Monday, February 5, 2007

تاج من ذو النون اللي مش عاوز يقول اسمه

بما اني كسرت بخاطر عزيزي ذو النون مرة
و مجاوبتش علي التاج عن خمس اسرار في حياتي،
قررت اني اخوض مغامرة التاج، اللي
بالنسبة لي زي اللغة الهيروغليفية لما حفصة مررت لي تاج
بما اني محدثة نعمة بالتدوين مفهمتش يعني ايه؟
وف اخر قاعدة مع الشلة افتكرت ان تاج دا اسم مضاد حيوي
او دوا كحة من اللى بتعاطاه المدونين يي قصدي
المدمنين بما اني قاعدة وسط اتنين دكاترة
ولما قريت ردود حفصة برده وداني طولت اه شفتها كدة
وافتكرت انه احد بوستات حفصة المرووشة
لكن لما روحت عند ستشي وتاج راسي شهروزة هانم
فهمت واكتشفت اد ايه في شبه بنا
ولما قريت البوست الاخير لذو النون هلكت من الضحك
كمان شفت اد ايه احنا متشابهين، وبما انه متشحتف
ان مين هيرد عليه؟ قررت ارد ع التاج دا
لان الاولاني بصراحة مقدرش ارد عليه لاني عندي
فضايح وبلاوي اكتر من خمسة غير معروفة
اوك؟ يلا بينا نبتدي
ماذا سيحدث لايميلك بعد موتك؟

رغم اعتقادي اني هموت قبل سن 36، هتنازل عنه لبنك الاميلات معرفش هو ايه؟ لكن اكيد حاجة زي بنك التبرع بالاعضاء ، واحمد زكي يبقي القيم عليه بما انه مليان بلاوي، لكن لسه مش عارفة اصحابي اللي مبيعرفوش عنجليزي دول احمد ممكن يرد عليهم ازاي؟، لكن انا عندي فكرة اني اعمل علي طريقة المساجين اكتب كذا ايميل واحفظهم درافت لاحمد، والصياغة تقريبا واحدة، ازيكم عاملين ايه؟ وهكذا، واخر درافت اقول لهم بقي وامري الي الله روحوا اتعلموا عربي او انجليزي لان دا اخر درافت موجود عند احمد ههههههه

هل اعطيت كلمة المرور او كلمة السر لاحد من قبل؟

لا مش اديتها، لكن ااخدتها لان احمد هو اللى عمل لي الاميل، بس انا متأكدة انه نسي الباس وورد، لكن مرة كنت هديها لاحد وهو رفض، لاني رفض اخد الباسوورد بتاعته، لاني مش معني ان في علاقة عاتفية بنا اني احاصره واخد الباسوورد، خصوصا ان الجيرل فريندالسابقة بتاعته كانت مطلعة عين اهله بتراقب الاميل والبريد العادي الخاص به، لكن انا كنت مدياها الطرشة، وانا سيد مين يطنش . لكن اكتفيت اني اخد الرقم السري لحسابه البنكي اللى مغيرهوش لحد دلوقتي.

