ... و التي تثبت أنه بني أدم
لا مانع من التسلح ببعض دورات الكاراتيه و التايكوندو ال جودو فهي تنفع كثيرا

ذو النون المصري said...

انا راجع و رجلي فوق ...........اهو يا ست راندا
ايوه لازم اتعدل لتبلغ زمايلي و تفضحني قدامهم في المدرسه اللي باشتغل فيها ،راندا دي اصلها مفتريه و ممكن تعملها دي ممكن تفتن كمان عليا عند مراتي و تقول ان انا ماشي مع حفصه علي المدونات
و مش بعيد تخلي مراتي ترفع عليا قضية خلع و ابقي المدون الوحيد المخلوع
يا خبر اسود دي تبقي فضيحه بجد دي مش فضيحه بس دا تجريس
لا دا التجريس ارحم مراتي تخلعني !!!!!!!!!!!!مع اني لسه مش متجوز بس برضه لازم الواحد يخاف من الخلع

ذو النون المصري said...

انا بس مشغول جدا الان في بعض الاصلاحات في مدونتي و هرجع تاني
و كنت عاوز اسال من يعلم
انا عملت شات بوكس في مدونتي لكنه موجود في اخر حته فيها في الاسفل عاوز ارفعه الي يمين المدونه لا اسفلها يا ريت اللي يعرف يعدي عندي و يشوف الحل ممكن يكون ايه؟
الامر الثاني كنت عاوز اعمل عداد للمدونه ،انا عرفت كل الخطوات لكن وضع كود العداد بيكون فين في التمبليت بالظبط؟
نرجو الافاده ممن يعرف و للجميع خالص الشكر و الاحترام

zenzana said...

يا سر
واضح من كلامك انك من مؤيدي عصر ما قبل الحداثة، وواخد موقف من الرقاصات، ومرافقات البشاوات، بلاش حقد واضطهاد ستات !!
بتفق معاك ف مسألة حقد الابناء، لكن دور على السبب ، هو مش الوطي بالسليقة، لكن ان المجتمع رسخ ف الوجدان، ان بعض المهن مهن حقيرة، خصوصا ف الدراما، اللى بسهولة تقدر ترصد فيها وطى المجتمع اللى بالسليقة، كمان شوف المناهج والكتب المدرسية، لازم الرجالة طالعين دكاترة، وبيقروا الجرايد، والستات قاعدة فالمطبخ طول المنهج، مورهاش شغلانة، مفيش مهن زى نجار بقال او حتى زبال، مفيش غير جنايني المدرسة لكن مفيش بواب مثلا
وهو ف الغالب غضبنا احنا على نفسنا مش غضب ربنا علينا.

شوف يا هانى او كراكيب،
انا بس مسكت ف حتة من بلاوينا، ويا ريت امسك الباقي بالتوالى
فكرتك بالتسليح هايلة، عشان كدة هتلاقيني دايما ماسة ف ايدي الكلاشينكوف بتاعي اقصد العكاز بتاعي، لان الكاراتية والعضلات بقوا موضة قديمة
مدونتك حلوة

ذو النون
يا حبيبي ايوة كدة، ارجع لكن العفو رجلك مش فوق ولا حاجة بعد الشر عليك من رجلك لما تبقي فوق، احنا مش ف القسم، ثم انت زعلان انك تبقي مخلوع؟ هو الخلع بيزعل؟ طب ما انت بتخلع ضرسك احيانا، هل معناها تكره سنانك كلها؟ ولا حتى الدكاترة؟ طبعا لا؟ يا سيدي كلنا مخاليع هههههه

متقلقش ع العداد ارسل اشارة استغاثة لحفصوتشا او الدكتور جرجس

tota said...

راندا
طبعا عندك حق ومشاهد فقدان الحق وضياعه كتيرة والاستمرار فى ضياع الحق هو اللى وصلنا للحال ده
معدتش تفرق ومش مهم والاهانة المستمرة والضياع من اول بيتنا لحكومتنا
وفعلا صح ان لا يضيع حق وراءه مطالب بس ده لو طالب فعلا بحقه

فكرة البوست مختلفة كانها بحث فى الاعماق وملاحظات للسلوك
تدوينة بسيطة بس عميقة
تحياتى

^ H@fSS@^ said...

