Wednesday, February 14, 2007

انا وعيد الحب..ورد وتلج وكشري

الصورة من أعمال صديقي تومي أنا بس لونت واشتركت بالصورة ف المسابقة
فيرونا يونيو2006

النهاردة عيد الحب كل سنة وانتوا طيبين، مبحبش عيد الحب المصري، مش لاني عندي عقدة خواجة
دا بس عشان مبحبش اخبار اليوم هههههههه ما علينا ، ها امنياتكم ايه يا تري ف عيد الحب؟
دا اذا اصلا في حد فاكر او مهتم انا عن نفسي في وعد وتربيطات من اتنين اصدقاء ان هيوصلني ورد،وبالنسبة
لي دا كفاية وحلو قوي، مع ان عرفت امبارح من الزعيم ان الوردة بقت بخمسة جنيه وعليه
احتارت انا دايما كان لي ذكريات جميلة مع عيد الحب حتي لما مكنتش مرتبتة بحد، وهرشت
ف شعري المنكوش وقلت يعني اطلب حقي ناشف؟!انا فاكرةعيد الحب في اخر سنتين كنت ف ايطاليا
، ومفتكرتش عيد الحب المصري خالص، و هناك عيد الحب اجازة في مدن الشمال، وعليه قررت أسافر
ف اجازة لالمانيا، بناء علي اقتراح من البوي فريند، كان عندى امل اخد تصريح الاقامة، عشان
اقدر اسافر لكن لحد قبل السفر بيوم مفيش تصريح، قلت هجرب، (جنان المحبين) لما اشوف،
الرحلة لميونخ اربع ساعات بالقطار، وهو احيانا خاضع للتفتيش والتشيك من بوليس
مكافحة الارهاب والهجرة غير الشرعية، وبما اني سافرت في رحلة سابقة بنفس
الطريقة وبرده من غير تصريح اقامة، قلت هتعدي يمكن يطلع لي ظابط اهبل
زي المرة اللي فاتت(هبقي احكي القصة ف بوست تاني)، المهم قاعدة ف القطر،
وعلي الحدود طلع مجموعة من فرقة مكافحة الارهاب، ودونا عن الناس
كلهم قاللي الباسبور، (كان لازم يعني اصبوغ شعري اسود قبلها)اخده ومش عارف
يفتحه من اليمين ولا الشمال، طبعا شاف العربي، افتكره شفره، انتهي الموقف
بأنه شال لي الشنطة الهندباك،(انا كنت منشكحة جدا ان في ظبوط شايل لي الشنطة) وقال
ع القسم يا فندم (مكنش في ضرب قفا، كان محترم جدا مش زي البعدة اللي هنا)في
القسم اتصل بقسم الشرطة التابع له عنواني، بلغوه ان تصريح الاقامة
لكن انا اللي ملحقتش اخده، طبعا مقدرش انه يعمل لي قضية تسلل عبر
الحدود، وقالي اقدر امشي خلاص، سألته اذا كان ممكن يدلني علي
السكة لمحطة القطر عشان ارجع محل اقامتي؟ اصر انه هو اللي هيوصلني
لان القرية الحدودية صغير ومفهاش مواصلات خالص، اوك نزلني قدام المحطة، ولمحت
سوبر ماركت وكابينة تليفون قلت اعتذر للبيه اللي مستنيني ف ميونخ ، وداخل كابينة التليفون
لقيت ايه؟ ايوة بالظبط ارقام تليفونات شركة التاكسي، وقلت يلا اجرب، اه هروح المانيا
تاكسي، وليه لا؟( واحدة مجنونة بقي)، او هي تخاريف عيد الحب ، اصل لما تكون بتحب
ممكن تعمل حاجات الناس هتشوفها في منتهى الجنان، بس اتصلت بتاكسي، ورد ان هيجي
ياخدني بعد ربع ساعة، اتصلت بالافندي وبلغته ان هوصل متأخرة شوية،

ودخلت محل بيتزا، وقعدت والاقي نفسي قاعدة علي بعد خطوتين من الظابط اللي
قبض عليا، عادييييييي خالص قعدت طلبت بيتزا وكولا دايت، وكل كام دقيقة الظبوط
يبتسم لي، ويشاور، وانا منفضة، ههههههه بعدها جه البيه السواق، لان شكله كان
نضيف جدا، ونادي علي اسمي، الظابط شاور لي وقالي مع السلامة، وجود لك، وانا ميتة من
الضحك، اخدت التاكسي وعبرت به الحدود ، وبس خلاص خلصت الحدوتة، طبعا البيه بتاعي
اتخض و كان هيجيله هارد اتاك، واتسرع لانه متعود ع النظام وان كل "خاجة تبقي تمام" هههههههههههههه
العيد بقي بتاع السنة اللي فاتت مش كنت مرتبطة بس كان احلي عيد حب بالنسبة لي،