كانت الاجابه نعم ،فما كات طبيعة علاقتك به ؟
احمد صديكي الانتيم ، لكن الاستاذ التاني ختيبي السابق
اسمك؟
راندا بنت صباح، بلاش اسم عيلتي لانه الصيت ولا الغني داخل فيه دهب وفضة وحاجات ملعبكة، هتسألوني عن معني اسمي؟ طبعا اعرف في تلات معاني اهمهم طبعا الجاكاراندا ودي شجرة صغيرة تنمو في اثيوبيا فقط وليس اي مكان اخر في الكون، والشجرة معروفة انها بتطرح ازهار لونها اصفر وازرق، اه والله، وفي رواية مشهورة للكاتب بيتس اسمها كدة شجرة الجاكاراندا.دورو عليها لانها قصة حلوة.
اسم الدلع المعروفة به بين اصحابي؟
شوفوا الموضوع اذا نظرت له كويس ممكن نعرف من خلاله معني التطور الطبيعي للحاجة الساقعة، يعني قبل المدرسة، امي كانت مصرة تناديني رامي، معرفش ليه؟ يمكن لاني كنت بلعب بليي او بركب عجل في الحارة و بتعارك مع الاولاد، احتمال؟ لكن والله كنت بنوتة خالص بلبس جيبة قصيرة، وكنت تلاحظ بسهولة اثار الجروح علي ركبي ، كل الحكاية ان مكنتش اسيب حد من الاولاد يغلبني ف لعب الكرة والبلي، او يلعب معايا لعبة الدكتور والمريض.
بعدها امي فهمت اني محبش الاسم دا، قررت تقوللي ريني معرفش برده يعني ايه؟ ولما كانت بتادي عليا مبردش، اولاد خالتي الي كانوا ف سن ولدتي كانوا في اسكندرية وبعيش معاهم فترة الصيف كلها هناك معاهم كانوا بينادوني ريري، بس العيال كانوا يفضلوا يغنوا هتلينا ريري هتلنا ريرى، من الاخر اتعقدت. في المدرسة كان في مدرس عسولة زي ذو النون عسولة كان بيناديني ميرندا طبعا العيال في المدرسة كل يوم انتي مالك مصفرة زيادة النهاردة؟
طبعا كنت بشخرم اللى جابوهم ، لما كبرت ع 18 صديق طلع عليا اسم راندوشكا، ودا نوع مدفع روسي سريع الطلقات، لكن احب اسم دلع كان كلبوظة او كلابيظو مع قرص الخدود.
عمرك و برجك؟
عمري بلا فشخرة 28سنة وامي ذله اهلي، نفسها واحد ان شا الله بتاع فجل، يتكرم يتجوزني عشان يشيل الزبالة من البيت ، قصدها مكتبتي مش انا،أنا برج الدلو وانا فعلا دلو و باخد علي قفايا كمان
شغلي ومجالي؟
كان نفسي اشتغل منقبة اثارلاني كنت مبهورة جدا بالاكتشافات الاثرية بتاعة مقبرة توت عنخ امون، وبتابع دايما اخر الاكتشافات في جرنال القاهرة،انا درست تاريخ، وبعدين دبلومة حقوق انسان من كلية سياسية واقتصاد، بدأت اشتغل من تانية كلية، ودا كان مفيد لان الاستقلال الاقتصادي بداية الاستقلال في الحياة،اشتغلت صحافة من سنة 99،و من سنة 2001، بدات مجتمع مدني ،لكن وما الحب الا للحبيب الاولي،شاركت في كتابة بعض الكتب مع مجموعة اصحاب،وبشارك في ورشة للاعمال الصحفية من اكتر من8سنين،انا اقدم الموجودين واصغرهم سنا،ولي حاجات كتير منشورة ملطوع عليها اسمي، كتبت عن ناس وانكتب عني، دلوقتي بشتغل في احدي مؤسسات حقوق الانسان وبحب شغلي جدا .
نوع شخصيتي؟
ممكن تلاقي فيا تناقضات علي حسب الجروب اللي انا موجودة في وسطيه، يعني مع احمد زكي وعمر قناوي منطلقة
مع ناس تانية تلاقيني خرسة، في الوقت نفسه انا ودن كبيرة، مش لسان حسب تصنيفات توتا، كمان وحيدة ومش وحيدة