يمكن عشان كده بيقولولي انتي بتاعت خناقات
اصلي مش بخلي حاجة ليا تضيع او تتهدر غير لما اعمل عليها مناحة و اجرس الخلق و الم المكان عليا
انا مرة ست اخدت الدور بتاعي و انا واقفة بحاسب
يا نهارييييييييييييييييييي
فضحتها و فضحت المحل و خليت اللي ما يشتري يتفرج و خلتها متسواش بصله و بما انها كانت عاملالاي فيها شريفة شدتلها نقابها بعد ما هي ضربتني و قعدت تتخانق معايا و رميت الحاجات اللي كنت حشتريها من المحل و قلت له اديك خسرت حاجات تيجيلها بقيمة 300 ريال
و ندمته انه كان خايف منها هي و ان الا
بجد والله اصله كان مستضعفني
و بيحاول يراضيها هي
لكن على مين
بقى قاعد يبوس في ايدي و رجلي و يديني كوبونات ببلاش و انا لا
سيبت المحل وسط تصفيق حار ليا و تف و شتيمه ليها
فكرك انا عدوانية او شرسة؟؟
افيديني افادك الله


ذو النون صديقي
لو عندك ياهو ايميل ضيفني عليه اهو يمكن اعرف امشيك و اظبط لك بلوجكك غير كده ممكن برضة تسال جرجس معلمي الاولو ادي دقني اذا عترت عليه

ههههههههههههههههه
سلام

ذو النون المصري said...

حكاية مش عايز حقي لها جذور بعيده في نفس كل انسان لان تصرفات الانسان لا تاتي هكذا بصوره عفويه عشوائيه لكن لها اصل و جذر ممتد بعمر الانسان كله تاثر فيه بكل ما يحيط ببيئته
مثلا الانسان يعيش في ظل نظام سياسي هذا النظام المفروض انه بيحافظ علي حقوق هذا الفرد او الشعب لن كلنا يشاهد حاكمه يبيعه و مصالحه بلا مقابل او لاجل بعض المصالح مع دوله اخري
داخل الدوله نجد المسؤلين ايضا عنا و مصالحنا لا يحققون لنا ما اشتغلوا في مناصبهم من اجله بل يمارسون علينا القهر حتي اضطرونا للتنازل عن امهات حقوق الانسان كالحريه و العداله و المساواه
في البيت نجد الفرد لا يعمل العمل الذي يختاره هو بل الذي يختاره الوالد او المجموع و ربما تتزوج من لا تختاره هي بل الظروف
و الكثير من هذه الحالات يتربي عليها الفرد منا حتي تصبح عاديه
و طالما تنازل عن حقوق اساسيه ما الداعي ان يتشاكل لاجل امور هامشيه
لا اقول ان الفرد بيتنازل بمزاجه لا نفسيا خلاص اتبرمج علي التنازل شايف انه ملهوش داعي يعمل مشاكل علي حاجه بسيطه او هي بسيطه بالنسبه للي تركه قبل كده
مثلا :لو واحد ارتكب خمس جرائم قتل هل يهتز له ضمير لو خبط واحد خبطه عنيفه ؟هو هيشوف انها بسيطه
لو واحد اغتصب فيه مشكله انه يعاكس او يتحرش؟
هو ده !!احنا مقضيين حياتنا تنازلات في تنازلات و مش في امور سهله لا احنا لا نختار من يحكمنا و لا نختار العمل الذي نحدد به مستقبلنا و لا نختار احيانا من نتزوج و لا نختار الا القليل شوفي طموحات الشباب كلها للاسف صارت بيولوجيه تنحصر في التزوج و التناسل و التغذيه
لم تعد هناك طموحات عليا تشعر بان هذا الفرد انسان حقيقي كله بسبب التنازلات
..................................
ياريت يكون كلامي واضح

مراقب مصري said...

