Tuesday, January 23, 2007

عيد ميلادي وتوابعه..موبيل ومشتبه وظابط!!




مش قلت لكم ؟ دا عيد ميلادي وانا عارفاه، ميعديش كدة

وخلاص

يعني كان لازم اروح احتفل به ف الخارج عشان متحصلش اي كارثة

النهاردة عيد ميلادي ،زي ما انتوا عارفين

ابتدا ظريف، صديقي وزميلي تيموثي ميلر

جاب لي تورتة شيكولاتة تجنن

وبعد الشغل، جروب من الاصدقاء قرر انه يحتفل بي

الاحتفال خلص تمام، وكمان كان في هدايا، منهم مج لشرب النسكافيه

عليه علامة الجودة الصينية،هدية من الست نانسي هانم

واول ما اروح الاقي الخبر دا

بابا ف القسم، واخوكي ف القسم، من الاخر طلعت القبيلة كلها ف القسم

لان ابن خالتى مقبوض عليه، لان في واحدة ست اتقتلت من حوالي شهر

في منطقة قريبة، ومش لاقيين المتهم، او حتى واحد اهبل يشييل القضية

ولان جوز الست القتيلة(سواق تاكسي) مشتبه فيه و بيتحقق معاه،

فالسادة الظبابيط رصدوا كل الارقام

اللي اتصلت بالمشتبه فيه(محبوس، واحتمال يكون طالع..اهله)قبل

قبل ارتكاب الجريمة(تحسبا للتخطيط)، بأيام، المسخرة كانت

ان سيادة الظابط عماد فتحي من نقطة منطقة ستة اكتوبر،

ارض الجمعية، التابعة لقسم الوراق،

اتصل بالمدعو ابن خالتى(مصطفي) وبيقوله "انا الظابط فلان تعالي لي

عشان عاوزك ف جريمة قتل"، تقولش

بيعزمه علي فنجان كابوتشينو ف جروبي، ابن خالتى، بما ان مستوي ذكائه ليس

من مستوي ذكاء ظبابيط الداخلية، افتكر وان بعض الظن اثم، ان حد من اصحابه بيهزر

فالاول اخد الموضوع تهريج، لمدة اربع او خمس ايام الظابط يتصل،

والتهريج يبدأ، بين ابن خالتى واصحابه علي الظابط "نعم يا خويا؟

ظابط وعاوز يحقق معايافي قضية قتل؟ طب انا هبعتلك واحد

صاحبي يروح معاك" وهاتك يا ضحك

لمدة خمس ايام الظابط قدامه مشتبه فيه في قضية قتل،

وقال ايه بيكلمه ف التليفون، و بيعزمه على القسم

شفت الحنية؟ (دلوقتى جرجس يزعل ويفتكر اني عميلة للداخلية)، اخر

ما بن خالتى زهق من معاكسات الظابط، شتمه، كام ساعة

وبن خالتى مصطفي كان ف القسم، مشتبه بمساعدة القاتل فى ارتكاب الجريمة

و تم طرد المحامي بره غرفة التحقيق، وتم سأله اذا كان يعرف جوز

القتيلة والمشتبه فيه رقم واحد؟ بن خالتى العبيط قال انه ميعرفش الاسم

فتم عرض المشتبه عليه، اللي اتضح انه سواق تاكسيييييي

(ادى اضرار التكسيات عشان تعرفوا ان عندى حق في مقاطعتها)
وان بن خالتى ركب معاه مرة او اتنين، واتفق معاه

انه يوصله ايام محددة لمنطقة القاهرة الجديدة

واخد رقم السواق، وبعدين كلمه

كل الشغلانة اوعي تهزر مع حد يطلع لك الكارت

الاحمر ف التليفون ويقولك "تعالى لي يا حبيبي ف القسم

عندي لك جريمة قتل انما ايه؟ تجنن"، او ان مدة مكالمتك تتجاوز الدقيقتين مع اي حد!!

لان ابن خالتى كانت كل جريمته ان اتصل من تليفونه

الشخصي(يعني لو بتفكر بلاش من تليفونك، استخدم ابو خمسين قرش للدقيقة) بالمشتبه فيه

رقم واحد،وكمان مدة المكالمة تجاوزت الدقيقتين(كفاية برده للتخطيط لجريمة قتل)، ابن خالتى رجع البيت