بس عندي صبر ايوب من الاخر جمل او جبل، لكن اطقي صبر الحليم اذا طهقته.هطنش اللي خلفوك لو عملت لي اراجوز، ودماغي زي الدزمة ، عنيدة مش ممكن، لكن ممكن اغير رأي اذا كلمتنى بالمنطق، معرفش الباقي، لكن اكتر حاجة مسخرة اتقالت عني ع النت صديق من فنلندا الشقيقة قال ان اهم صفاتي، اني بخلي الرجالة يعانوا، والبنات تغير بسهولة. ههههههههه.
السفر بالنسبة لي؟
اكتر حاجة بحبها في الدنيا، في صديق الشهر اللي فات لاغي رحلة ل لندن عشان مش هينفع اروح معاه،
و بحب اسافر مع جروب، نفسي اروح اسوان
المود بتاعي؟
دلوقتي تقريبا زفت لكن انا اللي بتحكم في مودي .
وقت فراغك وكيف تقضيه؟
للاسف انا حاليا معنديش وقت فراغ، لكن دايما معايا كتاب، وبقرا ف كل حتة خصوصا المترو واحيانا ع القهوة، وطبعا النت وسماع الاغاني، اخر سنتين ضيف عليهم الرسم اتعلمته مع صديق، وكمان اتعلمت حبة جيتار، لكن نفسي دلوقتي اتعلم عود،زمان كنت بحب كرة القدم وكمان لعبتها، كمان اخر سنتين كنت بقضي وقت كبير، بالرسم في الشوارع اللي هو اسمه فن الجرافيتي، زمان كانت هوايتي الرسم ع الخشب وحرقه، والرسم ع الزجاج والسيراميك، لكن الرسومات البسيطة لاني مبعرفش ارسم كويس لكن بلون حلو في اعتقادي، كمان بحب شغل الخرز والاكسسوار وتقريبا عاملة معظم الحاجات اللي بلبسها، وبحب اعادة انتاج الاشياء. لكن حاليا كل الحاجات دي مفيش وقت امارسها.
الاكلة المفضلة؟
زمان كانت المكرونة لكن طفحتها كتير اخر سنتين، دلوقتي بسبوسة من عند العبد، وكبدة من علي العربية اللي جنب كشري علي بابا، مبحبش الكشري.بفضل بومفريت .
الصفات اللي اخدتها من امي وابي؟
من امي خدت اني ابقي جمل صابرة وساكتة، لا اشكوي، ، وشايلة بلاوي لحد ما طلع لي اتب، بس مبتسمة طول الوقت وممكن الناس تتهمنى بالعبط، الحمد لله ما اخدتش حاجة من دادي، لاني اتعرفت عليه اول مرة لما كان عندي 18سنة، هو راجل طيب ممكن تكلفتيه بكلمتين لما تكوني راجعة متأخرة، و ولا مرة عصبي ولا متعكنن ودايما رايق ، لكن انا استحالة تكلفيتيني ولا حتى صنية بسبوسة.
اكتر ست حاجات بحبها؟
اولاد اختي لما بعملوا لي حفلة الاستقبال اول ما ارجع البيت
العب مع العيال عموما وعيال اختي خصوصا
اقرا قصة حلوة
اسمع اغنية بحبها معظمها اغان قديمة
بحب لما حد يجيب لي وردة
بسبوسة وقهوة حمادة واحمد زكي وانجي وعمر قناوي وحفصة وناس تانية
ومصر طبعا،
اكتر 6 حاجات بكرهها؟
صعبة شوية لاني فعلا معنديش مساحة اني اكره لكن مبحبش الغباء
والنفاق الاجتماعي واذدواجية المجتمع والناس، والحزب الوطني
وسمعني تعظيم مقشات يا جرجسسسسسسسسسس
الشغل بالنسبة لي؟
انا بشتغل شغلين واحد بحبه موت والتاني بحبه بس، لاني عمري ما اشتغلت حاجة مبحبهاش
وبالنسبة لي مش فلوس و لكن حياتي ومنفذي خارج الزنزانة.
الكمبيوتر والنت؟
مهمين لكن ممكن اديها صرمة ومعبرش الكمبيوتر، خصوصا لما احس ان الناس قريبة مني والنت بيبعدهم عني.
من سترسل لهم التاج؟
احمد زكي معندوش مدونة
كمان مروة وانجي
النديم؟ اه لكن الزعيم ليس في مستوي هايفتي عشان يرد ع التاج
حفصة وتوتا خلاص وكمان شهروزتي
فارس قديم وريني شطارتك وتنظيراتك حوالين موضة التاجات دي
هحاول اضحك علي ريكا و اوسا
و ابو ريشه
النديم
جرجس هيعمل لي فيها استاذ حمام ومش هيعبر اهلي
لكن هحاول.
تاج عليك يا رب، وتاج قليل يمنع بلاوي كتير.
حفصة بتزن علي اهلي عشان تكلمنى ع الماسنجر كفاية كدة.