قلبتي علينا المواجع الله يسامحك

التنازل عن الحقوق أصبح واقعا مقرفا جدا جدا... ومحاولة حث الناس على أخذ حقوقها أصبحت عبئا ثقيلا ومهمة مملة جدا بسبب عدم جدواها

الصورة اللي مع البوست معبرة جدا وقاسية جدا

تحية على أسلوبك السلس البسيط العميق في نفس الوقت وتوصيلك لفكرتك في أقل عدد من الجمل المكثفة والمواقف الواقعية المؤلمة

أُكتب بالرصاص said...

ممكن تسمحيلي اخلع القبعة
واسيبها عندك شوية

لفيت في المدونة .

لاقيها فعلا فضفضة بمزاج عالي

اخدت تقريبا ساعة وانا هنا!!
شربت واحد قهوة محوجة
واتمزجت



من المدونة
مش من القهوة

zenzana said...

حبيبتي توتا المدونين انواع، الاول بيعرف ينظر، زى فارس، وانتى، ونوع بيعرف يرصد الفتفوتة ويعمل عليها بروباجندا، هي ف الاخر حلوة، وفى نوع يعرف ينظر ويرصد، ويحلل، زى كوكو، وفى نوع اللى انا منهم، الغلبان اللى على اده، اللى بس ممكن يفضفض على الورق لكن مش مع الناس، و دول ينطبق عليهم تشبيهك انهم ودن كبيرة، لكن لسان مشكوك فيه،شكرا على تشجيعك.

قلم رصاص،
احرجتنى وخليت خدودى زى الطماطم، العفو يا سيدى من قلعك فى المدونة، واتفضل قهوة كل يوم لانى بقدر القهوة واللى يشربوها.


جرجس انت هنا؟ لا مش قادرة اصدق دا انا اللى اخلع القبعة، اخيرا شرفتنى، دا هيبقي العيد القومى للمدونة، حصلت لنا البركة.

حفصوتشا شكلك بت غاوية مشاكل، شاطرة يا بت، مجدع صحيح، انا مبحبش حد يشتغلنى وياخد حقي، بس من غير ضرب، اصل انا ليه لسان دايما قايم بالواجب، زى امبارح كدة مروحة على خط شبرا، وفى اتنين زى التيران، وراجل عجوز واقف وانا طلعت المترو، قلت الاول تور لو سمحت ممكن تقوم عشان اقعد؟ تنح، وقال ليه؟ قلت له عقبال عندك اصلي رجلى مخلوعة، كدة على طول، وقعدت وللتور اللى جنبي قلت له وانت مش ناوي تتحرك لعمو العجوز دا ولا؟
هههههههه راح قام، احيانا مبينفعش الا الغتاتة مع الناس التنحة

كلامك طبعا واضح يا ذو النون، وبتفق معاك ومع فارس قديم، فى البوست الاخير اللى عمله انصح بقرايته، لان طلعنا منه بنتيجة، مهمة ان المسألة مسألة جهل بالحقوق، واننا شعب عربي، واخد على المنح والهبات ولاوامر مش المطالبة بالحقوق وانتزاعها.

yasser_auf said...

Hi dear

pls send me yr email address or your yahoo or msn messenger ID

To add u in my contact list

To the followings emails :

yasser_auf@hotmail.com
yasser_auf2003@yahoo.com

whats happend to the new blogger of hafstousha ???

with my best regards

yasser auf .

zenzana said...

عزيزى يا سر

انتقل الى رحمة الله
روح عزى
http://elnaswiel3alam.blogspot.com

Anonymous said...

انا الصوره دى مش فاهمها هى دى واحد راكب بنت ام راجل راكب راجل ام راجل راكب ست ؟
دى الصورة بحاجة الى تعليق!!؟
ارجوك علقي على الصورة لانها صوره معبره وبحاجة الى توضيح
وارسلى التعليق على بريدى لانى ضيف عندكم هالساعة فقط بعدها سارجع الى مكانى الخاص
kccc_Q8@hotmail.com

zenzana said...