بعد اعتذارات للبيه الظابط اللي

اتشتم (حقه برده، الراجل قال انه ظبوط بن خالتى عبيط، مكنش متوقع

ان في ظابط حقيقي هيتصل به ويقوله انا الظبوط)كان فاكر ان بعد

شوية هيقوله (عليك واحد، انا حبيب العادلييييي) المهم

بكرة ربنا يستر لان بن خالتى قال انه بكرة هيروح القسم يتعرف

علي صديق للمشتبه رقم واحد(سواق تاكسي برده)، لانه

مرة ركب معاه التاكسي برده، يعني من

من الاخر كل السواقين اللى بن خالتى ركب معاهم ف الفترة الاخيرة

هيتجابوا

بعد ما خلص التحقيق مع بن خالتى اللى لسه عبيط، ومش فاهم اصلا اتقبض عليه ليه؟

تناقش الظبابيط ف القسم حوالين اهمية الموبيل ف كشف المجرمين

و استدعائهم، وان الداخليه لازم تدفع تمن موبيلات جديدة كحوافز، وكمات شوية كروت

لزوم الاتصالات، وبدأوا يعملوا لسته بالظبابيط الشطار مستحقي

المكافأة، رغم انهم لسه مش عارفين من القاتل؟


زى سفاح المعادي كدة

ربنا يستر بكرة


وكمان السنة الجاية


ومش هسمع كلامك يا احمد!!


قال احتفل قال!!


16 comments:

Rikka said...

مبدئيا صباح الخير يا جميل و كل سنة و انت طيبة و يا رب سنينك الجاية تكون أجمل من اللي راحت و العمر ليكي يا رب
انا لسه مكملتش البوست بس حبيت اقولك الأغنية جامدة مولتوووووووو انت مش متخيلة انا بموت في الاغنية ده قد ايه ... أرفع القبعة على اختيارك ليها .. خليني ارقا بقى و بعدين ارجع تاني .. سلام

Anonymous said...

تهنئة عيد الميلاد ،،،،
رغم كل اللى قولتيه،هنحتفل بعيد ميلادك، حتى و لو إبن خالتك مقبوض عليه فى القسم، هو أكيد بيحاول يطلع من زنزانتو و أظن أنتى كمان بتحاولى تطلعى من زنزانتك. أقولك حاجة أنا فعلا بقدر شعور إن كل واحد فينا يحاول يكون جزء من معاناة الآخرين ،(كن فى أحيان كتيرة بيكون هو سبب معاناة الآخرين)،،، و رغم كل دا إحنا محتاجين نفرح و محتاجين نشوف الدنيا متلونه بلون النعيم. و فى عيد ميلادنا لازم نحس بلون النعيم. عارفه ليه يا راندا (و دى تجربتى الشخصية جدا) إن فى عيد ميلادنا بنكون مع الناس اللى بنحبهم، أنا فاكر آخر عيد ميلاد ليا كان عيد ميلاد لطيف ، و عيد الميلاد اللى قبلوا كان أجمل و ألطف. علشان كده هنحتفل بعيد ميلادك حتى لو إنتى اللى رحتى القسم مش إبن خالتك....
أحمد

zenzana said...

ريكا انا سعاد حسنى بالنسبة لى حالة نفسية، يكفيني صوتها وتنطيطها، وانا ابطل اكتئاب

احمد مش عارفة ممكن اغازلك ولا لا فاكرة كلامك في مستشفي فلسطين من اربع سنين وبالذات جنب الشباك اللى ف الكوريدور، ان عيش اللحظة بحلوها و مرها
اسمح لي اغازلك لان الغزل مش بيبطل الصداقة
انا مبسوطة جدا انك صاحبي رقم واحد
ويا رب دايما

مراقب مصري said...

يا رنوش أنا مش عارف ليه مش عارفة تقري الأحداث صح

عيد ميلادك الكريم وكمان ربنا يبعت لك فيه سبق صحفي تحفة وقضية تجاوز من الشرطة ضد مواطن وكمان المواطن قريبك يعني هينفع بقول لنا تفاصيل وتبقى عندك قضية صحفية سُقع يعني م الآخر خبطة العمر... دي أحلى هدية عيد ميلاد

هو بس المشكلة إن ابن خالتك أفرجوا عنه من غير ما ينضرب ولا ينتهك ولا أي حاجة م الحاجات الجامدة اللي بتحصل في الاقسام دي

بس ملحوقة... ادعي كدة إنه لما يروح النهاردة القسم يروقوه بعلقة محترمة

Anonymous said...

اولا كل سنه وانتى طيبه ومن غير حوادث ولا كوارث
وانا اول مرة ادخل عندك بس كنت متابع مناوشاتك عند جرجس واليوم بس عرفت ان راندا صاحبت التعليقات الجامدة بقيت صاحبة مدونة فسميت
وجبت عيش وحلاوة ودخلت وقريت كل البوستات بتاعتك من اول كوكو الضعيف لحد عيد ميلادك
واعتبرينى زائر دائم عندك ان شاء الله لو ان دة هايكلفنى تصاريح زيارة وعيش وحلاوة وكدة بس مش خسارة فيكى

zenzana said...