24 comments:

^ H@fSS@^ said...

عارفة
ان اكمان نفسي و فكرت فيها اصلا
لو نزلت مصر و استقريت فيها
لازم نعمل كلنا رحلة مع بعض و ننزل اسوان و الاقصصر

بحبك

lastknight said...

ايه ده يامقصوفة الرقبه ة؟ تكتبى الحاجات اللى بحبيها و ماتكتبيش أسمى فى أولها ؟ أخص عليكى .. و انا اللى كنت جايبلك براندى و شوكالاته من اسكندريه ..
خسارتهم فيكى ..
هاهاهاه .. أعذرينى يازنزانه .. غايب عن التلعيقات عموما بقالى فتره .. بعيد عنك اكتئاب ..

abourrisha said...

أول مرة أعرف إن إسمك له معنى جميل كده

أنا أحب قوي الأسماء إللي لها معنى

وأحيانا بيحرني معاني أسماء بعض الناس وبيبقى نفسي أسألهم أسمكوا ده معناه إيه لكن بأحس بالإحراج

طلبك على عيني يا صاحبة الإسم الجميل
إنتي تأمري

البوست القادم إن سوف أجلس على كرسي الإعتراف وسوف أقر بكل شئ وسأجاوب عن كل الأسئلة وزيادة كمان بس ياريت أتشرف بزيارتك وتعليقك

شكرا على التاج

مراقب مصري said...

عزيزتي المدفع سريع الطلقات راندوشكا

خلاص يا حلو اتكشفت على حقيقتك وأعماقك السحيقة بانت للجميع وسأعمل جاهدا ومجموعة من الخبراء النفسيين في تحليل إجابتك في أقرب أنبوبة اختبار وهيبقى فيه دخان صاعد وراسب أسود وحاجات معقدة جدا... طبعا ليس عندي شجاعتك عشان أكشف أسراري وخبايايا وخصوصا إنه حزب المقشات الشخروموقراطي مستني يعرف ميتي إيه عشان يصنفوني بس أنا مش هانولها لهم... ممكن على رواقة إبقي خديني على جنب وشربيني حاجة أصفرا وأنا أجاوب لك كل التيجان اللي نفسك فيها لكن أدام الناس وعلى عينك يا تاجر... أهو دا اللي مش ممكن أبدا ولا أفكر فيه يوم أبدا

بس بجد بجد عجبني تجاوبك مع الأسئلة وخفة دمك الرائعة

تحياتي

alnadeem said...

أحلي حاجه فيكي يا بت يا راندا هي الصراحه

عموما يا ست الكل متشكرين ع الكلمتين الحلويين اللي قلتيهم في حقي دول ونردهالك في الأفراح

ويا ريت يعني تفهموني المطلوب مني ايه بالظبط في اللعبه دي

zenzana said...

حبيبتي حفصة امنية حياتي اخدك انت والشلة المشرفة عندي دي، ومعاهم احمد وذو النون وكمان باقي البنانيت المدونات واسرح بيكي في الاقصر وانا ف الاصل بتاع تاريخ علي راي نجيب الريحاني ف غزل البنات حاجة كدة بزرميط هعمل لكم جايد محصلش عملتها كتير ف المتحف المصري وبرده بره مع العيال الصعايدة بتوع بلاد بره كنت اجيب خريطة واديها ارشاد سياحي وافتكاسات،

سي فارس انت تاني اسم جه علي بالي لكن بصراحة كنت خايفة منك طبعا مش هقولك مين اول اسم الحال من بعضه انا بفكر مرة اروح اتصرمح معاك علي انفراط لكن انت حددت شكل علاقتنا نت بس

ابو ريشة طب اقولك معني تاني للاسم
في اللغة الاسبانية القديمة لفظ راندا يطلق علي الجسر الحجري بين قلعتين دا الواد هيمان بن ماريا اللى قالوا لي
كمان في الراند نبات زي الروز ماري بيتحط ع الاكل

تسلملي ها العنتين دول
انا بسمع الناس واعرف اقررهم علي فكرة بما اني بحب علم النفس وغاوية قراية فيه، فا انا سيد مين يقرر الناس ويدخل في العماميك

كوكو بلاش راندوشكادي في الورشة بس مع عمو عبد القادر انا بحب زنزانة اكتر لانها اللى عرفتني بيكم (ضمير الجمع ف علم النفس يهدف للحماية)بتحامي فيكم طبعا انا مبخفش من دكاترة النفساويين لاني بعرف الاعبهم كويس وانا فكرة ان من اسراري اني اخدن لي جلستين مع واحد فيهم في التالتة شد في شعره وقال انا اللى عاوز اتعالج مش هقول اسمه لانه مشهور في مجتمع منظمات المجتمع المدني
خلاص فكرني اشرحك ف لقائنا القادم وهترد علي اسئلة التاج و لو اني كنت هفرح فيك لو شخرموك اخوانا الشخرماطية (طبعا انت بتهرف بصنعة لاطافة من التاج هعديها لك جات علي دي، شكلك هتطلع في الاخر دكتور فيزيا تخصص بمب