مش مهم مين راكب على مين يا استاذ، المهم انت فهمت معناها ولا لاء؟

كل مرة ابعت على الاميل بتاعك، بيترد عليا عفوا، لقد رفس اميلكم، الرجاء شحت عنوان تانى من اى زريبة.

Anonymous said...

السلام عليكم : ـ

أزيك يا راندا ، آيه الأخبار ، على فكرة أنا كنت عايز أعلق على كل بوساتاتك السابقة بس أنتى كنتى مش عاملة لآى حد يعلق عندك ، باين كده كنتى تقصدنى فى الموضوع ده ولا يمكن رداً على اللى يسوا واللى مايسواش ، فكأنك بتقول لى مش كل حد يعلق عندى اللى يسوا واللى مايسواش ،

المهم يعنى حقوق آيه اللى بتتكلمى عليها احنا مصريين البنى آدم عندنا هو أرخص حاجة ده أن كان له قيمة أصلاً احنا هنا فى مصر مفيش حد له قيمة الأ الحرامية الكبار والحزب الواطى ، خسارة فيهم الأسم مع أنهم كرهوا الواحد فى كلمة وطنى ، والرئيس بتاعنا اللى مالهوش لازمة هم دول بس اللى واخدين حقوقهم ، أما باقى الشعب فعليه العوض ، فعلاً الشعب المصري ده اغلب شعب فى الوجود شعب أقصى امانيه ان يعيش وخلاص مش مهم يعيش أزاى بس المهم أنه يعيش ، شعب اتعود أنه يرضى بآى حاجة ، والدليل على كده احنا الشعب الوحيد اللى بيقولوا على الخبز كلمة عيش ، لأن عندنا الخبز وحده هو الحياة ، مايعرفش يسأل على حقه ، خذى مثلاً هذة القصة ، كان واحد صاحبى بيحكى لى كان فى مصلحة حكومية وبعدين راح يركب الاسانسير وكان معاه واحدة ست ورجل شكله غلبان قوى وبعدين تتحدث هو والست اللى معاه على الإهمال فى الاسانسير وتاخيره وعطلانه الدائم ،فى الآخر رد هذا الرجل وقال لهم يا جماعة الحمد الله أن أحنا لاقين حاجة وخلاص ، أحنا فى مصر وعايزة الناس تسأل على حقوقها عرفيهم الأول بحقوق الإنسان وقيمة الإنسان وبعدين نتكلم على راحتنا ، مع ألف سلامة

ذو النون المصري said...

ههههههههههههههههههههههه
اصله ايميل حمماري لا مؤاخزه

ذو النون المصري said...

ايه يا ست راندر انتي مش ناويه تغيري البوست ده وللا ايه؟
اكتبي الجديد انا يوميا بمر هنا و في انتظار الجديد

zenzana said...

ابيتاف، شكرا جدا على الاطراء
متقلقيش من لغتك، لان احيانا انا كمان عندى مشكلة في التعبير بلغة معينة، وقريب هحاول اكتب بلغة تانية

ذو النون
حاضر يا سيدي انت تأمر النهاردة في بوست
انا عندى حاجات كتير ف الدرافت لكن سورى
حبة أكتئاب بس

zenzana said...

اسلام يا حبيبي انت فين؟
واحشنى والله، وسألت عليك عمر امبارح

لا انا بس عشان مكنتش واخدة باللى من مسألة التعليقات لكن طبعا مبسوطة انك بتعلق، انت لسه زعلان؟ يا عبيط الحياة لا تستحق ان الاصدقاء يزعلوا، انا بس بحب انكشك، المفروض انك تقلق لو انا مجريتش شكلك، بما انى بلطجية،علي راي الزعيم المفدى المبجل عمر قناوى
اوك اتصل بعمر لازم نتقابل قريب
سلام