اتنين من اصديكائي تومي ومارتن (صيع)،قدموا لي هدايا عبارة عن صندوق شيكولاتة صغير و حزمة ورد تشبه
البنفسج (نوع الورد اللي بحبه، كان مسروق من حديكة جنب البيت)و كمان كتاب حواديت اطفال
لاني بحب كتب الاطفال، بس الكتاب هم اللي ابتكروه بنفسهم(انا عندي نفس الهواية)وخرجنا
بالليل متأخر نرسم ف الشارع و نعمل جرافيتي ، المهم الرسم دا علي حيطان الشوارع
مخالف للقانون، وبالتالي ممكن يتقبض علينا، المهم بما انه كان متأخر كان في
بوليس، وكنا علي وشك نترحل بما اننا مش من البلد دي لكن ربنا ستر، الاتنين الافندية
خدوها جري وسابوني ، اتكلمت مع الظبوط علي اني معرفهمش،(وبراءة الاطفال ف عنيها) وان
الاتنين المجرمين جريوا (شاورت ع الاتجاه المعاكس)المهم روحنا وكان
تاني يوم احلي من السابق،كنت بشتغل، وقبل ما يخلص الشفت، جات كل الشلة
اصحابي وزميلي ف البيت والشغل، وقال ايه مصرين نروح الجبل نتزحلق
ع الجليد، طبعا انا اصلا عندي فوبيا اماكن مرتفعة، وتلج؟ انا بتجمد لو فتحت
التلاجة، انا كائن صحراوي، اتلككت ان مش معايا هدوم تقيلة، لقيتهم
مجهزين لي الهدوم (الله يخرب بيت ال..) طب انا لسه مخلصتش شغل
فاضل لي ساعتين ؟ المدير بتاعي ظريف قالي روحي اتفسحي دا عيد
الحب..يا سلام؟ ، بس روحت جليد جليد انا هخاف؟ ، اخرها هقعد
ف العربية اقرا كتاب، و لو حصلي حاجة هنيمك م المغرب يا اطاليا،
وصلنا اصحابي اصروا اني اجرب الزحلقة، و أوعي وشك...لمدة خمس
ساعات بشكل متواصل، كرات تلج وزحلقة وضحك من القلب وبصوت عالي...مسخرة
من يومها علاقتي اتغيرت مع التلج.بقينا اصحاب
..اليوم انتهي بينا الدنيا ليل،بينوره ضوء قمر لطيف، ونجوم بتضوي ف السما ، واحنا
مسطحين علي قمة جبل ابيض مفيش حاجة حواليه بنتفرج علي النجوم وكل
واحد بيقول نفسه ف ايه؟ طبعا مش هقول اصحابي كانت ايه احلامهم(والا البلوج هيتقفل)هههههه، بس
انا كان نفسي اكون قاعدة علي القهوة ف وسط البلد، (معلش فقرية استحملوني)بشرب
شاي فتلة بالنعناع، و اغلس علي زكي وعمر ، وفعلا اتصلت بأحمد، كان متلقح ع القهوة مع الباقيين.
كل عيد حب وانتوا بتحبوا،الحب او الاحتفال به مش ضروري يكون بين راجل وست، لكن كمان الاصدقاء(قصر ديل)، بمناسبة عيد الحب في انتظار طلباتكم من الاغاني لحد الساعة أربعة ، لان هخرج من الزنزانة للاحتفال
اه نسيت اقولكم:
انا ف انتظار الورد (اللي مش عاوز يجيب ورد ممكن خمسة جنيه عن كل وردة)..بلاش انتظر كتييير احسن لكم نياااهااها

6 comments:

lastknight said...

ورد ؟ بتستهبلى ؟ بنقول الورده بقت بخمسه جنيه .. هى خصايه أو سندوتش سجق بالكتير .. و كل سنه و انتى طيبه يامزة التدوين فى عصر مابعد الحداثه

yasser_auf said...

هابي فالنتين دايز يا موزة

و كل ذكريات جميلة و انتي طيبة

تحياتي

مراقب مصري said...

هابي فالنتاين يا أرق خلق الله أجمل زنزانة في التاريخ

ذو النون المصري said...

ياااااااااااااااه
علي فكره انتي لازم تحكي لنا المزيد من زكرياتك الجميله جدا دي لاني فعلا استمتعت بسماعها و ياريت تكون كلها ان امكن من ايطاليا..........مش عقدة خواجه لا بس عاوز اعرف طبيعه حياة الشباب هناك و عاداتهم و تقاليدهم الحديثه
كل سنه و انتي طيبه

zenzana said...

شكرا جدا جدا
وهابي فالنتيين يا حلوين

جرجس بلاش الكلام الكبير قوي دا احسن اصدق
يا بني دا انا فتوة عماد الدين سابقا
ذو النون انتظر كتابي
رحلات بنت فطوطة
او الموكوسة في بلاد المكرونة المقصوصة

Anonymous said...

جرافيتي؟؟؟
المهم انا بعمل crew لو اي حد بيكتب جرافيتيعاوز ينضم يتواصل معايا nyne_52 ياهو او هوتميل
بيس يا جرافرز