الزعيم منورني استنى افرش السجادة الحمرا، واد يا عمر انت مش عارف انا بعزك اد ايه انت غالي جدا انت والواد احمد احساسي بيقوللي انتوا الاتنين اللى هفضل في ارابيزكوم للابد انتوا اللى طلعت بيكم من الدنيا الحلوة دي
بمناسبة صراحة كل الحكاية ان عندي احساس بالرضا وتصالح مع نفسي، وبحاول اقلل من كدبي علي نفسي والناس، لاني بكره قوي الكدب ممكن اقبل اي حاجة من اي شخص الا الكدب واللعب بالديل دا طبعا للرجالة لاني شاطرة ف اني اقطع ديل اي راجل اني بشطبه من حياتي باستيكة وبكل سهولة

الخطوات يا زعيم انك تاخد الاسئلة وتجاوب عليها

نسيت اجاوب علي سؤال فيهم اللي هو انا بشتغل ايه ع العموم هضيفه واللي يحب يقراه يرجع له

yasser_auf said...

يانهار اسود يا نهار اسود منيل بطينة متلون بلون كحلي علي بلوبلاك
براندي و شيكولاتة و من الاسكندرية و محدش يقولي و بعدين هو نزل الاسنكرية امتي و لا عداش عليا وقعة امة سوداء بجد حطلبة دلوقتي انيل عيشتة و انتي متشكرين علي العزومة طبعا الحاجة جاتلك و لا افتكرتي الاسكندرانية لا ببق و لا بحتة و لا حتة ميسد كول
طبعا ما هما ساعتها بيبقوا
مية مالحة ووشوش كالحة

ماشي ماشي يا وحشين يا اندال

zenzana said...

والله يا اخر البرجوازيين الاصلاء ما عتبتها مش ممكن من غيرك بقولك يلا اعمل التاج دا انا كنت خايفة انك تستهيفني

ولا شفت شيكولاتة ولا براندي ولا حاجة خالص منه
بقولك صح ايه اخبار دينا عملت لك يا سيدي دعاية محصلتش طبعا لميت زباين اااااااددددد كدا هو انا برده بفكر احط فيديو سعد الصغير بس لما الواد جرجس يعلمني بيتعمل ازاي اهو الم حواليا المزز اشمعني انت؟

zenzana said...

فارس
فين الشيكولاتة والنبي يا حزنبل انا عايزة شيكولاتة والحاجات التانية دي خليها دكاكيني انت عارف البروليتاريين مش هيسبونا ف حالنا
انت عارفهم طبعا

zenzana said...

لو سمحت يا فارس متغلطش
انا مقصوفة رجل(الله يرحمهاهعملها بوست ف يوم عيد ميلادها) مش رقبة
هههههههه

Anonymous said...

:) Hilarious!

صريحة و خفيفة الدم

بس اسوان بجد وهمية
لسة راجعة اصلي من الاقصر و اسوان و هريت المدونة صور
هههههه

تحياتي

ذو النون المصري said...

زنزانه
عرض زكريات رائع جدا فرحت بيه
التشابه الموجود بين المدونين في بعض الصفات اعتقد انه راجع الي ان لجوء المدونين الي التدوين راجع الي اسباب سياسيه او ثقافيه او هموم واحده لدي الجميع
و كما يقال كلنا في الهم شرق
انا سعدت بردك علي التاج و اعجبت بصراحتك في الحديث و تعرفت علي شخصيتك اكتر
لكي تحياتي و تقديري

ذو النون المصري said...

يا عم ابو ريشه و حياة ابوك تبطل تسال الناس عن معاني اسمائهم لانها فعلا عاده مش حلوه خااااااالص
اسالني انا
انا فاهم كل حاجه

zenzana said...

شكرا جدا ابيتاف
بس انا بصراحة استعيبتها اروح ع الدول المتكدمة و كل اللي شفته ف بلدي يبقي قاهرة واسكندرية و الساحل الشمالي ودهب واسيوط والعين السخنة
مفيش اقصر اسوان او فيوم
دي فضيحة

شكرا يا شهروزتي جدا انا مبسوطة اني شبهك وشبه البنانيت الحلوين والست اوسا اذا عبرتنا
ربنا يستر ومطلعش شبه ذو النون، شكرا ع البوس بس انا عندي عقدة من موضوع البوس دا ان الناس فاهماه غلط اخر تجاربي معاه كانت سيئة بنت اختى تفت علي خدي وقالت دي بوسة يا خالتو
يا ذو النون شكرا بتفق معاك
وسيب ابو ريشة اصل انا كمان فيا الداء دا احيانا بفكر في العلاقة ما بين الاسم والشخصية ومعي الاسم يعني حدوتة محتاجة بوست كامل

^ H@fSS@^ said...