حرام عليك يا جرجس، انت عاوز جنازة تشبع فيها بوستينج، يا سلام يا بني احنا قبيلة محدش يقدر يحبسنا، احنا اخرنا ضربة قفا، ولو حصل اكتر من كدة ، والله والله لابيتك من المغرب يا صينههههههههههه
يامصري يا متغرب، بينفونوتو
اهلا وسهلا تشرف يا سيدي، العيش والحلاوة عليك
والضرب علينا
هههههههه قصدي القهوة

karakib said...

واضح أنه سرك باتع
أنا قاعد كده مقلق علي فكره
لا تأثير عيد ميلادك يمتد للمعلقين فالمدونه ربنا يستر
هنعمل ايه بقي
كل سنه و انت طيبه

ذو النون المصري said...

كل سنه و انتي طيبه في كل الاحوال
انا مبكونش سعيد في اعياد ميلادي مش بسبب مشاكل في هذه الايام ..ابدا ...لكن لاني باتمني في كل عام احقق انجازات كبيره جدا لكن زمن العام يعتبر دائما قصير و لا اتمكن من تحقيق كل ما اتمناه
اضافه الي انني لا احب التقدم في السن
لكي تحياتي

Anonymous said...

على العموم كل سنة وانتى طيبة يا راندا وعقبال 100 سنة ، وأنا فعلاً متضايق جداً لموضوع أبن خالتك ، ربنا معاه ، وأنا آسف على تأخيرى انا كنت مشغول جداً فى هذة الفترة ،
أتمنى أنا آراك بخير وقريباص أن شاء الله

zenzana said...

شكرا يا سي كراكيب، بس خليك فاكرها، اتريق وهنشوف سر مين فينا اللى باتع ههههههه
ذو النون الافضل اننا منبنيش امال عريضة، اكتفي بالتركيز فى انجاز واحد على مدار العام، وف النهاية هتحس انك انجزت شيء، اما بخصوص كبر السن، اعتقد ان كل سن وله جماله وطموحاته، غير ان السن الحقيقي لايقاس بشهادة الميلاد، بل بمدى احساسك بالسعادة، وتحقيق انجازاتك. (كلام هجس معلش)، هههه
اسلام اكيد هنتقابل ونروح المعرض سوا، اوك؟

Anonymous said...

انا بقول غيري تاريخ ميلادك و خليه شهر و يوم تاني
ممكن تخليكي برج السرطان زي عشان تبقي سعيدة

"
قال يعني
"

سلام

Anonymous said...

نسيت اقول اني حفصة بس مش نافع اعلق عند حد باليوزر الجديد بتاعي
عااااااااااااااااااااااااااا
مش عارفة فيه ايه
بقالي قرب اليومين كل ما اكتب كومنت واطبعه تحصل مشكلة و يتمسح ويقلي انه في حاجة و حيشيكوا عليها ايه هي و يردولي خبر و
ادي وش الشيف
لا بيردوا ولا بيشيكوا
عاااااااااااااااااااااااا
فعلا البلوجر بانوا
على حقيقيتهم بانوا
عااااااااااااااااااااااااااااا
يا خراب بلوجك يا حفصة

الهي اشوف فيك يوم يا بلوجر

zenzana said...

ههههههه معلش يا حبيبتي الظاهر ان نبوءة كراكيب
اتحققت ان تأثير عيد ميلادي امتد للمعلقين ههههههه
دلوقتى انت اللى تأثيرك بان يا كراكيب
ههههههه

karakib said...

لا حول ولا قوة الا بالله
مش ممكن !! و ظهر الحق أول ضحاياكي من المدونين أهه :) حفصه الطيبه الغلبانه
لا مش ممكن :) مش ممكن
------------
أنا مش قدك يا زنزانه أنا غلبان الله يخليكي بلاش خليك فاكرها و الكلام ده انا غلباااان

Anonymous said...

العزيزة راندا : ـ

ياريت فعلاً نروح المعرض أنا زمان لما كنت لسه طالب وفاضى كنت باروح المعرض تقريباً كل يوم ومتابع الندوات وكل الأنشطة وكان وقتها مش معاى فلوس كويسة أشترى بيها كتب ، ودلوقتى لما أشتغلت وبقى معاى فلوس بقى ماعنديش وقت خالص ، تصدقى من أول ما أشتغلت من أربع سنين لم آرى فيها المعرض نهائي ، ربنا يسهل وأعرف أروح السنة دى المهم أنا أقدر أروح يوم الاحد عشان هو ده يوم أجازتى ، ياريت نعرف نحاول كلنا نتقابل ونروح المعرض وأهى تبقي فرصة حلوة نشوف كلنا بعض أنتوا وحشتونى جداً

zenzana said...

اسلام خد رقم تليفوني من عمر، انا للاسف اجازتى الجمعة، لكن ممكن عشان خاطرك اروح معاك الاحد بعد الشغل، انت عارف انا مشفتش المعرض من تلات سنين
بتعرف احلى حتة ف المعرض بحبها ايه؟
سور الازبكية، لان دا كان ملجأي لما كان معايا قروش بس