تخيلي اني انا كمان بحب اعرف اسماء الناس و معانيها ايه
احنا مصايب بجد زي بعض
الحمدلله كل مادى بعرف اني يمش لوحدي في الدنيا دي

Anonymous said...

هاي يا راندتي
ودة ممكن يكون اسم دلع جديد
أنا مبسوطة قوي إنك ممكن تبعتي لي تاج
بس الأول يا ريت تفهميني يطلع أيه دة
لأني أكتر من جهلة تدوينيا
يا ترى عرفتي أنا مين

zenzana said...

هو انا مش قادرة احدد اذا كنتى اوسا او ريكا
لكن مقبولة منك اسم الدلع الجديد
لو كانت سوزى صحبتي بتعرف عربي كنت هقول انها هي لانها بتنادينا
mia randina
حتى في البوست كارد اللى استلمته منها النهاردة ونسيت تكتب فيه اسمي الحقيقي
ع العموم التاج يا ستى كل اللى هتعمليه انك تاخدى الاسئلة زى الشاطرة وتردي عليها

لكن عندي احساس انك مروة يا البت انجي هانم او البرنسيسة نانسي ع العموم اشوفك ع القهوة

ذو النون المصري said...

تخيلوا ان انا كمان فيا نفس العاده
عادة حب معرفة معاني اسماء الناس حتي الاجانب فيه مثلا واحد اسمه فوكس دا معناه التعلب زي عندنا و ممكن يكون الديب زي عندنا برضه
فيه واحد اسمه تايجور
و معناه النمر زينا برضه
دي عاده انا كمان بحبها

ذو النون المصري said...

انا مش عارف ادخل المدونه الداش بورد مبيفتحش مش عارف ليه عاوز ادون لكن مش قادر
ياريت اللي مر منكم بمشكله مشابهه يدلني علي الحل
انا فاكر الاسم و الباسوورد كويس لكن مش عارف ايه المشكله بالظبط

abourrisha said...

ذو النون

إنت ليه مش راسي على بر بتحب تعرف معاني أسماء الناس ولا لأ

وبعدين بذمتك مش لما عرفت معنى اسم راندا طلع انه شئ جميل


وبعدين ياريت إللي يساعدك أنك تدخل البلوج بتاعك يساعدني أنا كمان علشان البلوج بتاعي له ثلاثة أيام لما أفتحه يطلع صفحة زرقاء وفيها كود غريب

ياريت حد يقدر يساعدنا

إننا نستغيث بكم يا أهل المعونة الفنية فأعينونا أعانكم الله وكتبت بوست له كام يوم ومش عارف أنشره

وشكرا مسبقا لمن يتفضل بالمساعدة

ذو النون المصري said...

استاذنا و استاذ الكل ابو ريشه
انا راسي علي بر انا احب اعرف لكن محبش حد يسالني انا عن معني اسمي لانه كبير حبه و معرفش له معني فبيعمل احراج

zenzana said...

ابو ريشة و ذو النون
هههههههههههههههههههههه
ههههههههههههههههه
بس، ابعتوا استغاثة للدكتور جرجس علي الشات بوكس ممكن يساعدكم انا
لا امتلك اي امكانيات فنية
انا اسفة

lastknight said...

مزة مابعد الحداثه .. ياستى الشوكالاته تحت أمرك فى أى وقت .. و البراندى كمان .. بس أنتى اظهرى و بانى .. بافكر فى يونانى عماد الدين .. شوفى أمتى يناسبك و اطلبينى .. بس قبلها بشويه مش مفاجآت زى بتاعة البلوريتاريا بتاعتك

و بمناسبة التاج .. تفسيرى أنه واحد عاوز يعرف أسامينا الحقيقيه .. هاهاهاه نظرية المؤامره

zenzana said...

خليك في طلعت حرب
شكرا يا فندم
اعتبر دا موعد غرامي عفيف (وش بيغمز)ولا هيكون في عوازل
انا بحب اكون مع العوازل
هههههههههه